кичевско – Kurir.mk

Поради магла намалена видливост во Полошко и Кичевско

Тале Кристо — Thu, 22 Dec 2022 11:47:33 +0000

Намалена видливост поради појава на магла од 30 до 50 метри има на патниот правец Тетово-Желино-Гостивар, до 50 метри на патот Тетово- Јажинце и од 50 до 100 метри на патниот правец Македонски Брод-Кичево, известуваат од АМСМ. На останатите патишта, сообраќајот се одвива непречено, по претежно суви коловози, велат од АМСМ.

Приведен дилер од кичевско, пронајдени дрога и пиштол

Тале Кристо — Sat, 22 Oct 2022 08:45:46 +0000

На 21.10.2022 во 21.45 часот на крстосницата на ул.„Загорје“ со регионален пат Кичево-Осломеј, полициски службеници од Надворешната канцеларија за криминалистички работи Кичево го лишиле од слобода А.А.(25) од с.Гарани, кичевско. При преглед во возилото „ауди“ со кичевски регистарски ознаки, во кое бил сопатник, кај него биле пронајдени остатоци од марихуана. Подоцна, со судска наредба, бил извршен претрес во домот и помошни простории на А.А., при што биле пронајдени и одземени марихуана, дробилка и пиштол „Екол“ со една празна рамка. Тој бил задржан во Полициската станица Кичево и по целосно документирање на случајот против него ќе биде поднесена соодветна пријава.

Кривични пријави за две лица од кичевско Србица за напад врз друго лице

Тале Кристо — Tue, 27 Sep 2022 15:40:56 +0000

ОВР Кичево поднесе кривична пријава против М.Б.(60) и М.Б.(38), двајцата од кичевското село Србица, поради постоење основи на сомнение за сторено кривично дело „насилство“. Тие, на 18.09.2022 година на улицата „Рудничка“ во Кичево физички го нападнале Х.С.(44) од селото Колари.

Кривична пријава против дилер од кичевско

Тале Кристо — Wed, 06 Jul 2022 15:28:15 +0000

Надворешната канцеларија за криминалистички работи Кичево поднесе кривична пријава против Р.Р.(47) од с.Србица, кичевско, поради постоење основи на сомнение за сторени кривични дела „неовластено производство и пуштање во промет наркотични дроги, психотропни супстанци и прекурсори“ и „овозможување на употреба на наркотични дроги“. На 03.07.2022 во Кичево, полициски службеници извршиле контрола во патничко возило „фолксваген голф“, кое го управувал пријавениот, при што биле пронајдени кокаин и пари. Исто така, било утврдено дека пријавениот му овозможил на друго лице од кичевско, сопатник во возилото, да користи кокаин.

Пожарот во кичевско неконтролирано беснее, состојбата критична

Магдалена Андонова — Fri, 29 Apr 2022 16:58:15 +0000

Шумскиот пожар кој во средата доцна навечер избувна во атарот на село Туин кичевско, се уште не е изгаснат. Според информациите од ШС „Лопушник“, и покрај интервенцијата на нивни екипи, пожарот во однос на претходните два дена е проширен и на нов шумски појас и се протега на повеќе од два хектари. -Пожарот кој од средата навечер е активен во атарот на село Туин кичевско и со кој се опфатени ниско стеблеста шума и сува трева се уште е активен. И не само што е активен, туку пожарот поради сушата и ветерот е проширен и покрај интервенцијата на наши екипи во текот на денешниот и вчерашниот ден, рече Анета Спасеноска одговорно лице за пожари во ШС „Лопушник.“ Таа посочи дека и во текот на утрешниот ден екипи на ШС„ Лопушник“ со прирачен алат ќе бидат присутни на местото на пожарот и ќе превземат дополнителни мерки за да се локализира огнената стихија. Бидејќи се работи за тешко пристапен терен, до истиот не можат да пристигнат возила од ТППЕ Кичево, што беше потврдено денеска од нивна страна.

По пет дена сите села во кичевско добија струја, тешко проодни патиштата до осум села во општината

Ивона Петрова — Thu, 16 Dec 2021 13:41:31 +0000

По петдневна интензивна работа на терен на екипи на ЕВН и компанијата задолжена за одржување на електромрежата „Инсталација“ од Кичево, сите осумдесет селски населби во општина Кичево добија електрично напојување, а последен е отстранет дефектот во село Малкоец. -Конечно на целата територија на нашата општина отстранети се дефектите во електромрежата и струја добија сите селски населби, со што овој проблем е целосно надминат. Останува сè уште целосно да се реши проблемот со проодноста на патиштатата до осум ридско-планински села во општината во делот каде што пропадна тендерот да се избере компанија за зимско одржување на патиштата на јужната страна од општината, вели Дашмире Адеми од ПО на ДЗС Кичево. Тој додаде дека од вчера се расчистени патиштата до селата Лавчани, Ехловец и Душогубица а сè уште останаа потешко проодни патиштата до селата Малкоец, Козичино. Патеец,Рабетино Дупјани, Кладник. Наскоро се очекува да бидат расчистени и патиштата до овие селски населби и да се нормализира животот и во овој дел од општината.

Сè уште тешко проодни патиштата до повеќе села во кичевско

Ивона Петрова — Wed, 15 Dec 2021 13:23:24 +0000

Изминува и петтиот ден откако снежно невреме го зафати регионот на Кичево и кичевијата а сè уште не се целосно проодни патиштата до селата во Рабетинска Река, дел Беличка река и Копачијата. Покрај проблемот со патиштата, жителите на село Малкоец сè уште немаат електрично напојување, додека останатите села кои пред 3-4 дена ги имаа истите проблеми добија електрична струја. – Поради поништена тендерска постапка за избор на најповолен понудувач, кој ќе врши зимско одржување на патиштата во јужната регија од општина Кичево, до повеќе селски населби во овој регион сè уште не сецелосно исчистени патиштата и прашање е на време кога истите ќе бидат оспособени за сообраќај рече Дашмире Адеми од ДЗС ПО Кичево и ги наведе селата до кои сè уште не се проодни патиштата. – Проблеми со проодноста на патиштата има до селата Лавчани, Душогубица Кленоец, Малкоец, Иванчишта, Видрани, Патеец, Козичино, Рабетино и Дупјани. Од селата кои во претходниот период поради искинати електроводови и паднати бандери немаа електрична струја, сè уште без електрично напојување е село Малкоец. Екипи на ЕВН се наоѓаат на терен и се очекува наскоро и оваа селска населба во близина на превојот Пресека, да добие електрично напојување и овој проблем да биде симнат од дневен ред-додаде Адеми.

Десетина села во кичевско сè уште без електрично напојување

Ивона Петрова — Tue, 14 Dec 2021 11:47:31 +0000

Снегот кој во саботата наврна во земјава им создаде многу неприлики на селаните од повеќето рурални средини во Кичевско, бидејќи дел од селата имаат тешко проодни патишта, а десетина села останаа без електрично напојување три и повеќе дена. И покрај интензивната акција што ја спроведе ЕВН, сепак поради тешко пристапниот терен и непроодните патишта сè уште десетина села се без електрично напојување. -Поради искинати електроводови и и паднати електрични столбови десетина села во кичевскиот регион сè уште се без електрично напојување. Електрична струја немаат селата: Прострање, Црско, Кладник, Карбуница, Душегубица, Иванчишта, Ехловец, Малкоец и Тајмиште. Екипи на ЕВН секојдневно се на терен, но тешко пристапните делови во регионот каде што има паднати електрични бандери или искинати електроводови, придонесоа веќе четвртти ден жителите од овие селски населби да немаат струја. Во текот на денешниот ден се очекува во поголем дел од овие села да се обезбеди електрично напојување и да се отстранат постоечките дефекти, информираа од РЦУК ПО Кичево. Жители од овие селски населби се жалат дека залихите на месо во фрижидери постои опасност да се расипат и да станат неупотребливи, и затоа очекуваат во текот на денежниот ден конечно и во нивните села да се воспостави нормално снабдување со електрична струја. Инаку, поради ниските температури во ноќните саати, патиштата до ридско-планинските села во Кичевијата се тешко проодни и лизгави и при движење на возилата се бара поголема внимателност токму поради лизгавите коловози.

Повеќе од 48 часа дваесетина села во Кичевско без електрично напојување

Ивона Петрова — Mon, 13 Dec 2021 12:43:29 +0000

Снегот кој во саботата изутрина заврна во кичевскиот регион, создаде многу проблеми во електро-дистибутивната мрежа и во одвивањето на сообраќајот, како локално така и на меѓуградски релации. Најгорливиот проблем го почувствуваа селата од Рабетинска Река, Беличка Река и дел од Копачијата, бидејќи жителите на овие села повеќе од 48 часа се без електрично напојување. -Лепливиот и кашест снег кој во саботата изутрина наврна во нашиот регион, најмногу проблеми создаде во електро-дистрибутивната мрежа, бидејќи во сите делови од општината беа искинати електро водовите што предизвика прекин во електро снабдувањето. Во дел од овие села, по интензивниот ангажман на вработените од ЕВН, нормализирано е снабдувањето со струја, додека 20-ина села се уште немаат електрично напојување, а на тој список се селата:Рабетино, Дупјани, Крушица, Патеец, Козичино, Светорача, Мало и Големо Црско, Прострање, Кладник, Ехловец, Иванчишта, Малкоец и Попоец. Како што сме известени екипите на ЕВН работат на отстранување на дефектите и на нормализирањето со снабдување со електрична струја и на овие селски насеби-истакна Дашмире Адеми, раководител на ПО ДЗС Кичево. Поголем број граѓани од приградските населби се пожалија дека по големата експлозија на трансформатор во нивна близина, дошло до прегорување на повеќе електрични уреди, како комјутери, телевизори и други апарати. Што се однесува до патиштата во општината тие се проодни и покрај отежнатото одвивање на сообраќајот поради влажните коловози и остатоците од снег патиштата.

Лишен од слобода маж од кичевско

Ивана Ефремовски — Wed, 08 Dec 2021 15:22:09 +0000

На 07.12.2021 во 18:30 часот на ул.„Борис Кидрич“ во Кичево, полициски службеници од Полициската станица Кичево го лишиле од слобода А.А.(44) од с.Србјани, кичевско. При преглед во неговото возило „цитроен“, со кичевски регистарски ознаки, била пронајдена и одземена бела прашкаста материја. Тој бил приведен во полициска станица и по целосно документирање на случајот против него ќе биде поднесена соодветна пријава.