колективен имунитет – Kurir.mk

Рендевски: Високиот процент на антитела кај граѓаните не значи дека е постигнат колективен имунитет

Ивона Петрова — Tue, 22 Mar 2022 11:37:17 +0000

Податоците од анализата од ковид тестирањето односно скринингот што го спроведе Министерството за здравство покажуваат дека кај испитаниците кои не се вакцинирани степенот на присуство на антитела се движеше од 75 до 76 проценти, додека кај испитаниците кои се вакцинирани нивното присуство на антитела е 85-86 проценти, што укажува дека голем број од тие кои не се вакцинирани против Ковид-19, или прележале или дошле во контакт со вирусот, меѓутоа тоа не значи дека е постигнат колективен имунитет, изјави за МИА заменик-министерот за здравство Владимир Рендевски. Тој посочи дека за тоа дали сме дојдени до колективен имунитет одлучува Комисијата за заразни болести врз база на анализите. Сепак, појасни Рендевски, најрелевантен параметар се анализите на бројот на новозаболени, починати и хоспитализирани и врз основа на тоа се препорачуваат епидемиолошките мерки. – Во поглед на актуелната епидемиолошка состојба и моменталните епидемиолошки мерки се во корелација со одредени варијабли кои се испитуваат во последните шест недели и се предмет на испитување во останатите европски земји. Тоа се бројот на новозаболени, починати и хоспитализирани, односно оптовареноста на здравствениот систем. Врз основа на овие варијабли постои посебен алгоритам кој го одредува епидемиолошкиот ризик односно епидемиолошката состојба во секоја земја. Врз основа на таа актуелна епидемиолошка состојба постојат предлог епидемиолошки мерки. Анализите во државава покажуваат дека во однос на овие три параметри моментално се наоѓаме во зелена фаза и според тоа се имплементираат соодветни епидемиолошки мерки кои се во корелација со зелената фаза. Анализите се следат на дневно и на неделно ниво и во зависност од одредено намалување или зголемување на овие параметри така би се планирале и идните епидемиолошки мерки, истакна Рендевски. Тој потенцира дека вакцинацијата против Ковид-19 е столб за подобрување на имунолошката состојба. – Затоа вчера започна караванот за вакцинација против Ковид-19 и во тој поглед мора да делуваме првенствено на повозрасните пациенти и пациентите со коморбидитети, а понатаму и на останатите пациенти кои се вакцинирани со две дози, а поминал подолг период од три месеци од последното вакцинирање. Практично да се даде и иницијатива за бустер доза кај овие пациенти, изјави за МИА заменик-министерот за здравство Рендевски.

Омикрон би можел да го доведе Израел до колективен имунитет

Тале Кристо — Sun, 02 Jan 2022 10:19:09 +0000

Скокот на бројот на заразени со варијантата омикрон на коронавирусот може да доведе до тоа Израел да постигне колективен имунитет, изјави денеска највисокиот здравствен функционер во земјата, додека бројот на случаи продолжува да расте. Високо заразната варијанта омикрон доведе до зголемување на случаите на коронавирус ширум светот. Бројот на заразени ширум светот достигна рекордно ниво, при што во просек од 24 до 30 декември се регистрираа нешто повеќе од еден милион случаи дневно. Смртноста, сепак, не е зголемена до тој степен, што дава надеж дека новата варијанта е помалку смртоносна. Израел успеа до одреден степен да го спречи ширењето на омикрон до крајот на декември, но бидејќи стапката на инфекција сега расте, се очекува дневните случаи да достигнат рекордно високо ниво во следните три недели. Тоа може да резултира со колективен имунитет, рече главниот директор на Министерството за здравство Нахман Еш. – Цената ќе биде многу заразени, изјави Еш за Радио 103ФM. – Бројките ќе мора да бидат многу високи за да се постигне колективен имунитет. Тоа е можно, но не сакаме тоа да го постигнеме со инфекција, сакаме тоа да се случи како резултат на вакцинирање на многу луѓе, рече тој. Околу 60 проценти од 9,4 милиони жители на Израел се целосно вакцинирани – речиси сите со Фајзер/Бионтек, соопшти Министерството за здравство, што значи дека тие или примиле три дози или неодамна примиле втора доза. Но, стотици илјади од оние кои ги исполнуваат условите за трета вакцинација досега не го сториле тоа. Од почетокот на пандемијата во Израел се регистрирани околу 1,3 милиони случаи на зараза со коронавирусот. Но, два до четири милиони луѓе би можеле да бидат заразени до крајот на јануари кога бранот на омикрон би можел да се смири, според Еран Сегал, научник од Институтот за наука Вајцман и владин советник. Во изминатите десет дена, бројот на новозаразени се зголеми за повеќе од четири пати. Се зголемија и тешките случаи, но со многу помала стапка – од околу 80 на околу 100. Имајќи ја предвид појавата на тешки форми на болеста, Еш рече дека размислува да дозволи четврта доза од вакцината за сите луѓе над 60 години, по минатонеделното одобрување за имунокомпромитирани и стари лица во домовите.

За колективен имунитет треба да се вакцинираат над 80 отсто од граѓаните, Македонија далеку од тоа

Ивона Петрова — Wed, 21 Jul 2021 05:36:09 +0000

За да се постигне колективен имунитет на населението треба да се вакцинираат над 80 отсто од граѓаните. Министерот за здравство Венко Филипче вели дека поради тоа постојано се упатуваат апели и се спроведуваат кампањи со цел да се покрена свеста на населението за потребата од вакцина. – Треба да се постигне колективен имунитет од 80 отсто, а ние сме далеку од тоа и затоа се нашите апели и кампањи, и преку Министерството, Владата, Канцеларијата на ЕУ, преку УНИЦЕФ со цел граѓаните да се вакцинираат. Достапна е вакцината во сите пунктови, никој од граѓаните кој ќе се пријави за вакцинација нема да биде вратен се со цел да имаме нормален живот, изјави вчера Филипче. Министерството за здравство соопшти дека на територијата на цела држава една доза вакцина досега примиле 27,5 отсто од граѓаните. Последните анализи покажуваат дека најголем процент вакцинирани граѓани има во Кавадарци 43,5 отсто, потоа следи Охрид со 42,9 отсто и Гевгелија со 41 отсто. Најмал процент вакцинирани граѓани има во Дебар 17,3 отсто, во Тетово 17,1 отсто, а во Кичево 15,8 отсто. Состојбата на вакцинирани граѓани во останатите градови е следна: Ресен 39,8 отсто, Битола 38,9 отсто, Неготино 38 отсто, Штип 37,2 отсто, Пехчево 36 отсто, Велес 31 отсто, Демир Хисар 30,9 отсто, Берово 30,9 отсто, Скопје 30,8 отсто, Валандово 30,6 отсто, Прилеп 30,3 отсто, Пробиштип 29,7 отсто, Крушево 28,3 отсто, Кочани 25,3 отсто, Свети Николе 25,2 отсто, Делчево 24,9 отсто, Виница 24,5 отсто, Крива Паланка 23,9 отсто, Радовиш 23,2 отсто, Струга 23,1 отсто, Куманово 21,2 отсто, Струмица 19,4 отсто, Кратово 18,9 отсто, Македонски Брод 18,2 отсто и Гостивар 17,8 отсто. Филипче порача дека вакцините се ефикасни и безбедни и оти единствениот начин да не бидеме затворени и да се вратиме на старите навики е што поголем број на вакцинирани граѓани и само така може да се придонесе до создавање на колективен имунитет и совладување на пандемијата. Министерот информираше дека ги следат трендовите насекаде во регионот и додаде дека нема некоја голема разлика во опфатот со вакцинација. -И тука се сите земји. Кај нас близу 450.000 граѓани веќе се вакцинирани, од нив 270 илјади се ревакцинирни, рече Филипче. Министерот најави дека ќе продолжат да го одржуваат системот со вакцинација вака активен како што е сега: сите пунктови за вакцинација да се отворени, граѓаните се пријавуваат без термин, никој да не се врати и нагласи дека вакцини има сосема доволно. Тој соопшти дека теренската вакцинација ќе оди по систем на ротација. Тоа значи ако некое место е поминато, кога ќе се поминат сите други места околу тој здравствен дом, ќе се повтори циклусот. – Отворени се вакциналните пунктови за деца. Околу 1 800 деца се пријавени, а околу 500 веќе се вакцинирани. Меѓутоа сето тоа не е процент што може да не заштити од нов бран. Граѓаните треба да се свесни дека ако не се вакцинираат има сериозно голема шанса да заболат од болест предизвикана од вирус кој многу веројатно ќе ги смести во болница и многу веројатно има голема шанса да имаат компликации. А го имаат овој механизам, инструмент да се вакцинираат и да се заштитат, нагласи Филипче. Како што информира, од индискиот сој на вирусот во последната недела се детектирани уште пет случаи, а ги има и другите соеви. -За сите соеви, за сите мутации на вирус, вакцината е единствениот спас и мора граѓаните да се свесни дека тоа е начинот на кој ние можеме да ставиме крај, порача Филипче. Информираше дека во овој момент прават анализи колку се вакцинирани секторите. Во здравствениот сектор има прилично висок процент, над 85 отсто, од вработените во градинките над 50 отсто, или 54-55, и еднакво толку во основните и во средните училишта. Најави дека сега ќе почне интезивна комуникација меѓу министерствата за образование и наука и за труд и социјална политика и директорите на институциите за повторно да разговараат со своите вработени и да ги упатат на вакцинација. – Вакцинацијата не е задолжителна, но во исто време размислуваме да воведеме некакви ограничувања од септември или октомври доколку се соочиме со нов бран. Сепак, не можеме сите да страдаме затоа што некој не се вакцинира. Ние не можеме да живееме затворени. Мора светот да функцинира, да биде отворен, затоа е и всушност вакцината измислена, за да се врати животот во нормала, рече министерот. Тој посочи дека биле свесни оти во еден момент ќе се соочат со анткваксинална кампања. – Исто како што се соочивме пред две години кога беше актуелна пандемијата со морбили. Меѓутоа, тогаш како инструмент ја имавме на располагање вакцинацијата и веднаш интервениравме и се сузби епидемијата, за нецели шест месеци значајно се зголеми опфатот на вакцинација. Тогаш воведовме забрана децата да се примаат невакцинирани во градинки и во училишта, изјави Филипче. И тоа, како што рече, треба да е еден знак и показател што значи и какво моќно оружје е вакцината во борба против пандемијата. Министерството за здравство информираше дека теренската вакцинација продолжува и денеска во 55 населени места. Вакцинацијата ќе се одвива во населените места: Ресен – Рајца, Курбиново, Сливница, Асамати, Претор Штип – Софилари, Драгоево, Селце Свети Николе – Кнежје, Ѓузумелци Демир Хисар – Доленци, Брезово, Зашле, Базерник Струга – Ложани, Биџево, Ново Село Крушево – Борино, Саждево, Јакреново Струмица – Дабиље, Сачево Неготино – Прждево, Термник Пробиштип – Пишица Кочани – Подлог Кичево – Зајас Битола – Новаци, Мегленци, Арматуш, Грумази, Гнилеж, Рибарци, Гнеотино, Брод, Бач, Добровени, Скочивир, Сливица, Живојно Охрид – Речица, Куратица, Завој, Плапе, Свиништа Македонски Брод – Инче, Зркле, Лупште, Ковче Велес – Ореше, Нежилово, Бистрица Крива Паланка – Конопница, Мождивњак Берово – Русиново Вкупниот број ковид-дијагностицирани лица во земјава од почетокот на епидемијата изнесува 155 951, на оздравени пациенти е 150 237, на починати е 5 488, а на активни случаи изнесува 226.

Нема колективен имунитет без вакцинирање на децата против Ковид-19

Дарко Андоновски — Tue, 06 Jul 2021 10:56:00 +0000

Колективен имунитет на Ковид-19 не може да биде постигнат без вакцинирање на децата и младите луѓе, предупреди денеска германското Здружение за имунолози. – Колективен имунитет се стекнува кога се заштитени од 60 до 70 проценти од граѓаните. Тоа значи дека вирусот не може да се размножува кај овие луѓе. Но, кај Ковид-19 е нешто поразлично, бидејќи луѓето можат да го пренесат вирусот, иако тие самите не се болни, биле вакцинирани и биле асимптоматски, истакна заменик-претседателот на Здружението, Рајнхолд Форстер. Тој додаде дека ситуацијата со делта сојот е влошена, бидејќи тој е позаразен и повеќе ги погодува младитге луѓе и децата. – Додека не се вакцинира оваа група, нема да добиеме колективен имунитет, посочи Ферстер.

Оваа европска држава каде Македонците најчесто одат на печалба стекна колективен имунитет – веќе три недели нема ниту еден смртен случај

Магдалена Андонова — Tue, 25 May 2021 05:53:29 +0000

Властите во Малта соопштија дека државата е првата земја во ЕУ што веќе има постигнат колективен имунитет против коронавирусот. Властите соопштија дека 70 проценти од возрасната популација примила барем една доза вакцина. – Денеска достигнавме колективен имунитет, изјави синоќа на прес-конференција министерот за здравство на Малта, Крис Ферн. Тој истакна дека „вакцината е оружје против вирусот“. Островската земја, со население од околу половина милион луѓе, аплицирала 475.000 дози на вакцини. Нешто помалку од 42 проценти од луѓето постари од 16 години се целосно вакцинирани. Три недели не се пријавени смртни случаи поврзани со коронавирус на Малта. Просечниот број на новоинфицирани лица на ден е само три. Од 1 јуни, на Малта ќе биде дозволено да се оди на плажа без маска. Од 1 јули, луѓето со завршен циклус на вакцинација повеќе нема да треба да носат маска на отворено кога шетаат сами или со друго лице, доколку се вакцинирани. Вакцинацијата во моментов е бесплатна за сите луѓе на Малта над 16 години. Деца на возраст од 12 години исто така ќе бидат вакцинирани откако европските медицински власти ќе дадат зелено светло. Малта регистрираше повеќе од 30.500 заразени и 417 смртни случаи. (МИА)

Според Филипче до крајот на летото ќе имаме колективен имунитет

Магдалена Андонова — Sun, 09 May 2021 09:47:13 +0000

Нашата проценка е дека некаде до крајот на летото може да се постигне колективен имунитет имајќи ги предвид сите количини вакцини кои треба да пристигнат во нашата земја, вели министерот за здравство Венко Филипче во неделното интервју на Радио Слободна Европа. Според министерот, сите вакцини се безбедни и нема потреба граѓаните да преферираат една наспроти друга вакцина. – Сега со пристигнувањето на оваа значајно голема количина на вакцини, а очекуваме уште стотина илјади на 15 мај, повторно од производителот Синофарм и количината од 500 илјади вакцини од производителот Синовак до крајот на месец мај, значи една значајно голема количина, која ќе се дистрибуира по овие два канали кои што ги спомнав, решивме да се стави приоритет на тие што се пријавиле и затоа се направи пресек на 30 април – сите граѓани коишто се пријавени на сајтот vakcinacija.mk, а тоа се невакцинирани близу 160 илјади, во период од две недели, значи некаде до 15 мај ќе добијат термин за вакцинација преку СМС порака или меил со точно време и пункт каде треба да се јават – вели Филипче. Министерот вели дека нема никакви дилеми околу ефикасноста на кинеската вакцина Синовак.

Путин: Целта е Русија до есен да постигне колективен имунитет

Дарко Андоновски — Wed, 21 Apr 2021 11:19:17 +0000

Рускиот претседател Владимир Путин денеска изјави дека целта е во Русија до есен да се постигне колективен имунитет на Ковид-19. – Сега најважна е вакцинацијата… за да постигнеме колективен имунитет до есен, истакна Путин во годишното обраќање до нацијата од Парламентот. Тој додаде дека Русија сега има три вакцини против Ковид-19 – Спутник В, ЕпиВакКоронба и КовиВак. – Апелирам до сите руски граѓани да се вакцинираат. Ова е единствениот начин да се ослободите од овој смртоносен вирус, посочи Путин. Тој минатата недела ја прими втората доза на вакцина против Ковид-19, но не пред камери и не откри која вакцина ја прими. Повеќе од осум милиони од вкупно 144 милиони Руси се вакцинирани. Земјата е една од најтешко погодените во светот. Пријавени се повеќе од 4,7 милиони заболени и 106. 000 смртни случаи. – Здравствените системи на многу водечки земји не успеаја да ја запрат епидемијата ефективно како нашата, наведе Путин. Претседателот на Русија како главната задача на Владата го посочи зголемувањето на приходите на Русите.

Дејл Фишер: Годинава во светот нема да се постигне колективен имунитет од коронавирусот

Магдалена Андонова — Mon, 11 Jan 2021 12:38:41 +0000

Програмите за вакцинација во текот на оваа година нема да обезбедат колективен имунитет од светската пандемија, оценија здравствени експерти, забележувајќи дека причините за тоа лежат пред се во ограничениот пристап на вакцините до сиромашните земји, проблемите со довербата во одредени заедници и потенцијалните мутации на вирусот. Дејл Фишер, шеф на Глобалната мрежа за предупредување и одговор на епидемиите, координирана од Светската здравствена организација, смета дека во скоро време нема да се вратиме во нормала, пренесе британскиот весник „Гардијан“. -Знаеме дека треба да добиеме колективен имунитет и тоа ни треба во повеќето земји, така што тоа нема да се случи во 2021 година, рече тој. „Можеби постојат некои земји што може да го постигнат тоа, но и тогаш ситуацијата нема да биде нормална, особено во однос на контролата на границата“, додаде Фишер. (МИА)

Студија: Шпанија е далеку од „колективен имунитет“

Ивона Петрова — Tue, 07 Jul 2020 06:18:35 +0000

Далеку од моментната реалност е „колективниот имунитет“ во Шпанија на нопвиот коронавирус и мерките за физичко растојание ќе останат најдобриот пристап во борбата против пандемијата. Тоа се наведува во голема шпанска научна студија. Само пет проценти од 61.000 учесници во студијата развиле антитела на коронавирусот, според студијата објавена во научното списание „Лансет“, која делумно било финансирано од шпанското Министерство за здравство. Студијата покажа дека околу една третина од заразените со коронавирусот биле асимптоматски, што, велат авторите, има „важни импликации врз јавното здравство“. „Во моментов, имунитетот на стадо е тешко да се постигне без да се прифати колатерална штета, т.е. бројни смртни случаи кај популацијата под ризик и без преоптоварување на здравствените системи“, велат истражувачите. „Некои експерти проценија дека серопреваленцијата од околу 60 проценти може да значи колективен имунитет. Сепак, ние сме далеку од тоа да ја достигнеме таа бројка“, изјави водечкиот истражувач Марина Полан за Си-Ен-Ен. Студијата наведува дека резултатите укажуваат на потребата да се одржат мерки за физичко растојание и да се продолжи да се идентификуваат и изолираат нови случаи и нивните контакти „за идна контрола на епидемијата“. Авторите тврдат дека не е јасно дали некое лице заразено со коронавирус кое не развило антитела може повторно да се зарази.Истражувањето почна во април, додека Шпанија беше во строг карантин. Шпанија е една од најтешко погодените европски земји, со повеќе од 28.000 смртни случаи и 250.000 случаи на инфекција со новиот коронавирус.