кирил божиновски – Kurir.mk

Укината мерката притвор за Миле Јанакиевски и Кирил Божиновски

Ристе Здравков — Fri, 28 Dec 2018 11:15:21 +0000

Апелацискиот суд Скопје известува дека, по повлекување на предлогот за одржување јавна седница од страна на обвинетите, на денешната нејавна седница Кривичниот совет на Судот донесе одлуки со кои се укинува мерката притвор против обвинетите Ненад Јосифовиќ од Скопје, Кирил Божиновски од Скопје, Зорица Арсовска од Скопје и Миле Јанакиевски од Скопје. Истовремено, додава Апелацискиот суд во соопштение, со со четири различни решенија на Кривичниот совет на Судот на обвинетите Јосифовиќ, Божиновски, Арсовска и Јанакиевски им е определена мерката куќен притвор. Вака донесените одлуки, соопшти Апелацискиот сауд, ќе бидат објавени во целост на веб страната на судот во рокот определен со Законот за управување со движењето на предметите во судовите.

СЈО предлага: Домашен притвор за Камчев, Панделевски, Јанакиески и Божиновски, за Мијалков нема мислење

Ивана Ефремовски — Thu, 27 Dec 2018 09:37:32 +0000

За Орце Камчев, Цветан Панделевски и останатите обвинети во случајот „Империја“ е побарано мерката притвор да биде заменета со поблага мерка односно домашен притвор, потврдија за МИА од Специјалното јавно обвинителство. Оттаму велат дека за Сашо Мијалков, кој исто така е обвинет во случајот „Империја“ се уште нема дадено мислење. Предлогот за преиначување на мерката од страна на СЈО е поднесен вчера. -За причините во интерес на истрагата не можеме да дадеме дополнителни информации, но може да се нагласи дека во случајот „Империја“ најважни се материјалните докази кои во оваа фаза успешно се прибавени, нагласуваат од СЈО за МИА. Освен за обвинетите во „Империја“, побарано е да се замени и мерката притвор во домашен притвор за поранешниот министер за транспорт и врски Миле Јанакиески и поранешниот генерален секретар на Владата Кирил Божиновски.

Иванов потврди дека Божиновски и Јанакиески се притворени со фингирана белешка

Катерина Бојаџиева — Fri, 07 Dec 2018 17:09:28 +0000

Претседателот на Република Македонија Ѓорге Иванов на денешната прес конференција одговарајќи на новинарско прашање, што разговарал на средбите со екс генералниот секретар на Владата на Република Македонија Кирил Божиновски и екс министерот за транспорт и врски Миле Јанакиески, нагласи дека Божиновски воопшто и не бил на средба со него, а не се остварил ниту телефонски разговор помеѓу нив. -Кирил Божиновски ниту се јавил, ниту дошол на средба. А Миле Јанакиески заедно со Пешевски дојдоа со една иницијатива која беше во прилог на релаксирање на односите, односно помирувањето во државата и подоцна тоа излезе во јавноста како апел. Тој само дојде да се консултира со мене како со претседател на државата, изјави Иванов. Со ова уште еднаш се демантираат сите натписи од провладините медиуми дека Божиновски барал помилување од страна на претседателот Иванов, а доколку не го добиел ќе избегал од државата. Имено, и во решението за одреден притвор на екс ген-секот на Владата Божиновски стои токму оваа шпекулација која Иванов целосно ја демантираше. Со ова се потврдува политичкиот прогон и реваншизам од страна на судските органи врз поранешни високи функционери од ВМРО-ДПМНЕ. Судиите наместо правни, повеќе од очигледно е дека носат политички одлуки по притисок на владата на СДСМ.

Кирил Божиновски го нуди целиот имот како гаранција за да излезе од протвор

Предраг Кукиќ — Tue, 04 Dec 2018 16:06:15 +0000

Освен поранешниот министер за транспорт и врски Миле Јанакиески и поранешниот генерален секретар на Владата Кирил Божиновски го нуди целиот имот со кој располага како гаранција за да излезe од притвор. Барањата на на Божиновски и на Јанакиески денеска се доставени до судот. – Очекуваме позитивен исход, бидејќи ова е доволна гаранција за судот да можат да се бранат од слобода и дека ќе бидат присутни во текот на целата судска постапка, како и до сега. Се работи за имот кој е стекнат како оставина од нивните родители, вели за Пресинг ТВ, адвокатката на Јанакиески и Божиновски, Сања Алексиќ. Ден по бегството на поранешниот премиер, Никола Груевски, Кривичниот суд донесе одлука да им се одреди притвор, на барање на СЈО кое пак добило информации од УБК, дека двајцата се подготвувале за бегство.

ВМРО-ДПМНЕ: Одлуката Јанакиески и Божиновски да останат во притвор е политичка, а не правна

Ивана Ефремовски — Tue, 27 Nov 2018 15:34:22 +0000

Кацарска судството не успеa да се издигне над политиката и со отфрлањето на издржаните и аргументирани жалби на Јанакиески и Божиновски донесе политичка, а не правна одлука, реагираат од ВМРО-ДПМНЕ. -Црната власт носи црнило во секоја сегмент на општеството, правосудните органи се егзекутори на политичкиот прогон на Зоран Заев. Апелацискиот суд се покажа како уште една алатка во рацете на власта за спроведување на политички прогон. Република Македонија поради контролата на власта над судството е црн пример за владеењето на правото во Европа, се наведува во партиското соопштение. Од ВМРО-ДПМНЕ обвинуваат дека судот донесе одлука врз основа на фингирана службена белешка, чија содржина беше демантирани дури и од претседателот на државата. -Јанакиески и Божиновски се жртви на политички прогон од институциите на системот кои служат како инквизиторни органи против екој неистомисленик на Зоран Заев, не го применуваат законот, туку слушаат нарачки. За ваквите конструкции и законски прекршување одгворност ќе има. Секој кој ја злоупотребил функцијата или го прекршил законот преку позицијата на моќ која моментално ја има, ќе одговара кога ќе се врати демократијата и правната држава во Република Македонија, истакнуваат од ВМРО-ДПМНЕ.

Миланов: За Јанакиески и Божиновски има правосилни одлуки да бидат во притвор и мерки на претпазливост, тоа по закон не е дозволено

Ивана Ефремовски — Tue, 27 Nov 2018 15:30:05 +0000

КУРИР побара коментар од адвокатот Еленко Миланов за одлуката екс-министерот за транспорт и врски Миле Јанакиески и поранешниот генерален секретар на Владата, Кирил Божиновски, да останат во притвор. -Одлуката е донесена покрај сите аргументи кои беа изнесени од одбраната, во делот дека решението има недостатоци и од формален и од правен аспект. Од формален аспект, воопшто не постои кривично дело за кое што им се води постапка како облигаторен дел од содржина, диспозитив на обвинение. Од друга страна, станува збор за директен предлог за определување на мерка притвор без да се бара, во суштина, преиспитување на мерки за претпазливост кои уште се на сила, така што ние во конкретниов случај имаме на сила и мерка за притвор и мерка за претпазливост кои се правосилни и се на сила, што е недозволено по законот. На крајот на краиштата, во однос на овие правни квалификации, постои аболиција, така што барање за нова аболиција нема потреба и останува под знак прашање оваа службена белешка, посебно по известувањето и на претседателот на државата дека таква средба со посредник, за овие две лица, никогаш не била остварена, истакна Миланов во изјава за КУРИР.МК.

„Стоп за политичкиот прогон“: По којзнае кој пат судството ја пропушти шансата да се издигне над политичките игри и да суди во согласност на закон

Дарко Андоновски — Tue, 27 Nov 2018 15:22:08 +0000

Граѓанската иницијатива стоп за политичкиот прогон во република Македонија изразува длабоко разочарување и незадоволство од одлуката на апелациониот суд во Скопје за одбивање на жалбите на Миле Јанакиески и Кирил Божиновски, стои во статус на Фејсбук страната на граѓанската иницијатива „Стоп за политичкиот прогон“.

-Политичкиот прогон во република Македонија продолжува. Политички монтираните притвори остануваат на сила. Денес по којзнае кој пат, судството ја пропушти шансата да се издигне над политичките игри и да суди во согласност на закон! кога неправдата станува закон, отпорот е наша должност!, потенцираат во нивниот ФБ статус.

Јанакиески и Божиновски остануваат во притвор

Катерина Бојаџиева — Tue, 27 Nov 2018 14:35:37 +0000

Поранешниот министер за транспорт и врски Миле Јанакиески и поранешниот генерален секретар на Владата Кирил Божиновски остануваат во притвор во „Шутка“. – Кривичниот совет на Апелациониот суд Скопје, по одржаните јавни седници од 26.11.2018 година, на ден 27.11.2018 година донесе одлуки со кои жалбите на обвинетите Миле Јанакиески од Скопје и Кирил Божиновски од Скопје, изјавени преку нивните бранители ги одби како неосновани и ги потврди решенијата на Основниот суд Скопје I Скопје, со кои на обвинетите им е определена мерка притвор, соопштуваат од Апелацискиот суд Скопје. Обвинетите вчера на јавна седница пред судиите во Апелација побараа укинување на притворот. Според Јанакиески, при определувањето на мерката притвор институциите ги прекршиле законите, конвенциите и човековите права, како и дека СЈО требало да направи проверка со кабинетот на претседателот Иванов и да бидат проверени снимки од безбедносните камери за посетите кај претседателот. Божиновски пред судиите посочи дека нема намера да бега, а како доказ за тоа го посочи тоа што 17 месеци ги почитува мерките на претпазливост определени од судот.

Стоилковски: Одлуката на Апелација за притворот на Јанакиески и Божиновски очекуваме да биде донесена врз база на факти

Ивона Петрова — Tue, 27 Nov 2018 13:13:18 +0000

Како што и неколку пати досега на овие прес конференции од ВМРО-ДПМНЕ имаме посочувано, одлуката за притвор на Јанакиески и Божиновски е одлука на политички реваншизам и притисок врз опозицијата и неистомислениците, истакна денес портпаролот на ВМРО-ДПМНЕ Наум Стоилковски одговарајќи на новинарско прашање. -Самите видовме дека решението за притвор се темели на фиктивна службена белешка, чија содржина е демантирана и од страна на претседателот Иванов, од каде што нели потекнува белешката како што е наведено.. Овој случај е уште еден доказ дека е дерогирана правната држава и дека принципот владеење на правото не се применува во праксата, туку дека институциите се злоупотребуваат. И како што веќе имаме истакнато од ВМРО-ДПМНЕ, според нас нема никаква причина за луѓе кои уредно се пријавуваат на судот и ги почитуваат одлуките за претпазливост претходно донесени од судот, да бидат во притвор, во исто време не постои ниту една причина и аргумент за определување на притвор покрај наведеното, вели Стоилковски. Тој посочи дека сето ова можело да се види во јавноста на вчерашната јавна седница на Апелацискиот суд. -И очекуваме судиите да се одважат и да бидат на висината на задачата. Тие треба да одлучат помеѓу фактите изнесени од највисокиот државен орган, Претседателот на Република Македонија од една страна и фингирана службена белешка од УБК која се повикува на анонимен извор, од друга страна. Доколку има право и правдина повеќе од јасно е каква треба да биде одлуката на судот. И таа одлука очекуваме да биде исклучиво донесена врз база на факти, односно да се донесе одлука која што ќе значи укинување на неправедно изречениот притвор за Јанакиески и за Божиновски, заклучува партискиот портпарол.

Дали Апелација ќе донесе одлука врз факти од Кабинетот на Иванов или врз фингирани белешки?

Ивона Петрова — Tue, 27 Nov 2018 12:01:39 +0000

Апелациониот суд одлучува дали ќе ја укине мерката притвор на Миле Јанакиески и Кирил Божиновски откако вчера беа одржани јавни седници по нивните поднесени жалби. Во очекување на тоа дали Апелација ќе донесе одлука според официјалните информации од Кабинетот на претседателот Ѓорге Иванов или според фингирана белешка, двајцата притворени вчера пред судот ги кажаа своите аргументи и побараа укинување на притворот. Јанакиески вчера посочи дека никогаш не побарал средба со претседателот Иванов преку посредник ниту пак имал потреба од тоа. Екс министерот истакна дека лично се познава со претседатело повеќе од 10 години, а додека бил министер во повеќе наврати бил и член на неговата делегација, каде заедно ја промовирале Република Македонија како поволна дестинација за инвестирање, а во негово присуство потпишал повеќе меѓународни билатерални договори. Тој пред судиите истакна дека бил активно вклучен во текот на двете претседателски изборни кампањи. -Во 2018 година со Претседателот Иванов сум остварил повеќе средби и истите исклучиво биле закажани преку неговиот кабинет. Покрај службени средби во изминативе десетина години, сме оствариле и приватни средби, а Претседателот во 2010 година беше гостин и на мојата свадба. Последната средба со Претседателот Иванов ја остварив на 13.11.2018 година, во 16 часот со времетраење од 90 минути, кога покрај мене присуствуваа уште 2 лица. Едно од нив беше претставник од претседателскиот кабинет, преку кого беше организирана средбата. Темата на оваа средба воопшто не беше амнестијата, туки Претседателот беше информиран за една иницијатива поврзана со актуелната политичка состојба во Република Македонија, рече вчера Јанакиески. Божиновски вчера рече дека ги демантира наводите за некаква наводна средба на негов посредник со претседателот Иванов. -Ниту постои, а ниту постоел било каков посредник, ниту било кого имам пратено на средба и во никој случај со никого немам разговарано за некакви планови за мое бегство. Со претседателот Иванов се познавам долго време, уште од студенските денови на Правниот факултет каде што ми беше професор, како и подоцна за време на обавувањето на државната функција во текот на годините. Доколку сум сакал и доколку би имал некаква потреба, лично би закажал средба и би се видел со претседателот Иванов, како што веќе имам остварено повеќе средби во минатото, и нема никаква причина да праќам некаков посредник, вели Божиновски. Одбраната на Јанакиески и Божиновски вчера истакна дека службената белешка врз основа на која им е одреден притвор е лажна, а потврди и самиот претседател на Иванов, кој се споменува во белешката. Во двете решенија, во белешката од УБК, стои дека средбата со претседателот Иванов била остварена преку посредник, иницијатор на средбата со претседателот на Република Македонија бил Миле Јанакиески, односно Кирил Божиновски, дека ги имале истите барања, дека ги имаат истите банкарски сметки во странство и дека се подготвуваат за истото бегство. На средба со претседателот на Република Македонија бил Миле Јанакиески, кој закажал телефонски, како што потврди и Кабинетот на претседателот. Кирил Божиновски немал средба со Иванов, а тоа го потврди и Кабинетот на Иванов. -Ја информираме јавноста дека ниту е побарана, ниту одржана средба со посредник на Миле Јанакиески, како што е наведено во службената белешка на УБК, класифицирана „строго доверливо", а која е основ за определување на мерката притвор. Миле Јанакиески телефонски побара средба со Претседателот Иванов која е одржана на 13.11.2018 година, вторник во 16:00 часот во Кабинетот на Претседателот на Република Македонија. На средбата, воопшто не беа дискутирани темите амнестија, на која се повикува судот во решението за притвор, која е во надлежност на Собранието на Република Македонија, ниту пак темата аболиција, се вели во соопштението од Кабинетот на претседателот. -Категорично ги негираме изнесените наводи во службената белешка на УБК и информираме дека ниту е побарана, ниту одржана средба со Кирил Божиновски, ниту со негов посредник. Негираме и дека е остварена средба со посредник на Миле Јанакиески, се вели во второто соопштението од Кабинетот на Иванов. Оттука, може да се констатира дека службената белешка на која се повикуваат обвинителството и судот е фабрикувана, така што ако се прифати како доказ, кој е непостоечки, се причинува кривично дело. Јанакиески и Божиновски беа притворени рано утрото околу 5 часот во средата на 14 ноември, веднаш откако беше потврдено дека Никола Груевски се наоѓа во Будимпешта и бара политички азил. Решенијата за притвор се изготвени на брзина, така што решението за притвор на Миле Јанакиески, обвинет во повеќе случаи на СЈО, е ископирано и за Кирил Божиновски, па така и службената белешка е идентична во двете решенија за притвор на што вчера реагираа двајцата обвинети.