кирил дојчиновски – Kurir.mk

Година од смртта на Кирил Дојчиновски, едно од најголемите имиња во историјата на македонскиот фудбал

Ивона Петрова — Thu, 10 Aug 2023 06:22:03 +0000

Денеска се навршува една година од смртта на Кирил Дојчиновски, еден од најголемите фудбалери во историјата на македонскиот фудбал, која почина на 78 годишна возраст. Македонскиот, но и светскиот фудбал пред една година останаа без легендарното име кој во својата играчка и тренерска кариера ќе остане запаметен како еден од најдобрите на овие простори. Дојчиновски засекогаш ќе остане запаметен во историјата на македонскиот спорт како првиот Македонец кој бил дел од светските фудбалски првенства. Тој беше дел од Мундијалот во 1974 година во Западна Германија, тогаш како фудбалер на белградска Црвена ѕвезда. Своите фудбалски почетоци ги бележи во Вардар, каде како тренер и ја заврши својата кариера. Играше за Црвена ѕвезда и француските Троја и Париз. Како тренер работеше во Ел Салвадор, каде што беше и селектор, а ги предводеше и Вардар, Пелистер, Македонија ЃП, Брегалница (Ш), Брегалница (Д) и неколку тима од Ел Салвадор.

Двајца Македонци играле против Бразил на Пеле, еден постигна и гол (ВИДЕО)

Ристе Здравков — Fri, 30 Dec 2022 08:45:25 +0000

Фудбалскиот свет од вчера тагува по големиот Пеле, кој почина на 82-годишна возраст. Само двајца Македонци ја имале таа чест да играат против Пеле, а тоа се Методија Спасовски и Кирил Дојчиновски. Спасовски и Дојчиновски кој за жал почина оваа година беа дел од легендарната репрезентација на Југославија која играше против Бразил во 1968 година на „Маракан“ пред повеќе од 150.000 гледачи. Двајцата беа стартери на натпреварот, а Мето Спасовски во седмата минута постигна и гол, натпреварот на крајот заврши без победник 3:3. Спасовски исто така е запишан досега како единствен Македонец кој му дал гол на Бразил.

Почина Кирил Дојчиновски, едно од најголемите имиња во историјата на македонскиот фудбал!

Магдалена Андонова — Wed, 10 Aug 2022 09:08:26 +0000

Во 79 година од животот почина еден од најславните фудбалери во истројата на македонскиот фудбал, легендарниот фудбалер и тренер Кирил Дојчиновски. Кирил Дојчиновски, роден на 17. октомври 1943 година во Скопје, ќе остане засекогаш запаметен во историјата на македонскиот спорт како првиот Македонец кој настапил на едно Светско првенство. На Светскиот фудбалски шампионат во З. Германија во 1974, Дојчиновски беше дел од селекцијата на Југославија, со што стана првиот Македонец кој настапил на еден Мундијал. Дојчиновски првите фудбалски чекори ги прави во Вардар, за кого одигра 218 натпревари од 1962 до 1967 година. Потоа се сели во белградска Црвена Звезда (1967 – 1974) достигнувајќи го врвот на својата слава. Од Црвена Звезда, Дојчиновски се сели во странство во една од најсилните лиги во светот, во француските Тројс и ФЦ Париз. Во периодот од 1970 до 1974 година беше стандарден член на репрезентацијата на поранешна СФРЈ предводена од Миљан Миљаниќ. Четирикратен шампион на Југославија со Црвена Звезда, освојувач на Митропа купот, полуфиналист во Купот на европските шампиони со Црвена Звезда во сезоната 1970/71 и четвртфиналист во сезоната 1973/74. По завршувањето на играчката кариера стартува со тренерска кариера. Како тренер е двократен шампион на Ел Салвадор со Луис Фирпо, и селектор на репрезентацијата на Ел Салвадор,а потоа е тренер и во Македонија во екипите на Вардар, Пелистер, Македонија ЃП, Брегалница Делчево и Брегалница Штип.Рабоити како тренер и во Грција во тимот на Ираклис. Кирил Дојчиновски, поради огромните заслуги за македонскиот фудбал, е добитник на бројни признанија меѓу кои и Наградата за животно дело од Македонскиот олимписки комитет, како и признанието од белградска Црвена Звезда, за една од најголемите легенди во историјата на клубот.