камбоџа – Kurir.mk

Расте бројот на загинати во пожарот во казино во хотел во Камбоџа

Ивона Петрова — Thu, 29 Dec 2022 13:20:00 +0000

Најмалку 19 лица ги загубија животот во пожарот во казино во хотелот „Гранд Дајмонд Сити“ во камбоџанскиот град Појпет, на границата со Тајланд, соопшти денеска полицијата. Како што пренесува Си-Ен-Ен, најмалку 70 лица се повредени, а неколку десетици се водат како исчезнати. Според полицијата, пожарот избувнал околу полноќ по локално време. Се претпоставува дека пожарот бил предизвикан од експлозија на резервоар за гориво. Претставник на локалната администрација рече дека 400 луѓе би можеле да бидат заробени во зградата.

ФОТО: Пожар проголта хотел-казино, најмалку 10 загинати

Ивона Петрова — Thu, 29 Dec 2022 07:35:00 +0000

Најмалку десет лица загинаа синоќа во пожар во хотел-казино на западот на Камбоџа, во град на границата со Тајланд, соопшти локалната полиција. Во пожарот што избувна синоќа околу 23 часот и 30 минути по локално време во градот Попе, десет лица загинаа, а 30 се повредени. Повредените се пренесени во болниците во соседната тајландска провинција Сао Каео, изјави извор од Министерството за надворешни работи на Тајланд. -Властите се обидоа да го стават под контрола пожарот со помош на противпожарни возила кои дојдоа од Тајланд, рекол изворот. Еден од тајландските спасувачи изјави дека пожарот брзо се проширил во катниот хотел-казино, поради тепихот. Во моментот на пожарот во зградата имало странски државјани, јавуваат локалните медиуми.

Експерти за деминирање од Камбоџа ќе обучуваат Украинци

Ивона Петрова — Thu, 03 Nov 2022 07:27:16 +0000

Експерти за деминирање од Камбоџа ќе обучуваат украински воени инженери. Премиерот на Камбоџа, Хун Сен информираше дека ќе испрати специјалци во Украина во соработка со Јапонија. Генералниот директор на Центарот за деминирање на Камбоџа, Хенг Ратана појасни дека неговата агенција ќе ја испрати првата група во Украина во почетокот на декември, а втората може да биде испратена во првиот квартал од 2023 година. Камбоџа во светот е позната како една од земјите со најмногу мини, по речиси 30 години војна што заврши во 1998 година. Оттогаш се пронајдени и уништени голем број мини, како и други неексплодирани средства, што значително го намали бројот на жртви.

Трагедија во Камбоџа: Најмалку деветмина ученици се удавија при превртување на брод

Ивана Ефремовски — Fri, 14 Oct 2022 09:38:23 +0000

Најмалку деветмина ученици се удавија при превртување на брод во јужниот дел на Камбоџа. Спасени се четири лица, ученици и членови на екипажот. Во тек е потрагата по двајца ученици, соопшти тамошната полиција. Од полицијата појаснија дека на бродот, што ја преминувал реката Меконг, имало повеќе лица од дозволеното, а во него немало елеци за спасување. Учениците на возраст од 12 до 14 години, живееле на речен остров и го користеле бродот речиси секојдневно за време на сезоната на дождови. Во сушниот период, реката има малку вода или воопшто ја нема. (МИА)

Пиеле алкохол за дезинфекција, починаа седум лица во Камбоџа

Ивона Петрова — Sat, 13 Nov 2021 10:40:02 +0000

Министерството за здравство на Камбоџа денеска соопшти дека седум работници починале откако испиле алкохол наменет за дезинфекција, кој го помешале со вода и безалкохолни пијалаци. Работниците се вратиле од Тајван и биле ставени во карантин поради епидемијата на коронавирусот, соопшти Министерството. Се додава дека поради труење во болница се префрлени 12 работници. Пациентите се жалеле на главоболка, вртоглавица и отежнато дишење. Експертите зеле примероци од пијалакот и ги однеле на анализа во лабораторија.

Њујорк Тајмс ја закова Македонија на дното по бројот на вакцинирани лица – од нас подобри се и пропаднати држави како Либан, Ел Салвадор

Тале Кристо — Thu, 06 May 2021 07:25:13 +0000

Престижниот „Њујорк Тајмс“ ја рангираше Македонија на дното по бројот на вакцинирани лица на 100 жители. Она што е интересно во целата ситуација, е фактот што некои пропаднати држави како Либан, Ел Салвадор, Камбоџа и други се подобро рангирани по бројот на вакцинирани лица на 100 жители. Имено, како што објави „Њујорк Тајмс“ во Македонија на 100 жители досега вакцинирани 3 лица, со што не става на самото дното по бројот на вакцинирани лица. За споредба, еден Либан досега на 100 лица вакцинирани се 6,9 лица, Ел Салвадор 14 лица на 100 жители, Камбоџа растргната од војни со 15 лица на 100 жители, Монголија 48, а исто така и Молдавија е подобро рангирана од Македонија и тоа со 5.5 лица по жител. Македонија, според „Њујорк Тајмс“ е на самото дно со само 3 вакцинирани лица на 100 жители, со што уште еднаш се потврдува неспособноста на Владата и на министерот за здравство со справувањето со коронакризата. Инаку, вкупната бројка на КОВИД-дијагностицирани лица во Република Македонија од почетокот на епидемијата изнесува 153.137, бројката на оздравени пациенти е 135.367, на починати е 5.016, а бројот на активни случаи изнесува 12.754.

Цела година по почетокот на пандемијата: Оваа држава го регистрира ПРВИОТ смртен случај од коронавирус

Ивана Ефремовски — Thu, 11 Mar 2021 12:47:17 +0000

Во Камбоџа е регистриран првиот смртен случај од коронавирус, една година по избувнувањето на пандемијата, а се работи за 50-годишен маж кој бил заразен минатиот месец и работел како возач во кинеска компанија во крајбрежната провинција Сихануквил. Во Камбоџа досега се регистрирани само 1.163 случаи на коронавирус, но земјата се бори со нова локална епидемија во која се заразени неколку стотици луѓе. Според Министерството за здравство, новата епидемија започнала со странски студент кој ја прекршил мерката за карантин и на почетокот на февруари го напуштил хотелот и отишол во ноќен клуб. Тоа предизвика нови случаи на зараза по што Владата на 20 февруари прогласи двонеделно затворање на сите училишта, кина, барови и забавни институции во Пном Пен. Оттогаш, камбоџанската Влада го продолжи затворањето за уште две недели за училишта, спортски сали, концертни сали, музеи и други објекти за забава во главниот град, но исто така и во блиската провинција Кандал и провинцијата Сихануквил. Министерството за здравство денеска соопшти дека се пријавени 39 случаи на локално пренесување на вирусот. Како што расте епидемијата, еден луксузен хотел во главниот град е претворен во ковид-болница со 500 соби, а властите спроведуваат нов закон со кој се изрекуваат кривични казни за кршење на здравствените правила. Земјата почна кампања за вакцинација во февруари со 600.000 дози на кинеската вакцина Синофарм. Исто така, овој месец доби 324.000 дози од вакцината АстраЗенека, донирана и произведена од Индија.(МИА)

ФОТО+ВИДЕО: Најосамениот слон на светот доби ново живеалиште во Камбоџа

Ивона Петрова — Tue, 01 Dec 2020 11:33:17 +0000

Каван, „најосамениот слон на светот“ откако години минуваше сам во пакистанска зоолошка градина, денеска беше пречекан во Камбоџа со радост од будистички монаси во Камбоџа, а потоа и испратен на патување во резерват за животни. Настанот е организиран од групата „4 шепи“ – со седиште во Виена. Како и сите други „патници“ на денешнинава, и слонот мораше да се тестира за Ковид-19 пред авионскиот лет. По качувањето, Каван при седумчасовното патување доби и 200 килограми „грицки“. – Слонот не беше под стрес за време на летот, јадеше, па дури и поспа додека стоеше во неговиот кафез, рече Амир Калил, ветеринар кој го придружуваше животното на летот. Со помош на Халил, Каван изгуби 1.000 килограми во последниве три месеци. Животното е старо 36 години. Каван е всушност подарок од Шри Ланка за Пакистан, дарен во 1985 година. Тој живееше во Зоолошката градина во Исламабад со неговата партнерка Сахели, која почина 2012 година. Зоолошката потоа, последниве години падна во тешка криза, а условите станаа толку ужасни што судот во пакистанскиот главен град нареди Зоолошката да се затвори во август. Состојбата на слонот го привлече светското внимание, вклучително и интересот на американската пејачка и глумица Шер, која учествуваше во неговото спасување и беше во Камбоџа поради доаѓањето на Каван. Според здружението, многу малку возрасни слонови претходно биле преместени со авион, па затоа подготовките за ова биле тешки. Откако ќе се навикне во новата природна, но сепак – контролирана средина, Каван ќе биде пуштен во засолниште за диви животни во северна Камбоџа, каде што околу 600 азиски слонови живеат „во мир и тишина“, соопштија тамошните власти.

Уапсен синдикален лидер во Камбоџа поради коментар за Виетнам

Магдалена Андонова — Sat, 01 Aug 2020 11:02:40 +0000

Претседателот на Камбоџанската конфедерација на синдикати Ронг Чун синоќа е приведен под обвинение дека поттикнувал немири со своите коментари за политички чувствителна тема за границата на Камбоџа со Виетнам. Чун денеска ќе биде сослушан, а доколку биде прогласен за виновен може да добие казна од шест месеци до две години затвор и парична казна од 244 до 976 долари. Според полицијата Чун е уапсен на барање на Општинскито суд во Пном Пен под обвинение дека давал неточни информации за границата помеѓу Камбоџа и Виетнам. Чун минатата недела за Радио Слободна Азија зборуваше за состанокот со земјоделците од источниот дел на Камбоџа, кои се пожалиле дека соседен Виетнам го прекршил законот на нивната држава. Прашањето за претензиите на Виетнам кон територијата на Камбоџа е чувствително политичко прашање поради историскиот антагонизам помеѓу двете соседни држави. Владата на премиерот Хун Сен одржува блиски односи со Виетнам, поради што неговите политички опоненти го обвинуваат дека не успева да ја заштити територијата на Камбоџа. Чун во средата ги предводеше работници од една фабрика до резиденцијата на премиерот Сен, кои побараа помош бидејќи фабриката е затворена поради пандемијата со Ковид-19. Во Виетнам во изминатите години уапсени се повеќемина истакнати опозициски лидери врз различни обвинувања. (МИА)

Се урна зграда во Камбоџа, двајца загинати, 17 повредени

Ивана Ефремовски — Fri, 03 Jan 2020 14:39:23 +0000

Најмалку две лица загинаа, а 17 се повредени денеска откако се урна седумкатница во изградба во јужниот дел на Камбоџа, соопшти полицијата. Зградата во приморската провинција Кеп се урна додека 20 работници биле внатре, од кои некои биле на пауза, изјави провинциски полицаец. Според заменик шефот на полицијата Нгуон Самет, 17 работници се спасени. Некои од нив се во критична состојба, а некои се полесно повредени. Самет рече дека зградата најверојатно се урнала додека на највисокото ниво е излеван бетон. Продолжува потрагата по работниците кои и натаму се водат како исчезнати. Премиерот на Камбоџа Хун Сен напиша на Фејсбук дека наскоро ќе ја посети провинцијата Кеп. (МИА)