известувачи – Kurir.mk

Известувачите на ПССЕ ја поздравија одлуката на Советот на ЕУ да ги отвори преговорите со Македонија и Албанија

Тале Кристо — Thu, 26 Mar 2020 15:49:57 +0000

Известувачите на Парламентарното собрание на Советот на Европа (ПССЕ) за мониторингот со Албанија, Џо О’Рајли и Петер Аиде и известувачот за пост- мониторинг дијалогот со Северна Македонија, Лиз Кристоферсен, денеска ја поздравија одлуката на Советот на Европската унија за отворање преговори за членство со Албанија и Македонија, јави дописникот на МИА. -Во контекст на трагичните случувања предизвикани од пандемијата со КОВИД-19, ова е многу добра вест и признание за заложбите на овие две земји за спроведување на реформите и политиките потребни за нивното европско интегрирање. Како известувачи за овие земји, ние сме подготвени да им помогнеме да продолжат на патот на евроинтеграциите, на кој било можен начин, рекоа известувачите. Известувачот Кристоферсен, потсети дека интеграцијата во ЕУ е долготрајна консензуална и стратешка цел за Македонија, која ги надминува политичките и етничките разлики. -Ова многу очекувано зелено светло доаѓа откако земјата презеде, во последните години, одлучувачки – иако тешки – чекори за решавање на „проблемот со името“ и започнување големи реформи. Денешното достигнување на процесот на интеграција во ЕУ е исто така резултат на можноста на сите најголеми политички партии да ги постигнат потребните политички договори за земјата да оди напред, во што се подразбира и неодамнешното усвојување на изменитиот закон за Јавното обвинителство, рече Кристоферсен . Таа додаде дека се надева оти оваа одлука ќе ги засили тековните реформи, вклучително и оние што се очекуваат во рамките на пост-мониторинг дијалогот на ПССЕ со Македонија, имено одржливоста и функционирањето на демократските институции, независноста на судството, борбата против корупцијата и консолидација на изборната рамка и спроведување на инклузивни политики со цел обезбедување на правата на малцинствата, како што е истакнато во Резолуцијата на Собранието од октомври 2019 година.. Покрај тоа, известувачите за Албанија ги повикаа сите политички фракции во Албанија да ја искористат оваа одлука за надминување на нивните политички разлики и решавање на системската политичка криза во земјата, да продолжат со реформите насочени кон создавање на навистина независно судство и да ја засилат борбата против организираниот криминал и широко распространетата корупција во земјата. -Политичката криза е „Ахиловата пета“ на реформскиот процес и демократската консолидација на Албанија. Сите политички фракции му должат на албанскиот народ да ја решат кризата и да ја надминат ендемичната политичка поларизација во земјата “, истакнаа О’Рајли и Еиде.

Постмониторинг известувачите на ПССЕ во посета на Скопје

Ивона Петрова — Mon, 18 Jun 2018 05:58:22 +0000

Од денеска до среда во Скопје ќе престојува делегација на Парламентарното собрание на Советот на Европа за постмониторинг дијалог со Република Македонија. Според најавата од прес-службата на ПССЕ, пратениците Лиз Кристоферсен од Норвешка и Валериу Гилетчи од Молдова се очекува да се сретнат со премиерот Зоран Заев, со претседателот на Уставниот суд Никола Ивановски, со членови на Парламентот, лидери на политички партии, со специјалната јавна обвинителка Катица Јанева, судии, претставници на граѓанскиот сектор, медиумите и дипломатските претставници во земјата. Кристоферсен и Гилетчи во Парламентот денеска треба да имаат средба со Бетиане Китев, шеф на Делегацијата на Собранието на Република Македонија во Парламентарното собрание на Советот на Европа (ПССЕ). Разговорите ќе бидат фокусирани главно на развојот на настаните по Извештајот од последната посета на претставници на ПССЕ во мај 2017 година со специјален фокус на судството, како и на генералниот напредок на земјата во насока на исполнување на обврските кон Советот на Европа. Кристоферсен и Гилетчи ќе одржат прес-конференција за време на последниот ден од посетата на Скопје, односно во среда. МИА

Трамп не присуствуваше на вечерата со известувачите од Белата куќа

Дарко Андоновски — Sun, 29 Apr 2018 07:40:53 +0000

Американскиот претседател Доналд Трамп синоќа не присуствуваше на вечерата со известувачите од Белатата куќа и наместо таму отиде на средба со свои поддржувачи во Мичиген. - Веројатно сте слушнале дека вечерва бев поканет на друг настан - вечера со известувачите од Белата куќа, но решив да дојдам тука во Вашингтон, Мичиген, рече Трамп пред насобраните поддржувачи. Втора година, Трамп не учествува на настанот во главниот град, оставајќи го Здружението на новинарите, кои ги пренесуваат неговите настапи, без својот вообичаен почесен гостин. Повеќето претседатели одат барем еднаш за време на нивниот мандат на оваа вечера, каде што се предмет на шеги на учесниците. - Зошто да бидам во просторија со група либерали кои објавуваат лажни вести и ме мразат, напиша претходно Трамп на веб страницата на својата компанија.(МИА)