колони – Kurir.mk

Се уште голема гужва на граничниот премин Богородица, за излез кон Грција (ВИДЕО)

Ристе Здравков — Sun, 18 Jun 2023 12:21:23 +0000

Изминатите два дена постојано се објавува на социјалните мрежи дека на граничниот премин Богородица, за излез кон Грција има чекање и големи колони. Утринава од АМСМ информираа дека на овој граничен премин се чека околу половина час и изгледа дека ова се уште трае, односно постојано има туристи кои одат на својот заслужен летен одмор, вклучувајќи ги и тие кој ја користат нашата земја како транзитна дестинација. За останатите гранични премини АМСМ соопшти дека нема подолги задржувања. Во текот на вчерашниот ден, започнувајќи од пладневните часови, на овој граничен премин, од грчка страна за влез во Македонија се чекаше околу 3 часа. Видеото погледнете го на следниот линк на кој можете постојано во живо да ја следите состојбата на овој граничен премин.

АМСМ: На Богородица за излез се чека 30 минути, во прекин сообраќајот на локалните патишта во Крива Паланка

Ристе Здравков — Sat, 17 Jun 2023 11:40:48 +0000

Автомото сојузот на Македонија соопшти дека се во прекин локални патишта во Крива Паланка поради излевање на Крива Река, а на граничниот премин Богородица за излез од државата се чека 30 минути. „Поради излевање на Крива Река, во прекин ќе бидат локалните патишта од Крива Паланка кон селата Варовиште и Градец. Во кумановското село Пчиња има собрани дрвја и гранки под мостот на реката Пчиња, со што е намален протокот на реката, па постои опасност од излевање и оштетување на мостот“, информира АМСМ. Поради обилни врнежи дожд и излевање на река кај село Раец сообраќајот на патот А1 Градско-Прилеп е во целосен прекин. Сообраќајот на останатите државните патишта се одвива по претежно влажни коловози. Интензитетот на сообраќај на патните правци надвор од градските средини е умерен. „На граничниот премин Богородица има зголемена фреквенција и чекањето за излез е околу 30 минути. На останатите гранични премини од македонска страна нема подолги задржувања за влез и излез од државата“, соопшти АМСМ. АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

ФОТО: КОЛОНИ ВОЗИЛА ЧЕКААТ ПРЕД БЕНЗИНСКИТЕ ПУМПИ ВО ШТИП – нè очекува ли ценовен шок на горивата?

Магдалена Андонова — Thu, 03 Mar 2022 16:21:35 +0000

Во текот на денешниот ден почнаа да се шират неофицијални и се уште непотврдени информации дека цените на нафтените деривати од вторник ќе поскапат за дури 10 денари. Граѓаните панично започнаа да се упатуваат кон бензинските пумпи да стават горива по моменталната цена. Од градот Штип ни пристигнуваат фотографии од моменталната глетка пред бензинските пумпи каде што има колона од возила кои чекаат ред за ставање на гориво. Се поставува прашањето дали ни престои нов ценовен шок како за горивата така и за прехрабрените продукти.

ФОТО: Редици од автомобили на ГП Табановце, со часови се чека влез за во Македонија

Магдалена Андонова — Thu, 23 Dec 2021 20:32:29 +0000

Редици автомобили долги по два километри се создадоа попладнето и вечерва на граничниот премин Табановце кон Србија, објави Алсат. Автобусите чекаат од три до пет часа за да ја минат границата, а патниците, кои главно се враќаат во Македонија за новогодишните празници, се револтирани, пишува Алсат. Според дел од патниците, има и автобуси кои поминуваат веднаш, без чекање, додека некои чекаат со часови. Гужвата почнала да се создава околу пладне и оттогаш само се влошува, велат патниците.

Новите мерки против коронавирусот создадоа колони на чешко-германската граница

Тале Кристо — Mon, 25 Jan 2021 10:35:43 +0000

Германската полиција денеска информира дека колони автомобили и пешаци ја преполниле чешко-германската граница, откако Германија ја прогласи Чешка за земја со висок ризик, што значи дека за влез во земјата треба да се има негативен тест за коронавирус. Американските медиуми пренесуваат дека стотици автомобили формираа колони на премините Валдмунхен и Фирт во Валд, а се наведува дека редиците ги направеле чешките граѓани кои работат во Германија. Од вчера за влез од Чешка во Германија на самата границата потребно е да се покаже негативен тест за коронавирус, не постар од 48 часа, додека оние кои не работат во Германија мора да заминат во изолација 10 дена. Поради зголемениот број барања, Чешка ќе го зголеми својот капацитет за тестирање на граничните премини. Најавено е дека чешкиот премиер Андреј Бабис за ситуацијата на границата ќе разговара со неговиот баварски колега Маркус Седер.

ФОТО: Километарски колони за вакцинација против корона вирус на Белградскиот саем

Тале Кристо — Sun, 24 Jan 2021 15:40:24 +0000

И денеска за вакцинација на Белградскиот саем се формираа огромни редици од повеќе илјади граѓани за да се вакцинираат со вакцината на кинескиот производител Синофарм, јави дописникот на МИА од Белград. Меѓу нив има граѓани кои беа дојдени без покана за вакцинација и кои чекаат неколку часа. Граѓаните чекаат во два реда, во едниот се оние што по доброволното пријавување добиле покана за вакцинација, а во другиот се оние што дошле без закажан термин. Граѓаните изјавија дека во просек чекаат околу три часа и дека не им е битно која вакцина за коронавирус ќе ја примат. Пунктовите за вакцинација на Белградски саем се отворени до 16 часот, а масовната вакцинација се спроведува и ширум другите градови во Србија. Според последните податоци што ги објави РТС, повеќе од 200.000 граѓани во Србија досега ја примиле вакцината против Ковид-19.

Километарски колони на патот кон Скопје, сите се враќаат од викенд

Магдалена Андонова — Sun, 23 Aug 2020 18:59:11 +0000

Огромни гужви има попладнево на патот од Охрид кон Скопје. На социјалните мрежи се споделуваат фотографии од километарски колони, а како и секоја година најкритично е околу Стража, зошто голем дел викендаши се враќаат и од Маврово. Затворените граници за Македонците поради алармантниот број на секојдневно новозаболени лица, ги натера граѓаните летово да останат дома, а Охрид е една од најпосетуваните дестинации. И покрај тоа што и градот и плажите беа полни, охридските угостители сметаат дека ова е за нив пропадната сезона, зошто ги нема странските, туку само гостите со „плиток џеб“.

Километарски колони на бугарско-грчката граница

Магдалена Андонова — Fri, 26 Jun 2020 15:04:44 +0000

Колони возила од три километри имало претпладнево на граничниот премин Промахонас за влез од Бугарија во Грција, објави грчката телевизија „Скај“. Во поголемиот дел, туристите се од Бугарија и Србија, а во Грција доаѓаат на неколкудневен одмор. На граничниот премин секојдневно има и претставници на Националната организација за јавно здравје на Грција, кои прават тестови по случаен избор за Ковид-19, јави дописничката на МИА од Атина. Според информациите на „Скај“, од 15 јуни кога се отвори граничниот премин, поминале 130.000 државјани на Европската унија и 14.000 државјани на трети земји, а мнозинството од нив се Срби. (МИА)