Кејлор Навас – Kurir.mk

Ал-Хилал заинтересиран за Навас

Ивана Ефремовски — Wed, 16 Aug 2023 14:31:44 +0000

За голманот на Пари Сен-Жермен, Кејлор Навас, интерес покажува Ал-Хилал. Триесет и шестгодишниот Костариканец минатата сезона ја мина на позајмица во англискиот клуб Нотингем Форест. Во парискиот клуб Навас сега е со статус на трет голман – по Џанлуиџи Донарума и Арнау Тенас. Навас има уште една година од договорот со ПСЖ. Претходно беше објавено дека клубот е заинтересиран да го продаде, како и другите позајмени играчи. Ал-Хилал веќе го купи Нејмар од Пари Сен-Жермен ова лето и е заинтересиран за уште еден фудбалер на парижаните, Марко Верати. (МИА)

Навас продолжува во Нотингем Форест

Тале Кристо — Wed, 01 Feb 2023 16:26:50 +0000

Костариканскиот репрезентативен голман Кејлор Навас до крајот на сезоната ќе го носи дресот на премиерлигашот Нотингем Форест, откако на последниот ден од јануарскиот преоден рок беше позајмен од францускиот првак ПСЖ. Навас (36), кој во текот на кариерата со Реал Мадрид освои три последователни титули во Лигата на шампиони, е еден од тројцата нови играчи во редовите на англискиот прволигаш кои пристигнаа на самиот крај на преодниот рок. Покрај Навас, на Форест му се приклучија и Џонџо Шелви од Њукасл и Фелипе од Атлетико Мадрид. Во својата прва премиерлигашка сезона по долга пауза, Нотингем Форест во моментов е на 13 место на табелата со 21 бодови, пет над зоната за испаѓање.

Кејлор Навас се пресели во Премиер Лигата

Бошко Тасиќ — Wed, 01 Feb 2023 05:59:42 +0000

Нотингем форест го ангажираше Кејлор Навас кој доаѓа како позајмица од ПСЖ до крајот на сезоната. Овој 36-годишен голман има огромно искуство на меѓународната сцена, со голем број на титули освоени со Реал Мадрид и ПСЖ. За првпат во неговата кариера ќе игра во Премиер лигата каде што моментно по 20 кола составот на Стив Купер е на 13 место со 21 бод. Во последниот ден од зимскиот преоден рок Нотингем форест ги доведе и Џорџо Шелви, досегашниот играч од средниот ред на Њукасл и одбранбениот фудбалер Фелипе кој доаѓа од Атлетико Мадрид.

Бомба во „пет до 12“ – Кејлор Навас!

Ристе Здравков — Thu, 15 Sep 2022 17:56:37 +0000

Кејлор Навас би можел да го напушти Пари Сен Жермен. Според некои извори, ПСЖ го понудил Кејлор Навас на Олимпијакос, а не е невозможно Костариканецот да се пресели во Пиреја. Марсело беше вистинска бомба, по него дојде Џејмс Родригез, а сега можеше и Навас. Целосно падна во втор план, Донарума е прв голман во сите натпреварувања, па прашање е дали Навас има мотив да остане на клупата. Преодниот рок во Грција продолжува денеска, па ќе видиме дали Навас ќе може да го затвори неверојатниот преоден рок на Олимпијакос. Навас во ПСЖ пристигна во 2019 година од Реал Мадрид, за кој бранеше пет сезони и ги освои сите можни трофеи, а претходно настапуваше за Леванте и Албасете.

Нема повеќе ротации на голот на ПСЖ, трансферот е блиску до комплетирање

Ристе Здравков — Mon, 15 Aug 2022 05:46:08 +0000

Костариканецот Кејлор Навас наскоро би требало да го напушти ПСЖ. Овој одличен мрежен чувар не сака да биде резервна копија на Донарума и дефинитивно реши да го напушти парискиот тим. Медиумите во Франција денеска донесоа нови информации во врска со неговата иднина, а беше објавено дека е блиску до преселба во Наполи. Како што пренесува L’Equipe, голманот се согласил на трансфер во италијанскиот тим и сега треба да го почека крајот на преговорите меѓу клубовите. Според информациите на новинарите, ПСЖ и Наполи се уште не одредиле под кои услови Навас ќе го напушти тимот. Станува збор за дефинитивен трансфер, позајмица или вклучување во понудата за играчот од средниот ред Фабијан Руиз, кого шампионот на Франција би сакал да го види во своите редови. Медиумите до неодамна пишуваа дека Кепа Аризабалага се сели во Наполи. Шпанецот требаше да се пресели во Наполи, но се чини дека тоа нема да се случи поради трансферот на Навас. Посебно што неодамна потпиша договор со италијанскиот клуб Салваторе Сиригу, кој ќе делува како резервен голман. Наполи во понеделник го започнува натпреварувањето во новата сезона од Серија А. Прв противник на тимот предводен од Лучијано Спалети ќе биде Хелас Верона, а натпреварот се игра од 18:30 часот. Што се однесува до Навас, тој во септември 2019 година се пресели од Реал Мадрид во ПСЖ. Вкупно одигра 106 натпревари за парискиот клуб и двапати ја освои, меѓу другото, шампионската титула на Франција. Светот слушна за него во 2014 година кога брилијантно бранеше за Костарика на Светското првенство во Бразил и се пресели во Реал Мадрид. Она што е исто така важно да се спомене е дека Бенфика покажа интерес за неговите услуги, но очигледно трансфер во Португалија нема да се случи.

ПСЖ од наредната сезона одбра кој ќе биде број еден голман

Бошко Тасиќ — Sun, 15 May 2022 06:33:53 +0000

Францускиот фудбалски клуб ПСЖ конечно пресече. Тие избраа меѓу Кејлор Навас и Џанлуџи Донарума, пренесува францускиот весник L’Equipe. На крајот на сезоната, ПСЖ го имаше можеби најдоброто голманско дуо во светот. Искусниот и одличен Навас и европски првак со Италија, Донарума се избори за местото „единица“. Тоа нема да биде случај следната сезона бидејќи „Паркот на принцот“ избра голман за следната сезона, пишува „Л’Екип“. Следната сезона неприкосновен број 1 меѓу стативите ќе биде Донарума, пред се затоа што е 12 години помлад од Костариканецот.

Навас незадоволен од минутажата во ПСЖ

Дарко Андоновски — Thu, 21 Apr 2022 10:45:18 +0000

Голманот на Пари Сен-Жермен, Кејлор Навас призна дека е незадоволен од минутажата во тимот од Париз. Тој исто така додаде дека има добри односи со другиот голман на тимот, Џанлуиџи Донарума. – Треба да научам многу работи. Џиџи и јас имаме добри односи и нема никакви проблеми со него. Се разбира, сè уште сакам да играм. На крајот на краиштата, ако има ситуација како оваа сезона, ќе биде тешко. Ајде да видиме што ќе се случи во иднина. Моето семејство е среќно овде, јас сум среќен во Париз. Добро се однесуваат со мене, но на овој или оној начин, сè мора да се промени, изјави Навас на тамошнити новинари. Репрезентативецот на Костарика оваа сезона забележа 23 настапи во сите натпреварувања, додека Донарума 22.

Семејството на голманот на ПСЖ вдомило 30-ина Украински бегалци

Магдалена Андонова — Mon, 28 Mar 2022 19:08:01 +0000

Семејството на голманот на ПСЖ и на костариканската репрезентација Кејлор Навас покажа голема добродушност со прифаќањето во својот дом во Париз бегалци од Украина, објави денеска францускиот прволигаш, потврдувајќи ја со тоа информацијата на шпанскиот весник „Спорт“ дека Костариканецот вдомил 30-ина луѓе, кои побегнале од руската инвазија. Навас во моментов е со својата репрезентација на завршницата од мундијалските квалификации, а според новинските извештаи, неговиот дом е преуреден за да може да ги прифати украинските бегалци, кои претежно се мајки со деца. Сопругата на Навас, Андреа Салас, објави на социјалните мрежи пораки од хуманитарни организации, апелирајќи на неколку светски јазици за „помош за деца со мајки и млади лица, кои се сами, а кои не поседуваат ништо друго освен облеката на нив“. Околу триесетина бегалци, колку што пристигнаа во домот на Навас, ги пренесе од Украина евангелистичко здружение со седиште во Барселона. ПСЖ во клупското соопштение не прецизираше колку вкупно лица нашле привремено сместување во домот на Навас, „бидејќи Кејлор тоа не го направи за да привлече внимание на јавноста“. (МИА)

Кејлор Навас во ПСЖ до 2024 година

Бошко Тасиќ — Mon, 26 Apr 2021 19:01:39 +0000

Голманот на ПСЖ Кејлор Навас, го продолжи договорот со францускиот првак до јуни 2024 година. Навас пред две сезони беше позајмен на ПСЖ од редовите на Реал Мадрид, за во летото 2019 година го комплетира трансферот на „Паркот на Принцовите“ за сума од 15 милиони евра. Навас во 72 настапи вкупно дури 36 пати ја сочува својата мрежа, а оваа сезона е втор најдобар голман во Лига 1 со само 16 примени гола во 25 меча, во кои 14 пати заврши без примен гол.

Навас поднесе барање да си замине од Реал

Ивона Петрова — Thu, 22 Aug 2019 07:10:45 +0000

Голманот на Реал, Кејлор Навас сака да го напушти мадридскиот тим, објави „Марка“. Според шпанскиот медиум, 32-годишниот фудбалер и репрезентативец на Костарика сака да добие стандардно место во првиот состав во новиот клуб. Минатата сезона Навас одигра 21 натпревар за Реал Мадрид и постигна 21 гол. Договорот на Навас е важечки до 30 јуни 2020 година. Вредноста на голманот на фудбалскиот пазар се проценува на 10 милиони евра.