комисии – Kurir.mk

Седници на комисиите за образование и за европски прашања

Тале Кристо — Wed, 05 Apr 2023 05:41:24 +0000

Во Собранието денеска седници ќе одржат комисиите за образование, наука и спорт и за европски прашања. На дневен ред на Комисијата за образование, наука и спорт се предлозите на закони за изменување на Законот за основање на Национална агенција за европски образовни програми и мобилност, на Законот за отворените граѓански универзитети за доживотно учење и на Законот за спортска академија, како и Предлогот на закон за изменување и дополнување на Законот за просветната инспекција, сите во прво читање. Комисијата за европски прашања треба да ги разгледа Предлогот на закон за изменување и дополнување на Законот за Управата за јавни приходи, како и предлозите на закони за вештачење и за зоотехника, сите во второ читање.

Во Собранието продолженија на три седници

Ивана Ефремовски — Wed, 09 Mar 2022 14:47:53 +0000

Пратениците претпладнево усвоија неколку предлог-закони, во прво читање и годишни извештаи во рамки на продолжението на 45-тата седница. На првото читање на Предлог-закон за дополнување на Законот за животната средина, предложен од пратениците од владејачкото мнозинство Ненад Коциќ и Маја Морачанин, предлагачите објаснија дека се работи основната цел на предложеното законско решение е забрана на ново градење или реконструкција на инсталации од тешка и загадувачка индустрија (Г1) во населено место или заштитно подрачје. -Да се одреди со закон дека не може да се градат инсталации од тешка и загадувачка индустрија (Г1) на помалку од пет километри од населено место или заштитно подрачје, се со цел да се заштити животната средина, а со тоа и здравјето на граѓаните. За жал, ние се соочуваме со една состојба, со ширењето на градовите, како случајот со Скопје, инсталации од тешка и загадувачка индустрија, кои во минатото биле далеку од населените места, со ширењето, сега да се практично до живеалиштата на луѓето, појасни Морачанин, која побара од пратениците да го поддржат предлог-законот. Пратеникот од опозицијата Миле Лефков во реплика побара од предлагачите појаснување зошто во еден од членовите стои градење или реконструкција на нови инсталации од тешка и загадувачка индустрија (Г1), што според него, така напишано, не ги опфаќа старите градби. -Не може да станува збор за реконструкција на нови инсталации. Доколку сакате да ги опфатите сите оние инсталации кои порано биле градени надвор од населените места, треба да го отстраните зборот нови. Ако остане вака како што е, ќе се однесува на градење и реконструкција на нови, а притоа ќе останат старите инсталации кои се наоѓаат во населените места. Затоа, сметам дека зборот нови треба да се отстрани од предлог-законот, рече Лефков. Пратеникот од СДСМ, Ненад Коциќ објасни дека секоја реконструкција на стара фабрика се смета како отворање на нова, и оттаму зборот нови реконструкции. -Таа формулација во законот е напишана уште во 2013 година, подготвен од 24 невладини организации, кога се боревме против рестартирањето на топилницата во Велес. Доколку во 2013 година се донесеше овој закон ќе се спречеше загадувањето со тешка индустрија, особено во Пробиштип и Кочани, рече Коциќ. Собранието ги проследи и годишните извештаи за 2020 година за работата на Судскиот совет, Агенцијата за аудио и аудиовизуелни медиумски услуги и Јавно радиодифузно претпријатие Македонска радио-телевизија. По завршувањето на продолжението на 45-та седница, дадена е пауза, по која Собранието треба да ги продолжи 50-та, а потоа и 51-та седница. (МИА)

Почна новата динамика на релација Скопје-Софија, прва со состанок групата за економија, трговија и инованции

Ристе Здравков — Tue, 01 Feb 2022 06:34:41 +0000

Со состанокот на Работната група за економија, трговија и иновации на претставници на Северна Македонија и Бугарија, кој се одржува вчера и денеска во Скопје, почна и практичната примена на новиот пристап во односите меѓу двете земји, кои го најавија премиерите Димитар Ковачевски и Кирил Петков. Зајакнување на практичната соработка во сфери кои се важни за секојдневниот живот на граѓаните на двете држави и на тој начин топење на мразот околу потешките прашања е нешто што Ковачевски и Петков го промовираа и во Скопје и во Софија, на меѓувладината седница, а кое треба во крајна линија да доведе до компромис за спорот и тргање на бугарското вето за почеток на преговори на Северна Македонија со Европската Унија. Двете влади формираа четири работни групи – за економија, трговија и иновации, за инфраструктура, транспорт и поврзување, за европска интеграција и зелени политики и за култура, наука и образование. Историските прашања ќе ги разгледува веќе постоечката Мешовитата македонско-бугарска комисија за историски и образовни прашања. Планирано е секоја недела состанок да одржува една од овие групи, кои секоја во својата сфера ќе придонесе за зајакнување на соработката меѓу двете земји. Министерството за финансии вчера и денеска е домаќин на бугарска владина делегација предводена од министерот за иновации и раст Даниел Лорер, кој заедно со министерот за финансии Фатмир Бесими копретседава со првиот состанок на Работната група за економија, трговија и иновации. Ковачевски вчера изјави дека е внесена нова динамика во разговорите со Бугарија и договорен нов пристап во разговорите, свртен на реални теми, додавајќи дека сите комуникации на двете министерства за надворешни работи се во фаза на работни документи. – Сите комуникации кои нашето МНР ги има со МНР на Бугарија се во фаза на работни документи, меѓутоа доколку се дојде до одредено решение, коешто ќе биде прифатливо за двете страни, тогаш нормално тоа ќе биде комуницирано, согласно процедурите, законите и Уставот на државата кај нас, изјави Ковачевски, посочувајќи дека шефот на дипломатијата Бујар Османи имаше излагање за разговорите со Бугарија пред Комисија за надворешна политика во Собранието. Одговарајќи на новинарски прашања при посетата на училишта во Прилеп, Ковачевски вчера нагласи дека целта на заедничката владина седница во Софија и формирањето на работните групи е реализирањето на новата динамика, која тој и Петков ја најавија. Меѓу министерствата, исто така, ќе има комуниција според потребите, посочи Ковачевски, особено меѓу министерствата за одбрана, бидејќи и Северна Македонија и Бугарија се членки на НАТО. Во меѓувреме известувачот на Европскиот парламент за Северна Македонија Илхан Ќучук оцени дека новата Влада во Софија започнала добар процес за да ги зближи Скопје и Софија. Според Ќучук, кој е и копретседател на либералната партија АЛДЕ, европратеник од ДПС/„Обнови ја Европа”, има тензија на историски, но не и на политички план. Тој рече дека работел со овие луѓе долги години и веќе ја има нивната доверба. Договорот меѓу двете земји од 2017 година, вели, го отвори евроатлантскиот пат за Северна Македонија. Запрашан од бугарската Нова ТВ дали верува дека Бугарија треба да го укине ветото за почеток на преговорите на Северна Македонија со ЕУ, тој рече дека верува оти Бугарија треба активно да работи во рамките на правилата договорени меѓу двете соседни земји. – Ќе биде голем пропуст на бугарската надворешна политика ако го дозволиме овој луксуз – Албанија да започне преговарачки процес, а Северна Македонија да се остави настрана, рече Илхан Ќучук. Прашањата поврзани со членството на Северна Македонија во Европската Унија и тековниот дијалог со Бугарија, беше една од главните теми на вчерашната средба на специјалниот претставник на Обединетото Кралство за Западен Балкан, сер Стјуарт Пич со претседателот Стево Пендаровски. Пендаровски, како што соопшти неговиот Кабинет, го информирал Пич за напредокот на дијалогот меѓу двете земји и во тој контекст, претседателот се заблагодари за интересот и поддршката на Велика Британија за македонско-бугарскиот дијалог. Шефот на државата потенцирал дека надминувањето на блокадата за почеток на пристапните преговори со ЕУ ќе внесе дополнителна предвидливост и стабилност на Западниот Балкан. Заедничката комисија за историски и образовни прашања на состанок овој месец Еден од главните причинители за застојот во односите изминатиот период беше токму атмосферата во историската комисија, која остана петтата работна група. Двајцата премиери и во Скопје и во Софија не одговараа директно на прашањето дали оваа комисија ќе претрпи промени, кадровски или организациски, но напоменуваа дека и таа ќе се приклучи на предвидената динамика на другите четири работни групи. Ковачевски вчера изјави дека и од Комисијата за образовни и историски прашања очекува резултати и динамична работа. Посочи дека таа работи по своја методологија и вклучува професори по историја. – -Таму ветија дека ќе има нова динамика во наредниот период, со цел да дојдат до решенија, кои тие ќе можат да ги презентираат пред јавноста, додаде Ковачевски. Копретседавачите, Драги Ѓоргиев од македонска и Ангел Димитров од бугарска страна беа присутни на меѓувладината седница минатата недела во Софија, а Ѓоргиев вчера во изјава за „Слободен печат” истакна дека нема промена во реториката и пристапот на бугарската страна и сѐ додека е така, не може да очекуваме напредок во работата на заедничката комисија. – Колку ќе се овозможи приближување на ставовите зависи и од двете страни, но со ваквите изјави другата страна однапред одредува во која насока ќе одат состаноците. Нема промена во реториката и во пристапот на бугарската страна и сѐ додека е тоа така, не очекуваме дека ќе има придвижување. Кога едната страна ја обвинува другата страна дека не сака да ја прифати апсолутната вистина на првата страна, не може да се очекува напредок во процесот. Бугарската страна инсистира на заедничка историја, воспоставена во средниот век. Ние не бегаме од заедничката историја, но, тоа не треба да се сфаќа на начин како тоа го сфаќа бугарската страна – дека историјата од средниот век до 1945 година е заедничка. Ако е така, тогаш тоа воопшто не е заедничка историја, туку е историја на еден ист народ. Таквиот пристап не е научен, не е историски, тоа е само едно политичко толкување. Со постојанава реторика всушност се минираат исходите на средбите, вели Ѓоргиев. Тој потврдува дека дека до крајот на мај е договорено да се одржат три средби. Претходниот договор, бил да се одржат до крајот на јуни, но на состанокот во Софија минатата недела било договорено да се скрати рокот, појаснува Ѓоргиев, за да може и Комисијата да даде свој придонес во новата динамика на односите на двете држави. – На заедничките разговори неодамна во Софија со колегата Ангел Димитров се договоривме дека годишно можеме да имаме најмногу шест средби, затоа што и меѓу средбите имаме многу работа. Претходно бевме договорени да имаме по пет средби годишно, сега додадовме плус една, вели Ѓоргиев. Следниот состанок на Комисијата ќе се одржи кон крајот на февруари во Софија, затоа што последната средба во живо беше во Скопје. Ѓоргиев вели дека сакаат колку може повеќе да се гледаат во живо, но тоа ќе зависи од состојбата со пандемијата. Прашан за членот што недостасува во Комисијата, по заминувањето на професорот Ванчо Ѓорѓиев, копретседавачот на македонскиот тим најави дека деновиве ќе достават предлог до Министерството за надворешни работи, но оти Комисијата нема да е комплетирана до следната средба. Бугарскиот копретседавач Димитров, пак, вчера во изјава за БНТ, обвини дека блокирањето на нормалниот ритам на работа на Комисијата се должи на како што вели „неподготвеноста на нашите колеги да прифатат дека имаме заедничка историја, а таа започнува во средниот век”. – Имаме искуство, знаеме што да очекуваме и пристапуваме со внимание и реализам, без посебни очекувања. Ние сме во средниот век, уште сме на материјата што се учи во основно училиште, се уште не сме стигнале до она што се учи во средно, а работиме три и пол години. Сето тоа е поради неподготвеноста на нашите колеги да прифатат дека имаме заедничка историја, а таа започнува во средниот век. На тоа се должи блокирањето на нормалниот ритам на работа на Комисијата, смета Димитров. Како што јави дописникот на МИА од Софија, Димитров вели и дека инсистирал разговорот за Гоце Делчев повторно да се отвори, при тоа изразувајќи жалење што тоа прашање ќе биде пред Мешовитата комисија по одбележувањето на 150-годишнината од раѓањето на Делчев. Досега Историската комисијата има дадено препораки до владите во Скопје и Софија за заедничко чествување на пет личности – Цар Самоил, браќата Кирил и Методиј и Свети Климент и Свети Наум Охридски. Во врска со правата на граѓаните со бугарска самосвест во земјава, минатата година до Државната комисија за спречување и заштита од дискриминација бил доставен само еден поднесок за дискриминација поради бугарско самочувство, изјави вчера претседателката на Комисијата, Весна Бендевска. Таа истакна дека институцијата има високо ниво на самостојност и е важна во моментов, поради изјавите на припадници на бугарското малцинство во Северна Македонија кои велат дека им се загрозени правата а нема каде да се жалат. Претседателката на Комисијата ги охрабри сите граѓани кои се чувствуваат дискриминирано по кој било основ – етнички, родов, сексуален, политички и други основи, да поднесат претставка до Комисијата. Бендевска додаде дека работата на Комисијата има ефект, иако некои од дискриминаторите не ја признаваат институцијата, поради тоа што не ја разбираат нејзината надлежност.

Седници на неколку собраниски комисии

Дарко Андоновски — Tue, 21 Dec 2021 06:25:54 +0000

Во Собранието на Република Северна Македонија денеска Тања Чачарова-Илиевска, член на Судскиот совет ќе даде свечена изјава. Во законодавниот дом за денеска се закажани и седници на Комисијата за одбрана, Комисијата за земјоделство, шумарство и водостопанство и Законодавно-правната комисија. На дневен ред на Комисијата за одбрана е Предлогот на закон за развој, производство и промет на воени стоки, во второ читање. Пред членовите на Комисијата за земјоделство се дополнувањата на Законот за финансиска поддршка за намалување на последиците предизвикани од Корона вирусот COVID – 19 врз производството, откупот на грозје и винската индустрија, како и Предлог на закон за финансиска поддршка за намалување на последиците предизвикани од Корона вирусот COVID – 19 врз производството и откупот на земјоделски производи, двата по скратена постапка. Меѓу точките на три закажани седници на Законодавноправната комисија се Предлог на закон за лековите, Предлог на закон за парничната постапка и Предлог на закон за исплата на паричен надоместок на жртви од кривични дела со насилство сите во прво читање. Оваа Комисија ќе ги разгледа и измените и дополнувањата на Законот за минерални суровини, Законот за иновациската дејност, Законот за трговските друштва и на Законот за државен пазарен инспекторат, сите во прво читање. Предлог измените и дополнувањата на Законот за концесиии и јавно приватно партнерство, се поднесени по скратена постапка, а во прво читање се и Предлог измените и дополнувањата на Законот за јавни претпријатија. Тука се и повеќе предлог-закони во второ читање од областа на економијата и финансиите.

Седници на четири собраниски комисии

Ивона Петрова — Mon, 22 Mar 2021 06:28:54 +0000

Во Собранието денеска седници ќе одржат комисиите за економски прашања, за финансирање и буџет и за одбрана и безбедност, а две последователни седници ќе има Законодавно-правната комисија. Единствена точка на дневниот ред на Комисијата за економски прашања е Предлог-законот за изменување и дополнување на Законот за градежните производи, во прво читање. Комисијата за финансирање и буџет ќе ги разгледа Предлог-законот за буџети, Предлог-законот за изменување и дополнување на Законот за финансиска полиција, како и Предлог-законот за продажба на станови кои потекнуваат од станбениот фонд на поранешна ЈНА или се добиени по пат на замена на недвижен имот кој потекнува од поранешната ЈНА и се доделени на користење на лица вработени во Министерството за одбрана и Армијата, трите во прво читање. На дневниот ред на Комисијата за одбрана и безбедност има осум точки, меѓу кои и Предлог-одлуката за изменување на Одлуката за одобрување на продолжување на рокот за постоење кризна состојба на дел од територијата на Република Северна Македонија, заради заштита од илегална миграција и заштита на јавното здравје во услови на постоење на пандемија прогласена од Светската здравствена организација за КОВИД-19 и спречување од негово ширење и поради висок ризик и зголемен обем на влез и транзитирање на мигранти низ територијата на државава. На дневниот ред се и предлог-законите за изменување и дополнување на Законот за служба во Армијата, во прво читање, за изменување на Законот за заштита од експлозивни материи и за изменување и дополнување на Законот за странци, двата во второ читање. Законодавно-правната комисија ќе одржи две последователни седници со вкупно 26 точки на дневен ред, од кои на првата се предлог-законите за изменување на Законот за спречување на насилството и недостојното однесување на спортските натпревари и за дополнување на Закон за научно-истражувачката дејност, поднесен од пратеници од власта, двата во прво читање. На втората седница на оваа собраниска комисија има 24 законски решенија, меѓу кои и Предлог-законот за образование на возрасните, во прво читање, предлог-законите за изменување на Законот за меница, на Законот за фондот за осигурување на депозити, на Законот за лизинг и на Законот за финансиските друштва, сите во второ читање. Членовите на комисијата ќе ги разгледаат и предлог-законите за изменување и дополнување на Законот за ревизија на инструментот за претпристапна помош (ИПА), на Законот за даночна постапка,Законот за регистрирање на готовински плаќања и на Законот за придонеси од задолжително социјално осигурување, како и Предлог-законот за изменување на Законот за игрите на среќа и за забавните игри, сите во второ читање.

Четири собраниски комисии ќе одржат седница

Ивона Петрова — Thu, 11 Feb 2021 06:17:14 +0000

Во Собранието на Република Северна Македонија денеска седници ќе одржат Комисијата за здравство, Комисијата за европски прашања, а по две седници ќе одржат и Комисијата за транспорт, врски и екологија и Законодавно-правната комисија. На дневен ред на седницата на Комисијата за здравство се повеќе закони во прво читање, меѓу кои Предлог закон за изменување на Законот за здравствената заштита, Предлог законот за изменување на Законот за заштита од јонизирачко зрачење и радијациона сигурност, Предлог законот за изменување на Законот за биомедицинско потпомогнато оплодување, Предлог законот за изменување на Законот за евиденциите во областа на здравството…. Пред членовите на Комисијата за европски прашања ќе се најдат Предлог законот за системот на внатрешна финансиска контрола во јавниот сектор и Предлог законот за изменување и дополнување на Законот за вршење на сметководствени работи, и двата во прво читање. На дневен ред на седницата на Комисијата за транспорт, врски и екологија се измените и дополнувањата на Законот за електронските комуникации, на Законот за водите и на Законот за заштита на природата, сите во прво читање. Во законодавниот дом за денеска е закажано и основање на Интерпартиската парламентарна група за поддршка на правата на Ромите, нивна инклузија и интеграција во Република Северна Македонија.

Седници на три собраниски комисии

Ивона Петрова — Fri, 15 Jan 2021 06:16:05 +0000

Во Собранието денеска седници ќе одржат комисиите за одбрана и безбедност, за финансирање и буџет и Законодавно – правната комисија. На дневен ред на Комисијата за одбрана и безбедност се измените и дополнувањата на Законот за посебните права на припадниците на безбедносните сили и на членовите на нивните семејства, во второ читање, Предлог законот за развој, производство и промет на воени стоки, во прво читање, измените и дополнувањата на законот за странци, измените на Законот за полиција, на Законот за заштита од експлозивни материи, на Законот за складирање и заштита од запални течности и гасови, на Законот за детективска дејност и на Законот за гранична контрола, сите во прво читање. Членовите на Комисијата за финансирање и буџет ќе одлучуваат за измените на Законот за вршење на услуги брз трансфер на пари, на Законот за задолжница, на Законот за меница, на Законот за фондот за осигурување на депозити и на Законот за лизинг, сите во прво читање. На дневен ред се и измените и дополнувањата на Законот за ревизија на инструментот за претпристапна помош (ИПА) и измените на Законот за финансиските друштва, во прво читање. Членовите на Законодавно – правната комисија денеска треба да одржат три седници.

Комисии на ВМРО-ДПМНЕ: Општина Аеродром целосно запоставена од страна на СДСМ

Тале Кристо — Wed, 01 Jul 2020 13:53:08 +0000

СДСМ на парламентарните и локалните избори настапија со нереална програма, ветувајќи проекти и мерки во сите општини, кои денес во најголема мерка, останаа нереализирани. Една од општините каде СДСМ целосно потфрли е скопски Аедором, една од општините со најголем број на жители во Македонија. Во Аеродром СДСМ ветија целосна гасификација на општината, каде првично истиот би се понудил на стопанските субјекти, но и за компаниите кои планираат да инвестираат во инустриската зона. Овој проект требаше да помогне и во борбата за почист воздух, но од ова аеродромци не видоа ниту гасификација, ниту нови инвестиции, ниту отворање на нови работни места, а најмалку од се почист воздух. СДСМ ветуваа изградба на атмосферски и фекални канализации и поголеми колектори, со цел решавање на овој горлив проблем, но овие 3 години нова канализациона мрежа не е изградена. За жителите на Аеродром СДСМ ветија и изградба на нов затворен пазар, кој во себе би содржел посебни делови за продажба на градинарски производи, млечни производи, свежо месо, дел за хортикултура, маркет, кафетерија, катче за деца, паркинг, магацински простор за корисниците на зелениот пазар, административни простории и сл. СДСМ повторно ветија и излажаа. За образованието и културата, СДСМ во Аеродром ветија изградба на ново средно училиште, гимназија „Кузман Јосифовски - Питу“, како и изградба на мултинаменски културен центар. За сите овие ветувања СДСМ излажа, а градоначалникот Марин важи за едно од најголемите градоначалнички промашувања во историјата на локалната самоуправа. На лагите и нереализираните ветувања на СДСМ им доаѓа крај. На 15 јули #ОбноватаДоаѓа и доаѓа крајот на најнеуспешната влада во историјата на Македонија, стои во објавената реакција на фејсбук страницата Комисии на ВМРО-ДПМНЕ.

Седници на три собраниски комисии

Ивана Ефремовски — Tue, 26 Mar 2019 06:54:39 +0000

Во Собранието денеска седници ќе одржат комисиите за политички систем и односи меѓу заедниците, за надворешна политика и Законодавно-правната комисија. На дневен ред на Комисијата за политички систем и односи меѓу заедниците се Иницијативата за надзорна расправа по Законот за изменување и дополнување на Законот за извршување, поднесена од пратеникот Панчо Минов, како и Предлог – законот за инспекциски надзор во второ читање. Членовите на Комисијата за надворешна политика ќе ги разгледаат Предлог-законот за ратификација на Спогодбата меѓу Владата на Република Македонија и Владата на Големото Војводство Луксембург за размена и заемна заштита на класифицирани информации, како и Предлог-законот за ратификација на Договорот меѓу Република Македонија и Црна Гора за уредување на меѓусебните имотно-правни односи. Овие два предлог закони, како и Предлог – законот за инспекциски надзор во второ читање се на дневен ред и на Законодавно-правната комисија.

Седници на пет собраниски комисии

Матеја Петровски — Mon, 27 Aug 2018 05:44:00 +0000

Во Собранието на Република Македонија денеска седници ќе одржат комисиите за здравство, за финансирање и буџет, за одбрана и безбедност, за прашања на изборите и именувањата и Законодавно-правната комисија. Предлог-законот за изменување и дополнување на Законот за здравственото осигурување во прво читање е единствена точка на дневен ред на Комисијата за здравство. Комисијата за одбрана и безбедност треба да расправа за предлог-одлуките за испраќање припадници на Армијата на Република Македонија за учество во мировната операција „Одлучна поддршка“ во Авганистан и за испраќање припадници на АРМ за учество во мировната операција на Организацијата на Обединетите Нации „УНИФИЛ“ во Република Либан. Комисијата за финансирање и буџет ќе ги разгледа предложените измени на Законот за данокот на додадена вредност, измените и дополнувањата на законите за супервизија на осигурувањето, за финансиската полиција, за игрите на среќа, во прво читање. Меѓу точките на дневниот ред се и измените на Законот за задолжување на Република Македонија кај Банката за развој при Советот на Европа по Рамковниот договор за заем за финансирање на Проектот за изградба и модернизација на Клиничкиот центар Мајка Тереза во Скопје и Регионалната клиничка болница во Штип, во прво читање. Собраниската Комисија за прашања на изборите и именувањата ќе одржи седница на која треба да биде предложен избор на директори на неколку институции и членови на комисии, меѓу кои и на Оперативно-техничката агенција - ОТА и главен државен ревизор. Законодавно-правната комисија ќе ги разгледа сите законски решенија кои се на дневен ред на овие собраниски комисии. (Миа)