избори 2020 – Kurir.mk

Собранието се конституира во вторник

Ивона Петрова — Sat, 01 Aug 2020 07:23:21 +0000

Конститутивната седница на новиот парламентарен состав ќе се одржи во вторник на пладне под посебни протоколи поради коронавирусот и во друга собраниска сала – Голема купола. Седницата ќе се одвива според протоколи и критериуми што се утврдени во претходна координација со претседателот на Комисијата за заразни болести, д-р Жарко Караџовски, за да се намали ризикот од евентуално ширење на заразата од коронавирусот. По илинденските празници партиите најавуваат дека ќе почнат неофицијалните разговори околу формирање нова Влада. Премиерот и потпретседател на СДСМ, Оливер Спасовски очекува наскоро да биде формирана новата Влада од страна на СДСМ. Од ВМРО-ДПМНЕ, велат дека купувањето пратеници станало заштитен знак на СДСМ. Во врска со тоа дали имаат неофицијални разговори околу новата Влада, Спасовски повтори дека СДСМ и коалицијата таквите разговори ќе ги почнат после празникот 2 Август. Според потпретседателот на ВМРО-ДПМНЕ Владо Мисајловски од власт која, како што вели, организираше поткуп и фалсификат избори какви што поминавме, не може да се очекува чесност и принципи. – Техничкиот премиер вели купувањето пратеници било небулоза на опозицијата. Тоа што работата не им е завршена, не значи дека „понуди” до пратеници нема. А впрочем, купувањето пратеници некако стана заштитен знак на СДСМ за што говори и минатото искуство, смета Мисајловски. Лидерот на ВМРО-ДПМНЕ Христијан Мицкоски, пак, смета дека за време на изборниот процес власта вршела директен поткуп на гласачите. Тој завчера во емисијата „Што не е јасно“ на ТВ Алфа рече дека дури се случувало парите што биле наменети за поткуп да бидат украдени, но веднаш да донесат нови пари. Мицкоски најави темелна кадровска реформа во сите структури на ВМРО-ДПМНЕ. Тој истакна дека не би го изненадило и доколку на есен се случат нови предвремени парламентарни избори ако не успеат ниту тие ниту СДСМ, ниту друга партија да формира Влада. -Ако никој не успее да формира влада не ја исклучувам можноста за нови предвремени парламентарни избори наесен, истакна Мицкоски. На предвремените парламентарни избори што се одржаа на 15-ти месецов, СДСМ освои 46 пратенички мандати, ВМРО-ДПМНЕ 44, ДУИ 15, коалициајата АА и Алтернатива 12, Левица два и еден ДПА. Конечните официјални резулати од изборите беа објавени на 25 јули, кога Државната изборна комисија им ги додели уверенијата на новоизбраните пратеници.

Обвинителството за организиран криминал влезе во ДИК

Љупчо Цветаноски — Tue, 28 Jul 2020 09:45:57 +0000

По наредба на судија на претходна постапка, Обвинителството за организиран криминал и корупција со асистенција на Одделот за организиран криминал во МВР утрината рано влезе во Државната изборна комисија да ја одземат, како што дознава САКАМДАКАЖАМ.МК, документацијата од договорот потпишан по преговарање без оглас со компјутерската фирма која не успеа да го одржи и да го работи сајтот на Комисијата на денот на изборите и деновите потоа. Обвинителството претходно најави дека по соопштувањето на конечните резултати од предвремените парламентарни избори, ќе отвори предмет за случувањата во ДИК, за да не влијае врз нејзината работа претходно. Постапката за набавка на софтвер за веб сајт на ДИК на кој што требаше во живо да се објавуваат резултатите од предвремените парламентарни избори завршила на 8 јули 2020, кога била одбиена жалбата на „Ај Воут“, фирмата која што без проблеми го одржуваше сајтот на ДИК од 2006 година, т.е. од формирањето на ДИК како постојано тело. Набавката на софтверот е спроведена со преговарање без објавување на оглас, а како најповолен понудувач беше избрана фирмата „Дуна“. Двете компании биле поканети на преговори од ДИК на 19 јуни 2020, а фирмите утредента ги доставиле понудите. Одлуката за избор на „Дуна“ е донесена на 22 јуни 2020. Истиот ден, „Ај Воут“ поднела жалба, која што е одбиена од Државната комисија за жалби по јавни набавки како неоснована на 8 јули 2020. Од документацијата се гледа дека Компјутерската фирма „Дуна“ која што потоа го доби поништениот тендер за набавка на софтвер за веб сајтот, не потпишала Изјава за сериозност, ниту пак ги исполнила трите минимални услови, според жалбата што ја прифатила Државната комисија за жалби по јавни набавки. Целиот текст прочитајте го тука. Се јави и хакерската група АнонопсМКД која пренесе дека тие не го хакирале системот, туку дека тоа го сторил некој одвнатре со дозвола за влез, факт кој тие го уочиле преку своите системи.

Аудио сведоштво на граѓанин кој бил поткупен да гласа за СДСМ на изборите на 15 јули

Дарко Андоновски — Sat, 25 Jul 2020 19:10:34 +0000

Граѓанин од источна Македонија чиј што идентитет е познат на авторот на овој текст во телефонски разговор изнесува свое сведоштво за тоа на кој начин бил поткупен и измамен од страна на познат истакнат активист на СДСМ за да гласа за оваа партија на Предвремените парламентарни избори кои се одржаа на 15 јули, објавува Брегалнички. Според изворот на информации со кого остваривме неколку телефонски контакти, покрај тоа што требало тој и неговото семејство да гласаат за СДСМ, требало да обезбеди дополнителен број гласови (колку што може повеќе), за од страна на активистот од СДСМ му се обезбеди влијание и помош за синот на нашиот соговорник за да положи “градска вожња” за автошкола. Притоа комуникацијата за ваквата “зделка” со гласови кои требало да легнат на контото на СДСМ, одела преку зетот и ќерката на нашиот извор на информациите кои што се наоѓаат во Италија. Возачката дозвола била потребна на синот на нашиот соговорник чиј што глас се слуша на оваа снимка, за да синот замине на работа во странство како возач. Притоа измамениот граѓанин соопштува дека бил задолжен од страна на активистот на СДСМ да го слика гласачкото ливче како доказ дека гласал за оваа партија. Според кажувањето на нашиот извор откако неговиот син паднал на практичниот дел од полагањето на градско возење со автошколата што се случили на 21 овој месец, нашиот извор на информациите решил да проговори во јавност и да ја раскаже својата приказна на кој начин бил измамен тој, неговото семејство и уште 10-тина други граѓани кои ги обезбедил за да гласаат за СДСМ. Во продолжение со одобрение на изворот на информациите а заради повисок јавен интерес го пренесуваме аудио сведоштвото на овој измамен граѓанин, кој заради егзистенцијални причини на својот син пристапил кон вакви постапки, за на крај да биде измамен од страна на активистот на СДСМ.

Аудио сведоштво за предизборен поткуп и измама на граѓанин кој гласал за СДСМ на изборите Аудио сведоштво за предизборен поткуп и измама на граѓанин кој гласал за СДСМ на изборите на 15-ти Јули, за возврат на "противуслуга" која никогаш не се случила. За емитување на овој аудио запис како и за заштитата на идентитетот на изворот на информациите се повикуваме на член 16 на Уставот заради повисок јавен интерес. Аудио снимката со гласот на изворот на информациите го објавуваме со дозвола на нашиот соговорник. Posted by Брегалнички.мк on Saturday, July 25, 2020

Дебакл на своето избирачко место- Петар Богојески не го гласале ниту соседите, освоил само три гласови (ФОТО)

Дарко Андоновски — Sat, 25 Jul 2020 13:34:03 +0000

Петар Богојески од Македонски концепт на изборите кои се одржаа на 15 јули во своето избирачко место во Изборната единица 1 освоил само три гласови. Според резултатите достапни во електронска форма во Изборната единица 1 членот на Македонски концепт освоил само три гласа што е повеќе од смешно за човек кој за време на изборната кампања изјавуваше неповторлив успех и изборни резултати. По овој дебакл на социјалните мрежи се појавија и саркастични коментари дека ниту соседите не го гласале Богојески. Инаку во 2018 година додека беше започната фазата за промена на името Еврокомесарот за проширување и добрососедска политика Јоханес Хан откри дека Петар Богојески гласал на Референдумот за промена на името Република Македонија.

Управниот суд ги одби сите 185 тужби од политичките партии за предвремените парламентарни изборите

Дарко Андоновски — Fri, 24 Jul 2020 17:49:47 +0000

Управниот суд ги одби сите 185 тужби од политичките партии за предвремените парламентарни избори и ги потврди решенијата на Државната изборна комисија, откако денеска ги разгледа и одлучуваше и по последните четири тужби. – Одлуките се одбивателни. Сите четири тужби коишто денеска беа разгледувани и одлучувано. ВМРО-ДПМНЕ две, една Демократи и една Единствена Македонија, тужбите се одбиени и се потврдени решенијата од ДИК, изјави денеска Ивана Смугреска од Управиот суд. Пресудите коишто ги донесе Управниот суд се конечни, односно како што појасни Смугреска, против истите се нема право на жалба. – Откако ќе бидат изготвени, верификувани пресудите истите веднаш се доставуваат до ДИК и до тужителите, односно до партиите. Роковите сега течат, не од понеделник, изјави Смугреска. Појасни дека судечките совети нашле дека тужбите се неосновани, односно се судело врз основа на Изборниот законик, одредбите во Изборниот законик, така што во тужбите не може да се предлагаат нови докази, нови околности. – Може да се предложат истите докази, факти и околности коишто биле предложени пред ДИК, тоа е предвидено во Изборниот законик, така што Управниот суд постапува во рамките на своите законски надлежности и нашол дека тужбите се неосновани, изјави Смугреска.

Тужбите до Управен суд не ги променија одлуките на ДИК

Ивона Петрова — Fri, 24 Jul 2020 05:23:28 +0000

Поднесените тужби од политичките парти до Управен суд, против решенијата донесени од Државната изборна комисија не донесоа ништо ново. Со исклучок на две тужби на ВМРО-ДПМНЕ и по една на партијата Демократи и на Единствена Македонија, што ќе бидат разгледани во текот на денешниот ден, Судот ги одби сите други тужби, поднесени од коалицијата Алијанса за Албанците – Алтернатива и партиите Левица, Интегра и МОРО – Работничка Партија, како неосновани. Со оглед на големиот број на тужби во Управниот суд изминатите денови се одржа повеќе јавни седници. Разледувањето и одбивањето на тужбите против одлуките на ДИК се одвиваше одделно од неколку совети предводени од по пет судии. До вчера во Управниот суд беа разгледани 186 тужби. – Заклучно со ден 22.07.2020 година, донесени се вкупно 77 одлуки од кои, 75 одлуки по тужби поднесени од тужителот Алијанса за Албанците и Алтернатива, една одлука по тужба поднесена од тужителот Интегра Македонска Конзервативна Партија како и една одлука по тужба поднесена од тужителот Живка Арсовска и по истите донесени се пресуди со кои тужбите на тужителите се одбиваат како неосновани и решенијата на Државната изборна комисија се потврдуваат, информира вчера Управниот суд. Сите 77 одлуки се објавени на официјалната веб страна на Управниот суд. Управниот суд исто така ги одби како неосновани и 101 тужба поднесена од Левица. Тужбите на Левица поднесени до Управниот суд беа разлгедани вчера на повеќе јавни расправи . Освен тужбите од Левица, Управниот суд ги одби и тужбите поднесени од Социјалдемократската унија и политичката партија Демократи. Левица по поднесувањето на тужбите до Управниот суд, преку соопштение информираа дека ним како политичка партија „им се украдени тројца пратеници (за околу 500-600 гласа по пратеник)“. – Тужбите за поведување управен спор се поднесени врз основа на погрешно утврдена фактичка состојба и погрешна примена на материјалното право. Сакаме да ја известиме јавноста дека образложенијата на побиваните решенија на ДИК се изработени на „темплејт“, т.е. однапред подготвен шаблон за одбивање, без навлегување во спецификите на секој поединечен случај – што е недозволиво за една државна институција. Истите се штури и банални и изобилуваат со цитирање на неповрзани членови од Изборниот законик, без воопшто да се впушти во материјално расправање за она што беше предочено во приговорите, образложија од Левица.

Одбиени сите тужби од Алијанса и Алтернатива и на Интегра, потврдени решенијата на ДИК

Ивона Петрова — Thu, 23 Jul 2020 10:24:34 +0000

Тужбите поднесени од Интерга, Алијанса за Албанците и Алтернатива и едно физичко лице, се одбиваат како неосновани и се потврдуваат решенијата на Државната изборна комисија, информираат од Управниот суд. – Заклучно ден 22.07.2020 година, донесени се вкупно 77 одлуки од кои, 75 одлуки по тужби поднесени од тужителот Алијанса за Албанците и Алтернатива, една одлука по тужба поднесена од тужителот Интегра Македонска Конзервативна Партија како и една одлука по тужба поднесена од тужителот Живка Арсовска и по истите донесени се пресуди со кои тужбите на тужителите се одбиваат како неосновани и решенијата на Државната изборна комисија се потврдуваат, информира Управниот суд. Сите 77 одлуки се објавени на официјалната веб страна на Управниот суд. Пред Управниот суд во тек е одржување на јавни расправи по поднесени тужби од Политичките партии Левица, Социјалдемократска Унија, МОРО – Работничка партија и Демократи, чии одлуки ќе бидат јавно соопштени по завршување на расправите.

Управен суд закажа јавна седница, ќе ги разгледува поднесените жалби од партиите

Ивона Петрова — Wed, 22 Jul 2020 08:10:59 +0000

Управниот суд за денеска закажа повеќе јавни расправи по поднесените 75 тужби од Алијанса за Албанците и Алтернатива, како и една тужба поднесена од Интегра. Тужбите, како што претходно најави претседателот на Управниот суд Бурим Сејдини, се поделени на неколку судечки совети формирани со жрепка. По решенијата на Државната изборна комисија за отфрлање на приговорите поднесени од политичките партии за предвремените парламентарни избори тужби до Управниот суд најавија и Левица и ВМРО-ДПМНЕ. Рокот за поднесување тужби до Управниот суд е 24 часа откако политичките партии ќе ги добијат решенијата од ДИК и истекува денеска попладне. Од Државната изборна комисија, вчера информираа дека до 14 часот решенија за отфрлање или одбивање на приговорите подигнале претставници и на Левица, додека на партиите кои не ги подигне решенијата, тие им се испраќаат по електронска пошта и се сметаат за уредно доставени пет часа од испраќањето. По одлуката на Управниот суд и добивањето на евентуалните одлуки од Уставниот судот, за заштитата на избирачкото право, во ДИК, согласно законот, Комисијата ќе ги објави официјалните конечни резултати од предвремените парламентарни избори. Потоа ДИК ќе им издаде уверенија на избраните пратеници. Крајот рок за одржување на конститутивната седница на Собранието е 4 август.

До Управен суд досега поднесени вкупно 76 тужби од две политички партии

Ивона Петрова — Wed, 22 Jul 2020 05:17:12 +0000

Тужби по решенијата на Државната изборна комисија за отфрлање на приговорите поднесени од политичките партии за предвремените парламентарни избори до Управниот суд досега поднеле само Интегра и коалицијата на Алијанса за Албанците и Алтернатива. Интегра има поднесено една, а АА и Алтернатива 75 тужби, кои Управниот суд треба да ги разгледа на јавна седница во рок од 60 часа од нивниот прием. Левица и ВМРО-ДПМНЕ, исто така, најавија дека ќе поднесат тужби до Управен суд по решенијата од Државната изборна комисија за орфлање на приговорите за изборни нерегуларности. Рокот за поднесување тужби до Управниот суд е 24 часа откако политичките партии ќе ги добијат решенијата од ДИК. Портпаролот на ДИК Адмир Шабани, вчера информираше дека до 14 часот решенијата од Комисијата за отфрлање или одбивање на приговорите ги подигнале претставници на Алијанса за Албанците и Алтернатива, на Интегра, на МОРО, на Демократи и на Левица, појаснувајќи дека доколку некоја од партиите не ги подигне решенијата, ДИК им ги испраќа по електронска пошта. По пет часа од испраќањето, посочуваат од ДИК, се смета дека решенијата им се уредно доставени на партиите. По одлуката на Управниот суд и добивањето на евентуалните одлуки од Уставниот судот, за заштитата на избирачкото право, во ДИК, согласно законот, Комисијата ќе ги објави официјалните конечни резултати од предвремените парламентарни избори. Потоа ДИК ќе им издаде уверенија на избраните пратеници. Крајот рок за одржување на конститутивната седница на Собранието е 4 август.

Анализа на Каракамишева-Јовановска: Изборите во 2020 година ќе останат запаметени како историски во негативна смисла

Љупчо Цветаноски — Tue, 21 Jul 2020 15:13:25 +0000

Предвремените парламентарни избори во 2020 година ќе останат запаметени како историски во негативна смисла од две причини: првата е рекордната злоупотреба на системот и државата од страна на власта преку евидентната корупција што власта ја спроведе предизборно и изборно на терен и втората поради евидентираните предизборни и изборни нерегуларности што институциите на системот ги толерираат во интерес на власта, вели во анализата за Курир проф. д-р Тања Каракамишева-Јовановска.

Во однос на рекордната злоупотреба на системот од страна на власта таа посебно би ги издвоила злоупотребите направени за време на четирите прогласени вонредни состојби од претседателот на Републиката и донесените спорни и коруптивни уредби со законска сила со кои владата го засили предизборниот, а подоцна и изборниот поткуп на голем број граѓани таргетирани како целни групи од страна на власта. „Да не ја заборавиме најкоруптивната уредба за финансиска поддршка на граѓани и вработени лица со низок доход, млади лица и здравствени работници преку издавање домашна платежна картичка наменета за купување домашни производи и услуги за време на вонредна состојба. Со оваа уредба, Владата изврши директна дискриминација, како потежок облик на дискриминација, на граѓаните кои не се корисници на финансиската поддршка од буџетски средства, односно ги стави во привилегирана положба неколку групи граѓани како корисници на буџетски средства предвидени во владината програма наспроти сите останати граѓани кои не се корисници на финансиската помош без претходно утврдена методологија и критериуми за доделување финансиска помош. Никој не смее да биде дискриминиран од страна на јавен орган по која било основа наведена во став 1 (член 1, Протокол 12 од ЕКЧП) што се смета за повреда на Конвенцијата, иако може да не е повредено ниту едно друго право од Конвенцијата“, посочува универзитетската професорка за Курир. И Европскиот суд за човекови права е јасен во делот на забраната од дискриминација и вели дека ниту една „карактеристика, обележје, статус не смее да биде основа за разликување на лицата или групите на лица едни од други“, објаснува професорката по Уставно право, и потенцира дека според Судот, основата за дискриминација може да биде карактеристика или статус на еден поединец/група што ги става поединците/групата во попривилегирана положба, различен третман или уживање на одредени бенефиции кои другите луѓе ги немаат. „Во случајот со уредбата, финансиската поддршка на граѓани и вработени лица со низок доход, млади лица и дел од здравствените работници претставува основа за дискриминација што се темели на недозволен различен третман на Владата кон граѓаните, по основ на општествен и имотен статус, возраст, положба во општеството, припадност на група. Во нашиот случај, и покрај фактот што КОВИД-19 претставува општо загрозувачка пандемија од која никој не е поштеден, а во случајот со справување на негативните последици од неа директно се справуваат и други категории вработени лица, како, припадниците на полицијата, Армијата, вработените во центарот за справување со кризи, вработените во аптеките, маркетите, локалните власти итн., Владата со уредбата направи поделба на привилегирани граѓани кои ги стави под финансиска заштита, и сите други, непривилегирани граѓани, кои не ги опфати со мерките од Уредбата без никаква претходно утврдена методологија и прецизни критериуми зошто токму овие категории граѓани се опфатени со мерките, а не и пензионерите како лица со низок доход, не и матичните доктори кои исто така беа во првата “борбена“ линија, зошто не се опфатени припадниците на полицијата врз чиј грб падна регулирањето на јавниот ред во услови на полициски час, зошто не се опфатени и припадниците на Армијата кои исто така беа вклучени во борбата против пандемијата, и слично. Од овие причини, Владата со оспорената Уредба ја повреди еднаквоста на граѓаните пред Уставот и законите, ги стави во дискриминирана положба мнозинството граѓани. Со арбитрерна уредба, врз основа на арбитрерни критериуми Владата подреди и привилегира граѓани кои земаа финансиска помош од буџетски средства, наспроти мнозинството граѓани кои ги дискриминира и ги остави без финансиска поддршка иако и тие граѓани имаат право на поддршка и финансиска помош во време на пандемија“, посочува Каракамишева-Јовановска. Владата направи дискриминација не само по основ на статус, положба, возраст и професија, туку и интерна дискриминација во рамките на лица со ист или сличен имотен статус, иста или слична возраст, иста или слична професија, потенцира универзитетската професорка, која укажува и дека, за жал, сево ова Уставниот суд не го виде и не ја поништи оваа дискриминаторна уредба, а на овие избори корупцијата беше подигната на највисоко ниво и поради планското заобиколување на законите, посебно на чл.8-а од Изборниот законик и на чл. 34 од Законот за спречување корупција со помош на спорни уредби со законска сила со што власта директно ја стимулираше корупцијата, предизборните вработувања кои инаку се забранети во законот, вонредните исплати на буџетски средства за време на избори и слично. „Преку заобиколување на законите со уредби и преку злоупотреба на вонредната состојба власта ја направи најголемата системска корупција што некогаш е видена во Македонија за време на избори. Ако на ова се надополнат и евидентираните поткупи давани од куќа на куќа, од семејство на семејство, тогаш дефинитивно овие избори можеме да ги наречеме владин корупциски изборен масакр. Ако на целава оваа слика се надодаде системската импотентност, неактивност, незаинтересираноста на институциите што треба да го санкционираат ваквото поведение на власта, ако ДКСК го преспа целиот предизборен и изборен период, ако Јавното обвинителство не презеде ништо во врска со докажаниот изборен криминал, ако смислената акција на СДС за измама на гласачите преку фејсбук инструкциите за чкртање на Северна на гласачкото ливче со цел прогласување многу неважечки ливчиња во полза на власта остана само на повикување во полициска станица на инспираторите без никакви други кривични последици, ако Уставниот суд ги поништи само уредбите што се однесуваа на нивните плати, а не и проблематичните уредби поврзани со изборниот процес и онаа за финансиска поддршка на дел од граѓаните, тогаш може да се дојде до мошне негативен заклучок во врска со целиот изборен процес,“ оценува професорката од Правниот факултет во Скопје во анализата за Курир. „Во однос на изборните нерегуларности посебно би го издвоила „хакерскиот“ напад или смислениот упад во страната на ДИК токму во време кога се внесуваа гласовите на сите гласачи. Овој смислен упад е најверојатно нарачка за да се направи контролирана разлика меѓу СДС и ВМРО-ДПМНЕ што треба да внесе дополнителна политичка неизвесност по изборите. Скандалозно беше однесувањето на членовите на ДИК кои одбија да ги пребројат уште еднаш сите ливчиња, од сите избирачки места поради евидентираната разлика и несовпаѓање меѓу бројот на гласачи кои гласале и бројот на важечки, неважечки, неупотребени и гласачки ливчиња дадени за партиските листи. На почетокот оваа разлика беше 2013 ливчиња кои недостасуваа во евиденцијата што само по себе е огромен скандал на ДИК, а за кој Комисијата се однесуваше прилично комотно и ноншалантно. Ако на ова се надоврзат и „бугарските возови“ кои според одредени проценки согласно процентот на ливчиња што недостасуваа во евиденцијата можат да бидат злоупотребени околу 80.000-100.000 гласа што не беше доволна причина ДИК да го отвори целиот изборен материјал и повторно да ги преброи сите ливчиња упатува на уште еден заклучок дека во Македонија се одржаа нерегуларни избори. Според чл. 151 од Изборниот законик, ДИК треба по службена должност да го поништи гласањето на секое гласачко место во кое бројот на гласачките ливчиња во гласачката кутија е поголем од бројот на избирачите што гласале ако тоа влијае врз вкупните резултати. ДИК не го стори тоа ниту по службена должност, ниту по основ на поднесени приговори“, посочува Каракамишева-Јовановска. Според универзитетската професорка, останува да видиме што ќе се случи во Управниот суд, дали Судот ќе ги изведе овие докази и дали ќе се впушти во пребројување на гласачките ливчиња или и Судот ќе делува формалистички и ќе го затвори изборниот процес и покрај сите наведени нерегуларности.