Калин Ивановски – Kurir.mk

Калин Ивановски загуби од Кукушкин и остана без главната рунда во Бергамо

Бошко Тасиќ — Mon, 30 Oct 2023 18:09:49 +0000

Македонскиот тенисер Калин Ивановски ги заврши настапите на ИТФ-фјучрс турнирот во Бергамо, Италија, со елиминацијата во втората рунда од квалификациите. Ивановски се соочи со вториот носител Михаил Кукушкин од Казахстан, против кого доживеа пораз од 1-2 во сетови (6-3, 6-7, 4-6). Македонскиот ас го освои првиот сет, а во вториот се врати од 2-4, но загуби во тај-брејк. Во третиот решавачки сет, искусниот Кукушкин направи еден брејк. Кукушкин има 35 години и се наоѓа на 211 место на АТП-листата, а најдобриот ранг го имал на 39.место во февруари 2019 година.

Калин Ивановски во Белград тренира со Новак Ѓоковиќ

Бошко Тасиќ — Wed, 25 Oct 2023 04:33:40 +0000

Најдобриот македонскиот тенисер, Калин Ивановски, одработи тренинг со најдобриот тенисер во светот, Новак Ѓоковиќ. Ивановски ова го објави на својот профил на „Инстаграм“. Ивановски и Ѓоковиќ се знаат од порано, а во една прилика светскиот број 1 изјави дека би сакал да одигра меч со Македонецот.

Рана елиминација на Ивановски во Хамбург

Ивана Ефремовски — Mon, 16 Oct 2023 16:41:05 +0000

Македонскиот тенисер Калин Ивановски загуби попладнево од холандскиот тенисер Јеле Селс со 2-0 во сетови (6-2, 6-4) во воведното коло на Челинџер 50 турнирот во германски град Хамбург. Клучни за поразот на Ивановски на турнирот што се игра за награден фонд 36.000 евра се покажаа реализираните брејк топки од страна на Селс, кој искористи три од 10-те можности, додека Ивановски немаше брејк-топка во дуелот, кој траеше еден час и 27 минути. Ивановски оваа недела ја почна на 305. место на АТП листата што е негов најдобар пласман во кариерата. Македонскиот тенисер напредуваше 26 позиции, откако ги мина квалификациите на Челинџерот во Братислава и дојде до второто коло. (МИА)

Ивановски го бележи најдобриот пласман на АТП листата

Дарко Андоновски — Mon, 16 Oct 2023 07:39:54 +0000

Македонскиот тенисер Калин Ивановски има напредок од 26 позиции на најновата АТП ранг-листа објавена денес. Тој сега се наоѓа на 305. место, што е негов најдобар пласман во кариерата. Ивановски прогресот го направи со освоените 15 бодови и во моментов има 176. Претходно, највисок пласман на АТП-листата за Македонецот беше 306. Место. Лидер во поредокот е Новак Ѓоковиќ (Србија), пред Карлос Алкараз (Шпанија) и Данил Медведев (Русија).

Mакедонскиот тенисер Калин Ивановски успеа да избори пласман на главниот турнир на Челинџерот

Тале Кристо — Mon, 09 Oct 2023 17:27:02 +0000

Најдобриот македонски тенисер Калин Ивановски успеа да избори пласман на главниот турнир на Челинџерот од серијата 125 што се игра во Братислава. Ивановски попладнево во финалните квалификации го совлада победникот на годинашново издание на „Macedonian Open“, Унгарецот Мате Валкуж со 2-0 во сетови (6-3, 7-5) за 87 минути игра. До триумфот Ивановски стигна благодарение на искористените брејк шанси во мечот 3/6 за разлика од ривалот, кој имаше 1/4, а притоа Ивановски имаше и седум ас сервиси. Во првото коло од главниот турнир Ивановски ќе игра против искусниот 34-годишен Германец Петер Гојовчик, кој во финалните квалификации беше поуспешен од Акира Сантилан од Австралија со 2-0. Утрешниот противник на Ивановски триумфираше на турнирот во Братислава во 2014 година.

Ивановски елиминиран на стартот на фјучерсот во Каси

Тале Кристо — Mon, 04 Sep 2023 16:04:12 +0000

Најдобро рангираниот македонски тенисер на АТП листата, Калин Ивановски, експресно го заврши настапот на Челинџер 75 турнирот во францускиот град Каси, откако денеска беше поразен со 2-1 во воведното коло од осмиот носител Франциско Гаио од Италија. Ивановски добро го почна дуелот и поведе со 1-0 препуштајќи му на 31-годишниот Гаио само еден гем во првиот сет. Во продолжението италијанскиот тенисер направи целосен пресврт и со идентични 6-4 во преостанатите два сета го совлада Ивановски и обезбеди пласман во второто коло на фјучерсот што се игра за награден фонд од 73.000 евра. Ивановски за следната недела е пријавен на фјучерс турнир во Португалија.

Ивановски поразен од Португалецот Соуса на челинџерот во Мајорка

Ивана Ефремовски — Thu, 31 Aug 2023 09:03:30 +0000

Најдобриот македонски тенисер Калин Ивановски претрпе синоќа пораз во првото коло на Челинџер турнирот „Рафаел Надал Опен“ што се игра за награден фонд од 73.000 евра во Мајорка, откако загуби од искусниот 34-годишен Жоао Соуса (259 место АТП) со 2-0 во сетови (6-4, 7-6). Португалецот во текот на мечот кој траеше безмалку два часа ја чекаше секоја грешка на Ивановски и најчесто таквата игра му носеше резултат Во првиот сет Ивановски го загуби гемот на свој сервис во петтиот гем, па така Соуса поведе со 3:2, а потоа со 4:2. Македонскиот тенисер во осмиот гем не реализираше две брејк топки, па противникот дојде до предност од 5:3. Во следниот гем Ивановски спаси една сет топка, а потоа и не реализираше брејк шанса и сетот заврши со 6:4 во гемови за португалскиот тенисер, кој имаше еден брејк од три можности, а Ивановски 0/3. Во вториот сет до 3:3 беше нерешено без брејк. Соуса направи брејк во седмиот гем, а Ивановски го врати во осмиот гем и изедначи на 4:4. Така беше до крајот на сетот, па одлуката падна во тајбрејкот. По првите шест поени беше 5:1 за Соуса, а Ивановски намали на 6:4, а потоа спаси и една меч топка, но следната не успеа да ја спаси. (МИА)

Македонскиот тенисер Калин Ивановски на 330 место на АТП листата, пад од 23 позиции

Тале Кристо — Mon, 28 Aug 2023 13:48:08 +0000

Новата АТП листа поради денешниот старт на УС Опен беше објавена ден порано, а на неа најдобриот македонски тенисер Калин Ивановски има пад од 23 позиции и сега се наоѓа на 330. место со 162 поени. Падот се должи на тоа што оваа недела Ивановски не играше, а во истиот период лани победи на турнирот во Монастир што беше негова прва турнирска победа. Сега има 14 помалку од претходната недела. Со ист број поени другите македонски тенисери имаа мали поместувања нагоре на листата. Горазд Србљак се наоѓа на 1131. место со 8 поени (скок три места), а Обрад Марковски е рангиран на 1216. место со 6 поени (скок 8 места). Овие двајца играчи од вторник ќе бидат дел од фјучрс турнирот што ќе се игра во Куршумлијска Бања во Србија, додека Калин Ивановски ќе настапи на Челинџер турнирот во Мајорка каде за противник во првото коло ќе го има Жоао Соуса од Португалија (34. год, 259. место АТП).

Ивановски: Одиграв неверојатен турнир

Бошко Тасиќ — Mon, 31 Jul 2023 04:19:54 +0000

Најдобриот македонски тенисер, Калин Ивановски го освои својот втор турнир со награден фонд од 25.000 долари откако триумфираше во Крамасх, Австрија. Ивановски по освојувањето на турнирот изрази надеж дека следните победи ќе му бидат на уште повисоко ниво, на Челинџер и АТП турнири. „Благодарност до сите за организацијата на турнирот. Секако и до мојот денешен ривал Жерар, против кого се надевам дека ќе играм и во иднина. Особено што двајцата сме млади и можеби следните мечеви ќе ни бидат на Челинџер или на АТП турнири. Одиграв неверојатен турнир. Имав добри мечеви, а притоа „морав“ да победам и неколку домашни тенисери“, изјави Ивановски при прогласувањето.

Македонска гордост: Калин Ивановски е победник на турнирот во Австрија

Ивана Ефремовски — Sun, 30 Jul 2023 12:40:50 +0000

Најдобриот македонски тенисер Калин Ивановски е победник на турнирот што се одржуваше во Крамзах, Австрија. Македонецот денес во финалето го победи Џерард Кампана Ли од Јужна Кореја, со 2:0. Во двата сета Ивановски беше подобар и ги реши со 6:2. Ивановски кој е 335. На АТП ранг-листата беше втор носител на турнирот кој се играше за награден фонд од 25 илјади долари. Ли е 601. На АТП рангирањето. Ова е втор трофеј за македонските тенисер. Претходно победи на турнир во Скопје минатиот месец. (МИА)