Кејлеб Дресел – Kurir.mk

Американците без својата прва ѕвезда на СП во пливање

Бошко Тасиќ — Mon, 03 Jul 2023 06:43:37 +0000

Сопственикот на седум олимписки златни медали и еден од најдобрите пливачи на денешницата, Кејлеб Дресел не се најде во тимот на САД за Светското првенство во Фукуока на крајот на јули годинава. Тој имаше четири обиди на државниот шампионат во Индијанаполис, но не беше меѓу првите двајца на ниту еден настан. Најблиску беше на 50 делфин, каде го освои третото место. На 100 делфин беше петти, а целосно потфрли на 100 слободно каде беше 29. и 50 слободно каде заврши како 23. За Дресел ова беше првиот вистински тест по Светското првенство во Будимпешта, кое го напушти поради наводни здравствени проблеми. Потоа направи долга пауза, но неговото враќање во базенот не беше успешно.

ОИ: Дресел го освои четвртото злато во Токио

Бошко Тасиќ — Sun, 01 Aug 2021 07:49:08 +0000

Кејлеб Дресел го освои четвртиот златен медал на овие Олимписки игри откако Американецот беше најбрз и на трката од 50 метри слободен стил. Најдобриот пливач на САД воедно постави олимписки рекорд и во оваа дисциплина со време од 21.07, а за малку не успеа да го урне и светскиот рекорд од 20.91 секунди. Среброто го освои Французинот Флоран Манаду, бронзениот медал припадна на Бразилецот Бруно Фратус. Дресел беше најдобар во 100 метри слободен стил, трка на која исто така постави нов олимписки рекорд, а триумфираше и на 100 метри делфин, како и штафета 4×100.

ОИ: Светски рекорди на Дресел и британската „микс“ штафета

Ивана Ефремовски — Sat, 31 Jul 2021 07:25:24 +0000

Американскиот пливач Кејлеб Дресел го освои своето трето злато на Олимписките игри во Токио, а второ во поединечна конкуренција, триумфирајќи во трката на 100 метри пеперутка со време на нов светски рекорд (49:45 секунди). Сребрениот медал во истата дисциплина го освои Унгарецот Криштоф Милак, постигнувајќи, притоа, нов европски рекорд (49:68), додека бронзата му припадна на Ноа Понти од Швајцарија. Претпоследниот ден на пливачките натпреварувања на Олимписките Игри донесе уште еден светски рекорд, кој го постигна штафетата на Велика Британија во трката на 4×100 метри мешано. Британската „микс“ штафета во состав Кејтлин Доусон, Адам Пити, Џејмс Гај и Ана Хопкин ја исплива трката со време од 3:37.58 минути и за 83 стотинки го подобри досегашниот рекорд на кинеската штафета. Среброто и припадна на Кина, додека бронзениот медал го освои австралиската штафета. (МИА)