кичево-гостивар – Kurir.mk

По магистралата Кичево-Гостивар сообраќајот се одвива забавено

Тале Кристо — Sun, 06 Aug 2023 17:59:24 +0000

Бранот на туристи и посетители кои се враќаат од Охрид, Струга и Маврово овој викенд, предизвика забавено движење на возилата на десетина километри пред Гостивар. Сообраќајната полиција со физичко регулирање кај здуњска крстосница овозможуваат проток на сообраќајот по магистралата. Колона од возила која се формира од над каменоломите во правец кон Гостивар се движи полека и според проценките на возачите до патарините им се потребни и по половина час. Протокот на возила по автопатот „Мајка Тереза“ од Гостивар кон Скопје се обезбедува со отворање на дополнителни кабини за наплата. Од СВР Тетово информираат дека зголемениот број на возила што се јавува особено по завршувањето на викендот придонесува за повремени застои и движење во отежнати услови. За да се воведе подобар проток кај „Здуњската раскрсница“ се исклучени семафорите и сообраќајни полицајци пропуштаат возила со приоритет во одредени интервали.

УШТЕ ЕДНА ТРАГИЧНА СООБРАЌАЈНА НЕСРЕЌА НА ПАТИШТАТА ВО МАКЕДОНИЈА: Во судар на два автомобили починаа две жени

Тале Кристо — Sat, 20 Aug 2022 11:22:25 +0000

На 20.08.2022 година во 09,15 часот, на магистралниот пат Гостивар-Кичево кај кичевското село Зајас, се случила сообраќајна несреќа помеѓу товарно моторно возило „мерцедес“ со тетовски регистарски ознаки, управувано од М.И.(58) и патнички автомобил „голф“ со тетовски регистарски ознаки, управуван од А.И.(78), двајцата од Тетово. На местото на несреќата, на повредите им подлегнала Т.В.(54) од Тетово додека во амбулантно возило, на пат кон Ургентниот центар во Скопје, починала С.Ц.(75) од Тетово, двете сопатнички во второто возило. По наредба на јавен обвинител, врз телата на починатите ќе се изврши обдукција. Увид на местото на незгодата извршија јавен обвинител и полициски екипи.

ОЈО Гостивар бара притвор за Кичевскиот поради сомнеж дека предизвикал тешка сообраќајна несреќа

Магдалена Андонова — Tue, 07 Sep 2021 16:51:20 +0000

Основното јавно обвинителство Гостивар донесе Наредба за спроведување истражна постапка против едно лице осомничено за кривично дело – Тешки дела против безбедноста на луѓето и имотот во сообраќајот според член 300 став 2 во врска со член 297 став 1 од Кривичниот законик. На 4 септември, на магистралниот пат Кичево-Гостивар, осомничениот како учесник во сообраќајот на јавните патишта не се придржувал кон прописите и го загрозил јавниот сообраќај. Движејќи се со патничко моторно возило „Мерцедес“ со кичевски регистарски ознаки, тој на критичното место не ја прилагодил брзината на движење според состојбите и условите на патот и на видно обележана полна надолжна линија започнал престигнување на возилото пред него – автомобил „БМВ“ со тетовски регистарски ознаки. Во истиот момент, во обратна насока кон Кичево се движел автомобил „Санг Јонг“ со гостиварски ознаки, на кое осомничениот му го попречил патот, па директно удрил со предниот десен дел од „Мерцедесот“ во предниот десен дел од автомобилот „Санг Јонг“. Удреното возило со левиот страничен дел, пак, удрило и во автомобилот „БМВ“ кој бил претекнуван. Во несреќата, животот го загубил сопатник во автомобилот „Санг Јонг“, четири лица се здобиле со тешки телесни повреди, а тројца, меѓу кои и осомничениот, се здобиле со телесни повреди. Поради опасност од бегство, можност за влијание врз сведоците/оштетените и можност за повторување на делото, јавниот обвинител до судијата на претходна постапка од Основниот суд во Гостивар достави предлог за определување мерка притвор за осомниченото лице.

Тешка сообракајна несреќа на патот Гостивар – Кичево – Едно лице загина, а две се повредени

Тале Кристо — Sun, 14 Feb 2021 11:21:42 +0000

Ноќеска (14 февруари), десетина минути по полноќ, на магистралниот пат Гостивар - Кичево, во близина на Новоселски мост, патничко моторно возило "бмв", со швајцарски национални ознаки, управувано од М.С. (54) од Кичево излетало од коловозот. Во несреќата, М.С. починал на самото место, смрт констатирал лекар од Итна медицинска помош, а сопатничката Н.С. (52) и сопатникот Ќ.А. (52), исто така, од Кичево се здобиле со повреди констатирани во гостиварската Општа болница "Ферид Мурад", информира портпаролот на СВР Тетово, Марјан Јосифоски. На местото на незгодата увид извршиле Јавен обвинител и екипа од ОВР Гостивар. По наредба на ЈО телото на М.С. е предадено за обдукција.

Четворица повредени во сообраќајка кај Гостивар

Дарко Андоновски — Sat, 07 Sep 2019 08:27:43 +0000

На 06.08.2019 во 12,30 часот било пријавено дека на магистралниот пат Кичево-Гостивар се случила сообраќајна незгода помеѓу патничко моторно возило „шевролет спарк“ со охридски регистарски ознаки, управувано од А.Б.(19) од Струга и патничко моторно возило „фиат браво“ со скопски регистарски ознаки, управувано од Д.С.(35) од Скопје. Во незгодата со тешки телесни повреди се здобиле возачот А.Б. и сопатник од истото возило Е.И.(23) од Струга кои биле пренесени во Медицинскиот центар Гостивар за укажување на лекарска помош. Со телесни повреди се здобиле двајца сопатници М.Ѓ.(40) и М.М.(22) и биле пренесени во Медицинскиот центар Гостивар за укажување на лекарска помош. Увид на местото на настанот извршила увидна екипа од Полициската станица Гостивар, информираат од МВР.

Детали за железничката несреќа: Воз удрил во карпа и излетал од шините, во прекин сообраќај на пругата Кичево-Гостивар (ФОТО)

Дарко Андоновски — Mon, 18 Feb 2019 08:17:15 +0000

Патничкиот воз кој сообраќа на линијата Кичево-Скопје изутринава удрил во карпа која најверојатно паднала на шините во близина на селата Лакавица и Падалишта гостиварско. Повредени нема, но има материјална штета и во прекин е сообраќајот на тој дел од пругата.

Во полициската станица Гостивар утрово, во 6:45 било пријавено дека патничкиот воз кој тргнал од Кичево удрил во карпа на потегот помеѓу селата Лакавица и Падалишта. Од ударот композицијата излетала од шините. По пријавувањето на местото на настанот е упатена екипа за увид, кој треба да започне наскоро. Согласно со стандардната процедура, со помошен воз треба да се врати гарнитурата на шините по што ќе се утврди оштетувањето на пругата.