Карл Нехамер – Kurir.mk

Нехамер: Да се спречи проширување војната во Централна Европа

Тале Кристо — Tue, 23 Aug 2022 13:01:15 +0000

Сега е важно да се направи се војната од источните граници на Европа да не се прошири во централниот дел на континентот, изјави австрискиот канцелар Карл Нехамер на отворањето на Европскиот форум Алпбах. Тој нагласи дека поради тоа е важно на целиот Западен Балкан да му се даде соодветна перспектива. Австрискиот канцелар се заложи за продолжување на преговорите за украинскиот конфликт, додавајќи оти набрзо нема да заврши војната, но дека е неопходно да се одржува контакт со Русија. Тој наведе дека е оправдано да се постави прашањето дали санкциите повеќе ја засегаат Русија отколку ЕУ.

Нехамер гледа пробив во решавањето на спорот меѓу Македонија и Бугарија

Ристе Здравков — Sat, 25 Jun 2022 07:26:52 +0000

Австрискиот канцелар Карл Нехамер смета дека бугарскиот парламент направил пробив со вчерашната одлука „да се откаже од ветото“ за отворање на пристапните преговори со Северна Македонија во ЕУ. Тој му честиташе на бугарскиот премиер во заминување Кирил Петков за неговата лична заложба за решавање на ова прашање. Според Нехамер, одлуката на бугарскиот парламент отвора нови можности и го забрзува решавањето на спорот. Сепак, канцеларот очекува дискусии на македонската страна. „Верувам дека прашањето може да се реши“, изјавил Нехамер.

Нехамер: Босна и Херцеговина уште годинава може да добие кандидатски статус за членство во ЕУ

Ивона Петрова — Fri, 24 Jun 2022 06:09:44 +0000

Босна и Херцеговина може уште годинава официјално да добие кандидатски статус за членство во Европската Унија, истакна синоќа австрискиот канцелар Карл Нехамер. Тој, по Европскиот совет, изјави дека има промена на парадигмата. Според него, Босна и Херцеговина повторно се најде во фокус, иако Украина и тамошната војна се доминантни теми. Тој потсети дека земјата мора да спроведе 14 реформски точки, бидејќи досега направила премалку. Доколку земјата сега ја спроведе реформата на изборниот закон и Уставот, Нехамер е уверен дека тогаш има јасна шанса да добие кандидатски статус, а штом ги исполни сите 14 претходно поднесени барања, можно е да започне и пристапни преговори. Нехамер пренесе дека од Самитот е испратена порака до Европската Комисија да се забрза процесот за кандидатите. – Тоа уште годинава ќе донесе резултати, смета австрискиот канцелар.

Нехамер: Пристапните услови за Украина мора да важат и за земјите од Западен Балкан

Катерина Бојаџиева — Thu, 23 Jun 2022 06:14:48 +0000

Австрискиот канцелар Карл Нехамер изјави дека пристапните услови за Украина мора да важат и за земјите од Западен Балкан, посебно за Босна и Херцеговина. Тој додаде дека Австрија на ниво на ЕУ ќе се залага за тоа. Нехамер истакна дека по доделувањето на статус кандидат на Украина и на Молдавија во ЕУ се воведува нова постапка, во која уште пред исполнување на критериумите на Унијата се добива кандидатски статус. – Тоа мора да важи и за другите земји-кандидати од Западен Балкан. Неопходни се и јасни сигнали за Северна Македонија и за Албанија, посочи Нехамер.

Нехамер: Австрија беше, е и ќе остане неутрална, членството во НАТО не е опција

Тале Кристо — Tue, 17 May 2022 19:35:57 +0000

Австрискиот канцелар Карл Нехамер денеска во Прага истакна дека членството во НАТО за Австрија не доаѓа предвид. -Австрија беше, е, и ќе остане неутрална, рече тој за време на посетата на Чешка. Според Нехамер, не се поставува прашањето за членството на Австрија во НАТО, бидејќи, како што кажа, има сосема поинаква историја од Шведска и Финска. Тој потсети дека двете земји се прогласиле за неутрални и имаат заедничка граница со Русија. -Затоа постои разбирање дека тие сакаат да се приклучат кон воената алијанса, но за Австрија тоа не доаѓа предвид, нагласи Нехамер. Канцеларот кажа и дека Австрија е целосно солидарна со Украина во рамките на ЕУ. Австриската министерка за одбрана Клаудија Танер, исто така, истакна дека секоја земја сама треба да одлучи дали ќе влезе во сојуз. Во Австрија, посочи таа, состојбата уставно-правно е јасна и неутралноста е дел од Уставот. Танер, исто така, кажа и дека „неутралноста е во срцата на Австријците“.

Премиерите на Австрија и Чешка потенцираат дека Западен Балкан не смее да се заборави поради Украина

Тале Кристо — Tue, 17 May 2022 14:20:11 +0000

Австрискиот канцелар Карл Нехамер и чешкиот премиер Петр Фијала денеска во Прага најавија дека ќе работат заедно за да постигнат „јасна промена“ во европската интеграција на Западен Балкан бидејќи регионот не смее да биде заборавен поради војната во Украина. Говорејќи на заедничката прес-конференција по средбата, Нехамер рече дека побарал од Фијала Чешка да не го губи од вид Западен Балкан. – Светската јавност е концентрирана на војната во Украина, а на Балканот нема толкаво внимание. Јасно е дека на Украина и треба поддршка и солидарност, но и на Западен Балкан, рече австрискиот канцелар. Нехамер, кој го посети Западен Балкан, го информираше чешкиот премиер за согледувањата од тоа патување и предупреди дека многу тензичната ситуација во Босна и Херцеговина бара внимание од ЕУ. – Не сакам Западен Балкан да има чувство дека ја заборавивме неговата кандидатура за ЕУ поради Украина, рече Нехамер. Чешкиот премиер Фијала му се заблагодари на Нехамер за ветувањето за поддршката на Чешка да биде успешна во еден од најавените приоритети на нејзиното претседавање со ЕУ – постигнување опиплив и конкретен чекор кон приемот на Западен Балкан во ЕУ и, во случајот на Србија, датум за евентуален влез во ЕУ. – Го решававме и прашањето за чешкото претседателство со Унијата и интересите на европските земји кои имаат некаква врска со руската агресија врз Украина. Еден од нив е напредокот во европската интеграција на Западен Балкан. Го поздравувам големиот ангажман на Австрија и лично канцеларот. Тој понуди поддршка за Чешка за да направиме исчекор во тој поглед, рече Фијала. Нехамер и Фијала разговарале и за прашањето за санкциите против Русија и за последиците од можното ембарго на руската нафта и гас во Австрија и Чешка. Нехамер рече дека ембаргото на гас за Австрија и Чешка „не доаѓа предвид“, бидејќи истите услови „мора да важат за сите земји од ЕУ“. Австрија, Германија и Чешка признаваат дека гасот е важен и ако другите европски земји сметаат дека нафтата е важна, мора да важат истите услови, рече Нехамер. Тој предупреди дека ослободувањето од зависноста од рускиот гас не може да се постигне преку ноќ и дека ЕУ мора да одреди услови прифатливи за нејзините членки.

Нехамер и Шолц нагласија дека санкциите против Русија нема да се ублажат

Ивона Петрова — Fri, 01 Apr 2022 05:38:36 +0000

Германскиот и австрискиот канцелар Олаф Шолц и Карл Нехамер се изјаснија против целосно ембарго за увоз на гас и нафта од Русија, но рекоа дека нема да има олеснување на санкциите. – Санкциите имаат смисла само ако го погодат оној што треба да го погодат, а не да ги ослабат оние што ги воведуваат, објасни Нехамер на заедничката прес-конференција во Берлин. Тој рече дека е страшно чувството да се биде зависен од рускиот гас, но неговата задача како канцелар е да се грижи за енергетската безбедност на Австрија. Во врска со најавата на претседателот на Русија, Владимир Путин, дека гасот од неговата земја во иднина ќе треба да се плаќа во рубљи, Нехамер рече дека чека писмено известување, па дури потоа ќе го каже својот став. Сепак, тој рече дека санкциите никако нема да се ублажат. Шолц истакна дека Германија ги погледнала договорите и оти тие наведуваат дека се плаќа во евра, што, како што вели, му го пренел и на Путин дека така ќе остане. – За европските компании важи дека можат, сакаат и ќе плаќаат во евра, рече тој. Шолц претходно најави дека Германија ќе ја отстрани зависноста од рускиот гас и нафта во текот на годината. Нехамер информира дека од почетокот на војната во Украина, Австрија не увезува нафта од Русија, а јаглен не увезува долго време. Шолц и Нехамер се согласија да ги усогласат своите ставови и го повикаа Путин да го прифати примирјето, да обезбеди граѓаните да добијат хуманитарна помош и да се ангажира во вистински мировни преговори.

Нехамер: Австрија беше и останува неутрална

Тале Кристо — Tue, 08 Mar 2022 10:07:18 +0000

Австрискиот канцелар, Карл Нехамер денеска изјави дека има намера да работи на тоа својата земја да ја задржи неутралноста во светлината на војната и рускиот напад врз Украина. -Австрија беше неутрална, таа е неутрална и таква ќе остане, изјави Нехамер за време на посетата на Катар. Неутралноста е важна, истакна австрискиот канцелар, додавајќи дека прашањето за австриската неутралност го смета за затворено. Спротивставувајќи се на се што стои зад војната во Украина, австриските политичари и медиумите почнаа да се прашуваат дали земјата треба да влезе во НАТО.

Напаѓачот во Виена бил симпатизер на ИД

Ивона Петрова — Tue, 03 Nov 2020 06:56:20 +0000

Синоќешниот напад во Виена беше „исламистички терор“ и однесе три животи, изјави австрискиот министер за внатрешни работи Карл Нехамер на прес-конференција одржана рано утрово. Нехамер рече дека полицијата пронашла јасни докази оти напаѓачот кој беше застрелан непосредно по почетокот на нападот „е радикализирана личност и симпатизер на Исламска држава“. Министерот рече дека полицијата била во можност брзо да го идентификува мртвиот напаѓач и открила докази при претрес на неговиот стан и видеа испратени од сведоци. Официјални лица одбија да го откријат идентитетот на осомничениот бидејќи сè уште траат истраги, а полицијата не ја исклучи можноста други напаѓачи да се сè уште во бегство. Полицијата ги повика луѓето да продолжат да на излегуваат од дома. Нехманер рече дека Австрија нема да толерира таков напад врз демократските слободи на земјата. – Нема да дозволиме нашите слободи и основни права да бидат украдени со такви напади, подвлече тој.

Полицијата во Виена застрела еден напаѓач, по друг се трага

Ивона Петрова — Tue, 03 Nov 2020 06:37:15 +0000

Министерот за внатрешни работи на Австрија, Карл Нехамер синоќа изјави дека е убиен еден напаѓач, кој го изврши терористичкиот напад во Виена, и дека полицијата во моментов трага по барем еден соучесник. – Ова е најтешкиот ден за Австрија во последните неколку години. Се соочуваме со терористички напад, со обем што Австрија досега не се соочила, изјави Нехамер на вонредна прес-конференција. Тој нагласи дека специјалните полициски единици успеале да елиминираат еден тешко вооружен терорист и дека, според последните информации, барем уште еден напаѓач е во бегство. Поради тоа, тој апелираше до граѓаните да не ги напуштаат своите домови, доколку тоа е можно, освен ако не постојат деловни причини. – Избегнувајте го центарот на градот, изјави Нехамер.