кабли – Kurir.mk

Грешка која сите ја прават: Ова не смеете да го вклучувате во ПРОДОЛЖЕН КАБЕЛ

Ристе Здравков — Mon, 28 Nov 2022 14:58:55 +0000

Дојдоа постудени денови, зимата е тука на прагот и сите се трудиме да ја стоплиме куќата. Секако, ова е периодот кога е зголемена употребата на греалки, но мора да запомните како тие треба правилно да се користат. Во зима поради лошо ракување со одредени апарати можни се пожари. Една од главните причини за пожари е грејачот вклучен во продолжен кабел. Ако е поврзан со продолжен кабел со други големи потрошувачи, тоа неизбежно може да доведе до несреќа. Сепак, можеби можете да го спречите тоа, а најважно е да ги проучите напоните. Имено, секој продолжен кабел не е ист и не ги поддржува напоните на симултано поврзаните уреди. Ако вашиот продолжен кабел не ги поддржува напоните, тогаш обидете се да ги преуредите уредите на поинаков начин. Значи, сè зависи од квалитетот на продолжениот кабел и напоните што ги поддржува.

Ограбен објeкт на МЕПСО во Новаци, украдена поголема количина кабел

Магдалена Андонова — Sun, 27 Nov 2022 17:03:32 +0000

На 26.11.2022 во 08.57 часот во СВР-Битола било пријавено дека во објект на МЕПСО лоциран во с.Новаци, била извршена тешка кражба при што бил одземена поголема количина кабел. Извршен бил увид од увидна екипа од СВР-Битола. Се работи на расчистување на случајот.

Кражба во Велес ќе станела трагедија: Сечел кабли од трафостаница, па настанала експлозија

Ивана Ефремовски — Wed, 09 Nov 2022 11:18:32 +0000

На 08.11.2022 во 10:00 часот, полициски службеници од СВР Велес го лишиле од слобода С.М.(44) од Велес. Тој се сомничи дека на 05.11.20222 околу 22:40 часот на ул. „8-ми Септември“ во Велес со употреба на алат се обидел да изврши „тешка кражба“ од трафостаница на ЕВН, но не успеал. Притоа, настанала експлозија откако се обидел да исече кабли. Лицето е приведено во полициската станица во Велес и по целосно документирање на случајот ќе следи соодветна пријава.

Крадци на кабли од АНБ ги оставија без струја агенцијата за храна и платежната агенција

Магдалена Андонова — Sat, 08 Oct 2022 18:29:45 +0000

Кражба на кабли од трафостаница причина за проблеми со струјата во две државни институции. Два дена Агенцијата за храна и ветеринарство не функционирала целосно бидејќи од празниот објект до нив кој е во сопственост на Агенцијата за национална безбедност во средата оперирале крадци. Украле и бакарни делови кои ги напојувале со електрична енергија соседните две згради и 120 вработени во АХВ наместо тоа што треба два дена средувале архива и пошта. -Бидејќи немавме стабилно, односно никакво напојување со електрична енергија, вработените а и информативниот систем не беше во функција и немаше пристап овие два дена да ги користат информациите, изјави за Сител, Илија Георгиев, раководител на одделение за работи поврзани со директорот во АХВ Спроти АХВ е и Агенцијата за финансиска подрршка во земјоделието, но оттраму ни одговорија дека имале варијанти за напојувањето со струја и системите работеле. -Проблемот со трафостаницата е саниран, а во понеделник ќе се направи проверка за настанатата штета на електронските уреди во агенцијата по што ќе биде констатирано што ќе биде предадено во МВР како записник. Објектот во сопственост на АНБ е празен со години. -стенд уп..Нефункционалната зграда е обрасната со трева, има искршени прозорци и врати, навечер нема осветлување и обезбедување и има лесен пристап за крадци. По овој случај каде штетата е најверојатно само на опремата чија проценка ќе ја прават заедно со осигурителна компанија, Агенцијата за храна и веринаство размислува да воведе 24 часовно обезбедување. -Ние сме кираџии овде, но мора да ги заштитиме и вработените и опремата оти никој не знае дали вакви настани можат повторно да се случат во иднина, вели Георгиев. Случајот со кражбата бил пријавен во МВР уште во четвртокот и оттаму ни одговорија дека работат на негово расчистување. На 06.10.2022 во СВР Скопје е пријавено дека биле одземени бакарни делови од трафостаница во деловен објект на бул.3та мак бригада. Полициски службеници извршиле увид и се преземаат мерки за расчистување на случајот, велат од МВР.

Украден кабел од влечен мотор од локомотива, истата повеќе не е во возна состојба

Ивона Петрова — Mon, 03 Oct 2022 12:29:54 +0000

Во кругот на ЖРСМ Транспорт АД-Скопје, денеска во Одделот за одржување на влечните средства, утврдена е извршена кражба на кабел од влечен мотор од локомотива серија бр. 642 и делови и кабли од манипулатор. -Поради кражбата на деловите и дополнителните оштетувања, оваа локомотова не е повеќе во возна состојба, со што е направена енормна штета на компанијата, имајќи ги предвид малиот број на возни средства со кои располага истата, се наведува во соопштението. Кражбата е пријавена до Министерството за внатрешни работи и утврдена е фактичката состојба од страна на Одделот на криминалистичка техника, со што е започната истражна постапка. -Бидејќи кражбата е извршена во кругот на ЖРСМ Транспорт АД-Скопје, стојат претпоставките дека оваа кражба не претставува ништо друго, туку саботажа на работењето на компанијата, велат од таму.

„Саботажа“ со неколку отсечени главни кабли се причина за големиот прекин на интернетот во Франција

Магдалена Андонова — Wed, 27 Apr 2022 11:34:56 +0000

Неколку мрежи кои ги поврзуваат интернет-инфраструктурите на големите француски градови беа прекинати во текот на ноќта, во многу краток интервал. Државен извор за неделникот „Обс“ тврди дека овај прекин е предизвикан од „координиран злонамерен чин“, јави дописникот на МИА од Париз. - Веќе немам интернет во моето место, реагираат корисници на интернет во Франција, каде нема повеќе ниту 4Г. Во утринските часови, многу Французи се пожалија на тешкотии во поврзувањето. Официјален државен извор за „Обс“ потврдува дека станува збор за „координиран злонамерен чин“, особено „сериозен“ и „многу редок“. - Очигледно е дека станува збор за саботажа и Обвинителството отвори истрага, вели истиот извор. Еден телекомуникациски инженер посочува дека „околу 3:20 часот, 3:40 часот и 5:20 часот, каблите на неколку оптички мрежи на долги растојанија биле делумно отсечени“. Тоа бил кабелот „од Париз до Стразбур, Лион и Лил“. Овие кабли со оптички влакна „на долги растојанија“ овозможуваат поврзување на големите француски градови едни со други, особено за инфраструктури, како што се центрите за податоци. Исто така, преку оваа мрежа циркулира фиксен пристап до Интернет (АДСЛ и оптички влакна) и одредени телефонски линии. Линијата Париз-Лион била прво пресечена, потоа Париз-Стразбур и Париз-Лил, со влијанија кои ги надминуваат овие големи градови и се шират на целата област. Извор во телекомуникациите за Обс вели дека пресекот на кабелот Париз-Лион се наоѓа на нивото на селото Ла Шапел-ла-Рен (Сена-ет-Марна) и поради тоа смета дека тоа е „чин на вандализам“. Исто така наведува дека тоа е „напад што може да се спореди со кибертероризам“. Во последниве години, зголемен број базни станици беа вандализирани (70 во 2020 година), но тоа не влијаеше на фиксниот интернет бидејќи важните кабли што ја носат мрежата минуваат низ непознати локации. Оваа состојба е многу загрижувачка бидејќи се работи за вистинска операција. Тоа може да бидат итри мали милитанти, како и многу посериозни. Жандармеријата ќе биде мобилизирана за набљудување на теренот, вели државниот извор за Обс. Веб-страницата Free-Reseau, која прикажува аномалии со операторот Фри, за денеска на пладне посочува 190 тешкотии при поврзувањето во Франција, главно концентрирани на северот и истокот на земјата, како и на југот. Слична опсервација има и од страницата Zone ADSL, која посочува 8.314 дефекти на фиксниот интернет во последните 24 часа и 1.123 дефекти на мобилните мрежи, кои главно влијаат на операторот Фри, а во помала мера и на СФР. Според информациите од страницата, кај Фри се деградирани 70 отсто од капацитетите. Сепак, операторот одби да коментира. На Твитер, Фри објави „повеќе злонамерни дејствија“ на инфраструктурата и дека сега се „ограничени“. Се претпоставува дека се поштедени мрежите на Оранж и Бујиг Телеком. „Некои телекомуникациски играчи укажуваат дека забележале прекини на интернет врските, тврдат од Бујиг Телеком, кој гарантира „дека не се користат врските засегнати од овие дефекти. „Од своја страна, СФР потврдува дека „линиите со оптички влакна кои се исечени околу Лион и во Ил-де-Франс“ веќе се поправаат. Враќањето во нормала не се очекува да се случи пред среда навечер. (МИА)

Фатени потпалувачи на кабли во Злокуќани

Ивона Петрова — Thu, 21 Apr 2022 11:11:50 +0000

Екипи на градските комунални инспектори при вршење редовна контрола пред објектот на поранешна Агромеханика во населбата Злокуќани затекнаа лица што спалуваа кабли. Веднаш се повикани полициски службеници со кои земени се податоци и против истите ќе биде покрената соодветна прекршочна пријава. Запаленото сметиште беше веднаш изгасено. Градските инспектори продолжуваат со засилените контроли на терен и сите затекнати сторители што ја загадуваат животната средина ќе бидат ригорозно санкционирани.

Фатена група која палела кабли под Кале

Ивана Ефремовски — Fri, 06 Sep 2019 06:32:17 +0000

Комуналните редари на Град Скопје фатиле група која нелегално пали кабли под Кале. Сторителите се соодветни казнети. Противпожарната бригада на Град Скопје на својата официјална Фејсбук страна изрази благодарност до Инспекторатот на Град Скопје. -Браво за Инспекторатот на Град Скопје, ова се потенцијали за настанување на пожар и загадување на нашиот град, пишува на Фејбук страната. ФОТО: МИА