Кајри Ирвинг – Kurir.mk

Кајри Ирвинг не можеше да игра против Мемфис поради проблеми со стапалото

Ивона Петрова — Tue, 31 Oct 2023 13:21:25 +0000

Еден од најдобрите кошаркари на Далас маверикс, Кајри Ирвинг, поради проблеми со стапалото не можеше да излезе на теренот на мечот со Мемфис гризлис. Маверикс решија да поштедат Кајри од игра во последен момент. Тежината на повредата не е соопштена. Во првите два натпревари од сезоната, Ирвинг имаше просек од 19,5 поени, 4,5 скока и 6,0 асистенции по натпревар. Натпреварот во Мемфис го доби Далас со 125:110. Далас маверикс има максимален ефект по првите три свои натпревари во новото издание на НБА-лигата.

Леброн Џејмс го напушта ЛА Лејкерс и заминува во Далас

Бошко Тасиќ — Tue, 06 Jun 2023 04:25:50 +0000

Кајри Ирвинг се обидува да го искористи своето пријателство со Леброн Џејмс за да го примами да се приклучи на Далас Маверикс, пренесуваат американските медиуми. Со тоа би се створил нов пеколен конкурент за титула на Западот кој во своите редови ќе го има и суперталентираниот Лука Дончиќ. Кајри Ирвинг и Леброн Џејмс веќе еднаш беа добитна комбинација за титула застанувајќи на патот на „династијата“ Голден Стејт во дресот на Кливленд. Но, за да создаде триото Леброн-Ирвинг-Дончиќ потребно е тројцата да прифатат и сериозно намалување на платите. Ирвинг е слободен играч, но „кралот Џејмс “ во договорот со Лос Анџелес Лејкерс има уште една сезона во која треба да заработи речиси 47 милиони долари со опција за продолжување на соработата и во сезоната 2024/25 за 50.6 милиони долари.

Далас сака да го задржи Кајри Ирвинг

Бошко Тасиќ — Wed, 05 Apr 2023 04:45:34 +0000

Кајри Ирвинг има договор со Далас Маверикс до крајот на оваа сезона, но франшизата од Тексас нема против да го задржи во своите редови и за во иднина, односно да ја продолжи соработката со него, тврди Bleacher report. И плејмејкерот е расположен да остане, но сака се да биде договорено пред стартот на преодниот рок за слободни агенти во текот на летото. Веројатно директните преговори ќе почнат по завршувањето на сезоната, а таа за Далас може да финишира веќе идната недела. Наводите на Bleacher report се спротивни на она што вчера го најави Шемс Чаранија кој рече дека Далас најверојатно ќе се ослободи од Ирвинг бидејќи сака да се фокусира на иднината и да биде активен во текот на летото. Ирвинг дојде во Мавс во февруари и досега има одличен ефект од 26,7 поени, 5,9 асистенции и 5,1 скок по меч. Сепак, по неговото доаѓање, Далас доживеа голем пад во формата и од четвртото, падна на 11. место во Западната конференција.

Кајри Ирвинг нов кошаркар на Далас

Бошко Тасиќ — Mon, 06 Feb 2023 05:39:31 +0000

Кајри Ирвинг ја продолжува кариерата во дресот на Далас маверикс, откако газдата Марк Кјубан успеа да се договори со Бруклин нетс околу размената на играчи со која повеќекратниот олстар кошаркар кариерата ќе ја продолжи во Далас. Според договорот меѓу клубовите, Бруклин ги доби Спенсер Динвиди, Доријан Дини Смит, како и изборот од првата рунда на драфтот во 2029 година што требаше да му припадне на Далас. Челниците на Бруклин не сакаа да се разделат од еден од своите најдобри кошаркари, но пресудeн беше фактот дека договорот на Ирвинг истекуваше на крајот од сезонава, па „мрежичките“ се најдоа во ситуација да мора да го пуштат да си замине ако сакаат да добијат барем нешто за возврат.

Три екипи во игра за ангажман на Ирвинг

Бошко Тасиќ — Sun, 05 Feb 2023 07:09:38 +0000

Кајри Ирвинг сака да го напушти Бруклин Нетс до крајот на актуелниот преоден рок, па може многу лесно да го видиме во нова средина во престојниве денови. Едната од опциите е да заврши на друго место до 9 февруари, додека другото е да остане во Нетс до крајот на кампањата и потоа како слободен играч да ја одбере новата средина. Според секогаш добро информираниот новинар Шамс Шаранија три екипи, организации се подготвени да спремат пакет за размена за Ирвинг и тоа се Лос Анџелес Лејкерс, Феникс Санс и Далас Маверикс. Во Лејкерс се Леброн Џејмс и Ентони Дејвис, Феникс како главна ѕвезда го има Девин Букер, додека во Далас е Лука Дончиќ.

Кајри Ирвинг побара „трејд“ и тоа веднаш

Бошко Тасиќ — Sat, 04 Feb 2023 05:53:00 +0000

По летната драма во Бруклин Кајри Ирвинг сега не сака повеќе да чека и побарал трејд, известуваат одредени американски медиуми. Или сега ќе го разменат или како слободен играч за неколку месеци, па Нетси нема да добијат ништо за него. Рокот за трансфер е деветти февруари, а Кајри се одлучи за заминување по неуспешните кратки разговори за нов договор. Се предвидуваше дека Ирвинг ќе добие околу сто милиони, но очигледно проблемите со коронавирусот и добро познатиот став на ѕвездата на „мрежичките“ за вакцинацијата, остави траги во односот на кошаркарот и клубот. Ирвинг сезонава настапи на 40 натпревари, со просек од 27,1 поени по натпревар.

НБА: Ирвинг со победа се врати по суспензијата

Магдалена Андонова — Mon, 21 Nov 2022 08:34:14 +0000

Во НБА лигата Бруклин на домашен терен го совлада Мемфис со 127-115 во натпревар што го одбележи враќањето на теренот по суспензијата на Кајри Ирвинг. Кошаркарот на Бруклин беше под суспензија од својот клуб од 27 октомври поради рекламирање филм со антисемитска содржина. Во својот прв натпревар по паузата, Ирвинг забележа 14 поени. Најефикасен во редовите на Бруклин беше Кевин Дуран со 26 поени, од кои 20 уфрли во второто полувреме. (МИА)

НБА-ѕвезда ќе ја заврши кариерата поради мега-скандалот

Бошко Тасиќ — Thu, 10 Nov 2022 05:52:51 +0000

НБА играчот Кари Ирвинг веќе неколку сезони е во центарот на вниманието, пред сè поради непромислените работи што ги прави и поради куп скандали отколку за кошарката. Долго време не можеше да игра за Бруклин Нетс поради одбивањето да се вакцинира, а сега е во големи проблеми поради антисемитските коментари кои ги даде, поради кои на крајот се извини. Бруклин Нетс наметнаа услови кои мора да ги исполни за да се врати на теренот, беше суспендиран и казнет, но сега од САД пристигнуваат вести дека по овие коментари Кари Ирвинг би можел да стави крај на својата кошаркарска кариера. Како што пренесува „Фејдавеј ворлд“, неговата пазарна вредност е нула и никој не го сака во својот тим. Вредноста на маркетинг планот е исто така нула, бидејќи Најк ги прекина сите спонзорства со него и остана без речиси ниту еден спонзор, а сега американските медиуми пренесуваат дека неколку неименувани генерални менаџери на НБА тимови сметаат дека кариерата на Кари е завршена и дека тој никогаш нема да игра повторно во најдобрата лига во светот!

Тој повеќе не вреди, а премногу е платен, изјави еден генерален менаџер за „Фејдавеј ворлд“, а друг додаде: „Мислам дека Кари никогаш повеќе нема да игра во НБА“.

Газдата на Бруклин реши – Ирвинг и Дурант на продажба

Бошко Тасиќ — Sun, 06 Nov 2022 16:01:59 +0000

Кајри Ирвинг беше суспендиран на најмалку 5 натпревари поради јавно промовирање на книга поврзана со антисемитизам, а потоа не се извини. Не само што не покажа каење, туку и продолжи да ги брани своите ставови. На крајот дојде извинување, но само кога лигата се сврти против него. Нетс го суспендираа до понатамошно известување, а неговото враќање на паркетот ќе зависи од неговите понатамошни чекори во форма на дејствија кон еврејската заедница во Бруклин. Договорот на Ирвинг вреден 37 милиони долари годишно истекува следното лето, а според американските медиуми поврзани со Нетс, клубот преку трејд ќе се обиде што поскоро да се ослободи од Ирвинг. Слична судбина може да го снајде и Кевин Дурент, близок пријател на Ирвинг. На почетокот на летото, Дурент побара трејд од Нетси и покрај тоа што потпиша нов повеќегодишен договор минатата година, а потоа го повлече барањето. Меѓутоа, бидејќи Дурент и Ирвинг се блиски пријатели, а Нетс не ја отвори добро сезоната, НБА тимовите ги реактивираа преговорите за трејдот поврзан со Дурент.

Кајри Ирвинг доби суспензија од Бруклин Нетс

Бошко Тасиќ — Sat, 05 Nov 2022 07:09:11 +0000

Кајри Ирвинг се најде во центарот на скандал, поради навредливи коментари кон Евреите и поддржување на филм со антисемитски елементи. Поради тоа кошаркарот јавно се извини, меѓутоа Бруклин Нетс сметаат дека тоа не е доволно, како и дека Ирвинг не ги отфрлил верувањата јавно и недвосмислено. Клубот реши да се обрати преку официјално соопштение, поврзано со непожелната ситуација. „Во текот на последните неколку денови константно се обидувавме да му помогнеме на Ирвинг да разбере колку неговите зборови и дела се штетни. Сметавме дека едукативниот пат е исправен и ќе напредуваме. Денес сме уверени во спротивното, Кајри во текот на конференцијата за медиумите не ги отфрли антисемитските верувања недвосмислено и не прифати дека во спорниот филм има недозволена содржина. Тоа не се случи првпат. Поради тоа што не се откажа јавно од омразата кон Евреите, а тоа за нас е вознемирувачки и е против верувањата на нашата организација, нашата одлука е дека во моментов не е пожелно Бруклин Нетси да се поврзани со Кајри Ирвинг“, стои во соопштението. Бруклин го суспендираше Кајри на барем пет натпревари, а во тој период тој ќе мора да мине серија поправни мерки за да може да се врати во тимот. Во периодот во кој нема да игра, Ирвинг нема да прима плата од Нетси.