кеј на вардар – Kurir.mk

ЈП „Улица и патишта“: Продолжуваат активностите за уредување на кејот на река Вардар

Магдалена Андонова — Sat, 13 Aug 2022 08:59:30 +0000

Екипите на ЈП Улици и патишта и екипите на ЈП Паркови и зеленило по налог на Градот Скопје продолжуваат со активностите за уредување на кејот на реката Вардар. Во текот на изминативе денови рачно се чисти нискостеблестата вегетација од косините на коритото на потегот од пешачки мост Злокуќани до мост 8-ми Септември каде десната страна од кејот е целосно завршена, а во наредниве деновите екипи продолжуваат машински да ја чистат левата страна од кејот во насока од мост 8-ми Септември кон Влада. Исто така други екипи паралелно го чистеа потегот до мостот кај Александар Палас каде со машини се коси погуста вегетација, се собира наталожениот мил од коритото, се отстрануваат гранки, корења и дрвја во внатрешноста на коритото и според работниот план овој потег до крајот на неделата ќе биде целосно завршен. Покрај чистењето на кејот минатиов период се изврши санација на велосипедската патека со фугирање на оштетувањата од мостот Влајко во долниот дел од кејот кон амфитеатарот, санација на оштетените бекатон плочи на пешачката патека на кејот во делот над Аква паркот, санација на неколку шахти на кејот на кои се поставени бетонски плочи за заштита во делот од пешачкиот мост 8-ми Септември и во делот пред мостот Обединети Нации. А беше и извршена санација на заштитна ограда на пристапната рампа кај хотелот Александар Палас. ЈП Улици и патишта ќе продолжи и во периодот кој следи со активности за интензивно уредување и санација на кејот на река Вардар за соодветна рекреација и спортување за сите посетители и граѓани.

Продолжува акцијата за уредување на тревните површини на кејот на Вардар

Ивона Петрова — Fri, 22 Jul 2022 08:11:57 +0000

Екипите на ЈП „Паркови и зеленило“ деновиве со акција за косење на зеленилото на кејот на Вардар вршат интензивни активности на уредување на вегетацијата, во координација и по налог на Град Скопје. Акцијата започна во Ново Лисиче на потег од мостот Близнак до ЈП „Лајка“. Теренските екипи неделава работат на косење на неуредените тревни површини, кастрење на гранки, сечење избојци и чистење на површините. Екипите со соодветна механизација работат на косење и уредување на дивоизраснатата вегетација на овој простор. Истовремено, во склоп на оваа акција на косење на зеленилото на кејот се работи и од левата страна на Вардар, каде што се врши уредување на зеленилото на потегот од вливот на Лепенец во Вардар до мостот на бул. 8ми Септември. Оваа акција е дел од вонредните работни активности на ЈП Паркови и зеленило. -Во заедничка соработка со Градот Скопје посветено и редовно ги одржуваме јавните зелени површини во градот во корист на посетителите и за целите на рекреација на граѓаните на кејот на Вардар, велат од ЈП „Паркови и зеленило“ .

Започна да се реализира првата фаза од проектот за целосна реконструкција на левата страна на кејот на Вардар

Магдалена Андонова — Fri, 01 Jul 2022 11:50:43 +0000

Екипите на ЈП Улици и патишта, деновиве на терен интензивно работат на реализацијата на првата фаза од проектот за целосна реконструкција на левата страна на кејот на реката Вардар. Градежните активности се одвиваат на потегот од мостот Мајка Тереза до Железничкиот мост, каде што се врши на ископ на нефункционалната и запуштена патека, при што се отстрануваат старите и оштетени плочи. На овој потег, постоечките патеки се со должина од 750 метри и широчина од 3 метри, а досега е извршен ископ во должина од 550 метри. По завршувањето на овие градежни активности, екипите ќе реализираат активности за целосна обнова и продолжување на постоечките патеки. Истовремено, екипите на ЈП „Паркови и зеленило“ реализираат активности за хортикултурно уредување на овој потег. Реконструкција на левата страна на кејот на реката Вардар ќе се одвива во три фази со цел воспоставување на мултифункционален модерен јавен простор со ново зеленило, пешачки, вело патеки и нова урбана опрема во интерес на сите граѓани. Првата фаза, чија реализација е во тек, е на потегот од мостот „Мајка Тереза“ до ПИОМ, втората до паркот на езерата во Аеродром и третата, до мостот „Тодор Александров“ во општина Аеродром.

„Град Скопје го регулира статусот на лицата корисници на куќарки на кеј за истите да бидат правно заштитени“

Магдалена Андонова — Mon, 18 Apr 2022 18:48:36 +0000

Градоначалничката на Град Скопје, Данела Арсовска во вечерашното гостување на Канал 5 телевизија истакна дека градот го решава проблемот со куќарките на кејот на Вардар бидејќи лицата кои до сега стопанисувале со овие куќарки од 2018 до сега се оставени без договор. Тие преку нов јавен повик ќе имаат можност да добијат договор и бидат правно заштитени, додавајќи дека истите цели четири години работеле без регулиран статус. - Лицата кои стопанисуваат со овие куќарки, сега во овој момент за жал тоа го прават без регулиран статус, бидејќи некој уште во 2018 година не им овозможил тие правно да си го регулираат. Она што Град Скопје во овој момент го прави е регулирање на нивниот статус, односно примопредавање на куќарките и преку соодветен јавен повик тие ќе може да аплицираат и да добијат соодветен договор. Вака ќе бидат заштитени. Имавме конструктивен состанок со нив, знаат која е намерата на градот и не станува збор само за тие неколку куќарки на кејот на Вардар, туку станува збор за 22 лица со таков нерегулиран статус на повеќе потези низ централното градско подрачје, истакна Арсовска. Таа додаде дека на средбата во градот, биле истакнати многу проблеми од страна на овие лица, потенцирајќи дека тоа се проблеми наталожени од изминатите неколку години, пред се затоа што некој не сакал да им го реши нивниот статус. - Се случило и кршење на нивните куќарки, некој се обидел да ги оштети и украде нешто од таму. Едноставно, тие немаат како да се легитимираат за да се заштитат, затоа што некој не им овозможил да имаат договор. Ние се обидуваме правно да ги заштитиме со договор да немаат само обврски, туку да имаат и права, рече Арсовска.

Физички нападната жена поради недоразбирање во сообраќајот на градскиот кеј во центар

Дарко Андоновски — Wed, 09 Oct 2019 13:44:59 +0000

На 08.10.2019 во СВР Скопје, Ф.Е.(36) од Скопје пријавила дека во 15.20 часот на ул.,,Кеј Димитар Влахов“, поради недоразбирање во сообраќајот, била физички нападната од С.М.. Се преземаат мерки за расчистување на случајот, информираат од МВР.

Поминал со повреди на неколку места: 20 годишно нападнато од кучиња скитници на кејот на Вардар

Матеја Петровски — Sun, 22 Jul 2018 12:28:50 +0000

Вчера во 20:45 часот во Полициската станица Ѓорче Петров Д.И.(20) пријавил дека на 20.07.2018 година околу 18,30 часот додека се движел по кејот на реката Вардар во населбата Ѓорче Петров бил нападнат од кучиња скитници. Како што информираат од МВР, при нападот му биле нанесени повреди на левата нога и на двете раце.

ФОТО: Шилегов го запусти кејот на Вардар

Дарко Андоновски — Tue, 29 May 2018 12:48:20 +0000

Kејот на реката Вардар во Скопје на потегот кај градскиот парк е доведен во незавидна состојба и наместо омилено собиралиште за одмор и рекреација сега е срам на скопјани. Независно што дел од политичките партии има различен поглед кон изградба на рекреативни објекти на кејот на реката Вардар, факт е дека огромен број на скопјани таму рекреираат од мај до октомври. Во изборната програма на Петре Шилегов стоеше дека силно ќе се залага за спортот и здравиот живот за скопјани, но за сега според очекувањата тоа остана само празно ветување. Факт и е дека неколку лета наназад Скопје беше домаќин на силен меѓународен турнир во одбојка на песок, дали тоа ќе се случи и летово или според состојбата на спортските игралишта и реквизити спортот не е важен за градоначалникот на град Скопје. Сите посетители на кејот на реката Вардар се сведоци како години наназад терените за одбојка на песок и за кошарка биле полни со рекреативци во секоја момент на денот и ноќта. За жал денес се сведоци дека тие игралишта поради негрижата на Шилегов се само тажна глетка на скопјани и неговите посетители. Угостителкиот објект беше омилено катче на најмладите и честа станица за освежување на младите семејства на кејот, но и тој денес изгледа како одамна напуштено место. Ниту кејот, гордоста на градот, омиленото собиралиште за рекреација на скопјани, не е среден, тревата не е искосена, од коритото на реката Вардар расте висока вегетација, од песокот на игралиштата расте трева, уништени се конструкциите на спортските реквизити. Градоначалниче Шилегов, доста беа танцувања и концерти, фатете се за работа. Скопјани заслужуваат внимание.