казина – Kurir.mk

Албански опозициски фронт: Груби и ДУИ со основањето на нови три казино компании ги внесуваат коцкарниците во нашите домови

Ивана Ефремовски — Tue, 26 Sep 2023 14:06:44 +0000

Претседателот на Демократското движење, Изет Меџити денеска соопшти дека на 11 септември државата објавила одлука и јавен повик за основање нови три казино компании. Според него, овие казино компании, кои ќе бидат во доминантна државна сопственост, ќе овозможат коцкање на интернет, на телефони, таблети и домашни комјутери. -Одлуката е одобрена од Владата, со потпис од Артан Груби, човекот кој во сенка стои зад секое казино низ државата. Коцката ќе ни влезе дома. Ако досега требаше да одите во казино, после овие одлуки на Артан Груби и Владата, казиното ќе дојде дома, со само неколку клика на интернет. Зад овие одлуки и бизниси стои ДУИ, стои Артан Груби. Скоро и да нема казино компанија во оваа држава во која нема луѓе од најблиското опкружување на Артан Груби. Се ќе се дознае, за се има време. Клиентелистите во ДУИ предводени од Артан Груби се опседнати со својот сон да станат ологархија, но не со чесна работа или печалбарство, туку со грабеж од државата, а сега и со грабеж директно од парите на граѓаните, рече Меџити, кој беше шридружуван од претседателит на Движењето Беса и Алтернатива, Биљал Касами и Африм Гаши. Тој најави дека тие како здружена албанска опозиција остро се спротиставуваат на ширењето на заразата со казината и ќе се борат против тоа. -Владата со оваа одлука под ризик ги става сите наши деца. Секој родител ќе стравува дека зависноста од коцкање овој пат ќе влезе дома преку телефоните, таблетите и компјутерите на нашите деца. Тие најмногу време поминуваат на интернет. Не се прават фабрики за нашите луѓе. Не се градат болници, училишта. Нема стадиони и игралишта за нашите деца. Ама има казина и коцкарници. ДУИ треба да погледне наоколу. Зар не гледате дека во индустриската зона во Илинден се градат фабрики, а во Визбегово, благодарение на ДУИ, на патот кон Косово се градат коцкарници. Има ли граници алчноста за пари? Одговорноста за порастот на последиците од оваа крајно негативна општествена девијација има име и презиме, Артан Груби, рече Меџити. Потенцира дека како Здружена албанска опозиција ќе побараат одговорност и нема да дозволат уништување на младината. Побара игрите на среќа да се стават под строга контрола и далеку од домовите. (МИА)

Младината на фракцијата на ДУИ бара казината и обложувалниците да бидат одалечени три километра надвор од населените места

Ивана Ефремовски — Tue, 18 Apr 2023 12:16:03 +0000

Младината на фракцијата на Демократската унија за интеграција денеска на прес-конференција побара од Владата казината и обложувалниците да бидат одалечени три километри надвор од населените места, а не 500 метри како што стои во Предлог-законот за игрите на среќа, кој е во собраниска процедура. Јетмир Асани, потпретседател на младината на фракцијата на ДУИ истакна дека ако Владата не одговори на ваквите барања тие ќе преземаат дополнителни чекори користејќи различни демократски методи како протести и маршови за, како што рече, да го запреме ова зло во општеството. -Младите се иднината на една држава, но денес за жал, мораме да потсетиме дека во оваа држава оваа Влада не отсече од агендата, а со нас играат баш како игри на среќа кои од ден на ден се отвораат во форма на казина и обложувалници. Од овде сакаме да алармираме денес освен што секојдневно не терате да ја напуштиме државата и да го фатиме патот за странство, дополнително со игрите на среќа ни го ставате злото на врата. Наместо да ни отворате библиотеки, работни места или младински центри, вие ни отворате обложувалници. Ни ја загрозувате иднината како млади луѓе. Ја загрозувате нашата финансиска состојба, како и нашиот ментален мир. Чувствувавме загриженост што ќе се формира нова видео лотарија од страна на Владата, со што подразбираме дека апаратите ќе ги имаме насекаде, наместо да имаме младински центри или центри за иновации. Дали разбирате дека младите се поподложни на влијанието на коцкањето отколку возрасните?, рече Асани. Тој соопшти и податоци од анкета спроведена од Движењето Анти-коцкање за влијанието на игрите на среќа врз младите, во кое се забележува дека 58 отсто од анкетираните млади барем еднаш играле казино, обложувалници или онлајн казино. Посочи дека уште поалармантни се податоците од оваа анкета во која се вели дека 67 отсто од испитаниците изјавиле дека првпат играле на возраст од осум до 18 години. -Во Северна Македонија имаме повеќе од 1200 казина, обложувалници и онлајн казина. Додека имаме 109 средни училишта, 227 библиотеки и 20 младински центри, што значи три пати повеќе. Затоа решивме да реагираме на оваа одлука на извршната власт и ги поттикнуваме нашите министри и нашата Влада да размислат повеќе за изградба на можности за младите да се развиваат во својот академски и социјален живот, рече Асани. (МИА)

Лихтенштајн на референдум ќе одлучува за казината

Тале Кристо — Fri, 20 Jan 2023 13:26:45 +0000

Лихтенштајн, познат по прекарот „Лас Вегас Алпа“, ќе мора да ги затвори своите шест казина доколку се изгласа референдумот закажан за 29 јануари. Поддржувачите на овој референдум тврдат дека новата индустрија ризикува да му наштети на угледот на земјата, бидејќи сега се на меѓународната црна листа на земји кои се сметаат за „даночен рај“ поради релаксираните закони за коцкање. „Не сакаме да се етаблираме како казино и жариште за покер во Европа“, рече застапникот за референдум Гидо Мајер. Претседателот на казината во Лихтенштајн, Рајнхард Фишер рече дека тие работат во рамките на законот и во некои случаи над нивото што го бара законот. Минатата година даноците од патувања, главно на странските посетители на казината во Лихтенштајн и донеле на државата 50 милиони швајцарски франци. „Ова е приход кој е важен за нашиот буџет“, рече вицепремиерката Сабине Монауни, која забраната ја оцени како „радикална и прекумерна“ и дека таа не ги решава проблемите со зависноста од коцкање. „Мораме да најдеме рамнотежа помеѓу мерките кои ќе ја намалат активноста, но во исто време нема да го уништат пазарот“, рече таа. Шест казина моментално работат во микродржавата со население од само 40.000 жители, од кои сите се отворени од 2017 година, по промената на законите за коцкање. Најмногу посетители има од Германија и соседните земји, Швајцарија и Австрија.

Акциска контрола во три казина, констатирани повеќе неправилности

Ивана Ефремовски — Thu, 24 Nov 2022 11:30:38 +0000

На 23/24.11.2022 во периодот од 20:00 до 02:00 часот, полициски службеници од Одделот за криминалистичката полиција, Одделот за специјални полициски операции и СВР Скопје во координација со Управата за јавни приходи, спроведоа акциска контрола во три казина на подрачје на Скопје. При контролата, легитимирани биле 28 лица, додека од страна на УЈП се констатирани повеќе неправилности за што ќе бидат поднесени соодветни пријави.

Контроли во казина во Гевгелија, констатирани низа неправилности

Катерина Бојаџиева — Mon, 18 Apr 2022 10:32:13 +0000

На 17.04.2022, полициски службеници од Одделот за криминалистичка полиција во соработка СВР Струмица и Управата за јавни приходи извршиле контрола во повеќе казина и автомат клубови на подрачјето на Гевгелија. Од извршената контрола, од страна на УЈП во четири објекти биле констатирани неправилности во однос на водење книга за благајна, неистакнати правила за игра на јавно место, нередовно водење сметководствени книги и неправилности во книгите за дневен промет. Исто така, во едно казино дневниот промет не бил пријавен подолг период, додека во друго казино бил пронајден покер апарат со спорен сериски број. По целосно документирање на случајот ќе бидат поднесени соодветни поднесоци.

Граѓаните на Струга едногласни: Бараат казината да се дислоцираат подалеку од училиштата

Магдалена Андонова — Sun, 30 Jan 2022 10:21:06 +0000

Стружани сметаат дека игрите на среќа придонесуваат кон зголемување на криминалот и сиромаштијата, но и дека не се почитуваат законите и лица под 18 години посетуваат објекти каде што се приредуваат игри на среќа во Струга. Ова го покажува истражувањето на професорот Ндерим Положани, кој во рамки на проектот „Поддршка на изборни реформи", спровел анкета со 200 испитаници во рамки на мониторингот на измените на Законот за игри на среќа, со кои се предвидува објекти во кои се приредуваат игри на среќа да бидат оддалечени најмалку 500 метри од образовни институции. – Места каде што се приредуваат игри на среќа, спортски обложувалници и казина, се среќаваат насекаде низ Струга. Не се бира местото на нивно отворање дали е училиште, основно или средно, верски објект и слично. Илјадници евра секој ден излегуваат од џебот на граѓаните на Струга, а завршуваат во касата на игрите на среќа и обложувалниците. Игрите на среќа не ги штедат ниту социјалните категории и малолетниците, кои треба да се наша колективна грижа, заклучува Положани. Според истражувањето, 95 проценти од испитаниците сметаат дека не се почитуваат законите и лица помлади од 18 години ги посетуваат објектите на игри на среќа во Струга, додека пет отсто се со спротивен став. – Најголем дел од испитаниците или 96 проценти тврдат дека игрите на среќа придонесуваат до зголемување на криминалот и сиромаштијата, а 82 отсто се со став дека игрите на среќа требаат целосно да се затворат, додека 18 проценти сметаат дека овој бизнис треба да биде регулиран со нов закон, но не и целосно да се завтори. Поголем дел или 88 отсто би го поддржале предлог законот, со кој ќе се обврзат објектите на игрите на среќа да бидат оддалечени минимум 500 метри од училиште и верски објекти, а 83 веруваат дека сегашниот закон за игри на среќа не е во интерес на граѓаните, појасни Положани. Игрите на среќа, нагласи тој, најлошо влијаат на младите и учениците, а со нивно приредување расте и криминалот поради лихварството. – Поддршката за дислокација на казината и кладилниците е голема од населението, верските заедници, инситуции, стручни лица… Некои пак сметаат дека игри на среќа треба да се приредуваат во елитни хотели или пак на граничните премини, надвор од населени места и подалеку од младите, пред се децата, рече Положани. Во рамките на проектот се одржа панел дискусија, во која учествуваа претставници од повеќе сектори, сите со заеднички став дека објектите во кои се приредуваат игри на среќа треба да се дислоцираат подалеку од образовните институции, но и подалеку од населените места. Јакуб Ќазимоски во своето излагање истакна дека коцкањето е забрането во исламот не само по себе, туку затоа што носи многу лоши последици како за поединецот, така и за општеството. – Оваа навика (коцкањето), ги прави луѓето непродуктивни, мрзливи и социјални паразити. Ги уништува способностите, времето и енергијата како на поединецот, така и на заедницата. Исламската заедница е изречно строго против отворање на било какви казина и игри на среќа, а кога веќе живееме во едно општество каде имаат право и другите кои не мислат на ваков начин, тогаш во најмала рака треба да бидат оддалечени, таму каде што апсолутно не може да дојдат во контакт малолетни лица, вели Ќазимоски. Со аргументи дека објектите што приредуваат игри на среќа треба да се надвор од населените места излезе и Никола Кукунеш, кој живее во центарот на Струга, во чаршијата и вели дека ја загрозуваат безбедноста на жителите. – Живеам до четири обложувалници и три казина. Се плашам да го пуштам детето во продавница, затоа што незнам, кој се ќе сретне во сокаците. Трипати во годината има вооружени грабежи во овие објекти. Јас заспивам со помислата дека можеби токму вечерва некој ќе ми прошета со пушка покрај куќата. Ниту сум заштитен ниту некој се грижи за безбедноста. Затоа таквите објекти не треба да бидат во централното градско подрачје. Не да броиме колку чекори од училиштето ќе бидат лоцирани, туку да броиме колку чекори од местото каде што некој ја става перницата да спие, вели Кукунеш. Валбона Лачка, која била сведок на разговор меѓу ученици, кои штотуку изиграле тикет за спортска, заклучи дека тие имаат голем психолошки проблем. – Во еден момент се свртев и им ги видов лицата. На нив се гледаше вознемиреност, чекање, недоверба еден кон друг и тоа едноставно ми изгледаше како голем психолошки проблем кај децата. Тие не беа концентрирани на тоа што требаше да имаат часови, туку чекаа да влезат во училиштето и разговараа, кој има точен тикет, а кој погрешен, односно кој тим ќе победи, раскажа Лачка. Панелистите заклучија и дека лицата кои се навлечени на игри на среќа, односно коцкање негативните ефекти ги рефлектираат во семејството, но и дека треба да се спроведе едукација на учениците за штетните последици.

Грчки медиуми: Казина во Македонија издаваат лажни ковид сертификати

Ивона Петрова — Wed, 05 Jan 2022 11:56:44 +0000

Грчката телевизија Опен објави видео-сторија за казино во Дојран кое наводно издава фалсификувани ковид-сертификати. Се тврди дека извесно казино во близина на граничниот премин Дојран-Дојрани на македонска територија им обезбедува бесплатен лажен негативен тест на своите посетители со кој тие можат безбедно да се вратат во Грција. Онаму каде што се нуди можност за коцкање, алкохол и забава 24 часа на ден, тие даваат и сертификати за негативен брз тест, вака пишуваат грчките медиуми. Според грчката телевизија Опен, случаите биле откриени кога во еден ден од 45 патници на кого им бил направен брз тест на границата, 9 испаднале позитивни. Телевизијата наведува дека некои од казината, на клиентите им го даваат брзиот тест со негативен резултат, многу автентичен документ, без да направат никакво тестирање. Целта на сопственикот на казиното, како што тврди телевизија Опен, била да привлече што поголем број клиенти овозможувајќи им олеснето поминување на граничните контроли. Лажните сертификати за брз тест, според видео-сторијата, се документи од овластен дијагностички центар, во кои без да биде извршено какво и да е тестирање, само се пополнуваат имињата на клиентите.

Од утре невакцинираните против Ковид-19 нема да можат да влезат во трговските центри, обложувалници и казина

Тале Кристо — Tue, 17 Aug 2021 19:15:43 +0000

Владата на денешната редовна 99-та седница ги донесе најновите мерки, протоколи и препораки за заштита на здравјето на населението од ковид-19, врз основа на препораките од Комисијата за заразни болести. Владата донесе одлука дека за влез во угостителски објекти, кафулиња и барови, без разлика на капацитетот и бројот на присутни посетители, како и за настан од секаков вид (прослава, веселба, свадба, роденден, крштевка, концерт, семинар, обука, работилница, конференција, културен или спортски настан, обложувалници, казина), задолжително е поседување, приложување и проверка на еден од следните документи: – сертификат, потврда за извршена имунизација (вакцинација) од вирусот SARS-CoV-2, односно примена најмалку прва доза вакцина против заразната болест, или – сертификат, потврда за прележан ковид-19 во последните 45 дена, сметајќи од денот на оздравувањето, за лица над 18 годишна возраст. Оваа мерка задолжително се применува и за организација, работа и присуство, учество и на секаков вид на настан на отворен простор, каде има повеќе, како и за влез во затворениот дел од моловите. Дополнително, во сите угостителски објекти, кафулиња и барови опфатени со оваа мерка каде капацитетот е поголем од 30 посетители, гости, лица, задолжителнo e воспоставување редарска служба од страна на правниот субјект за контрола и спроведување на мерката. Додека пак во угостителските објекти со капацитет помал од 30 лица контролата на поседувањето на сертификатот на посетителите е должност на редовно вработените лица. Овие мерки стапуваат на сила по нивното објавување во „Службен весник“, односно од утре 18 август 2021 година. Останува забраната за организација на свадби, веселби и прослави во објекти од затворен тип, додека друг тип на настани на затворено и натаму може да се организираат со исполнетост до 30% од капацитетот на местото каде што се одржува настанот и ограничен бр

Ќе се отвораат казината и фитнес центрите, најави Филипче

Ристе Здравков — Mon, 22 Jun 2020 13:49:59 +0000

На Комисијата за заразни болести зборевме за олабавување на мерките и дојдовме до заклучоци да се отворат казината, а до крајот на неделата да профункционираат и фитнес центритe, истакна министерот за здравство Венко Филипче на денешната прес-конференција. „Во однос на границите, дополнително ќе ја информираме јавноста, вели Филипче.

Казината во Лас Вегас затворени поради коронавирус

Ивона Петрова — Wed, 18 Mar 2020 11:33:44 +0000

Лас Вегас ги затвори казината со цел да се спречи ширењето на новиот коронавирус, изјави гувернерот на американската сојузна држава Невада, Стив Сисолак. – Тоа се однесува на здрав разум, истакна Сисолак на прес-конференција. Затворени се и фитнес и рекреативните центри, ноќните клубови, кино салите и трговските центри. – Пожарникарите, полицијата, сообраќајот, здравствените и социјалните центри, како и доставувачите на храна, ќе продолжат да работат, нагласи Сисолак. Во САД се регистрирани 6.400 заболени лица од Ковид-19, а најмалку 109 се починати.