клиничка болница – Kurir.mk

Клиничката болница Штип бара вработување на околу 50 лица, меѓу кои и 15 лекари

Тале Кристо — Thu, 02 Feb 2023 12:52:25 +0000

Околу 50 вработени, доктори, медицински сестри и секаков вид персонал недостасува на речиси сите одделенија во Клиничка болница Штип. Дел од вработените заминаа на работа во приватното здравство, друг дел се пензионираа, па како што вели директорот на болницата Ален Ѓеорѓијев, ситуацијата со кадарот е тешка. Тој информира дека денеска се потпишани барањата за вработување и очекува позитивен одговор од страна на Mинистерствата за здравство и финансии. Барањето е за вработување на 15 лекари, а останатите се за медицински сестри, болничари, хигиеничари и физиотерапевти. -Со оваа група која замина во приватната болница и овие два месеци имаме пензионирање на повеќе профили, сериозно се наруши бројката на вработени во Клиничка болница- Штип. Денеска ги потпишав барањата за вработување кои ќе бидат упатени до Министерството за здравство. Се надевам дека по две и пол годни конечно ќе бидат потпишани решенијата за примање, вели Ѓеорѓијев. Кадар недостасува најмногу во Одделот за анестезиологија, од каде за два до три месеца си заминува уште еден анестезиолог, па на овој оддел ќе останат само тројца кои ќе треба да ја извршуваат работата во целата болница. Недостаток на кадар има буквално на сите оддели, но загружувачка е ситуацијата на ортопедија, Одделот за очни болетсти, инфективното одделение. -Ние имаме недостаток буквално на сите оддели, најдрастична бројка каде ни треба да пополниме е Одделот за анестезија каде веќе во март, април ќе останеме со минус уште еден доктор и докторот кој замнина во приватната ординација ние ќе се сведеме буквално на тројца анестезиолози за цела болница со што ќе се отежни процесот на изведување на оперативни процедури, имаме потреба на ортопедија, на Одделот за очна болести, инфективни болести, додава Ѓеорѓијев. Во последните две години Клиничка болница Штип со над 500 вработени, сега е сведена на 440.

Медицински персонал и полицаец нападнати во штипска Клиничка болница

Тале Кристо — Mon, 11 Apr 2022 12:38:46 +0000

Педесет и петгодишен жител на Пробиштип агресивно се однесувал кон здравствените работници во Клиничка болница-Штип, а физички нападнал и полицаец. Надлежните од СВР-Штип информираат дека настанот се случил синоќа. – Полициски службеници од Полициската станица Штип го лишиле од слобода 55 годишниот З.К. од Пробиштип бидејќи околу 23.00 часот во Клиничка болница Штип агресивно се однесувал кон медицинскиот персонал и физички нападнал полициски службеник кој преземал службени дејствија. З.К. бил задржан во Полициска станица, вели во соопштението на СВР-Штип. По целосно документирање на случајот против 55 годишниот З.К ќе биде поднесена соодветна кривична пријава.

Вработена во тетовската Клиничка болница истепана од колега

Магдалена Андонова — Thu, 13 Jan 2022 11:59:06 +0000

Четириесет и четиригодишна жена, вработена во Клиничка болница Тетово пријавила во полиција дека била нападната од друг вработен во установата. Тетовската полиција вчера бележи уште две пријави за физички напад. -На 12 јануари во 10.15 часот во СВР Тетово 44-годишната А.А. од тетовска Брвеница вработена во Клиничка болница Тетово пријавила дека околу 09.00 часот, по претходна расправија, била физички нападната од Б.К. од Тетово, исто така, вработен во болницата, информираат од СВР Тетово. Вчера во СВР Тетово малолетник заедно со неговиот родител пријавиле дека на 7 јануари околу 18.15 часот на паркинг од трговски центар во Тетово, додека тој бил со неговите малолетни пријатели, биле физички нападнати од четри лица кои при нападот користеле и остар предмет, со кој му нанеле повреда. Во полицијата 24-годишна жена од Тетово пријавила дека на 11.01.2022 година околу 18.30 часот, во семејниот дом, по вербална расправија, ја нападнал нејзиниот сопруг Ф.Б. (МИА)

Физичка пресметка во Клиничката болница во Тетово: Нападнат економскиот директор на болница

Тале Кристо — Thu, 04 Feb 2021 10:56:08 +0000

Во Клиничката болница во Тетово вчера се случила физичка пресметка, каде што нападнат бил економскиот директор на Клиниката, јавија вчера албанските медиуми во земјата. Настанот денеска беше објавен и во билтенот на СВР-Тетово: Вчера (3 февруари) во 12 часот и 45 минути, А.Е.(41) од Тетово пријавил дека околу 11 часот во тетовската Клиничка болница, каде бил вработен, физички бил нападнат од Н.С.(50) од тетовско Селце, исто така, вработен во болницата. Набрзо потоа, Н.С. пријавил дека тој бил физички нападнат од А.Е и од уште неколку други лица кои не биле вработени во болницата. Се преземаат мерки за расчистување и документирање на случајот, стои во билтенот на СВР-Тетово. Имено според вчерашните информации на медиумите пресметката се случила помеѓу вработен во Клиниката, соработник на директорот на Ф.И и економскиот директор А.Е. Неофицијално, во инцидентот имало вмешано и други лица, а причината наводно била несогласувањето меѓу двата директори.

Три медицински сестри од штипската Клиничка болница ставени во изолација

Тале Кристо — Thu, 08 Oct 2020 10:49:37 +0000

Три медицински сестри од одделенијата за анестезиологија, хирургија и хирушки сали од штипската Клиничка болница од денеска се во изолација. Директорот на Клиничка болница-Штип, Ален Ѓеорѓијев за МИА вели дека изолирањето на трите медицински сестри доаѓа по направената епидемиолошката анкета на лекарот и болничарката, кои работеле на Инфективното одделение. -Трите медицински сестри имале контакти со заразениот лекар од Неврохирургија, кој беше анагажиран во системот за ротации за работа на Инфективното одделение. Од вчера во изолација е и неговиот колега од ова одделение, вели Ѓеорѓијев. Останува и понатаму проблемот со недостиг на инфектолози. Во моментов на одделението, кое е од регионален карактер, работат само двајца инфектолози, а третиот е на боледување. Но, како што вели Ѓеорѓијев, проблемите ги надминуваат со ангажирање на лекарите специјалисти од другите одделенија, кои им помагаат на инфектолизите. Во врска со состојбата со коронавирусот во Затворот во Штип, таму деветтмината изолирани осуденици до денеска немаат појавено симптоми, нивната состојба во моментов ја следи медицинскиот техничар, а лекарот го чека резултатот од тестирањето, кој бил во контакт со заразениот осуденик. Доколку тестот на лекарот се покаже позитивен, во тој случај директорот на Затворот во Штип, Мики Тодоров вели дека од страна на ЈЗУ Здравствен дом „Панче Караѓозов“-Штип треба да се анагажира друг лекар, кој ќе се грижи за здравјето на осудените лица. Направена е и реорганизација во самиот затвор, по вчерашниот прв позитивен случај на коронавирус, кај осуденик.

Групна тепачка во болничка соба во клиничка болница во Тетово

Тале Кристо — Thu, 23 Jan 2020 19:08:43 +0000

Одредени недоразбирања во соба во тетовската болница завршила ноќеска со физичка пресметка. Според првичните информации, двајца тетовци довеле другар, кој бил во алкохолизирана состојба во болницата, а во собата во која биле започнала расправија и физичка пресметка со други лица кои веќе биле таму. – Вчера во 23 часот во СВР Тетово, вработен во тетовската клиничка болница пријавил дека во една од болничките соби на Интерното одделение бил нарушен јавниот ред и мир со физичка пресметка помеѓу К.Б.(29) и С.Р.(26) од една и Н.А.(46) и Ј.А.(41) од друга страна, сите од Тетово. Се работи на расчистување на случајот, информираат од СВР Тетово. Инволвираните ќе се соочат со прекршочна пријава за нарушување јавен ред и мир.

Стоилковски: Обинителството да го испита случајот со Клиничката болница во Штип

Тале Кристо — Sun, 12 Jan 2020 12:02:30 +0000

Болница во Штип нема, а наместо казна за изведувачот, по две години доцнење со проектот, Венко Филипче и Зоран Заев одлучиле да му дадат уште 7 милиони евра, изјави на денешната прес-конференција портпаролот на ВМРО-ДОМНЕ Наум Стоилковски -Филипче и Заев се имиња кои што се повторуваат во „Рекет 1“, „Рекет 2“, во „Рекет 3“, Обвинителството сериозно мора да го испита овој случај, вели Стоилковски -Зошто не е активирана банкарската гаранција за изведувачот по доцнењето со градбата на штипската болница? Зошто по втор пат се продолжува рокот без пенали за изведувачот на штипската болница? Зошто сега по сето доцнење на изведувачот, се бараат 7 дополнителни милиони евра од буџетот на Република Македонија?, прашува портпаролот на ВМРО-ДПМНЕ. Сето ова длабоко го нарушува договореното на тендер за градба на болницата, најмногу во делот на цената за изведување, како приоритет во условите за добивање на тендерот, вели тој. Ако за проект вреден 30 милиони евра и веројатно во себе содржи и рамка минимум од 2 милиони евра за непредвидени трошоци, сега се бараат 7 дополнителни милиони евра од буџетот, работата е длабоко загазена, додава Стоилковски Тоа е дел од работата на обвинителството кое мора, според закон, во овој случај да поведе постапка по допрен глас, порачува портпаролот на ВМРО-ДПМНЕ.