извод на родени – Kurir.mk

Уставниот суд ќе поведе постапка, донесена времена мерка за неиздавање на новите изводи

Ивона Петрова — Wed, 05 Jul 2023 11:16:07 +0000

Уставниот суд денеска одлучи да поведе постапка за утврдување на уставноста на Упатството за водење на матични книги поради непочитување на уставно пропишаниот рок од седум дена за негово објавување во Службен весник. Исто така Уставниот суд донесе времена мерка за неиздавање на овие документи. На денешната седница во делот на јавноста присуствуваше и министерот за правда Кренар Лога кој Упатството го потпишал на 29 мај, а во Службен весник е објавено на 15 јуни. Лога по седницата изјави дека е вистина дека не е испочитуван уставниот рок од Секретаријатот за законодавство и Службен весник, но оти тоа не е направено од негова страна. -Такви пропусти имало во минатото во сите службени весници и јас носам неколку од нив, рече Лога. Според него, Уставниот суд не треба да ја отвора Пандорината кутија, бидејќи во речиси секој Службен весник има непочитување на уставни рокови и дека дури и има непочитување и Уставниот суд. Одговарајќи на новинарско прашање за тоа дека поранешна министерка за правда реагираше дека е неуставно упатството што тој го потпишал а се однесува на внесување на етничката припадност во изводот во матична книга, рече дека таа (Рената Дескоска ) не е компетентна да го кажува тоа, бидејќи „ги избегнала уставните измени и сама, како што рече, се номинирала за член на Венецијанската комисија. Лога не одговори и на прашањето кои држави во изводот има графа за етничка припадност, туку кажа контра прашање и тоа : во кои европски земји во Уставот стои „јазик што го зборуваат 20 отсто од граѓаните“. На денешната седница на Уставниот суд беше иницијативата на Павле Трајанов за една изборна единица, две иницијативи поврзани за бугарските клубови, иницијативата налидерот на Левица Димитар Апасиев за одлучување од страна на Џафери и други.

Нови изводи на родени со графа националност, се огласија од Министерството за правда

Ивана Ефремовски — Tue, 04 Jul 2023 15:41:25 +0000

Нови изводи на родени со графа националност. Упатството не се коси со законите, туку е во согласност со Законот за матична евиденција, соопшти Министерството за правда, споделувајќи фотографии од новите изводи. - Националност во матичната книга на родените се предвидува во членот 4, на венчаните во членот 11 и на умрените во член 13 од Законот за матична евиденција, се вели во соопштението од Министерството за правда.

Лога стави потпис: Се менуваат изводите од матичните книги, новите ќе имаат графа за етничка припадност

Ивона Петрова — Mon, 29 May 2023 14:00:08 +0000

Министерот за правда Кренар Лога го потпиша Упатството за изменување и дополнување на Упатството за начинот на водење, заштита и чување на матичните книги и списи; издавање на изводи, уверенија, преписи и копии врз основа на матичните книги; водење постапка и составување на записник за најдено дете; обновување на уништени, оштетени или исчезнати матични книги, како и за обрасците на матичните книги, регистарот на матични книги, изводите и уверенијата што се издаваат врз основа на матичните книги, каде ќе стои графа за етничка припадност. Од Министерството за правда информираат дека ова Упатство ќе стапи на сила по истекот на 8 дена од објавувањето во Службен весник за изводите на родените. За другите изводи, како што се наведува во соопштението, поради финансиски импликации Упатството ќе започне да се применува од 1 јануари 2024 година.

Власта го брише името Република Македонија од изводите на лица родени пред Преспанскиот договор

Ивана Ефремовски — Tue, 23 Jul 2019 13:15:58 +0000

И за лицата кои се родени пред Преспанскиот договор, во изводите нема да пишува Република Македонија. Наместо тоа кај графата државјанство ќе бидат напишани коси црти (/////). Оние кои се родени откако Заев со Грција го смени уставното име на земјава, ќе имаат извод со јасно назначено „Република Северна Македонија“. Сите вработени во Управата за водење на матични книги, веќе имаат добиено известување со кое им се става на знаење дека власта го брише името Република Македонија од изводите. Северна Македонија, според ова известување е нешто кое задолжително мора да се напише, а наместо Република Македонија ќе добиете коси цртички.