Кахраманмараш – Kurir.mk

Силен земјотрес ја погоди турската провинција Кахраманмараш

Тале Кристо — Fri, 05 May 2023 19:21:40 +0000

Земјотрес со интензитет од 4,6 степени е регистриран денеска во југоисточната турска провинција Кахраманмараш, која беше епицентарот на разорните земјотреси на 6 февруари. Според владината Дирекција за управување со катастрофи и вонредни состојби (АФАД), земјотресот е регистриран во 17 часот и 52 минути, епицентарот бил во градот Ѓоксун, а неговата длабочина била 7,55 километри. Засега нема информации за причинета штета или за повредени лица. Според официјалните податоци, бројот на жртвите во разорните земјотреси во земјата на 6 февруари е повеќе од 50 илјади, а повредените се околу 115 илјади.

Девојка спасена од под урнатините 248 часа по земјотресот во Турција

Катерина Бојаџиева — Thu, 16 Feb 2023 11:20:52 +0000

Спасувачките екипи ја спасија 17-годишната Алејна Олмез во турската област Кахраманмараш од под урнатините на зграда, 248 часа по разорните земјотреси кои ги потресоа јужните делови на Турција, јави агенцијата Анадолија. На единаесеттиот ден од земјотресите, продолжуваат операциите за пребарување и спасување во овие подрачја. Спасувачките тимови ја лоцираа девојката која била затрупана под урнатините на зграда во подрачјето на Дукадироглу. По нејзиното лоцирање, спасувачите успеаја жива да ја извлечат 17-годишната Олмез која потоа е пренесена во болница. Два разорни земјотреси, првиот со интензитет од 7,7 степени по Рихтер, на 6 февруари наутро во 4:17 часот по локално време, со епицентар во округот Пазарџик, и вториот во 13:24 часот, со интензитет од 7,6 степени по Рихтер, со епицентар во местото Елбистан, ги потресоа јужните делови на Турција. Епицентрите на земјотресите се регистрирани во турската област Кахраманмараш. Фото: Анадолија

ФОТО+ВИДЕО: Македонскиот армиски тим се огласи од Кахраманмараш, еве каква е состојбата на терен

Ивона Петрова — Thu, 09 Feb 2023 11:36:47 +0000

Армискиот тим од Македонија, кој се наоѓа во градот Кахраманмараш, непрекинато е ангажиран во активностите за пребарување на теренот. Војниците работат на пронаоѓање и извлекување на евентуално преживеаните, кои се наоѓаат во рушевините настанати од катастрофалните земјотреси. -Даваме максимум со надеж дека ќе успееме да спасиме и извлечеме живи луѓе. Остануваме тука се додека е потребно и продолжуваме професионално да ги извршуваме задачите со цел и надеж дека ќе спасиме што повеќе луѓе и да ја покажеме нашата солидарност со Република Туркије, велат македонските војници. Во меѓувреме, дополнителниот армиски состав од 36 припадници од баталјонот за специјални сили обучени за спасување и пребарување во урнатини, денеска во претпладневните часови од касарната „Илинден“ во Скопје замина во Република Туркије.