ивица тодориќ – Kurir.mk

Беше најбогат човек на Балканот: Денес живее тешко, му помагаат пријателите

Предраг Кукиќ — Sun, 03 Feb 2019 12:27:23 +0000

Ивица Тодориќ , некогашниот сопственик на Агрокор и најбогат човек на Балканот , живее од помош на пријателите и познаниците. Тој смета дека политиката ја уништила неговата компанија Агрокор, а не економијата. Тодориќ вели дека по бегството во Лондон, и враќањето во Хрватска живее тешко. „Не ми е лесно, зависен сум од помошта на пријателите“, вели тој. Додава дека пријателите му помогнале да собере пари за кауција. Зборува дека има трошоци со кои не е лесно да се живее. Живее на имот од 55.000 метри квадратни, но објаснува дека го дели со уште четири семејства. „Ова е мој единствен недвижен имот. Мојот дел чини 6 милиони евра“, додава Тодориќ. Вели дека е свесен дека тоа не е малку, но нагласува дека бил најбогат на подрачје каде живеат 200 милиони луѓе.

Ивица Тодориќ планира да се кандидира за претседател на Хрватска

Ивона Петрова — Wed, 21 Nov 2018 18:16:59 +0000

Поранешниот директор на хрватската компанија „Агрокор“, Ивица Тодориќ, кој е осомничен за присвојување на 100 милиони долари, планира да се кандидира за претседател на Хрватска. Претседателските избори во Хрватска ќе се одржат кон крајот на следната година. Тој вчера беше пуштен од затвор со гаранција од еден милион евра. – Ќе ја освојам власта и ќе ја насочам Хрватска во вистински правец, ќе се кандидирам на изборите, изјави Тодориќ за „24 сата“. Тодориќ ги отфрли обвинувањата за лошо управување со прехранбената компанија „Агрокор“ и за корупција. Владата ја презеде контролата врз компанијата откако таа достигна долгови од шест милијарди евра. Ивица Тодориќ беше уапсен во Лондон пред една година по распишана меѓународна потерница. Британски суд минатиот месец ја отфрли неговата жалба и го екстрадира во Хрватска. МИА

Ивица Тодориќ плати кауција, излегува од затвор

Ивона Петрова — Tue, 20 Nov 2018 16:32:19 +0000

Поранешниот сопственик на Агрокор Ивица Тодориќ денеска уплати кауција од еден милион евра, со што му е овозможено во текот на денот да излезе на слобода од истражниот затвор, во кој се наоѓа по екстрадицијата од Лондон. На денешното рочиште, кое беше свикано по потврдата за уплата на кауцијата, истражниот судија го предупреди Тодориќ дека доколку ги прекрши одредбите од кауцијата, средствата ќе и припаднат на државата, а против него може да биде поводена постапка. На Тодориќ му се изречени и мерки на претпазливост, односно забрането му е да го напушта престојот кој го има пријавено и не смее да го напушти загреб без одобрение на Судот. Исто така, одземена му е и патната исправа. Тодориќ и неговите синови Иван и Анте, но и 12 лица од Агрокор се осомничени за незаконско стекнување финансиска корист од над милијарда куни од Агрокор. МИА

Тодориќ испорачан во Хрватска и сместен во истражен затвор

Ивона Петрова — Thu, 08 Nov 2018 07:15:46 +0000

Поранешниот сопственик на „Агрокор“ Ивица Тодориќ, против кого е покрената истрага поради „стекнување материјална корист“, синоќа беше екстрадиран во Хрватска, една година откако беше уапсен во Лондон, каде замина по избивањето на аферата „Агрокор“. Непосредно по слетувањето на авионот на хрватскиот аеродром, Тодориќ е одведен во истражниот затвор во Реметинац. Во затворот му е врачено и судско решение за одредување истражен затвор, на кое има право на жалба. Хрватското Министерство за внатрешни работи соопшти дека „во текот на вечерните часови хрватската полиција го спровела 67-годишниот хрватски државјанин од Велика Британија во Република Хрватска, односно во надлежниот затвор“. Тодориќ замина во Лондон тврдејќи дека е изложен на политички прогон од хрватските власти. Откако му беше потврдена одлуката за екстрадирање во Хрватска, тој изјави дека е „малку разочаран“, но дека е подготвен за натамошни битки. Истрагата против Тодориќ беше покрената минатата година поради сомневање дека од „Агрокор“ „извлекол“ повеќе од милијарда куни (1 куна = 0,135 евра). МИА

На Тодориќ му се блокирани 64 милиони евра во четири држави

Матеја Петровски — Mon, 23 Apr 2018 15:49:36 +0000

На поранешниот сопственик и основач на Агрокор Ивица Тодориќ му се блокирани 64,4 милиони евра во четири држави, а претстојот во Лондон го финансира со средства од продажбата на семејната куќа на неговата сопруга. На Тодориќ средства му се блокирани во Хрватска, Велика Британија, Холандија и Канада. Неговата сопруга ја продала семејната куќа за 250 илјади евра и тие пари ги донела и пријавила во Велика Британија. Средствата биле наменети за плажање на кауцијата на Тодориќ од 100 илјади фунти и за животни трошоци во Лондон. Британски суд денеска одобри ектрадиција на основачот на Агрокор, за да биде суден за злоупотреби од над 110 милиони евра. Тодориќ има седумдневен рок за обжалување на одлуката. Судот одлучи дека тој не мора да остане во притвор, но мора секој ден да се пријавува во полиција. - Основачот на Агрокор Ивица Тодориќ ќе остане на слобода со построги мерки на претпазливост се до правосилна одлука за испорачување во Хрватска, соопшти судијката од Вестминистерскиот суд Ема Ербутнот. Сопственикот на Агрокор и 14 други осомничени се под истрага во Хрватска во врска со фингирање податоци во компанијата, која е најголема приватна фирма во Западен Балкан, со околу 60.000 вработени. Тој ги отфрла обвиненија за злоупотреби и изјави дека тие се политички мотовирани. (Mиа)