Кочански „Водовод“ и ЕДС – Скопје не постигнаа договор за одложено плаќање на долгот за струја

Магдалена Андонова — Wed, 26 Oct 2022 13:56:03 +0000

КЈП „Водовод“ од Кочани и компанијата „Енерџи Деливери Солушнс“ (ЕДС) од Скопје денеска не постигнале заеднички договор за одложено плаќање на долгот за електрична енергија. Не се остварија очекувањата на менаџерскиот тим на кочанското комунално претпријатие дека добавувачот ЕДС, со кој на крајот на јуни годинава беше потпишан договор за електроснабдување, ќе прифати заостанатите обврски да се плаќаат на рати. Просториите во управната зграда и во другите објекти на работните единици на „Водовод“ и по една недела од исклучувањето од мрежата остануваат без струја. Раководството на „Водовод“ и понатаму е недостапно за медиумите, а ниту од Здружението на даватели на комунални услуги – АДКОМ немаат сознанија кои се причините што не е постигнат договор со снабдувачот, иако две други комунални претпријатија успеале да се договорат. -Од информациите што ги имаме во АДКОМ, комуналните јавни претпријатија во Куманово и Демир Хисар се договориле долговите да ги плаќаат на рати или нешто слично. Ситуацијата секаде станува алармантна, не знаеме што да очекуваме за понатаму, имавме најави за одредена помош од Владата, но тоа се одолговлекува и се наталожуваат проблемите. И во разговорите со Регулаторната комисија за енергетика и водни услуги и во нашите обраќања до Собранието, со законски измени во Законот за енергетика, бараме да влеземе во делот на мали потрошувачи и домаќинства, затоа што ние продаваме вода, што е основна потреба или работиме на одведување на отпадните води, што е битно за животната средина. Треба да направиме сè што можеме за на крајот граѓаните да не ја сносат целата обврска, истакна Пеце Милевски, претседател на АДКОМ. Градоначалникот на Кочани, Љупчо Папазов информираше дека во локалната самоуправа, која е основач на „Водовод“, имаат пресметка дека долгот на комуналното претпријатие за електрична енергија само за последните три месеци изнесува околу 50 милиони денари.

Исклучена електричната енергија во КЈП „Водовод“ од Кочани

Ивана Ефремовски — Thu, 20 Oct 2022 13:24:43 +0000

КЈП „Водовод“ од Кочани денеска остана без струја откако беше прекината испораката од електричната мрежа поради неплатен долг кон добавувачот ЕДС – Скопје. Освен управната зграда, напојувањето беше прекинато и во објектот Стопански двор, во кој се сместени неколку работни единици на претпријатието, а во непосредна близина е и градската капела. Раководството на комуналното претпријатие е недостапно за медиумите кои очекуваат подетални информации за сумата што ја должи и какви постапки ќе се преземат за да се надмине состојбата. Поради специфичноста во работењето, во меѓувреме преземени се активности да се обезбеди напојување со струја за капелата и бензинската пумпа лоцирана во кругот на Стопански двор, за да можат да функционираат возилата за комунална хигиена. Најголем дел од енергијата во „Водовод“ се троши за моќните пумпи за црпење вода од бунарите кај селото Грдовци и нејзин транспорт до филтер станицата во Кочани, за што месечно се плаќаат по околу 1,5 милион денари. (МИА)

КЈП „Водовод“ – Kurir.mk

Кочански „Водовод“ и ЕДС – Скопје не постигнаа договор за одложено плаќање на долгот за струја

Исклучена електричната енергија во КЈП „Водовод“ од Кочани