Две светиниколски конфекции остануваат затворени до понеделник

Ивона Петрова — Fri, 17 Jul 2020 10:36:26 +0000

Светиниколските фабрики „Мода“ и „Кемтекс“ ќе бидат затворени до понеделник, информираше за МИА директорот, Ангел Димитров. Од досегашниот скрининг во двете конфекции се покажа дека 45 работници се заразени со коронавирусот, од кои 15 се претходно откриени пред масовното тестирање, кое е направено со одлука на раководството на двете конфекции. -Добро е што од нашите две фабрики 80 отсто од позитивните случаи се асимптоматски, доколку не го направивме скринигот заразата ќе се ширела во погоните. Одлуката што ја донесовме за скрингот е добра и во моментов чекаме резултати за 90 работници, вели Димитров. Тој истакна дека со оваа состојба, испораката на производите за партнерите ќе биде пролонгирана за две недели. Производите требало да се испорачат до 31 јули, но сега ќе се пролонгира за две недели и се надева дека партнерите нема да им испорачат казнени пенали. Во штипскиот регион исто така се шири заразата меѓу работниците, појавена е во вкупно осум, од кои три се нови. Дел од нив се затворени. Епидемиолозите велат дека работниците веќе не ни знаат како се заразиле, дали по работното време, при дружење со пријатели или семејството или пак во контакт со некоја од работничките. Директорот на Клиничка болница-Штип, Ален Ѓеорѓијев вели дека позитивна вест е што по извршениот скрининг на новинарите во Штип, на којшто се јавија само шестмина, ниту еден од нив не ја прележал инфекцијата. Новинарите од овој град добро, како што вели, се заштитувале и ги почитувале здравствените протоколи при нивното известување од терен.

„Гласен текстилец“ бара времено затворање на конфекциите во Штип

Дарко Андоновски — Mon, 01 Jun 2020 13:01:20 +0000

Невладината организација „Гласен текстилец“ денеска упати барање до Општинскиот кризен штаб, кој во моментов има седница во проширен состав заедно со државниот секретар во Министерството за здравство, Владимир Милошев, да се затворат конфекциите во Штип времено. Барањето следи по објавување на новата бројка заразени текстилни работнички од неколку конфекции, но и членови на нивни семејства и пријатели. Штип денеска има двоцифрен број на заразени, односно во здравствениот билтен се нотираат вкупно 27 лица. -Време е за затворање на конфекциите, тоа да се регулира со годишен одмор, бидејќи сите знаеме дека 80 проценти од вработените во штипските конфекции никогаш го немаат искористено годишниот одмор од 20 дена, туку им беше даван одмор од пет дена. Сега е време да ги пуштат работниците на одмор во интерес на колективното здравје, вели Кристина Антева од НВО „Гласен текстилец“ Таа истакна дека барањето е доставено до Кризниот штаб бидејќи постојано се во контакт со работниците коишто се уште се на своите работни места во конфекциите каде што денеска има регистрирано новозаразени со коронавирус. Антева пренесува дека се исплашени за своето здравје. -Плачат на телефон, до таму одат, ниту се ослободуваат од работа, ниту планира некој нешто да направи. Очекувам конфекциите да бидат затворени бидејќи не почитуваа ниту една од мерките, ниту една од уредбите, ниту една од препораките. Секоја чест на ретките исклучоци коишто се оградија од останатите, а за оние кои не ги почитуваа барам и кривична одговорност бидејќи не се грижеа ниту за здравјето на работниците, ниту пат беа свесни за колективното здравје на еден град како што е Штип. Ми е жал за останатите сопственици коишто организираа сопствен превоз што ќе бидат и они на удар поради несовесните превозници и несовесните сопственици на конфекции, вели Антева. Прашања дали на почетокот на пандемијата се почитуваа мерките од страна на конфекциите и превозниците, Антева вели дека – да на почетокот се почитувале мерките, но подоцна не се почитувале токму заради тоа и Штип сега се соочува со голем број на заразени во текстилните фабрики. -За жал, лажните вести за коронавирусот и некои што мислат дека се богови го направија ова и денешниве бројки. Сега ќе ги гледаме штетите и последиците, рече Антева. Потенцира дека оние коишто не веруваат во коронавирусот слободно можат да остварат и контакт со работниците кои во моментов се на Инфективното одделение и самите од нив да слушнат во каква состојба се.

конфекции – Kurir.mk

Две светиниколски конфекции остануваат затворени до понеделник

„Гласен текстилец“ бара времено затворање на конфекциите во Штип