китови – Kurir.mk

ВИДЕО: Импресивни сцени од Јадранот, снимена група китови

Ивона Петрова — Tue, 02 May 2023 17:23:45 +0000

Видео споделено на ЈуТјуб каналот Morski.hr прикажува група од десет китови во близина на островот Вис во Хрватска. Иако појавата на китови во Јадранот не е толку изненадувачка, она што е невообичаено е што десетина од нив се снимени во водите кај Вис. -Снимајќи го кристално чистото море и вдлабнатиот брег, бевме сведоци на импресивна глетка на китови во нивното природно живеалиште. Бевме маѓепсани, вели Стефан Торес. Тоа е вид на голем северен кит кој веќе е виден на Јадранот. Тој е најблискиот роднина на синиот кит и после него е следното најголемо животно на Земјата. Колегата на Торес, Бранимир Биочиќ, објасни дека прво снимиле група од 3-5 поединци, а по околу 15 минути забележале уште една група. -Ова видео е снимено околу 20 минути откако тие две групи се споија, а тука има околу 10 единки, вели Биочиќ.

Морето исфрли мртви китови – дали е ова последица на земјотресот?

Ристе Здравков — Fri, 10 Feb 2023 15:58:38 +0000

Морето исфрлило голем број мртви китови на северниот брег на Кипар. Се смета дека смртта на китовите е поврзана со силните земјотреси што во понеделникот ги погодија Турција и Сирија. Одделот за рибарство и морски истражувања на Кипар соопшти дека денеска се пронајдени шест мртви китови, а вчера се пронајдени четири живи китови насукани на брегот. Три кита се вратени во морето, но четвртиот умрел. „Овие животни имаат систем за ехолокација на кој влијае морската бучава; тоа може да бидат воени вежби, сеизмички вежби или секако земјотрес во регионот“, изјави Јанис Јоану од Одделот за рибарство и морски истражувања за ТВ Сигма. Станува збор за китови ziphius cavirostris, попознати како китови со клун Кувиер. Нивното присуство не е вообичаено во територијалните морски води на Кипар, пишува Гардијан. Во понеделникот земјотрес со јачина од 7.8 степени ги погоди Турција и Сирија. Бројот на жртви расте. Загинаа најмалку 21.000 луѓе.

Современата технологија во заштита на китовите

Катерина Бојаџиева — Tue, 18 Oct 2022 11:35:37 +0000

Официјалните податоци покажуваат дека меѓу 18.000 и 25.000 китови годишно угинуваат поради судири со бродови. Пловилата се сериозна закана за китовите, па современата технологија може да помогне да се заштитат овие морски животни. Така, Владата на Чиле, во соработка со Фондацијата МЕРИ и Иницијативата „Син брод“, се обидува да најде решение потпирајќи се на технологијата на „паметна пловка“ којашто треба да помогне во следењето на морските екосистеми и заштитата на китовите. Проектот е во тек во заливот Корковадо и „пловката“ ги предупредува бродските посади доколку има китови во нивна близина, за да се избегнат инциденти. Технологијата користи океанографски сензори и софтвер за тн. „Слушање во длабоката океанска средина“ (ЛИДО), дополнет со вештачка интелигенција за да ги одреди видот и местоположбата на цицачите. Исто така, го следи и нивото кислород, температурата и други фактори на океанот. Овие податоци би можеле да помогнат и во проучување на климатските промени и влијанието врз морскиот свет. Иницијативата „Син брод“ засега користи шест „пловки“ за заштита на китовите во заливот. Членовите на проектот се надеваат дека ќе можат да го покријат целосното движење на китовите меѓу Антарктикот и екваторот, што би можело да го намали бројот судири низ целото нивно живеалиште. Тоа значи и подобри и покорисни податоци при донесувањето одлуки и во политиката за заштита на животната средина. Технологијата може да биде подеднакво важна и за луѓето и за китовите. Покрај нивната улога во урамнотежувањето на екосистемите, китовите помагаат да се прераспредели топлината низ океанските струи. Колку повеќе се овие животни, толку океанот ќе биде поголема заштита од глобалното затоплување и неговите штетни влијанија.

Речиси 500 китови угинати во масовно насукување близу Нов Зеланд

Ивона Петрова — Wed, 12 Oct 2022 07:09:16 +0000

Властите на Нов Зеланд денеска потврдија дека 477 китови загинале во две неодамнешни насукања во, како што ја нарекоа – една од најголемите вакви несреќи во земјата. Насукувањето се случило на пооддалечената група Острови Чатам, на околу 840 километри од источниот брег на Јужниот Остров на Нов Зеланд. Во саботата 232 животни се насукале на главниот остров од архипелагот, а уште 245 се најдени во понеделникот на островот Пит, 40 километри северно. Еколошката добротворна организација „Проект Џона“ смета дека ова е едно од најголемите насукувања во Нов Зеланд. „Обично, при големи масовни насукувања на Фејрвел Спит (‘рт на Јужниот Остров), просечно угинуваат 70-80 китови“, соопшти организацијата. Насукувањето китови не е невообичаено на Островите Чатам. Најголемиот поединечен настан е забележан 1918 година, кога угинале над 1.000 животни. Добротворното здружение соопшти дека презема обиди за спасување секаде каде што тоа е можно.

ФОТО: Околу 230 китови насукани на Тасманија, само половина се се уште живи

Ивона Петрова — Wed, 21 Sep 2022 09:48:57 +0000

Околу 230 пилот-китови, се насукаа на западниот брег на Тасманија (Австралија). Воздушните снимки покажуваат голем број од овие морски цицачи долж широката плажа на јужниот остров, а само половина од нив сѐ уште се живи, соопшти Одделот за природни ресурси и животна средина на оваа австралиска сојузна држава. На Тасманија, оваа појава е помасовна, иако се случува китови да се насукаат и на копното на Австралија. Пред точно две години на австралиското крајбрежје се насукаа 500 пилот-китови, од кои 400 угинаа. Не е целосно познато зошто пилот-китовите се насукале. Можно е јатото да било привлечено кон брегот заради храна, или пак, еден – два кита залутале, па другите ги следеле нив.

Во Нов Зеланд се насукаа 36 китови

Ивана Ефремовски — Thu, 17 Mar 2022 15:22:33 +0000

Вкупно 36 китови се насукаа на песочната плажа Farewell Spit во Нов Зеланд, а некои за жал починаа. До насукувањето дошло на врвот на Јужниот Остров, а надлежната служба излегла на терен по дојава. Спасувачките екипи се обидуваат да им помогнат на китовите кои се насукале во должина од неколку километри. Насукувањето на китови и делфини е вообичаено кај Јужниот Остров, а во последниот месец на 60 китови им била потребна помош, додека 28 умреле. Пред неколку години, на Farewell Spit угинаа дури 300 китови.

УЖАСНА ТРАДИЦИЈА: Убиени околу 1.500 китови и делфини на фестивал

Ивана Ефремовски — Tue, 14 Sep 2021 13:27:29 +0000

За време на овогодишниот фестивал „Гриндадрап“, што се одржува секоја година на Фарските Острови, автономен регион на Кралството Данска, убиени се 1.428 китови и делфини, јави агенцијата Анадолија. Домашните медиуми информираа дека локалното население годинава убило 1.428 животни, во традиционалниот лов на делфини и китови наречен „Гриндадрап“, што датира од 1500-тите години. Годинашната е највисока бројка на убиени животни од почетокот на традицијата. Во традицијата што трае од 1584 година, најмногу китови и делфини досега биле убиени во 2013 година. Тогаш биле усмртени 430 животни. И покрај силните осуди од екологистите низ целиот свет, традиционалниот фестивал се одржува секоја година.

Неколку насукани китови ќе мора да бидат успиени

Магдалена Андонова — Thu, 24 Sep 2020 10:09:32 +0000

Неколку китови кои го преживеаја масовното насукување на Тасманија ќе бидат еутаназирани бидејќи не можат да бидат извлечени, соопштија австралиските спасувачи. Според нив четири китови се многу исцрпени за да можат да преживеат, па мора да бидат успиени, бидејќи тоа е најхуманата работа што може да се направи. Спасувачите во вода пуштија околу 70 китови, а најверојатно уште 20 ќе бидат вратени во море. Во Австралија веќе угинаа околу 380 китови. Се уште не е одлучено што ќе прават со телата на угинатите китови, дали ќе ги остават или закопаат на плажата, ќе бидат фрлени на депонија или во море. (МИА)

До сега угинаа најмалку 380 насукани китови

Ивана Ефремовски — Wed, 23 Sep 2020 07:10:01 +0000

Најмалку 380 пилот китови насукани на западниот брег на Тасманија угинаа, соопштија спасувачите додавајќи дека ова најголемиот број на смртни случаи поврзани со насукувања регистрирани во Австралија. Спасувачките екипи спасија 50 китови и се верува дека уште 30 се живи, изјави денеска Ник Дека, менаџер на Парковите во Тасманија и Службата за диви животни. Во понеделникот околу 270 китови се насукаа на три локации во пристаништето Меквари. Уште 200 други утрово беа пронајдени мртви на околу седум до 10 километри јужно од првата локација. (МИА)

Околу 470 китови се уште насукани во Тасманија

Ивона Петрова — Wed, 23 Sep 2020 06:05:00 +0000

Втора група од околу 200 пилот китови е пронајдена заглавена во близина на западниот брег на Тасманија, со што вкупниот број на китови што треба да се спасат неделава достигна околу 470, јави ДПА. Спасувачките екипи денеска изјавија дека новата група беше пронајдена утринава околу седум километри јужно од првичната локација во пристаништето Меккури. Биологот на програмата за зачувување на морињата, Крис Карлион, изјави дека тоа е најголемиот број на заглавени китови што некогаш ги снимиле во Тасманија. Околу 270 китови во понеделникот останаа заглавени на три локации во пристаништето, близу градот Страхан. Една третина од нив веќе беа мртви пред да почне акцијата за спасување. Спасувачите вчера успеаја да ослободат 25 китови кои беа заглавени во песок во близина на рампата за бродови „Меккури Хедс“. Карлион ја опиша ситуацијата како „конфронтирање“, додавајќи дека можело да се слушне како китовите меѓусебно се вознемируваат. Таа кажа дека причината за заглавувањата често пати останува непозната и затоа може да дојде „едноставно до несреќа“.