компјутери – Kurir.mk

Најдени и одземени 24 компјутери, ова е причината

Ивана Ефремовски — Sat, 21 Oct 2023 19:36:02 +0000

На 20.10.2023 во периодот од 12:00 до 16:00 часот, полициски службеници од СВР Тетово извршиле контрола во деловно-трговски објект во Тетово, што го управувал В.А.(45) од с.Здуње, гостиварско. При контролата биле пронајдени и одземени 5 лаптоп компјутери и 19 други компјутери за кои В.А. не поседувал потребни документи. По целосно документирање на случајот ќе следи соодветен поднесок.

Приведено лицето кое го ограби здружението „Донирај компјутер“

Ивана Ефремовски — Sat, 02 Sep 2023 09:19:25 +0000

Две лица се приведени во врска со кражбата на компјутерската опрема од просториите на Здружението на граѓани „Донирај компјутер“. Министерството за внатрешни работи денеска соопшти дека приведен е С.М. како и А.А. кај кого бил пронајден еден лаптоп за кој постои сомнение дека го купил од С.М. - Станува збор за С.М., на возраст од 37 години од Кавадарци и А.А., исто така на 37-годишна возраст, од Неготино. При претрес во домот на С.М., извршен со судска наредба, биле пронајдени и одземени шест лап-топ компјутери, делови за компјутер и друга компјутерска опрема, за што постои сомнение дека потекнуваат од кривично дело „тешка кражба“ сторено на 28 август во Здружение на граѓани на улицата „Браќа Хаџи Тефови“ во Кавадарци, се појаснува во соопштението од Министерството за внатрешни работи. Кај А.А. бил пронајден еден лап-топ компјутер за кој, исто така, постои сомнение дека потекнува од истото кривично дело и дека го купил од С.М.. Од МВР информираат дека се што е пронајдено ќе биде вратено кај сопственикот, а по целосно документирање на случајот, против двете лица ќе биде поднесена соодветна пријава. И основачот на „Донирај компјутер“, Борче Стаменов на „Фејсбук“ објави дека крадецот е фатен и дека компјутерите ќе си ги земат в понеделник.

Срамота: Ограбена канцеларијата на „Донирај Компјутер“

Дарко Андоновски — Mon, 28 Aug 2023 18:15:26 +0000

Ограбена канцеларијата на „Донирај Компјутер“ во Кавадарци, информираше Борче Стаменов, човекот одговорен за голем број деца да имаат услови за следење на онлајн наставата во време на пандемијата. -Се деси и тоа. Сабајле у 3.59 некој ги обил канцелариите на #ДонирајКомпјутер у Кавадарци. Украл 4-5 Леново лап топа, 6-7 Apple Mac book pro и повеќе нови (20-25) ССД дискови од 120гб. Имаме снимки кои треба да ги прегледаме утре во полиција и опис на лоповот. Ако некој ви понуди нешто за продавање од споменатите работи или видите оглас, ве молам да ми пишете. Кавадарчани ве молам да споделите и да помогнете да се најде сторителот. Срамота е да се краде од иницијатива како нашава, срамота, вели Стаменов на Фејсбук.

Руската православна црква осмисли молитва за луѓе опседнати со компјутери

Тале Кристо — Tue, 18 Jan 2022 09:06:44 +0000

Руската православна црква (РПЦ) осмисли 39 нови молитви, вклучително и онаа за луѓе кои се „опседнати со страста кон компјутери“. Иницијативата беше поднесена кон крајот на минатата година до Синодско-литургиската комисија – врховниот управен орган на РПЦ. Меѓу повеќето предлози се молитви за успешни операции, полагање испит, почнување со студии, па дури и за барање работа. Доколку комисијата ги одобри предлозите, молитвите ќе станат дел од литургиските практики, а оние кои одат во црква ќе можат да ги побараат тие молитви. Покрај тоа, меѓу новите молитви е и молитвата за луѓе кои се „опседнати со страста кон компјутерите“. Таа важи и за гејмерите. Ова доаѓа во време кога зависноста од видеоигри е официјално призната како опасно здравствено нарушување во Русија. И Светската здравствена организација ја прогласи оваа зависност за нарушување на менталното здравје во 2018 година. Сепак, според СЗО, зависноста може да се дијагностицира само од квалификуван медицински персонал, а симптомите мора да бидат присутни најмалку една година и мора да имаат негативно влијание врз семејството, училиштето, работата, социјалните вештини и другите сегменти од животот.

Фокус: Владата се поднови со 80 компјутери, тендерот го „лапна“ нова фирма, основана лани

Тале Кристо — Fri, 15 Oct 2021 08:28:09 +0000

Пред две недели Владата склучи договор за набавка на 40 лаптопи и 40 компјутери, како и компјутерска опрема и сервери, за кои ќе потроши 116.000 евра. Договорот е потпишан од генералниот секретар Мухамед Зеќири, а добитник на тендерот е Друштво за компјутерски софтвер, консалтинг, посредување, производство, трговија и услуги ИТ СОЛУТИОН М од Долна Бањица, Гостивар. Од Владата за „Фокус“ посочуваат дека компјутерите се потребни за вработени во Генералниот секретаријат и во канцеларијата на премиерот. -Согласно Планот за јавни набавки од 2021 година, а врз основа на барање од надлежниот сектор и одлука за набавка, спроведена е постапка за набавка за информатичка опрема. Компјутерите се потребни за вработените во Генералниот секретаријат и Канцеларијата на Претседателот на Влада на Република Македонија, ни одговорија од Владата. Според објавените податоци на сајтот на Бирото за јавни набавки може да се види дека на тендерот учествувале четири компании, а од Владата потенцираат дека ја избрале понудата со најниска цена. -За набавката на персонални и преносни компјутери четири понудувачи имаат поднесено понуди. Во фаза на евалуација двајца понудувачи се поканети на електронска аукција, останатите двајца се отфрлени. По завршување на електронската аукција даден е предлог за избор на најповолната понуда, односно најниска цена, велат од Владата. Падатоците од Централниот регистар покажуваат дека фирмата која го „лапна“ тендерскиот колач била регистрирана минатата година, поточно во мај 2020 година.

Во село Пласница осумнаесет ученици немаат компјутери за да ја следат онлајн наставата

Магдалена Андонова — Mon, 22 Feb 2021 13:07:36 +0000

Осумнаесет ученици во ОУ „Мустафа Кемал-Ататаурк“ од село Пласница се уште немаат компјутери за да следат онлајн-настава. Но бројот е помал во споредба со почетокот на учебната година кога без ИТ-уреди беа 58 ученици. Македонско-турската комора во земјава обезбеди 40 нови компјутери за исто толку ученици од ова училиште, кои ќе им бидат на располагање се додека наставата од петто до деветто одделение.се одвива на далечина. Директорот на училиштето, Риза Реџепоски, изјави дека на преостанатите 18 ученици, предметните наставници им обезбедуваат литература од која тие може да учат и да бидат во чекор со наставата. -Бидејќи немавме можност на сите ученици да им обезбедиме компјутер, за овие 18 ученици наставниците подготвија материјал од она што останатите ученици го следат онлајн, ќе им помогне и следењето на наставата што се емитува на јавниот телевизиски сервис. Учениците периодично ќе доаѓаат на училиште за да го подигнат материјалот подготвен од нивните наставници, за на крајот да полагаат и да се провери дали го совладале, рече Реџепоски. Во училиштето „Мустафа Кемал-Ататаурк“ во село Пласница онлајн-настава следат 204 ученици, додека 145 до четврто одделение наставата ја следат со физичко присуство. Директорот Реџепоски е задоволен што во нивното училиште засега нема ниту ученици, ниту наставници, инфицирани со КОВИД-19. (МИА)

Илиески: Над 60.000 деца немаат услови за следење на онлајн настава

Ивана Ефремовски — Thu, 22 Oct 2020 17:43:17 +0000

Она што е многу важно, ние не ја спроведуваме Конвенцијата, меѓународниот светски закон кој што Македонија го има ратификувано не се почитува, правата на децата, обврските на децата, рамноправноста на децата во образованието, вели пензионираниот државен просветен инспекторат Ѓорѓи Илиески во вечерашното гостување во емисијата Што не е јасно на телевизија Алфа. Илиески вели дека иако министерката Мила Царовска се фали дека 88 проценти онлајн наставата е успешна, тоа не е така, бидејќи не 40.000 деца, туку над 60.000 деца немаат услови за онлајн настава. -Пазете ние имаме 88 проценти успешна онлајн настава. Но, тоа не е точно, ние имаме званично 40.000 деца кои што немаат ниту компјутери, ниту интернет за следење на наставата. Но, таа бројка е поголема, односно неофицијално бројката е над 60.000 деца кои што немаат услови, и тоа не сакаат да го кажат го кријат, додаде тој. Според Илиески државата мора да обезбеди ист третман за сите деца. Нагласи дека не може ќерката на министерот Димитров да добива 40.000 долари стипендија а другите деца да се дискриминирани. -Државата е должна на секое дете да му даде ист третман, се за доброто на децата, а не само за доброто на дете на министерот Никола Димитров, неговата ќерка да има 40.000 долари годишно стипендија. Значи која е таа дискриминација, децата не смеат да бидат дискриминирани, но тоа за жал се случува во нашата држава, истакна Илиески.

Прилепскиот градоначалник објавил тендер за компјутери, а незнае на колку ученици им треба

Тале Кристо — Fri, 09 Oct 2020 08:35:08 +0000

И по една недела од почетокот на новата учебна година, прилепскиот градоначалник Илија Јованоски, абер нема колку ученици од општинските основни и средни училишта, се уште немаат компјутери за следење на он-лајн настава, информираше Алфа телевизија. „Таква бројка се уште немаме. Знаеме дека во сите училишта имаме некоја бројка што се социјални случаеви кои што немаат компјутер, лап-топ…Ние направивме јавна набавка за сите училишта, за потребите…Јавната набавка е во тек и се надеваме дека со отворањето на тендерот, на 30-ти октомври дека ќе ги имаме дотогаш, а знаете дека е проблем со набавка на компјутери во целата држава“, – се оправда градоначалникот Илија Јованоски. Запрашан од наша страна – како е можно јавната набавка да е веќе распишана, а без притоа да се знае бројот на потребните компјутери, тој кажа дека позната била само вредноста на тендерот, што пак, во најмала рака е чудно?! „Значи, бројката не е точно одредена, одредена е сумата – осум милиони и двесте илјади денари се…во зависност од цената на комјутерите…толку ќе бидат и тие. Затоа точната бројка не можам да ви ја кажам…“, се одбрани Јованоски. Инаку, во општина Прилеп има над 10.000 ученици, од кои дури 9.000 основци и средношколци треба да следат он-лајн настава, бидејќи ниту едно од училиштата не доби дозвола од Министерството за следење на наставата со физичко присуство на учениците.

Компјутери немаат децата, а ниту наставниците – Ќе се обезбедат ли конечно услови за работа?

Ивона Петрова — Sat, 03 Oct 2020 10:37:11 +0000

Иако министерката за образование и наука, Мила Царовска најави дека министерството и Владата ќе обезбедат ефикасен образовен процес, сепак тоа не се покажа така во првите денови од почетокот на учебната година. Според проценките на министерството над 40.000 децата немаат пристап до електронски уред за следење на настава, а Владата нема толку пари за да обезбеди толку уреди за секое дете. Но, покрај учениците, доволно компјутери немаат ниту наставниците. -Наставничка сум на ученици од четврто одделение кои наставата ја следат во домашни услови преку компјутер. За да им го предадам материјалот морам и јас да имам компјутер кој ќе ја поддржува платформата. Но, јас немам соодветен компјутер за да можам да се приклучам на платформата и да го предадам наставниот материјал. Од училиштето во кое предавам не даваат никаков одговор за тоа како ќе ја реализирам наставата, изјави наставничка од основно училиште. Имено според Законот за работни односи работодавецот е должен да обезбеди средства за работа. Во врска со овој проблем вчера реагираше и независниот синдикат за образование и наука (НСОН) каде соопшти дека до нив секојдневно пристигнуваат поплаки од страна на наставниците дека им се вршат притисоци од страна на нивните директори да си обезбедат компјутери за да ја реализираат наставата. -До нашиот синдикат деновиве стигнуваат бројни поплаки од наставници за притисоци што им се вршат од страна на нивните надредени, директори на училиштата, да си обезбедат компјутери за да реализираат настава. Ако се земе предвид дека наставникот е во исто време и родител на едно, две или повеќе деца, разбирливо е колкава е тежината на пресијата врз тие работници во образованието. Дел од колегите се соочуваат и со двојно зголемен работен учинок, односно двојно им се зголемени бројот на наставни часови, што е спротивно на законот за наставници и тие работат по повеќе од осум часа во денот, наведува НСОН во соопштението.

Бесрамна најава на премиерот: Дечињата денес почнаа со настава, Заев во април ќе набавувал комјутери!

Ивана Ефремовски — Thu, 01 Oct 2020 09:56:16 +0000

Постапката за набавка на 40.000 компјутери за оние деца кои ги немаат ИТ-уреди за следење на онлајн настава би траела да трае до април месец, најави денеска премерот Зоран Заев на првиот ден од новата учебна година. Оваа најава како проект ќе беше одлична ако се случеше пред најмалку еден месец. Учебната година започна денес. Голем број на родители не можат да си дозволат да купат комјутер за своето дете, па се снаоѓаа, се задолжуваа, позајмуваа, само за да не го двојат своето дете од останатите. Преживеаја голгота во неизвесноста кога и како би почнала учебната година. И денес, откако оние кои ќе следат онлајн настава веќе мораа да имаат набавено компјутер, Заев бесрамно најавува дека компјутери ќе се набавуваат во април! -Постапка за набавка за 40.000 компјутери би траела до април месец. Ќе направиме да може секое дете да се чувствува еднакво со другите, изјави Заев.