изборен праг – Kurir.mk

Поголемите политички партии предлагаат една изборна единица со пет отсто праг и со отворени листи

Тале Кристо — Mon, 08 May 2023 14:55:09 +0000

Поголемите политички партии во Собранието на денешната прес - конференција истакнаа дека предлагаат една изборна единица со пет отсто праг и со отворени листи. Пратеникот на Демократската унија за интеграција, Арбер Адеми истакна дека неговата партија во работната група ќе предложи една изборна единица со пет посто праг и со отворени листи. Тој посочи дека прагот од пет отсто е во функција за да се обезбеди политичка стабилност. -Политичката нестабилност не оди во прилог ниту на државата, ниту на граѓаните. Ако господинот Трајанов сака да има загарантирано пратеничко место доживотно, ајде да разговараме и за тоа, но во рамките на работната група. Треба да бидеме конструктивни. Токму поради овие причини, Демократски сојуз беше против отворени листи за советници, бидејќи така целата јавност ќе дознае кој колку тежи во политичката сцена и затоа беа против. И нивното образложение во рамки на работната група пред локалните избори беа во оваа насока. Но лобирањето и кампањата пред граѓаните е најнормална работа, рече Адеми. Одговарајќи на новинарско прашање за изјавата на претседателот и пратеник на Демократски сојуз, Павле Трајанов дека ниту ДУИ, ниту било која од албанските партии самостојно не може да го достигнат овој праг, Адеми рече дека ова „не е блеф и оти ДУИ поддршката што ја уживаа може да се потврди и да се направи проста математика дали пет отсто е достижно или не“. Пратеникот на СДСМ, Миле Талевски истакна дека неговата партија ги поддржува измените на Изборниот законик, со оглед на тоа дека, како што посочи, тие биле првата политичка партија којашто во својата програма уште во 2016 година внесе предлог за една изборна единица. -Ги поддржуваме законските измени во делот на препораките од ОБСЕ и ОДИХР. Во делот на прагот, во делот на отворените листи и со оглед на тоа дека Изборниот законик секогаш се носел со консензус апелираме преку дебата, преку дијалог во работната група да се утврдат потребата од отворени листи, потребата од праг. Битно е да се дискутира и зеднички како политички партии да го предложиме Изборниот законик и да го изгласаме тука во Собранието, рече Талески. Пратеникот на ВМРО-ДПМНЕ, Никола Мицевски потенцира дека неговата партија ќе даде поддршка на една изборна единица откако ќе се договорат другите работи. Посочи дека поддршка од страна на ВМРО-ДПМНЕ ќе добијат забелешките од ОБСЕ/ОДИХР. -А за ова другото очекуваме од големите политички партии да го кажат својот став по однос на една изборна единица. Став на ВМРО-ДПМНЕ во однос на една изборна единица е тоа дека не се мешаме во внатре коалициските комбинаторики на владејачките партии и конфликтите кои што постојат меѓу нив по однос на овој процес затоа што гледаме дека од една страна имаме лицемерие дека поддржуваат една изборна единица. А од друга страна, втора година имаме закочен процес на закон кој што е во процедура. Ние ги повикуваме ДУИ и нивниот подизведувач СДС да се произнесат по оваа прашање, затоа што играта на лош и добар полицаец продолжува од овие две политички партии. Имено, ако одреден временски период во изминативе години ВМРО-ДПМНЕ им беше крива затоа што немаа една изборна единица, а им е дел од коалициското ветување уште од седумнаесетта година на владејачкото мнозинство, се уште ги држат помалите политички партии во коалиција со оваа ветување, рече Мицевски.

Помалите партии во Собранието се за една изборна единица, без изборен праг

Тале Кристо — Mon, 08 May 2023 13:40:55 +0000

Пратениците од помалите партии- предлагачи на Предлог-законот за измени и дополнувања на Изборниот законик на денешната прес-конференција во Собранието истакнаа дека треба да има една изборна единица без изборен праг, бидејќи, како што посочија, на овој начин ќе се демократизира земјата, но и ќе се зајакне одговорноста на носителите на јавни функции. - Сметаме дека на овој начин, Парламентот ќе биде реален односно определбата на граѓаните. Според анкетите околу 70 отсто од граѓаните се за една изборна единица и повеќето сметаат дека на тој начин ќе имаат можност за избор за кого ќе гласаат. Вака со шест изборни единици, со системските предности што ги имаат четирите партии, две од власта, две од опозицијата, нема еднакви шанси за политичките партии за да постигнат условно изборен резултат. Затоа предлагаме да биде Македонија една изборна единица, рече Павле Трајанов од Демократскиот сојуз, еден од предлагачите на ова законско решение, посочувајќи дека овој концепт нема ниту етничка, ниту било каква друга димензија. Според Трајанов, во оваа фаза многу тешко е да се направат сите промени. Клучното сега е да има една изборна единица, а сите други елементи може да се усогласуваат преку амандманите. За предлогот на ДУИ за една изборна единица со праг од пет отсто, Трајанов рече дека ниту ДУИ, ниту било која од албанските партии самостојно ќе го достигнат овој праг. Претседателката на ДОМ и пратеник Маја Морачанин истакна дека и тие се за една изборна единица без праг, отворени листи и 50 проценти на жените на листите. Морачанин услови дека ДОМ ќе ја напушти Владата ако до јуни претседателот на Собранието Талат Џафери не ги стави на пленарна седница измените на изборниот модел. Според пратеничката на Либерално-демократската партија Моника Зајкова, ако има потреба за изборен праг, тоа да не биде изборен праг со којшто лицитираат од пет отсто. Според неа, тоа во старт би било погубно за помалите партии. -Но и може исто да се разговара за промена на математичката формула на пресметување на гласовите, односно на место Донтовиот количник, да се воведе пропорционална формула која најсоодветна мислиме дека би била Харе квотата, но за сето тоа треба да разговараат и работните групи и да се отвори дискусија тука по Предлог-законот со цел во таа амандманска расрправа да може да ги коментираме сите овие работи, рече Зајкова. Бејџан Илјас, пратеник на Демократската партија на Турците на Македонија, смета дека овој закон е добра подлога и дека моменталната ситуација не го одразува етничкиот состав на општеството во Собранието. И пратеникот на ВМРО-Народна партија Љупчо Балковски рече дека се согласни за една изборна единици и посочи дека новиот изборен модел ќе придонесе за поголема демократизација. Ги повика поголемите политички партии да гласаат за законското решение.