јован стојаноски – Kurir.mk

Поради смртта на градоначалникот, општина Охрид го откажа најавениот проект

Ивана Ефремовски — Thu, 20 Dec 2018 08:30:20 +0000

Поради ненадејната смрт на градоначалникот на Охрид, Јован Стојаноски, од општината информираат дека се отажува годинешното издание на проектот кој стартуваше минатата година „Од 20-ти до 20-ти - СИТЕ ВО ОХРИД“ кој требаше да трае од 20-ти декември 2018 до 20-ти јануари 2019 година. И покрај тоа што програмата беше потврдена и артистите беа букирани, сепак е донесена одлука оваа година да не се одржи главната програма и истата да се пренесе за следната година. Сепак, за најмладите, кои се нашата иднина и кои се најрадосни за празниците, ќе биде приредена програма на Градскиот плоштад, каде ќе настапат најмладите со своја програма, информираат од општина Охрид.

Семејството на починатиот градоначалник на Охрид со благодарност до сите граѓани за искажаната поддршка и почит

Ивона Петрова — Tue, 18 Dec 2018 09:50:59 +0000

Семејството на прерано починатиот градоначалник на Охрид Јован Стојаноски, до сите граѓани на Охрид, упати зборови на благодарност за искажаната нивна поддршка и почит кон својот градоначалник. Во пораката, семејството искажува благодарност што во најтешките моменти за нив, луѓето ги надминале сите партиски, човечки и секакви други препреки и со дела, убав збор, стисната рака во знак на поддршка или само човечки поглед, им помагаат да го изминат најголемото премрежје. -Зборови немаме, солзите не запираат, за нас остана само голема празнина која никогаш нема да се надополни. Негова најголема љубов беше Охрид. Да му се оддолжиме сите заедно со тоа што ќе се сплотиме, ќе го изградиме како што доликува, ќе го направиме да биде, како што милуваше да каже „најубавото место на светот“, со силно образование, со насмеани луѓе, со верба во Бога и народот. Да застанеме зад оваа идеја во која веруваше Јован - Градоначалникот и да се сеќаваме на него онаков како што и секогаш беше - со широка насмевка, топла прегратка и отворено срце ЗА СИТЕ, се вели во пораката на семејството Стојаноски до охриѓани.

ВИДЕО: Со пуштени сирени, охридските бродари се простија од починатиот градоначалник

Ивона Петрова — Mon, 17 Dec 2018 13:34:09 +0000

Со петминутно вклучување на бродските сирени и спуштени знамиња, бродската Флотата на Охридското Езеро му оддаде последна почит на прерано починатиот градоначалник на Охрид, проф. д-р Јован Стојаноски, пишува порталот Охрид1.

По смртта на Стојаноски, охриѓани напролет ќе избираат нов градоначалник

Ивана Ефремовски — Mon, 17 Dec 2018 09:12:33 +0000

Во Охрид денеска е ден на жалост по ненадејната смрт на градоначалникот Јован Стојаноски (48), професор на Факултетот за туризам и угостителство во неговиот роден град. Тој почина во саботата претпладне, во возило на Итната медицинска помош, на пат кон Центарот за кардиоваскуларни болести, откако му се слошило на состанок со директорите на општинските јавни претпријатија. Според информациите, причина за смртта е срцев удар, пишува Независен. Стојаноски беше градоначалник на Охрид само една година и два месеца, откако на локалните избори минатата година успеа да ја поврати предноста на СДСМ во општината која се смета за една од најатрактивните во политичката битка меѓу најголемите партии во земјава. Стојаноски победи во првиот круг на локалните избори лани во октомври над кандидатот на ВМРО-ДПМНЕ, Митко Тилески. Пет дена подоцна, дотогашниот градоначалник на Охрид, Никола Бакрачески (ВМРО-ДПМНЕ), му ја предаде функцијата на неговиот другар од училишните денови, со кого, во меѓувреме, се најдоа на различни политички страни. „Го познавав Јован уште од детството. Ги делевме школските клупи во исто основно и средно училиште. Бевме и комшии и долгогодишни пријатели. Го дочекав во градоначалничкиот кабинет при примопредавањето на функцијата. Имавме мошне срдечен разговор. Си спомнавме за многу моменти од детството и младоста. Му посакав успешен градоначалнички мандат. И беше успешен. И беше впечатлив. За жал на сите нас, заврши пребрзо. Но беше успешен и во својата професија како професор, а и како советник во градскиот совет. Својата одмереност, ненаметливост и внимателност ги споделуваше и ги пренесуваше на охриѓани како универзална човекова вредност...“- со ваква порака Бакрачески се збогува со својот наследник на градоначалничката функција. Од повеќето политички табори стигнаа реакции по повод прераната смрт на Стојаноски. Согласно со едногласната одлука на Советот за прогласување ден на жалост, денеска во Охрид се откажани сите манифестации од културно-забавен карактер. Паралелно, откажани се и повеќето активности во Собранието на Македонија, вклучително и пленарното заседание, седницата на телото за помирување и седницата на Комисијата за уставни прашања. Охрид, општината која традиционално важи за една од централните точки на политичката битка меѓу ВМРО-ДПМНЕ и СДСМ - сега останува без градоначалник. Вакуумот до изборот на нов градски татко, веројатно, ќе се пополни со избор на в.д. градоначалник од редот на советниците во општината. Советот на општина Охрид брои 23 члена, од кои 11 се од СДСМ, 10 од ВМРО-ДПМНЕ, а двајца од ДУИ. Според овој распоред на сили, очекувано е дека в.д. градоначалникот ќе биде од редовите на владејачката коалиција на централно ниво. Односно дека нема да се повтори ситуација како во Дебар, каде што по смртта на градоначалникот Ружди Љата од редовите на ДУИ, мнозинството во Советот го презедоа Алијансата за Албанците, Беса, ВМРО-ДПМНЕ и ПЕИ, кои избраа в.д. градоначалник од редовите на Алијансата. Сепак, и за Охрид и за Дебар останува неизвесноста дали на вонредните избори за градоначалници што престојат ќе се повтори предноста што таму ја извојуваа владејачките СДСМ и ДУИ на минатогодишните локални избори. Според најавите, дополнителните избори за нови градоначалници на Охрид и на Дебар ќе се одржат паралелно со редовните претседателски избори напролет. Тогаш треба да се избере и нов градоначалник на општина Ново Село, откако Боро Стојчев од СДСМ поднесе оставка од морални причини откако беше осуден на затвор за обид за шверц на цигари. Извор: НЕЗАВИСЕН

Комеморативна седница за починатиот градоначалник Стојаноски

Ивона Петрова — Mon, 17 Dec 2018 06:42:42 +0000

Комеморативна седница ќе се одржи денеска во Охрид по повод ненадејната смрт на градоначалникот, проф.д-р Јован Стојаноски. Комеморативната седница ќе се одржи во големата општинска зграда со почеток во десет часот. Советот на општина Охрид вчера на вонредна седница свикана по повод ненадејната смрт на Стојаноски едногласно донесе одлука денеска да биде прогласен за ден на жалост на територијата на општината. Согласно одлуката, за денеска се откажуават сите закажани манифестации од културно забавен карактер. Погребот на посмртните останки на Стојаноски ќе се одржи во 14 часот на Градските гробишта во Охрид. На комеморацијата и погребната церемонија е најавено присуство на видни личности од политиката и јавниот живот, а меѓу нив и премиерот Зоран Заев, кој, како што соопшти Владата, поради ненадејната смрт на Стојаноски го откажа присуството на настанот за отворање на делница од автопатот во Бугарија. Градоначалникот на Охрид проф.д-р. Јован Стојаноски почина завчера изутрина, во возила на службата за итна медицинска помош, на пат кон Центарот за кадриоваскуларни болести. Стојаноски беше професор на Факултетот за туризам и угостителство во Охрид, а градоначалничката функција ја вршеше од 20 октомври минатата година, по победата во првиот круг од локалните избори. Стојаноски, роден на 7 август 1970 година во Охрид, беше оженат и татко на две деца. МИА

Ден на жалост во Охрид: Семејството и пријателите ќе се простат од градоначалникот – погребот ќе биде утре

Предраг Кукиќ — Sun, 16 Dec 2018 09:00:21 +0000

Советот на Општина Охрид денеска ќе одржи вонредна седница на која ќе биде изгласана одлука утре да биде прогласен за ден на жалост во Охрид. Комеморативна седница по повод ненадејната смрт на градоначалникот на Охрид, Јован Стојаноски ќе биде одржана утре со почеток во 10 часот. Посмртните останки на охридскиот градоначалник ќе бидат изложени утре во Градската капела во 12 часот, а погребот е закажан од 14 часот на Градските гробишта во Охрид. Градоначалникот на Охрид Јован Стојаноски утрово бил во својот кабинет, каде одржувал работен колегиум, по што доживеал здравствени проблеми и бил пренесен во Општата болница. Од Интерно одделение на болницата бил транспортиран во Кардиолошки завод, а починал во време на транспортот. Стојаноски беше професор на Факултетот за туризам и угостителство во Охрид, а градоначалничката функција ја вршеше од 20 октомври минатата година, по победата во првиот круг од Локалните избори. Стојаноски, роден на 7 август 1970 година во Охрид, беше оженат и татко на две деца.

Градоначалникот Стојаноски ќе биде погребан во понеделник

Предраг Кукиќ — Sat, 15 Dec 2018 15:52:43 +0000

Погребот на градоначалникот на Општина Охрид Јован Стојансоки, кој почина ненадејно утрово од инфаркт, ќе се одржи во понеделник. Посмртните останки на градоначалникот на Општина Охрид, проф. д-р Јован Стојаноски ќе бидат изложени во капелата на градските гробишта во Охрид на 17.12.2017 година, понеделник, од 12 до 14 часот.

ВМРО-ДПМНЕ ОК Охрид изрази огромно жалење и сочувство за смртта на градоначалникот на Охрид

Катерина Бојаџиева — Sat, 15 Dec 2018 15:30:24 +0000

Со огромно жалење и неверување ја примивме трагичната вест за смртта на градоначалникот на Охрид, г. Јован Стојаноски. Смртта со нејзината немилосрдна конечност е вест која секогаш нѐ остава неми и понизни пред силите кои го движат светот, а се над нашата моќ дури и да ги разбереме, а камо ли да влијаеме на нив. Најтрагична од сите пак е веста за конечно завршување на животот на млад човек кој сѐ уште има долг пат да оди и уште многу да му даде на светот, стои во соопштението на ВМРО-ДПМНЕ ОК Охрид. -Господинот Стојаноски заминува прерано од животот на своите најблиски, но заминува прерано и од животот на нашиот град кој пред само една година го назначи за свој прв човек, за татко на градот. Нашиот политички натпревар со г. Стојаноски траеше повеќе години претходно пред да стане градоначалник. Тој беше член на Советот на општина Охрид во тек на еден мандат. За тој период во кој имаше бројни дебати за важни прашања во кои имавме различни ставови, ние сепак успеавме да изградиме завидно меѓусебно почитување и разбирање. Тоа се рефлектираше и на предизборната кампања која го задржа потребното ниво на политичка култура пред сѐ заради мирниот и неконфликтен карактер на кандидатите. Почитувањето се задржа и во целата една година додека ја извршуваше функцијата градоначалник како конструктивен политичар, стои во соопштението и се додава: „Остануваат прекратени бројните планови кои треба да го движат овој град кон подобро утре. Остануваат со сигурност прекратени и бројни лични цели неповрзани со политиката. Нам ни останува огромното жалење за прерано завршениот живот на нашиот, пријател, сограѓанин и градоначалник. Изразуваме искрено сочувство на семејството, пријателите, колегите од Факултетот за туризам и угостителство како и на сите граѓани на Охрид. Нека почива во мир и нека му е вечна слава!“.

Почина градоначалникот на Охрид

Предраг Кукиќ — Sat, 15 Dec 2018 11:20:39 +0000

Утрово на 48 годишна возраст почина градоначалникот на општина Охрид, Јован Стојаноски, пишува Сител. Тој немал никакви здравствени проблеми, а неофицијално причината е инфаркт. Според првичните, неофицијални информации, тој починал додека го транспортирале од Општата болница во Охрид до Кардиолошкиот завод. Официјално мандатот на градоначалникот на Општина Охрид, Проф. д-р Јован Стојаноски започна на 20.10.2017 година, после победата во првиот круг на Локалните избори 2017 година. Стојаноски е автор на значаен број трудови и артикли од областа на Маркетинг, како и активно учество на голем број домашни и меѓународни семинари, конференции и конгреси.

Градоначалникот Стојаноски цела година чита препишани говори од неговиот претходник Бакрачески (ВИДЕО)

Катерина Бојаџиева — Tue, 16 Oct 2018 10:03:16 +0000

Градоначалникот на Охрид Јован Стојаноски, цела година чита препишани говори од неговиот претходник Никола Бакрачески, пишува порталот Охрид1. Првпат, градоначалникот Стојаноски на 8 декември 2017 година прочита дословно препишан говор кој на 8 декември 2013 година го прочитал тогашниот градоначалник Бакрачески. Препишан говор, Стојаноски читаше и на церемонијата по повод празникот 11 Октомври.