кк цибона – Kurir.mk

Некогашниот европски шампион Цибона оди во стечај

Бошко Тасиќ — Sat, 23 Sep 2023 05:27:04 +0000

Двократниот европски шампион, екипата на Цибона, и официјално банкротираше. Бидејќи овој четврток е 120. ден откако сметката е блокирана, односно никако не можеле да работат преку неа, тоа автоматски значи дека клубот е во стечај. Наводно, клубот бил подготвен за такво сценарио, па имале и план како да се извлечат од овие проблеми. Имено, неодамна беше објавено дека Цибона го започнува процесот на трансформација во спортско акционерско друштво. За ова хрватскиот кошаркарски клуб има рок од 45 дена. Се проценуваше дека единствена шанса да се спасат гигантите е надлежните институции некако да се убедат дека преминот во спортско акционерско друштво е вистинското решение за излез од долгогодишната криза. Хрватските медиуми посочуваат дека со доаѓањето на новото раководство, долгот на Цибона е значително намален и моментално изнесува околу 5.000.000 евра. Планот е преку акциите на идното спортско акционерско друштво да се инвестираат два милиона, па во новиот бизнис би се влегол со долг од околу 3.000.000 евра. Инаку, пред две сезони тимот на Цибона требаше да биде исфрлен од АБА лигата и на нејзино место да влезе МЗТ Скопје, но во последен момент хрватскиот клуб успеа да дојде до пари и да остане дел од елитното друштво.

МЗТ Скопје со неверојатна трета четвртина ја победи Цибона, сега на потег е Будуќност

Бошко Тасиќ — Fri, 14 Apr 2023 18:42:24 +0000

МЗТ Скопје со 87-74 ја совлада екипата на Цибона во последниот меч од АБА лигата, за да ја избегне последната позиција потребено е утре Будуќност да го совлада Борац. Македонскиот тим одигра неверојатна трета четвртина, тие десет минути ги доби со 30-5 и со голем пресврт стигна до убедлива победа која на крајот може да се покаже како клучна за опстанок. Цибона беше подобра во првите две четвртини и на одморот отиде со предност од 12 поени разлика, беше 53-41 за хрватскиот тим. Но во третиот период МЗТ Скопје не само што ја анулираше негативата, туку стигна до 13 поени предност кои ги задржа до крајот на мечот за победа од 87-74. Кефи со 19 поени беше најефикасен во составот на МЗТ Скопје, Бурсаќ постигна 17, Кук 15, Стојановски 14. Кај Цибона најефикасни беа Аранитовиќ и Љубичиќ со по 13 поени. Сега погледите се вртат кон Црна Гора каде Будинќност утре од 19 часот ќе го пречека Борац. Црногорскиот тим е голем фаворит и доколку победи, МЗТ Скопје ќе избегне испаѓање од АБА лигата, ќе игра бараж за да остане во елитното натпреварување.

МЗТ Скопје ги отвора вратите на „Јане Сандански“ за клучниот меч од АБА лигата

Бошко Тасиќ — Tue, 11 Apr 2023 19:55:59 +0000

Кошаркарите на македонскиот кошаркарски шампион МЗТ Скопје Аеродром ќе ја дочекаат Цибона во рамките на последното коло во АБА лигата, во натпревар кој мора да го добијат. „Штрковите“ ги исполнија своите цели, а ниту победа над Цибона не значи сигурен опстанок, туку треба да чекаат услуга од Будуќност кој е огромен фаворит со Борац. Поради важноста на натпреварот, на избраниците на Драган Николиќ ќе им биде потребна голема поддршка, па МЗТ Скопје одлучи да ги отвори вратите на СЦ „Јане Сандански“ и влезот ќе биде бесплатен. Средбата меѓу МЗТ и Цибона се игра в петок во терминот од 18:00 часот.

Кошаркарите на Цибона го прекинаа штрајкот и решија дека ќе останат до крајот на сезоната

Бошко Тасиќ — Wed, 22 Mar 2023 05:52:28 +0000

Поранешниот европски шампион Цибона го остави решавањето на проблемите за претстојното лето, односно крајот на сезоната откако управата на клубот и кошаркарите се договорија да се прекине штрајкот и играчите да останат до крајот на мај. Загрепскиот тим веќе играше против Олимпија во комплетен состав и остави одличен впечаток, за малку и не направи изненадување во Љубљана. Веднаш по мечот тренерот Јосип Сесар изјави дека има гаранции од играчите дека во овој состав ќе ја довршат сезоната, односно ќе ги бранат боите на клубот во последните два месеца. Тоа значи дека сите финансиски проблеми ќе бидат ставени на страна, а кога ќе заврши сезоната, ќе се активираат сите можни механизми за да бидат заштитени нивните барања и да бидат целосно исплатени. Дотогаш клубот треба да има чиста визија како понатаму, а логично е да се очекува дел од финансиската конструкција да биде покриена и од Градот Загреб.