кирил миноски – Kurir.mk

Миноски: 2-3 недели пред кризата ни кажуваа дека економијата ни е сјајна и дека имаме ликвиден буџет, сега државната каса е празна

Дарко Андоновски — Fri, 24 Apr 2020 07:31:31 +0000

Поранешниот министер за финансии и поранешен директор на УЈП, Кирил Миноски во вечерашната емисија „Клик Плус“ на Тв21 истакна дека месец дена пред да почне економската криза, од Владата не убедуваа и смируваа дека економската состојба во државава е сјајна и дека и дека буџетот ни е во одлична кондиција, за сега да видиме дека државната каса всушност е празна. -Очигледно е дека државната каса е празна, и покрај претходните изјави кои што ги имавме пред извесно време дека имаме ликвиден буџет и дека економска состојба е сјајна. Ние сега доаѓаме во ситуација, после две-три недели од тие изјави на највисоко ниво дека имаме сетозни проблеми со ликвидноста на државниот буџет, при што се лицитира со различни изјави во однос на големината на дефицитот кој што во почетокот се споменуваше дека би изнесувал 800 милиони евра, потоа се споменуваа милиарда и 500 милиони евра, па три милиарди, рече Миноски. Тој истакна дека од сето ова покажува дека економската состојба не само што не била сјајна туку дека ние, како држава, имаме сериозен проблем во поглег на ликвидноста на буџетот и прашање е дали ќе има финансиски средства и за овие сет на мерки, кое барем декларативно, се донесоа за спас на економија. -Сето тоа покажува дека, во суштина економската состојба не била толку сјајна, дека ние имаме сериозни проблеми во поглед на ликвидноста на буџетот, и клучното прашање кај овие мерки е не само дали тие ќе бидат декларативно донесени, туку прашањето е дали за тие мерки постојат соодветни парични средства и какви се бариери се искреирани во поглед на можностите за користење на тие мерки, истакна Миноски.

Македонија станува единствена земја во светот која наместо да им помага на домаќинствата, истите дополнително ги оптоварува

Ивана Ефремовски — Wed, 22 Apr 2020 14:39:22 +0000

Додека нафтата на светско ниво е под минусот, Владата предводена од СДСМ удира по грбот на народот и ја зголемуваат акцизата. Владата одлучи акцизата за нафтените деривати да се се зголеми за три денари. На чиј грб ќе падне ова како терет? Секако, на граѓаните. Народот секако живее многу тешко време. Епидемијата удри по нив, а владата наместо да го ублажи, го засилува тој удар. На овој предлог се спротистави целата бизнис заедница велејќи дека сме единствена земја во светот која качува акциза за да се справи со корона кризатa. Поранешниот министер за финансии на Македонија, Кирил Миноски, во изјава за КУРИР оценува дека оваа мерка е признание од власта дека државните финансии се во очајна состојба. -Зголемувањето на цената на акцизите покажува неколку работи: постојат сериозни проблеми со полнење на буџетот за кој што до пред извесно време се тврдеше дека е ликвиден дека ние како држава сме пример за економски раст и развој и стабилна економија, за да за неполни две недели повторно највисоките претставници на власта ни соопштија дека државните финансии се во очајна состојба. Во исто време според Глобалниот индекс на резистентност на економијата, Македонија е рангирана на 100 место најниско во регионот, како за пример Србија е на 63 место, Црна Гора на 78 место, а Албанија на 95 место. Второ повторно се посегнува по веќе испробаната рецептурата која што веќе еднаш се употреби во 2018 година, на зголемување на акцизата и директно посегнување во џебот на граѓаните, истакна тој. Потенцира дека сето тоа тогаш помина без големи реакции во јавноста. -На повиците од стручната јавност во изминативе недели за „солидарност“ од страна на оние кои што во изминатите три децении имаа најголем економски бенефити од државата, се одговори на начин што токму на барање на овие центри на моќ се зголеми акцизата во услови кога на светските берзи постои незабележан пад на цената на нафтата и дури истата се дели бесплатно. Како за пример во соседството денеска веќе медиумите известуваат за намалена цената на нафтените деривати. Сето тоа се прави во името на „солидарноста“ и за доброто на граѓаните, кои што секојдневно се убедувани дека сето тоа се прави за нивно добро. Ваквите тврдења се спротивни на сите економски постулати дека граѓанинот и приватниот сектор, а не државата подобро и порационално управуваат со средствата, истакна Миноски. Експертот во областа финансии оценува дека Македонија е единствен пример на земја во светот која наместо да им помага на граѓаните, им става уште еден терет плус. -Дополнително солидарноста се манифестира на начин што парите ќе се соберат пропорционално повеќе од сиромашните, за да не ги отповариме богатите, што е далеку од принципот на правичност. Со тоа Македонија станува единствен пример на земја во светот која што наместо да им помага на домаќинствата и семејните буџети истите дополнително ги оптоварува. Спротивно на оваа практика во САД секој полнолетен граѓанин доби директна државна помош. Очигледно дека оваа пракса на префрлање на товарот врз обичниот граѓанин и малиот бизнис ќе продолжи да се практикува и во иднина, по принципот три денари денес, шест денари утре, сето тоа во име на „солидарноста“ и со девизата за неколку дена сите ќе заборават на повисоката цена, истакна Миноски во изјава за КУРИР. Тој посочува дека за да се наполни државниот буџет и ефикасно да се управува со јавните финансии, се разбира, постојат соодветни решенија.

Миноски во црногорски медиум објаснува што е клучно за надминување на кризата

Ивана Ефремовски — Sun, 12 Apr 2020 11:11:07 +0000

Клучно во оваа ситуација е да се покаже лидерство, решителност и брзина во постапките на креаторите на економската политика. Државата мора да „внесе“ пари во економијата преку заеми и субвенции. Оние што повеќе имаат корист од државата во различни форми, во периодот пред оваа криза, треба да преземат поголем товар. Особено би алудирал на банките, кои остваруваат огромни профити од компаниите и граѓаните, а и неодамна го истакнав тоа анализирајќи ја врската помеѓу економијата и етиката. Ова се само дел од потребните активности за да се излезе од економската криза предизвикана од коронавирусот, според докторпт по економски науки, Кирил Миноски, поранешен министер за финансии на Македонија и во моментов консултант на Министерството за финансии на Турција. Ви пренесуваме дел од неговото интервју дадено за Volim Podgoricu Што е клучно за надминување на кризата? Повеќето економисти веруваат дека стимулирањето на целокупната побарувачка и „вбризгувањето“ пари во економиите е клучот за надминување на кризата. Директорката на ММФ, Кристалина Георгиева, неодамна го кажа ова во своето обраќање пред јавноста, а порано истиот рецепт го применија скоро сите најголеми економии во светот: САД, Германија, Франција, ЕУ, Турција. Во овие земји се создадени досега невидени пакети за финансиска поддршка на националните економии. Мерките што ги преземаат земјите во регионот варираат во зависност од нивната економска сила и се поделени на два сегмента: мерки за фискална политика и мерки за монетарна и макроекономска политика. Во фискалната сфера, обично се преземаат мерки како што се одложување на даночни плаќања, субвенционирање на плати на вработени и домаќинства, субвенционирање на пензии, нудење евтини кредитни линии, додека во областа на монетарната политика мерките се различни и обично вклучуваат намалување на основната каматна стапка на државните записи, одложување наплата на заеми за одреден временски период и слично. Во основа, мерките преземени во Црна Гора според она што можам да го видам како информација не се разликуваат многу од она што беше преземено во регионот и пошироко на глобално ниво. За жал, мислам дека по некое време во регионот, компаниите и граѓаните на крајот ќе останат да се грижат за себе, што е судбина на граѓаните и компаниите од оваа област, со оглед дека нашите економии се мали, ранливи и не се во можност да инјектираат пари на начин тоа го прават Америка, Германија, Франција. Задолжување на државата наспроти колапс на економијата Прво е неопходно да се види што е достапно за нас во земјата, да се анализира буџетот и, во меѓувреме, да се бараат средства на меѓународните финансиски пазари. Најдобро би било да се обезбедат со меѓународни финансиски институции: Светска банка, ММФ, Европската инвестициска банка итн. Во време на криза, задолжувањето е неопходно и оправдано за да се спаси економијата и животниот стандард на населението. Покрај позајмувањето, важно е средствата да се користат правилно и да постои транспарентност во нивното трошење.

Миноски: Генералниот наратив на оваа Влада е “Ќе“ но од ветувањата нема ништо

Предраг Кукиќ — Mon, 18 Nov 2019 09:42:05 +0000

Владата само дава ветувања кои потоа не ги исполнува, вели за Детектор поранешниот министер за финансии Кирил Миноски. „ Мислам дека генералниот наратив е „Ќе“. Значи ќе биде, ќе анализираме, ќе направиме но гледаме дека во реалноста имаме многу малку поместувања на подобро. Никој генерално не е против зголемување на платите неопходно е да се зголемуваат платите. Генерално сите сакаме да имаме повисок животен стандард. Но тој животен стандард треба да го обезбеди приватниот сектор кој што ќе има соодветни услови за раст и развој и тоа е единствено одржилва онцепција и за буџетот, за обезбедување на средства во буџетот но и за благосостојбата и на граѓаните и на компаниите“ – вели Миноски за Детектор. Дека се води лоша економска политика, според Миновски доказ се и извештаите на светските релевантни институции како и ранг листите на кои македонската економија добива послаби оценки од порано. “Гледаме дека на сите индикатори, и на Doing Business и на сите ранг листи кои што ги имаме релевантни, Македонија паѓа, тоне на тие листинзи што укажува на тоа дека се праќа лош сигнал пред се во делот на фискалната политика“ – вели Миноски.

Миноски: Во услови на мирен мандат Тевдовски не направи суштински реформи

Дарко Андоновски — Tue, 25 Jun 2019 13:04:12 +0000

Заев ќе биде еден од ретките премиери истовремено и министер за финансии, секако доколку предлогот за реконструкција помине во Собранието. За начинот на кој треба да функционира министерството за финансии како еден од најважните ресори во Владата анализираме со Кирил Миноски, поранешен министер за финансии. Според Миноски ваквиот потег е невообичаен и непознат за светските финансиски институции. Кои политики му пресудија на неговиот наследник Драган Тевдовски, како од денешна перспектива се гледа на јавниот долг на државата споредено со тоа кога тој беше министер и задолжен за долговите, што е подобрено во начинот на кој се трошат парите од државната каса во последните две години, се неколкуте дилеми за кои разговараше екипата на Фактор.мк. Фактор: Колку е изводливо премиерот да биде истовремено и министер за финансии. Колку оваа функција е одговорна и тешка за исполнување, ќе има ли капацитетот премиерот Заев да „седи на две столчиња“? Миноски: Не ми се познати многу примери во светот, каде што едно лице во исто време е претседател на влада и министер за финансии. Со оглед на тоа дека имаме политичка влада зад која што што стои парламентарното мнозинство, политичката одговорност за евентуалното неуспешно извршување на функциите ќе ја сноси истото. Во секој случај се работи за две одговорни функции, чие што паралелно извршување ќе бара огромен напор, време, енергија и ангажман, како сето тоа во пракса ќе изгледа не ми е познато.

Фактор: Министерот Тевдовски е практично најголемата „жртва“ на операцијата „Метла“. Што мислите вие како екс министер за финансии, заслужи ли Тевдовски да биде разрешен?

Миноски: Поставувањето и разрешувањето на министерот Тевдовски е прашање на парламентарното мнозинство и владината коалиција. Лично мене не ми се допаѓа кокетирањето со социјализам без да се има соодветна економска основа за тоа. Во услови на мирен мандат без посериозни политички притисоци и потреси, за разлика на пример во мојот, кога функцијата ја извршував во една исклучително тензична и политички сензибилизирана атмосфера, не се спроведоа никакви суштински реформи во делот на јавните финансии, ниту се понудија нови решенија и проекти во делот на унапредувањето на деловното опкружување, конкурентноста, пристапот до финансии, зголемување на продуктивноста, развојот на работна сила, воведување на нови и поквалитетни услуги на јавниот сектор и слично, се што видовме е делумна имплементација на претходно осмислени и договарани проекти со меѓународните финансиски институции. Не може управувањето со јавни финансии да се сведе само на зголемување на даноците на малите и креативните претприемачи и индивидуи, лица кои што се двигател на секоја економијата, кои што превземаат ризик, создаваат нова вредност и креираат работни места, на воведувањето на ограничувања во однос на готовинските плаќања за приватниот сектор без компаративно да се следи состојбата во регионот, на начин што поради институционалните слабости ќе се поттикне сивата економија и даночната евазија, а ќе се гуши потрошувачката. Исто така отсуствуваше реакција на исклучително ниската стапка на реализација на капиталните инвестиции без да се направат напори да се подобри проектниот менаџмент во оваа сфера. Според мене клучна карактеристика за изминатиот период е отсуството на јасна визија и модел за тоа како да се развива македонската економија и како да се подобри животниот стандард на граѓаните. Фактор: Кои политики му пресудија на Тевдовски, покачувањето на акцизата за дизел горивата, прогресивното оданочување и подигнувањето на даночните стапки или пак поддршката за раст на минималната плата? Миноски: Зголемените акцизи и прогресивното оданочување само го зголемија оптоварувањето за граѓаните и приватниот сектор иако тоа е најлесен начин на краток рок да се полни буџетот, без при тоа да добиеме поквалитетни услуги или нови сервиси на државата или да имаме поефикасна администрација. Мојот впечаток е дека на тој начин сакаме да создадеме држава/општество на подеднакво сиромашни граѓани, наместо да тежнееме да создадеме држава/општество на богати граѓани и благосостојба преку креирање на услови секој да може да заработи повеќе со ангажирање на сопствениот труд или капитал. Фактор: Може ли да направите споредба во поглед на јавното долг на Македонија додека вие бевте шеф на државна каса и состојбата со задолжувањата која ја остави Тевдовски? Миноски: Сегашната власт наследи јавен долг во апсолутен износ, од 4,711 милијарди евра и полна државна каса со 225 милиони евра. Денеска долгот изнесува над 5,25 милијарди евра. Тоа значи дека апсолутната задолженост се зголемила за над 500 милиони евра, без при тоа да видиме некој видлив инфраструктурен проект, а согласно фискалната стратегија трендот на задолжување и во иднина ќе продолжи до 53 % од БДП. За жал денеска сме сведоци на молк од истата онаа критичка јавност за која долгот од 47 % беше висок, а дополнителното задолжување од 500 милиони евра и најавениот јавен долг од 53 % денеска го прифаќа како умерена задолженост. Фактор: Министерството за финансии има нов веб сајт со голем пристап до статистики и бази на податоци. Се согласувате ли дека има поголема транспарентност во начинот на кој се трошат јавните средства, има ли нешто што вие би подобриле? Миноски: Голем дел од податоците што денес ги гледаме на веб страната беа и претходно достапни, има неколку табели кои што се нови за јавноста, а претходно циркулираа во министерството или беа посредно достапни, сега се објавуваат на веб страната, што е во ред. Да потсетам дека Проектот за вклучување во Специјалниот систем за дисеминација на податоци Плус на Меѓународниот монетарен фонд (SDDS Plus - Special Data Dissemination Standards Plus) чија што цел е зголемување на транспарентноста во статистичкото известување беше претходно започнат. Што се однесува до понатамошното зголемување на транспарентноста, јас би вовел cloud услуги преку целосно електронско поврзување на системите на УЈП, МФ и Царина, унификација и воведување на нови деловни процеси кои што ќе го намалат можностите за човечка грешка, ќе го подобрат системот на управување со ризик и ќе овозможат генерирање на податоци во реално време за сите заинтересирани страни, со што дополнително ќе се зголеми транспарентноста, квалитетот на работење и отчетноста во работењето институциите во ресорот финансии. Идејата беше презентирана и начелно прифатена од меѓународните финансиски институции, а постоеше расположение за вклучување и на големи приватни корпорации во имплементација и финансирање на решението.

Миноски: Прогресивниот данок станува казна за лицата кои се успешни и ефикасни или кои имаат мали бизниси

Ивона Петрова — Fri, 21 Dec 2018 08:15:56 +0000

Поранешниот министер за финансии, Кирил Миноски во дебатата на Алфа кажа дека верува во политика на ниски даноци и на слободен пазар зошто на тој начин се влијае стимулативно на развојот на бизнисите а со тоа и на економскиот развој на Република Македонија. Притоа тој го искритикува воведувањето на прогресивниот данок кога веќе на сила имаме рамен данок кој се покажа дека е успешен проект во Република Македонија. - Воведувањето на рамниот данок ја зголеми наплатата ги зголеми приходите во државната каса и мое мислење е дека и во постоечки услови и по ставувањето на новата влада рамниот данок успешно ја полни државната каса. Се работи за идеолошка матрица каде прогресивното оданочување ќе придонесе за зголемување на правичноста и едаквоста. Анализите покажуваат на ЏИНИ индексот кој што ја мери нееднаквоста дека во временскиот период од воведувањето на рамниот данок таа нееднаквост се намалила. Овој аргумент дека со прогресивниот данок ќе се намали нееднаквоста не држи затоа што бројките покажуваат дека таа се намалува. Овој данок станува казна за лицата кои се успешни и ефикасни или кои имаат мали бизниси, рече Миноски Екс министерот притоа праша дали лицата кои заработуваат износ од 90 илјади денари треба да ги сметаме дека се богати. Тој наведе дека постои простор преку намалувањето на сивата економија, зголемување на транспарентноста, преку воведување на нови системи во УЈП, поефикасен систем на инспекциските служби да се прибираат повеќе средства во државата каса.

Миноски: Убедливо сме на днoто – нема нови проекти, старите се прекинуваат

Ивона Петрова — Fri, 08 Jun 2018 13:42:17 +0000

Mакедонија и официјално е на дното во Европа по растот на БДП, покажуваат последните податоци од Државниот завод за статистика. Имено, според официјалните податоци, БДП во првиот квартал од 2018 година забележал раст од минимални 0,1 отсто. Најголем пад е забележан кај градежниот сектор и тоа од дури 37 отсто. Ваквите поразителни бројки уште еднаш ја потврдија лошата економска политика на СДСМ. Немањето на сопствени проекти и стопирањето на проектите од претходната Влада негативно влијаат врз македонската градежна оператива и македонската економија во целост. За експертите ваквите движења се очекувани, со оглед на актуелните економски политики. -Во услови кога податоците за движењата на европскиот пазар како најзначаен за македонската економија покажуваат раст, економиите во регионот растат со стапки од над 4 отсто, навистина е поразителна и разочарувачка бројката од 0,1 отто раст на БДП кога во исто време стапката на инфлација изнесува 1,5 отсто за првиот квартал, со што дополнително се минимизира оваа и онака скромна бројка. Градежниот сектор кој што беше главниот двигател на економијата во изминатите години е во пад, што дополнително ја усложнува состојбата и влијае негативно на растот на дваесетина индустриски гранки од економијата што директно зависат од градежниот сектор – вели поранешниот министер за финансии, Кирил Миноски. Со ваквите негативни тенденции во економијата, невозможно е да се реализираат проекциите за раст од 3,2 отсто, како што најави владата на Зоран Заев. Дури и сегашната слабокрвна раздвиженост на економијата се уште е резултат на имплементираното во претходниот период, од времето кога ВМРО ДПМНЕ беше на власт. -Податоците од првиот квартал на 2018 година, не даваат простор за ваков оптимизам, дотолку повеќе што и проекциите на Светска Банка за растот на македонската економија во 2018 година се 2,3 отсто, што повторно станува во овие услови висок таргет затоа што економијата на квартална основа треба да расте по речиси 0,6 отсто за да се стигне оваа бројка. Инаку и овие резултати кои што се испорачуваат се резултат на активностите на компаниите во слободните економски зони кои што се добавувачи на големите европски компании и кои што максимално ја користат позитивната коњуктура на европскиот пазар. Колку што ми е познато речиси и да нема некој позначаен инвеститор кој што има најавено отварање на нов капацитет во Република Македонија. Тоа се разбира не е добро за Република Мекедонија за компаниите и граѓаните- тврди Миноски. Според лидерот на опозициската партија, ВМРО-ДПМНЕ, Христијан Мицкоски Државниот завод за статистика повторно ја потврдил лошата економска политика на СДСМ. -Според официјалните податоци, БДП во првиот квартал од 2018 година забележал раст од минимални 0,1%. Убедливо сме на дното. Притоа, од приходна страна, пад од цели 37 отсто забележува градежниот сектор, што всушност и ја отсликува НЕ работата на Владата на Република Македонија предводена од Зоран Заев. Немањето на сопствени проекти и стопирањето на проектите од претходната Влада негативно влијаат врз македонската градежна оператива и македонската економија во целост- истакна Мицкоски. Лидерот на ВМРО-ДПМНЕ посочи и дека има пад од 7 отсто во просперитетниот сектор Информации и комуникации. -Да потсетиме, во својата кампања СДСМ големо внимание посвети на овој сектор ветувајќи намалување на Данокот на добивка за ИТ компаниите за цели 50 отсто т.е. од 10 отсто на 5 отсто. Но, како што можеме да видиме нема ништо од тоа. Од расходна страна, падот повторно е алармантен кај Бруто-инвестициите. Имено во првиот квартал од 2018 година, Бруто-инвестициите забележуваат пад од 9 отсто, со што продолжува политиката на деинвестирање, својствена за СДСМ, објаснува Мицкоски, кој кажа дека исполнувањето на капиталните инвестиции од само 7,4 отсто во првиот квартал од 2018 година придонело јавната потрошувачка негативно да влијае врз БДП, односно да забележи пад од 1,4 отсто – прецизираше Мицкоски.

Миноски: Намалена е потрошувачката, градежништвото е во пад, секое семејство е задолжено за 1.200 евра нов долг

Ивона Петрова — Tue, 10 Apr 2018 12:07:44 +0000

Претседателот на комисијата за финансии на ВМРО-ДПМНЕ Кирил Миноски во вчерашното гостување во емисија „Без ракавици“ на ТВ Алфа истакна дека во првиот квартал се намалила потрошувачката, имало пад на градежништвото, а единствена витална економска активност покажале странските инвестиции кои се донесени од владеењето на ВМРО-ДПМНЕ, кои своевремено беа критикувани од страна на СДСМ. - Кога се анализираат бројките за градежништвото многу е важно да се земе во предвид дека трендот на активности во градежништвото е битен од аспект на тоа што со градежништвото директно се врзани околу 23 индустриски гранки, така што зголемената градежна активност значи зголемена потрошувачка и обратно намалената градежна активност, намалена потрошувачка, рече Миноски. Миноски додаде дека главниот двигател на македонската економија изминатите неколку години биле компаниите односно индустриските зони кои што се меѓународни компании и кои што имале етаблиран систем како на добавувачи исто така и на купувач. -Претходната влада водеше грижа не само за странските инвеститори туку и за домашните инвеститори од аспект на тоа што и на домашните компании под исти услови им беше дадено да се отвораат свои капацитети во слободните економски зони, потенцираше тој. Миноски истакна дека сегашната влада на СДСМ е контрадикторна бидејќи од нивна страна кога бил во опозиција постојано одржувале прес конференции каде што граѓаните биле манипулирани од нивна страна и се пласирале лажни бројки, додека како што рече тој се гледа висината на долгот по глава на жител се зголемил за по 1200 евра. Според него ова е политика која што значи продолжување на задолжувањето.

Миноски: Не е точно дека со прогресивниот данок ќе се намали нееднаквоста

Ивона Петрова — Thu, 05 Apr 2018 14:29:09 +0000

Кога зборуваме за даночни реформи, тука мораме да направиме разлика помеѓу левицата и десницата, не само кај нас, туку генерално во Европа. Оние политики кои што веруваат десничарите се базирани на ниски даноци затоа што економската филозофија која што се следи е филозофија дека ниските даноци и рамните даноци обезбедуваат едноставност во пресметката, тие се фер од проста причина што оданочувањето на сите даночни субјекти се врши со еднаков процент, што не значи еднаков во апсолутен износ и тие обезбедуваат економски раст, воедно го ограничуваат и просторот за политички манипулации, кажа Кирил Миноски поранешен министер за финансии во емисијата „Економски магазин“, во однос која е разликата помеѓу персоналното и рамното оданочување.

Тој додаде дека и покрај тоа што прогресивниот данок се смета дека ќе обезбеди повеќе пари во државната каса, искуството во Република Македонија го покажало сосема спротивното.

-Со воведувањето на рамниот данок во Република Македонија покажа дека беа обезбедени поголеми приходи во државната каса во однос на периодот кога имавме еден вид на прогресивно оданочување. Вториот аргумент е дека Џини индекс кој што ја мери нееднаквоста покажува намалување на периодот 2010 – 2016 година во Република Македонија и тој е помал во однос на 2006-2007 година. Значи не е точен аргументот дека со прогресивниот данок ќе се намали нееднаквоста, потенцираше Миноски.

Миноски истакна дека во период кога имало рамен данок имало многу поголеми инвестиции во здравството и образованието. Како што рече Миновски постојат анализи дека рамниот данок е фер данок за граѓаните.

Тој додаде дека доколку оваа влада на СДСМ прави споредба со оданочување со Данска и Шведска мора најпрво да се земе во предвид нивото на економски развој, висината а БДП по глава на жител, трета работа квалитетот на услугите која ја нуди администрацијата.

-Гледаме дека непостоењето на јасен концепт во однос на тоа каква даночна реформа ќе се спроведе доведува до една неизвесност и несигурност и кај домашните и кај странските инвеститори, меѓутоа и кај граѓаните на Република Македонија. Таквата неизвесност и несигурност кај странските инвеститори кај они кои што сакаат да дојдат и да отвораат нови бизниси во Македонија значи одлагање на нивната деловна одлука дали воопшто да дојдат во земјата или не, додаде тој.

Миноски го објасни документот 2020-2025 каде што се тангира токму прашањето на прогресивни даноци.

Тој рече дека од 100 проценти од испитаниците во анкетата кажале дека бројот на вработени ќе остане на исто ниво или ќе биде намален, дека 88 проценти од странските инвестиции нема да размислуваат да го прошират бизнисот во Република Македонија и воедно истакна дека голем процент на испитаниците сметале дека ќе се зголеми даночната евазија.