јаир лапид – Kurir.mk

Лапид сведочеше во случајот за корупција против Нетанјаху

Ивана Ефремовски — Mon, 12 Jun 2023 15:57:03 +0000

Лидерот на израелската опозиција, Јаир Лапид денеска сведочеше дека премиерот Бенјамин Нетанјаху двапати се обидел да го убеди да го поддржи законот за даночни олеснувања на еден холивудски магнат. Поранешниот израелски премиер и главен ривал на Нетанјаху, Лапид сведочеше во еден од трите случаи против актуелниот израелски премиер. Во обвинението се наведува дека Нетанјаху ги искористил своите позиции за да ги поддржи интересите на холивудскиот магнат Арнон Милчан, а за возврат доби подароци. Според обвинението, Нетанјаху извршил лични услуги за Милчан, вклучително и барање од американски официјални лица да му ја продолжат дозволата за престој во САД на Милчан. Нетанјаху ги негира обвинувањата, истакнувајќи оти подароците била само пријателски гест. Нетанјаху е обвинет за измама, нарушување на довербата и примање мито во три случаи во кои се вмешани влијателни медиумски магнати и богати поединци. (МИА)

Лапид: Израел е дел од решението на европските проблеми со гасот

Магдалена Андонова — Mon, 12 Sep 2022 13:00:53 +0000

Израел може да и испорача на Европа околу 10 отсто од вкупното количество гас што минатата година го добиваше од Русија, изјави израелскиот премиер Јаир Лапид за време на неговата посета на Германија, пренесоа британските медиуми. -Ние ќе бидеме дел од напорите за замена на рускиот гас во Европа, рече Лапид по неговата средба со германскиот канцелар Олаф Шолц. Германскиот лидер посочи дека Германија настојува да изгради нова структура за увоз на гас од новите партнери за да се ослободи од нејзината зависност од Русија. (МИА)

Израелскиот премиер предупредува на ширење на тероризмот доколку се обнови договорот со Иран

Ивана Ефремовски — Wed, 24 Aug 2022 14:45:06 +0000

Израелскиот премиер Јаир Лапид изјави денеска дека западните сили мора да ги прекинат преговорите за обновување на нуклеарниот договор со Иран, предупредувајќи на опасност од „тероризам низ целиот свет“ доколку Техеран заработува сто милијарди долари годишно. „Израел не е против договор. Ние сме против овој договор бидејќи е лош, затоа што не може да се прифати онаков како што е во моментов напишан, рече Лапид на брифингот за странските новинари во Ерусалим. Лапид рече дека според она што сега му се нуди, на Ирен ќе му обезбеди сто милијарди долари годишно, без притоа да појасни врз што ја заснова таквата проценка. Тој предупреди дека Техеран нема да инвестира пари во „градење училишта или болници“, туку за „поткопување на стабилноста на Блискиот Исток“ и ширење тероризам. „Револуционерната гарда ќе се финансира со тие пари. Ќе се финансираат повеќе напади врз американски бази на Блискиот Исток. Ќе се користи за зајакнување на Хезболах, Хамас и Исламски џихад“, рече израелскиот премиер. Израел во 2018 година ја поздрави одлуката на тогашниот американски претседател Доналд Трамп за повлекување на САД од договорот со Техеран. Вашингтон во меѓувреме посочи дека Техеран направил отстапки во преговорите за обновување на тој договор. Висок американски функционер појасни дека Иран повеќе нема намера да го блокира пристапот на инспекторите од Меѓународната агенција за атомска енергија (МААЕ), а се откажа и од барањето за симнување на Револуционерната гарда од списокот териристички организации. Независно отстапките, Израел и натаму се спротивставува на договор, особено доколку тоа предвидува укинување на економските санкции против Техеран.

Израел смета дека нацрт-договорот „не соодветствува на критериумите што ги постави самиот (американски претседател) Џо Бајден – да спречи Иран да стане нуклеарна држава“, предупреди Лапид. Израелските власти го критикуваа договорот за кој се преговара, бидејќи не предвидува уништување на центрифугите за збогатување ураниум, ценејќи дека на тој начин му се остава на Техеран повторно да ги активира во момент кога ќе смета дека му одговара. Лапид неодамна апелираше до претседателот на Франција и канцеларот на Германија да не го потпишуваат нацрт-договорот со Техеран. „Им кажав дека преговорите се дојдени до точка на која мора да бидат прекинати“, појасни денеска Лапид. Израелските медиуми коментираат дека премиерот не ги критикувал директно САД, туку рекол дека постои отворен дијалог со американската администрација за сите недоразбирања и оти ја почитува нивната подготвеност да слушаат и да соработуваат, нагласувајќи дека САД остануваат најблискиот сојузник на Израел. „Претседателот Бајден е еден од најдобрите пријатели што Израел некогаш ги имал“, рече Лапид и повтори дека договорот со Иран, доколку биде потпишан, нема да има обврзувачки карактер за Израел кој, како што истакна „ќе дејствува за да спречи Иран да стане нуклеарна“ сила“. (МИА)

Бајден и Лапид одлучни да го спречат Иран да се здобие со нуклеарно оружје

Магдалена Андонова — Thu, 14 Jul 2022 13:21:41 +0000

Американскиот претседател Џо Бајден и израелскиот премиер Јаир Лапид денеска ветија дека нема да дозволат Иран да се здобие со нуклеарно оружје, што е знак на единство меѓу сојузниците поделени со години околу дипломатијата со Иран. Ветувањето, содржано во „Ерусалимска декларација“ со која беше затворена првата посета на Бајден на Израел како претседател, уследи по неговата изјава на израелската телевизија дека е отворен за можноста за употреба на оружје против Иран „како последно средство“, очигледна отстапка за Израел кој бараше од светските сили „веродостојна воена закана“. Во изјавата денеска, објавена пред официјалното потпишување на декларацијата, повторно се потврдува поддршката на САД за правото на Израел „сам да се брани“. „САД нагласуваат дека дел од тоа ветување е одлучноста дека на Иран никогаш нема да му биде дозволено да добие нуклеарно оружје и дека е подготвен да ги искористи сите елементи на својата национална моќ за да го обезбеди тој исход“, се вели во соопштението. Во 2015 година, Иран потпиша меѓународен договор со кој се ограничуваат неговите нуклеарни проекти, кои имаат потенцијал за создавање бомби. Во 2018 година, тогашниот претседател Доналд Трамп се повлече од договорот, тврдејќи дека е погрешен, потег што Израел го поздрави. (МИА)

Јаир Лапид е новиот привремен премиер на Израел, државата оди на петтите избори во рок од 3 години и неколку месеци

Ристе Здравков — Fri, 01 Jul 2022 10:57:04 +0000

Јаир Лапид стана привремен премиер на Израел, откако Парламентот вчера гласаше да се самораспушти, активирајќи ги петтите избори во земјата за нешто повеќе од три години. Министерот за надворешни работи и ветеран лидер на центристичката партија ја презеде функцијата на полноќ и ќе ја предводи земјата пред изборите, закажани за 1 ноември. Тој ја презеде должноста од Нафтали Бенет, кој, како што самиот се изјасни, нема да се кандидира на следното гласање. Тежок пат треба да мине Лапид, за да го победи главниот противник, поранешниот премиер Бенјамин Нетанјаху, пишуваат медиуми повикувајќи се на анкети. Лапид беше архитект на осумпартиската коалициска Влада, што се распадна само по година дена откако беше формирана. Поранешниот автор, колумнист во весник и ТВ водител, ќе биде и првиот премиер на Израел од 2009 година кој поддржува решение за две држави со Палестинците, иако нема да биде во можност да преземе какви било големи иницијативи за време на привремениот мандат. Седумдесет и двегодишниот Нетанјаху, на судења за корупција во низа случаи, се обидува да се врати на премиерското место. На средината на јули, Лапид во Израел ќе го пречека американскиот претседател Џо Бајден, на неговата прва посета на Блискиот Исток, од доаѓањето во Белата куќа.

Лапид: Нема да чекам на изборите, веднаш ќе се зафатам со проблемите

Дарко Андоновски — Tue, 21 Jun 2022 07:02:18 +0000

Израелскиот министер за надворешни работи Јаир Лапид изјави дека нема да чека нови избори за да се справи со бројните предизвици и дека ќе се соочи со нив веднаш штом ќе ја преземе функцијата привремен премиер од актуелниот премиер Нафтали Бенет. -Треба да се справиме со трошоците за живот, да водиме кампања против Иран, Хамас и Хезболах и да се спротивставиме на силите кои се закануваат да го претворат Израел во недемократска земја, рече Лапид. Претходно, израелската Влада потврди дека ќе го распушти парламентот и ќе се подготви за нови избори по неколкунеделниот засилен притисок врз кревката владејачка коалиција на Бенет. Претходно британските медиуми јавија дека неименуван израелски функционер изјавил дека Бенет и Лапид се договориле за распуштање на парламентот и дека Лапид во меѓувреме ќе ја преземе функцијата премиер. Следната недела ќе се одржи гласање во парламентот, по што Лапид ќе ја преземе премиерската функција, рече претставникот.

Лапид: Ако е неопходно Израел сам ќе дејствува против Иран

Магдалена Андонова — Mon, 27 Dec 2021 22:00:19 +0000

Шефот на израелската дипломатија Јаир Лапид денеска изјави дека ако е неопходно Израел е подготвен да дејствува против Иран. – Секако ние повеќе би сакале да дејствуваме во соработка со меѓународната заедница, но ако е неопходно, ќе дејствуваме сами. Сами себе ќе се браниме, истакна Лапид на седницата на одборите за надворешни работи и за одбрана. Тој додаде дека Иран се грижи само за укинување на санкциите од САД и да вложи милијарди долари во својата нуклеарна програма и да ги финандира сојузничките шиитски милиции во регионот. Во Виена денеска почна осмата рунда разговори за обновува на Заедничкиот сеопфатен акциски план за иранската нуклеарна програма. Преговорите за нуклеарниот договор со Иран се водат во Виена од април 2021 година. Преговарачите веќе потврдија дека работата ќе продолжи врз основа на документите разработени во шесте рунди. Беше забележано дека сите страни сакаат да го вратат Договорот во првобитната форма. На пример, земјите одредиле кои американски санкции против Иран треба да бидат укинати и листа на чекори во областа на нуклеарната енергија што Иран мора да ги преземе за да се врати на своите нуклеарни обврски. Израел уште во 2015 година беше против Договорот за иранската нуклеарна програма, а и сега е против продолжувањето на преговорите за заживување на Договорот и ги предупредува дека тоа нема да го запре Иран да стане нуклеарна сила. (МИА)