клиника за кардиологија – Kurir.mk

Кардиологија во хаос: Вработените бараат разрешување на директорот Зимбаков?

Катерина Бојаџиева — Thu, 17 Aug 2023 11:38:20 +0000

Доктори и персонал од клиниката за Кардиологија целосно незадоволни од функционирањето на клиниката бараат разрешување на директорот Жан Зимбаков, дознава Радио Лидер од извори во клиниката. Како што дознава Лидер, од вработените биле испратени бројни писма со поплаки до Министерството за здравство затоа што, како што велат, на штета на пациентите клиниката не набавува основни материјали. -Директорот и заменикот не набавуваат основни материјали за извршување на дел операциите, па приморан сум пациентите да ги праќам на приватни клиники или во странство иако овде ја имаме најсофистицираната апаратура. – стои во едно од писмата до министерството за здравство до кое имаше увид Радио Лидер. Во писмото, докторот опишува и пример со конкретен случај. -Нашата клиника поседува најсофистицирани и скапо платени Мапинг системи за електростимулација на срцевите заболувања но не се набавуваат потребните материјали иако има постоечки тендер. Како последица од тоа, пациентите се принудени спасот да го бараат во странство каде што за истите интервенции се плаќа повеќе од десетина илјади евра. Колегите шпекулираат дека материјалите не се набавуваат поради нерешени бизнис релации на медицинскиот директор Жан Зимбаков и заменикот Бушлетиќ со добавувачите, поради наводно неисплатени проценти. Но не би навлегувал во тоа, факт е дека пациенти одат во странство иако истите зафати може да се извршат кај нас. – пишува докторот до министерството. Како што дознава Лидер, докторите и персоналот подготвуваат и порадикални чекори а во наредните денови Радио Лидер ќе објави и други детали од работењето на Зимбаков.

Кардиологија: Работиме со целосен капацитет, пациентите да продолжат со својата рутинска нега на срцето

Ивона Петрова — Wed, 29 Sep 2021 09:39:00 +0000

Универзитетската клиника за кардиологија соопшти дека секогаш е достапна за своите пациенти и ги охрабрува да продолжат со својата рутинска нега на срцето, со цел да се осигурат дека ќе останат здрави. Колку побрзо се третира болеста на срцето, како што посочуваат од Клиниката, толку е подобар исходот кај пациентите и се намалени ризиците од компликации. Иако во моментов дел од Клиниката функционира и како Ковид центар, со цел да ги третира пациентите со кардиоваскуларни заболувања заразени со Ковид-19, останатиот дел на Клиниката работи со целосен капацитет, вклучувајќи голем број на коронарни интервенции, како и останати дијагностички процедури, стои во соопштението по повод 29 септември, Светски ден на срцето. Од Клиниката потенцираат дека на овој ден кога светот сè уште се бори со пандемијата предизвикана од Ковид-19, никогаш не сме биле посвесни за важноста на нашето здравје и здравјето на нашите најблиски. – Така, оваа година Светскиот ден на срцето е поважен од сите досега. Сега е шансата за сите нас, да се осигураме дека го негуваме и правилно го чуваме срцето. Кардиоваскуларната болест е најголемиот убиец на светот. До неа доведуваат многу причини, почнувајќи од консумирање цигари, дијабетес, висок крвен притисок, до загадување на воздухот и други болести. Во 2019 година се забележани 17,9 милиони смртни случаи во светот како резултат на кардиоваскуларни заболувања, односно 32 отсто од сите смртни случаи глобално. Од нив, 85 отсто како резултат на срцев или мозочен удар. Во Европа, кардиоваскуларната болест е главна причина за смрт и тоа кај 47 отсто од жените и 39 отсто од мажите, информираат од Клиниката. Петстотини и триесет милиони луѓе во светот, како што се истакнува, живеат со кардиоваскуларна болест и за нив пандемијата Ковид-19 беше уништувачка. – Нашите пациенти беа најподложни за развивање тешка форма на болеста предизвикана од вирусната инфекција, поради што многу од пациентите се плашеа да се јават на своите рутински и закажани контроли и се изолираа од своите семејства и блиски. Пациентите кои доживуваа срцев удар го одложуваа нивниот итен есенцијален третман, поради страв од заразување, предизвикувајќи нова јавна здравствена криза, стои во соопштението од Клиниката.

Вработен на Клиниката за кардиологија заразен со коронавирус, одел на работа

Ивона Петрова — Fri, 27 Mar 2020 11:25:34 +0000

Рентген-техничар од Клиниката за кардиологија е заболен од корона-вирусот, дознава неофицијално „Фокус“. Тој со симптоми на вирусот доаѓал на работа, по што бил тестиран. Според информации на Фокус, ова медицинско лице не бил во странство, но најверојатно се заразил додека бил дома, бидејќи вработените на клиниката се поделени во два тима, кои се менуваат неделно или на две недели. Фокус пишува и дека техничарот немал контакт со пациенти, но затоа во изолација се пратени петнаесетина негови колеги кои ќе бидат тестирани. Официјални информации се очекуваат од Министерството за здравство.

Фирма блиска на директорот на кардиологија доби тендер во висина од 940 илјади евра?

Предраг Кукиќ — Sun, 15 Sep 2019 10:13:13 +0000

Фирмата Блуфармa за која постои сомневање дека зад истата стојат блиски луѓе на директорот на Клиниката за кардиологија, Жан Зимбаков за краток период доби неколку тендери од Клиниката, велат упатените. -Последниот е во вредност од околу 940 илјади евра и станува збор за набавка на електростомулатори, дефибрилатори, електроди, катеретери и слично. Но, освен ова историјата на соработка меѓу двете фирми постои во повеќе области. Минатата година во ноември на Кардиологија се одржа Меѓународна средба на која излагање имаа кардиолози од Македонија, Грција, Бугарија, Австрија. Настанот, како што стои и на веб страната на фирмата бил организиран од производителот на производи за интервентни процедури во кардиологијата БИОТРОНИК во соработка со Блуфарма како дистрибутер на нивните производи во Македонија. На отворањето обраќање имаа министерот за здравство Венко Филипче и Жан Зимбаков, директор на Универзитетската Клиника за Кардиологија.

Применета нова метода за превенција од мозочен удар

Катерина Бојаџиева — Tue, 06 Mar 2018 14:58:51 +0000

Шеесет и петгодишен Македонец е првиот пациент на кого му е ставен стент на каротида со новиот систем „неурогард“, кој го разви компанијата „Контего медикал“ од Јужна Каролина. Интевенцијата ја изврши д-р Сашко Кедев на Универзитетската Клиника за кардиологија.

Со стентирање на каротидите, односно артериите што одат во мозокот, практично се спречува појава на мозочен удар.

Доктор Кедев посочи дека новиот систем за стентирање е всушност апаратура која овозможува три во едно, односно се става филтер во каротидата за да спречи затворање на артерискиот канал, ставање стент и балон дилатација на крвниот сад.

- Со новата апаратура практично се скратува времето за ставање на стентот и таа е побезбедна, бидејќи се избегнува повеќекратно вадење и ставање на потребните материјали. Првиот пациент кај кој е направена интервенцијата има 65 години и веќе има стент на десната каротида која му беше 90 отсто запушена. И левата беше многу стснета и имаше опасност кај него да се појави мозочен удар, бидејќи веќе имаше невролошки симптоми, истакна Кедев.

Со овој начин на стентирање, нагласи, може да се делува и кога пациентот преживеал мал мозочен удар, односно со стентирање на каротидите да се спречи појава на масивен мозочен удар.

- Македонија е избрана да учествува во клиничката студија за одобрување на оваа апаратура за употреба. Кај нас треба да се направат интервенции кај 30 пациенти. Првично ќе направиме интервенции на 10 пациенти, кои ќе ги одбереме со скрининг, односно кај пациентите кои имаат најголема корист, а кај кои има најмал ризик. По извршување на овие интервенции кај нас, ќе може да се прават на пациентите во Берлин, Лајпциг и Милано, додаде д-р Кедев.

Иако ова е првата фаза од клиничката студија за апаратурата, пред-тестирањето, според Кедев, покажало извонредни резултати.

Додаде дека овие пациенти сега ќе се третираат бесплатно, бидејќи е студија, а додека да се комерцијализира апаратурата сигурно ќе поминат две до три години.

Скопска Кардиологија доби нов директор

Ивана Ефремовски — Thu, 15 Feb 2018 11:11:31 +0000

Доктор Жан Зимбаков е назначен за нов директор на скопската Клиника за кардиологија. Тој доаѓа на местото на Беким Поцеста од редовите на Алијансата за Албанците. Кардиологот Зимбаков од пред неколку месеци раководи со второстепената комисија за лекување во странство.