Јепе Кофод – Kurir.mk

Кофод: Очекувам Данска да се приклучи на европската безбедносна политика од 1 јули

Тале Кристо — Thu, 02 Jun 2022 11:15:03 +0000

Министерот за надворешни работи на Данска Јепе Кофод рече дека очекува земјата да може да се приклучи на заедничката безбедносна политика на ЕУ од 1 јули оваа година. Тој денеска изјави дека има „низа формални чекори“ кои треба да се исполнат пред да се приклучи Данска во европската безбедносна политика. Првиот е данскиот Парламент да ги ратификува резултатите од вчерашниот референдум, на кој, според официјалните резултати, 66,9 отсто од гласачите се изјасниле дека поддржуваат приклучување кон безбедносната политика на ЕУ. Излезноста беше 65,7 отсто. Кофод го нарече референдумот „добар и важен чекор“. Премиерот Мете Фредериксен рече дека резултатите се „јасен сигнал“ за рускиот претседател Владимир Путин. Главниот ефект од пристапувањето на Данска во рамки на безбедносната политика на ЕУ ќе биде учеството во разговорите со европските колеги за безбедносни прашања, а војниците од таа земја ќе учествуваат во воените мисии на Унијата. паг/ 2022-06-02 13:00:13, од Пандорка Арсовска-Гацова

Пендаровски на средба со министерот за надворешни работи на Данска

Ивона Петрова — Wed, 01 Sep 2021 12:41:31 +0000

Претседателот Стево Пендаровски денеска го прими Јепе Кофод, министер за надворешни работи на Кралството Данска, кој престојува во посета на Македонија. Соговорниците на средбата констатираа дека двете држави во континуитет градат пријателски, сојузнички и партнерски односи. Во таа насока, претседателот Пендаровски изрази интерес за интензивирање на политичкиот дијалог на високо ниво. Претседателот Пендаровски и министерот Кофод ја истакнаа и потребата за подобрување на економската соработка и трговската размена. На средбата се разговараше за процесот на проширување на Европската Унија, при што претседателот Пендаровски изрази благодарност за принципиелната поддршка на Данска за евроинтегративниот процес на Северна Македонија. Претседателот Пендаровски истакна дека нашата држава ќе продолжи да работи на домашната реформска агенда, со фокус на владеење на правото, јакнење на ефикасноста и непристрасноста на судството и борбата против корупцијата. Соговорниците разговараа и за безбедносната состојба во Авганистан, како и за одлуката на Северна Македонија да прифати авганистански цивили. На средбата претседателот Пендаровски му се заблагодари на министерот за донираните вакцини за заштита од Ковид-19.

Данскиот министер за надворешни работи во посета на Македонија

Ивона Петрова — Wed, 01 Sep 2021 05:19:27 +0000

Министерот за надворешни работи на Данска, Јепе Кофод денеска ќе претстојува во официјална посета на земјава. Македонија е првата земја од регионот што Кофод ќе ја посети, како дел од неговата турнеја низ земјите од Западен Балкан. Негов домаќин ќе биде министерот за надворешни работи Бујар Османи. На агендата на разговорите, како што соопшти МНР, ќе се најде европското досие на Северна Македонија и на целиот регион на Западниот Балкан, а ќе стане збор и за актуелните теми во меѓународните односи и безбедноста, пред се состојбите во Авганистан и ангажманите на државите за помагање и згрижување на цивилното население. Двајцата соговорници ќе разговараат и за билатералните односи меѓу двете земји, со посебен акцент на соработката на економски и трговски план.