Јован Стојоски – Kurir.mk

Стојоски постави нов македонски рекорд на 100 метри

Ивона Петрова — Mon, 02 May 2022 08:42:43 +0000

Нов македонски рекорд на 100 метри постави атлетичарот Јован Стојоски, истрчувајќи ја патеката под 11 секунди. Стојоски на 26 Меѓународен митинг во Бар го освои првото место на 100 метри со време на нов национален рекорд од 10:59 секунди. Успешниот настап на митингот во Бар, Стојоски го комплетираше со освоеното прво место и на трката на 400 метри со резултат 46:59 секунди.

Стојоски единствен македонски атлетичар на СП во Белград

Тале Кристо — Wed, 16 Mar 2022 16:27:46 +0000

Честа на македонската атлетика на Светското првенство во сала кое овој викенд ќе се одржи во Белград, ќе ја брани Јован Стојоски во трката на 400 метри. Стојоски оваа година го подобри личниот и државниот рекорд, истрчувајќи 400 метри во време од 47.18 секунди, што беше најблиску до потребната норма за настап на завршниот турнир. Стојоски ќе настапи во квалификациите на 400 м на 18 март, во 11.00 часот, во конкуренција на 29 атлетичари во оваа дисциплина. На СП во Белград, од 18 до 20 март, пријавени за настап се вкупно 680 атлетичари од 137 држави, што е импозантна бројка во услови на пандемија на коронавирусот.

Јован Стојоски со личен рекорд на ЛОИ во Токио

Бошко Тасиќ — Sun, 01 Aug 2021 07:07:24 +0000

Единствениот претставник на Македонија во атлетските дисциплини на ЛОИ во Токио, Јован Стојоски го освои 38 место на трката на 400 метри остварувајќи личен рекорд. Стојоски целта ја мина со време од 46,81 секунда со што го подобри својот личен рекорд. Тој се натпреваруваше во конкуренција на 48 натпреварувачи.

ОИ: Стојоски не се пласираше во полуфиналето, заврши 38-ми во квалификациите на 400 метри

Ивона Петрова — Sun, 01 Aug 2021 06:53:34 +0000

Македонскиот атлетичар Јован Стојоски го освои 38. место во квалификациите на трката на 400 метри на Олимписки игри во Токио. Тој патеката ја помина за 46.81 секунда што е негов личен рекорд, но недоволно за пласман во полуфиналето. Во оваа дисциплина се појавија вкупно 48 атлетичари. Најдобар резултат имаше Американецот Мајкл Чери со време 44,82 секунди. Од Македонците, до крајот на Олимпијадата треба да настапат уште Пулексенија Јовановска (карате, кати) на 5 август и Могомедгаджи Нуров (борење слободен стил, 97 кгр.) на 6 август.

„Сакам да ја направам Македонија горда“ – за Стојоски е чест да настапува под македонско знаме во Токио

Ивана Ефремовски — Wed, 28 Jul 2021 08:42:21 +0000

Македонскиот атлетичар ги прави последните подготовки пред настапот на Олимписките Игри во Токио. Трката на 400 метри е закажана за први август. Јован Стојоски веќе во Токио. Македонскиот атлетичар со нетрпение го очекува својот деби настап на едни Олимписки Игри, сонот на секоја спортист. Стојоски на ЛОИ во Токио ќе настапи на трката на 400 метри која е закажана за први август, во 3:45 часот. Тој ги користи последните денови за максимална подготовка за најголемиот предизвик во неговата кариера. Добро знае што значи да се настапува под знамето на една земја. - Задоволен сум од подготовките кои што ги одработив. За Токио се подготвував две години. Олимписките игри се сон за секој спортист, голем предизвик. За мотивот не треба да се зборувам премногу. Предизвикот е голем, имам голема чест, да настапувам под македонското знаме, тоа ми дава обврска да дадам се од себе. Никогаш не сум се штедел, вака ќе биде и на трката. Сакам да ја направам Македонија горда. Конкуренцијата ќе биде голема, но тоа го прави чувството посебно. Имам искуство на другите натпреварувања, се надевам дека ќе успеам да остварам резултат за почит, истакна атлетичарот Јован Стојоски. Настапот на ЛОИ во Токио ќе биде дополнително искуство за предизвиците кои ги има поставено македонскиот атлетичар. - Иако е рано, но моја следна цел се Олимпијадите во Париз и Лос Анџелес. Нема да застанам, сакам да носам успеси, сакам да ја правам Македонија горда, додаде атлетичарот. РЕДАКЦИЈАТА НА КУРИР МУ ПОСАКУВА УСПЕШЕН НАСТАП

Стојоски ќе ја брани честа на македонската атлетика на ОИ во Токио

Катерина Бојаџиева — Tue, 22 Jun 2021 17:04:12 +0000

Македонскиот атлетичар Јован Стојоски доби вајлд карта за настап на летните Олимписки игри во Токио. Одлуката, како што официјално е соопштено, ја потврди денеска Македонскиот олимписки комитет (МОК) водејќи се од пропозициите на Светската атлетска федерација право на настап на Игрите во Токио да добие најдобро рангираниот атлетичар во дисциплината во којашто настапува. -Во моментов, според овие пропозиции на Светската атлетска федерација, тоа е Јован Стојоски, кој воедно има и најдобар резултат според IAAF таблица на отворено, во олимписка дисциплина Со неговиот резултат од 46,82 на 400 метри тој успеа да го обезбеди својот пласман за Олимпијадата во Токио, соопшти Македонската атлетска федерација. Атлетичарот Стојоски е осмиот македонски спортист што има обезбедено настап на Олимпијадата, која од 23 јули до 8 август ќе се одржи во Токио.

Стојоски последен во квалификациската група на ЕП во Полска

Тале Кристо — Fri, 05 Mar 2021 12:47:18 +0000

Симболичен настап имаше Јован Стојоски на денешната трка во квалификациите на 400 метри на Европското првенство во Полска. Единствениот македонски претставник на евро-шампионатот трката ја заврши со време 48,6 секунди. Македонскиот атлетичар за време на трката имаше контакт со италијанскиот тркач Лоренцо Бенати, по што го загуби ритамот и не успеа на крај да стигне до позначаен резултат. На ова првенство требаше да учествува и Дарио Ивановски на трката 1500 метри, но тој мораше да го откаже настапот поради позитивен тест на коронавирус.

Јован Стојоски единствен македонски атлетичар на претстојното Европско првенство

Ивана Ефремовски — Mon, 01 Mar 2021 16:08:50 +0000

Полскиот град Торун од 5 до 7 март ќе биде домаќин на Европското сениорско првенство во сала на кое македонската атлетика ќе има еден натпреварувач во Јован Стојоски. Македонскиот атлетичар пристигна во Торун и се подготвува за својот настап во квалификациите во трката на 400 метри, што е на програмата в петок. -Учеството на нашиот атлетичар на ова големо првенство ќе има директно влијание во ранкинг-листата на Светската атлетска федерација, според која ќе се распределуваат и слободните места за летните Олимписки игри во Токио, соопшти денеска Атлетската федерација на Македонија (АФМ). Освојувачот на златниот медал на 3.000 метри на неодамнешното Балканското првенство во Истанбул Дарио Ивановски, беше принуден да го откаже настапот на Европското првенство во Полска поради позитивен тест на коронавирус. (МИА)

Македонскиот атлетичар влезе во финалето на Европско првенство

Ивана Ефремовски — Fri, 12 Jul 2019 18:15:49 +0000

Јован Стојоски успеа да влезе во финалето на Европско првенство под 23 години. Со ваквиот подвиг, Стојоски влезе во историјата на Македонската атлетика како прв атлетичар кој успеал да стигне до финалето на едно вакво големо европско натпреварување. Имено, Стојоски кој е член на АК Охрид и синоќа на ова првенство се пласираше во полуфиналната рунда, денеска со резултат 47 секунди и 02 стотинки во првата полуфинална група се пласираше на третото место, со што стана македонски финалист на ова големо натпреварување. Финалната трка на 400 метри, македонскиот атлетичар ќе ја истрча утре на 13 јули, со почеток во 18.30 часот. (МИА)