излекувани лица – Kurir.mk

Рекорден број излекувани лица за 24 часа во Италија

Ивона Петрова — Sat, 18 Apr 2020 06:25:00 +0000

Италија синоќа соопшти дека бројот на излекувани од Ковид-19 во рок од 24 часа бил 2.563. Тоа е рекорд од почетокот на пандемијата во земјата во која од вирусот починаа речиси 23.000 луѓе. – Ова е најголем број оздравени лица откако почна кризата, рече Анџело Борели, шеф на службата за цивилна заштита, додавајќи дека смртните случаи за последниот ден биле 575. Во Италија имаа 107.000 регистрирани пациенти вчера, што е за 355 повеќе од претходниот ден. Во некои региони, како Торино, Неапол и Рим, овој број паѓа. Друг петочен рекорд во Италија е оној со бројот на тестови извршени од здравствените услуги, кои беа над 65.000 за 24 часа. Нешто повеќе од пет проценти од нив беа позитивни. – Ова е уште еден показател за ефективноста на мерките за изолација преземени за ограничување на заразата, рече Франко Локатели, шеф на Високиот совет за здравство. Тој на прес-конференција синоќа изјави дека имало 4.068 лица на интензивна нега на 3 април, а последните бројки се за нешто повеќе од 2.800. Анџело Борели беше задоволен што притисокот врз болниците веќе е олеснет. Тој истакна дека ова дава претстава за огромната работа направена во болниците и соработката на граѓаните. Како одговор на променливата состојба, брифинзите за епидемијата веќе нема да бидат секој ден, туку во понеделник и четврток. Резимеата на тековните податоци ќе бидат објавени секој ден на веб-страницата на Службата за цивилна заштита. Повеќе од 10 проценти од заразените лица со новиот коронавирус во Италија се здравствени работници. Две третини од нив се жени.

Излекуваните од Ковид-19 можат да останат носители на вирусот

Дарко Андоновски — Thu, 26 Mar 2020 13:56:19 +0000

Луѓето кои се излекувани од новиот коронавирус можат да останат носители на Ковид-19 и треба да бидат повторно тестирани, изјави вирусологот и директор на Научно-истражувачкиот центар во францускиот град Бесанкон, Филип Хумбер. -Може да се излекувате од вирусот, но се уште да го имате во носната шуплина и на тој начин да го ширите. Тоа се случува кај носителите на хепатитис Б и Ц. Ова значи дека може да имате антитела против вирусот, но во исто време и самиот вирус, истакна Хумбер на брифинг на Асоцијацијата на странски дописници на ОН во Женева. Според последните податоци на Светската здравствена организација, досега во светот има над 22.000 починати лица од новиот коронавирус.

Повеќе од 130 лица излекувани од коронавирус

Ивона Петрова — Fri, 31 Jan 2020 10:12:20 +0000

Повеќе од 130 лица заболени од коронавирус се излекувани, изјави постојаниот претставник на Кина во Обединетите нации, Џанг Ѓун. – Изгубивме многу животи, но во исто време спасивме повеќе од 130 луѓе, кои се излекуваа, изјави Џанг. Тој рече дека е многу важно што типот на вирусот е идентификуван и што може да се разликува од другите. – Борбата против вирусот и спречувањето на неговото ширење остануваат главни приоритети за Кина. Сигурни сме дека можеме да победиме, рече Џанг. Тој смета дека во борбата против коронавирусот е неопходна меѓународна соработка, но и дека Кина ги повикува сите да се воздржат од преувеличување на сериозноста на ситуацијата, наведувајќи дека може да се слушнат и неодговорни коментари. Кинеската здравствена комисија соопшти дека од последиците на коронавирусот во Кина починаа 213 лица, а 9.692 се заразени. За 24 часа бројот на жртвите се зголеми за 43 лица. Најголем број случаи има во провинцијата Хубеи и главниот град Вухан, жариштето на вирусот. Надвор од Кина не е регистриран ниту еден случај. Светската здравствена организација вчера прогласи вонредна состојба на глобално ниво, откако бројот на случаи на заболени со новиот коронавирус се зголеми за повеќе од десет пати во една недела.