Клиника Жан Митрев – Kurir.mk

Клиниката Жан Митрев останува со старата сопственичка структура, преговорите за стратешки партнер не завршија со договор

Ивана Ефремовски — Thu, 21 Sep 2023 11:03:47 +0000

Клиниката Жан Митрев останува со старата сопственичка структура. Завршните преговори за влегување на стратешкиот партнер Холандскиот фонд Balkan Alliance Healthcare не завршија со конечен договор. -Остануваме посветени на нашата работа во Клиниката Жан Митрев и развивањето на стандардите во приватното здравството. Нашиот приоритет остануваат нашите пациенти и инвестициите во овој домен нема да се намалат. По 23 години успешно опстојување ја продолжуваме мисијата за воведување повисоки стандарди во здравствените услуги во земјава. И покрај потешкотиите што ги имаме поради блокираната сметка продолжуваме и понатаму да инвестираме и да се развиваме. Во моментов менаџментот на Клиниката не води преговори со други заинтересирани компании, велат од клиниката.

Во Клиника Жан Митрев изведена е ретка хибридна операција

Ивана Ефремовски — Wed, 14 Jun 2023 13:30:35 +0000

Доктор Жан Митрев заедно со својот тим успешно изведе сложена хибридна операција ФЕТ (Frozen Elephant trunk). Оваа операција претставува решение за комплексна состојба на распукување (дисекција) на аортата, при што се прави вградување на специјална аортна протеза на аркусот (лакот) и на десцедентната (спуштачкиот дел) на аортата. Операцијата е изведена кај пациентката на возраст од 66 години во животозагрозувачка состојба со хронична компликација - аневризма што довела до колапс на левото белодробие и проблеми со дишењето. Ова не е прва операција за неа. Претходно кај пациентката била направена итна операција за замена на коренот на аортата заради акутна Стенфорд А (Де Бејки тип 1) дисекција, со цел санирање на тогашното распукување (дисекција) на аортата и спасување на животот на пациентката. Пациентката успешно се опоравува под постојан надзор од специјалистите на Клиника Жан Митрев. Оперативниот зафат иако во медицината се практикува подолго време, во континуитет се унапредува со нови техники. Но, заради комплексноста на целиот процес и вклучувањето на различни интервенции и пристапи, ретко се применува. Успешноста на зафатот покрај специјалноста и комбинирањето на интервенции, во голема мера зависи и од употребата на најнови модели протези и примена на соодветни стратегии за заштита на миокардот, како и церебрална и висцерална заштита. Наречен е хибриден зафат затоа што комбинира ендоваскуларен третман со класична операција со употреба на хибридна протеза и интердисциплинарен тим во состав: кардиохирург, интервентен радиолог, анестезиолог, перфузионист, инструментарка. Ваквите операции за најтешко болните секогаш бараат брза реакција и истите со години наназад успешно ги изведува д-р Жан Митрев.

Пресуда на Основен кривичен суд – Клиника Жан Митрев нема пропусти во работењето

Тале Кристо — Tue, 06 Jun 2023 12:22:17 +0000

Основниот кривичен суд потврди дека нема никакви пропусти во работењето на Клиничката болница Жан Митрев. Обвиненијата на МАЛМЕД во однос на наводите за прекршоци во работата на Клиниката Жан Митрев се покажаа како неосновани. Во пресудата се потенцира дека нема докази за направен прекршок. Според овој заклучок Основниот кривичен суд донесе ослободителна пресуда за клиничката болница и за доктор Жан Митрев во предметот со МАЛМЕД. Со оваа ослободителна пресуда се потврдува дека Клиничката болница Жан Митрев и во најтешките периоди работеше според највисоки здравствени стандарди, транспарентно и во согласност со веќе утврдени и дозволени методи на лечење, кај нас и во светот. Ова е само еден чекор кон целосно докажување на вистината и фактичката состојба за нашата работа и тоа дека се што беше направено во Клиниката Жан Митрев, беше направено во интерес на пациентите и согласно етаблирани методи и стандарди при лекувањето.

Бесплатни дерматолошки прегледи од Клиника Жан Митрев по повод месецот на меланома

Ивана Ефремовски — Fri, 19 May 2023 11:57:54 +0000

Клиника Жан Митрев спроведува бесплатни прегледи за превенција на меланома – канцер на кожа, во Скопје беа прегледани и советувани над 50 граѓани, а следната недела еднодневни бесплатни прегледи ќе се прават во Битола и во Струмица. Дерматолози специјалисти од Клиника Жан Митрев ги спроведуваат бесплатните дермоскопски прегледи како превенција за појава на рак на кожа и соодветна заштита од канцер на кожа и како поддршка на Европската кампања за зголемување на свесноста за ова заболување. Покрај прегледите, пријавените граѓани добиваат и совети како правилно да се грижат за здравјето на кожата. Прегледите ги спроведуваат дерматолозите д-р Анџелка Илиева и д-р Александра Лазаревска и тоа со претходно закажан термин. Клиничката болница Жан Митрев секоја година традиционално со бесплатни прегледи и советување на граѓаните ја поддржува Европската кампања за подигање на свеста за рано откривање на карцином на кожа.

Тргна караванот „Здравје за сите“, специјалисти од Клиника Жан Митрев правеа бесплатни кардио прегледи на пензионерите од Виница и околината

Ивана Ефремовски — Tue, 16 May 2023 11:00:33 +0000

Специјалисти од Клиника Жан Митрев од денеска започнаа со спроведување на бесплатни кардиоваскуларни прегледи на пензионерите во повеќе градови низ државата. Со караванот „Здравје за сите“ пензионерите од Виница и околните населени места, беа прегледани од тимот доктори од Клиника Жан Митрев, при што добија анамнеза, ЕКГ и читање, ултразвучен кардио васкуларен преглед, контрола на ТА и консултации за навремено откривање и превенција на срцеви заболувања. Клиника Жан Митрев го започна здравствениот караван „Здравје за сите“ и бесплатните прегледи со цел да се зголемат можностите и пристапот до специјалистички прегледи за сите оние што немаат и не можат да добијат мислење од доктор за својата здравствена состојба. Клиниката ја зголемува грижата за здравјето на граѓаните и посебно за ранливи категории и оние без можност за консултации со доктор. Покрај прегледите ќе се прави и советување и едукација за правилно и навремено дијагностицирање на можни заболувања. Здравствениот караван и спроведувањето на бесплатните прегледи е дел од Меморандумот за соработка потпишан меѓу Клиничката и Сојузот на здруженија на пензионерите на Македонија, а се спроведува во соработка со локалните организации. Карванот ќе ги посети сите оние места и градови каде пристапот до специјалистички преглед е оневозможен. Во следниот период ќе ги посети и Кочани, Македонска Каменица, Делчево, Берово и Пехчево. Со оваа активност Клиниката Жан Митрев ја подигнува јавната свест во насока на грижа за кардиоваскуларното здравје со навремена превенција од кардио заболувања на посебни целни групи и навремено идентификување и намалување на ранливоста.

Награда „Оскар на хуманоста“ од Црвен крст на Македонија за Клиника Жан Митрев

Ивана Ефремовски — Wed, 10 May 2023 12:40:00 +0000

Д-р Жан Митрев и Клиника Жан Митрев добија признание од Црвениот крст на Македонија „Оскар на хуманоста“. Наградата и признанието се доделени за покажана хуманост и безрезервна поддршка на активностите на организацијата.

-Добрината треба да издржи, и ако некој прави лошо, треба да му се врати со добро. Затоа постојат и вакви добри, хумани луѓе кои без разлика на сѐ, прават само добри дела. Некои аматерски, некои доброволно, волонтерски, професионално, но прават добри работи и помагаат на другите. Јас сум навистина горд што сум тука, меѓу вас, со толку многу добри луѓе и оваа награда само ме убедува дека хуманоста и искрената добрина го менуваат светот на подобро, истакна д-р Митрев при подигањето на наградата.

Клиника Жан Митрев својата поддршка на активностите на Црвениот Крст на Македонија ги покажува континуирано со учествување во сите хуманитарни и донаторски активности организирани од страна на организацијата, како и со редовни доброволни крводарителски акции со кои се придонесува за подигање на здравствената култура и јавната свест за постојаната потреба од крводарителство. Со масовното учество во крводарителските акции од страна на вработените како и со останатата помош од Клиника Жан Митрев за хуманитарните активности на Црвениот Крст, клиниката се потврдува како колектив со високи етички, хумани и морални вредности.

Оскарот на хуманоста беше доделен во рамки на одбележување на Светскиот ден на Црвен крст и Црвена полумесечина.

Клиника „Жан Митрев“: Сметката останува блокирана

Ивона Петрова — Fri, 03 Mar 2023 11:37:05 +0000

Клиниката Жан Митрев ја информира јавноста дека и покрај тоа што имаат блокирани сметки секојдневно работат, прават сложени кардиохируршки зафати и спасуваат животи. -Исто така после пет дена сметките остануваат блокирани.Обвинителната Искра Хаџивасилева пред медиумите изјави, - „Ова не е некаква хајка против болницата Жан Митрев“. Сакаме јавно и прецизно да одговориме низ статистички податоци: - Во цела држава смртноста од Ковид беше 51%, во Клиника Жан Митрев смртноста беше двојно помала од другите болници во земјава и изнесува 25% и тоа на Интензивна нега. - Овој процент на смртност од 25 % на интензивна нега во време на Ковид пандемијата во Европа е постигнат само во Германија и во нашата клиника. - Во Македонија починаа 9663 пациенти од Корона, вие како Јавно обвинителство велите дека 1,7% од починатите биле измамени од нашата клиника. - Обвинителке што се случува со останатите 98,3% кои починале и нивните семејства во другите болници Точно обвинителке Хаџивасилева ова не е „некаква“, ова е многу добро организирана хајка, со обвинителен акт чиј што главен доказ е ТВ емисија со сцени од погреб, се вели во соопштението на болницата. Истакнуваат дека бидејќи статистичките податоци покажуваат 75% преживување, она што треба да добијат е извинување и благодарност, а не блокирани сметки и желба за, како што истакнуваат, уништување на клиниката. -Сите овие бројки укажуваат само на тоа дека вистината е наша страна и дека обвинителниот акт е конструкција и обвинување без никаква основа.Ние веќе поднесовме жалба на вашето решение и уште еднаш на крајот апелираме за фер судење и деблокирање на сметките со цел да се отстрани притисокот кон секојдневното работење на нашата клиника, се вели во соопштението.

Клиника „Жан Митрев“: Блокирањето на сметките ќе доведе до затворање на болницата

Ивона Петрова — Tue, 28 Feb 2023 08:36:57 +0000

Клиниката Жан Митрев информира дека на еден ден пред да отпочне судскиот процес, од страна на Кривичниот суд е донесено решение за определување на предлог мерки кои предвидуваат целосно блокирање на сметките на болницата. -Укажуваме дека со донесените мерки целосно се блокира работењето на болницата Жан Митрев, која е здравствена организација од јавен интерес. Клиниката Жан Митрев од денеска не е во можност да ги отплаќа обврските кон банките. Сакаме да ја информираме јавноста дека ќе направиме се што е во нашите можности и лекувањето на ниту еден пациент нема да биде доведено во прашање иако, постапките на Кривичниот суд, а на барање на обвинителството одат во поинаква насока односно бараат наше затворање. Се што баравме е фер судење во однос на лагите и невистините пласирани против нашата Клиника, а добивме „пресуда“ пред отпочнување на судскиот процес, се вели во соопштението на болницата. Оттаму посочуваат дека поради овој развој на настаните кој го очекувале после, како што велат, седум месечната синхронизирано организирана хајка, барале од јавноста, како и од претставниците на меѓународната заедница во Македонија да се заинтересираат и да го следат судскиот процес. -Очигледно дека нашите апели беа залудни бидејќи токму пред отпочнувањето на судскиот процесот сме сведоци на брутална блокада со нејасна позадина на Клиниката Жан Митрев. Образложението на Кривичниот суд дека се блокираат сметки на правни лица кои не се од интерес на клиниката е целосно неосновано. „ПЗУ Жан Митрев Струмица“ и „Битола“, не можат сами да ги покријат инвестициите и тие ги покрива матичната клиника во Скопје. Другиот правен субјект „Фила Фарм“ работи со позајмица за да може да ги исплаќа побарувањата на правниот субјект „ЛАБС“, кој е исто основан и поврзан со клиниката „Жан Митрев.“ Друштвата кои се наведени се формирани и се финансираат согласно законската регулатива во државата и истите се тесно поврзани со функционирањето на клиниката. Тие вработуваат голем број луѓе и истите се двојно пораснати во капитал. Потенцираме дека ваквото решение на Кривичниот суд е во спротивност со начелата на презумпција на невиност и создава неиздржлив притисок врз Клиниката Жан Митрев, се наведува во соопштението на болницата.

Клиника Жан Митрев ќе донира медицинска опрема за Турција

Ивана Ефремовски — Wed, 08 Feb 2023 08:29:21 +0000

Клиника Жан Митрев ќе донира медицинска опрема за погодените подрачја од земјотресот во Турција. Опремата преку Црвениот Крст ќе биде доставена до деловите каде што е најпотребно. Освен опремата и медицинските препарати, од Жан Митрев клиника доколку е потребно ќе биде испратен и стручен тим доброволци за помош во кризните центри. За сите активности поврзани со потребната помош за Турција, клиниката е во комуникација со надлежните институции во Македонија. „Серијата земјотреси во Турција кои одзедоа голем број животи, уште еднаш потврдија дека солидарноста е најважна за човештвото. Скопје е град на солидарноста, дел од нас се соочиле со ваква голема несреќа и трагедија и затоа солидарноста треба да продолжи и да се помогне на овие луѓе на секаков можен начин. Изразуваме сочувство до турскиот народ за последиците од овој трагичен настан“, велат од Клиника Жан Митрев.