конфекција – Kurir.mk

Штипското јавно обвинителство покрена обвинение против управител на текстилна конфекција за намерен лажен стечај

Магдалена Андонова — Thu, 03 Mar 2022 15:27:24 +0000

Штипското јавно обвинителство покренува обвинение против управител на една штипска текстилна конфекција за намерно лажно предизвикување на стечај. Претседателката на „Гласен Текстилец“-Штип, Кристина Ампева на денешната прес-конференција истакна дека известувањето на Основното јавно обвинителство(ОЈО)-Штип го добиле денеска. Ова известување доаѓа по вчерашната кривична пресуда во корист на работничка од Делчево, за којшто МИА веќе информираше. Ампева забележува дека ова значи дека пресудата нема да биде изолиран случај. - Драго ми е за денешното известување од Основното јавно обвинителство-Штип, каде што поднесовме обвинение против управител на една конфекција во Штип, ќе го почекаме исходот од постапката. Меѓутоа овде се разботи за намерно предизвикување на стечај, со самото тоа што ОЈО –Штип за првпат ни одговара позитивно во однос на еден член од Кривичниот законик нас ни влева доверба, а треба да им влева и доверба на работниците, вели Ампева. Кривичните постапки треба за крајна цел да имаат намалување на злопотребите од страна на работодавачите на сметка на работниците. -Време е веќе ова да започне да се практикува по Кривичен законик, а не како прекршување на Закон за работни односи. Нека има затворски казни, парични казни, нека се полни буџетот, од работодавачи кои сметаат дека треба да ги злоупотребуваат работниците, вели Ампева. За кривично дело предизвикување на намерен лажен стечај е предвидена затворска казна од една до пет години.

ЗА ВАКОВ ГЕСТ НЕ СТЕ СЛУШНАЛЕ ДОСЕГА: Ване Богдов од Штип ќе им ја предаде својата конфекција на вработените

Магдалена Андонова — Thu, 18 Nov 2021 21:45:47 +0000

Од 1 јануари, конфекцијата во штип, „Вабо“, ќе биде предадена на вработените. Газдата на конфекцијата, Ване Богдов, кој ја започнал оваа приказна уште пред цели 25 години, ја предава фирмата на своите вработени. Со текстилната конфекција ќе раководи Тања Николова, технолог со долгогодишен работен стаж и Дарко Роглев, референт по извоз. -Вчера имавме собир на работниците на кои ја објавив мојата одлука, а на кој собир ги претставив Николова и Роглев. Всушност на работниците им ја дадов на користење фабриката со целата опрема во неа при што во првата година нема да плаќаат никаков надомест за тоа, а од втората година, само под услов фабриката да работи со добивка, во што не се сомневам, ќе плаќаат минимална кирија за 1.250 метри квадратни производен простор колку што има конфекцијата, изјавил Ване Богдов за „истокпрес.мк“ За да не дојде до заблуда, Богдов фабриката не им ја дава во сопственост на работниците, туку им ја предава на користење. -Јас им ветив дека со своите врски со деловниот свет во државите од Западна Европа со кои соработувам цели 25 години, без никаков надомест за себе, ќе им обезбедувам работа на еден подолг временски рок. Јас сум им гарант дека тие редовно ќе земаат плата зашто работа има за многу идни години. Важен е и фактот дека тие нема да имаат режиски работници, кажа Ване Богдов.

Штип го бележи вториот случај на повторување на коронавирусот кај маж вработен во конфекција

Дарко Андоновски — Thu, 17 Sep 2020 12:13:28 +0000

Во Штип е регистриран втор случај на повторување на коронавирсуот кај маж вработен во една конфекција во градот. Марија Димитрова директор на Центарот за јавно здравје-Штип вели дека работникот првиот пат би позитивен пред неколку месеци, а бил откриен при масовното тестирање во текстилните конфекции. Првиот пат тој бил асимптоматски, додека деновиве појавил поблаги симптоми на вирусот, по што бил тестиран и били позитивен на коронавирусот. Претходно во првиот случај 46-годишен маж беше позитивен, а по неколку месеци се заразил по контакт од текстилниот калстер и заврши во болница. За разлика од пред неколку месеци Штип има пад на активните случаи и поголем број оздарвени. Деновиве се појавиле позитивни случаи во две фирми во Штип, од кои една е текстилна. Димитрова вели дека останатите случаи кои се појавиле изминатите денови се контакти, а имале и цели семејства кои се заразиле по годишниот одмор.

Затворена уште една текстилна компанија во Штип, вкупно седум конфекции

Дарко Андоновски — Wed, 03 Jun 2020 13:05:37 +0000

Затворена е уште една текстилна конфекција во Штип каде дополнително е потврден позитивен тест на еден работник, објави денеска градоначалникот на Штип, Благој Бочварски по седницата на Општинскиот кризен штаб, на која присуствуваше и вицепремиерот и координатор на национално ниво, Бујар Османи. Со тоа, во Штип се затворени вкупно седум конфекции, а конфекцијата која сега е затворена има 250 вработени и на сите ќе им бидат земени брисеви. – Вработените во шестте конфекции задолжително треба да останат дома во самоизолација да ги почитуваат мерките и да го заштитат своето и здравјето на граѓаните. Градскиот пазар на 5 јуни делумно ќе биде отворен за работа, само со прехранбени производи, рече Бочварски. Вицепремиерот Османи соопшти дека е е потребно да се постават т.н. КОВИД координатори во компаниите, но и во државните институции, кои ќе имаат директни овластувања да го следат спроведувањето на мерките и препораките. Со тоа, смета Османи, значително ќе се заштитат и вработените, и компаниите. – Очигледно дека имаме рецидив на болеста. Имаме враќање на пикот на епидемијата којшто денеска се потврдува и на ниво на државата, и во Штип. Веќе е време да се создаде нова позиција во сите институции кои имаат повеќе вработени без разлика дали се работи за приватни или државни институции. Тоа се ковид координатори. Бидејќи очигледно е дека оваа болест ќе трае и за да ги заштитиме вработените, но и компаниите од затворање, најисплатливо за сите е доколку секоја компанија и државна институција назначи КОВИД координатор чија единствена работа ќе биде да внимана на почитување на протоколите, истакна Османи. Во Штип во изолација се ставени над 300 граѓани, а на Инфективното одделение се лекуваат вкупно 16 пациенти со средна клиничка слика.