Конференциска лига – Kurir.mk

Бреидаблик пред полни трибини ќе ја пречека Струга на реваншот во Исланд

Тале Кристо — Wed, 30 Aug 2023 13:46:46 +0000

Македонскиот претставник во Конференциската лига Струга Трим Лум ќе го очекува полн стадион на утрешниот реванш против исландски Бреидаблик во клучниот натпревар за пласман во групната фаза. Исландскиот шампион објави дека распродадени се сите билети за натпреварот против македонскиот првак кој е закажан за в четврток од 18:45 часот во Копавогур на стадионот „Копавогсволур“ со капацитет од 3.009 седишта. Струга денеска допатува во Исланд каде реваншот ќе го почне со резултатска негатива по поразот минатиот четврток во Охрид од 0-1, а на реваншот ќе биде ослабен без суспендираните Радески и Згуро. Поуспешниот од овој дуел ќе обезбеди пласман во групната фаза во Конференциската лига за која жрепката е закажана за в петок.

Јувентус исфрлен од Конференциската лига

Ивана Ефремовски — Sat, 29 Jul 2023 08:36:06 +0000

Италијанскиот фудбалски гигант Јувентус е исфрлен од овосезонската Лига на Конференции поради кршење на правилата за финансискиот фер-плеј, објави синоќа УЕФА. Раководното тело на европскиот фудбал, исто така, го казни и Челзи поради кршење на правилата на финансискиот фер – плеј како резултат на „поднесувањето нецелосни финансиски податоци“. УЕФА наведе дека станува збор за трансакции кои датираат меѓу 2012 и 2019 година. Јувентус е казнет со 17.4 милиони фунти, додека Челзи е казнет со 8.57 милиони фунти. Италијанскиот клуб ќе мора да плати само половина од својата казна доколку неговите финансиски податоци за следните три години се во согласност со прописите, додека Челзи веќе се согласи да го плати износот на казната. Италијанската фудбалска федерација сега треба да ја извести УЕФА која екипа ќе го заземе место на Јувентус во Конференциската лига, а според најавите тоа ќе биде Фиорентина. (МИА)

Седлоски: Шкупи има квалитет да се пласира во групната фаза во Лигата на Конференции

Тале Кристо — Wed, 17 Aug 2022 11:02:29 +0000

Тренерот на Шкупи, Гоце Седлоски е оптимист пред пресметките со Балкани од Косово во плејофот од Конференциската лига на УЕФА. Со евентуален успех, македонскиот шампион ќе стане втората екипа од нажата држава која изборила учество во групна фаза во еврокуповите. Првиот тим е Вардар кој во ерата на Сергеј Самсоненко играше во групите во Лига Европа. Седлоски смета дека неговите играчи со настапите на евро-сцената сезонава покажале дека со право можат да се надеваат на победа над Балкани. – Ќе дадеме максимални напори да се радуваме на крајот на пресметките со Балкани. Противникот ни е познат од пријателскиот натпревар во подготвителниот период. Тие покажаа дека се квалитетен тим. Кај нас е позитивно тоа што сме комплетни без повредени играчи. Очекувам добро наше издание и со трпелива игра да дојдеме до посакувана цел, изјави Седлоски. Слично како тренерот Седлоски, размислува и Бесир Демири кој вети максимално залагање на сите играч кои ќе добијат шанса да настапат. Натпреварот Шкупи – Балкани ќе се игра утревечер од 21 часот на Национална арена „Тодор Проески“ во Скопје.

Конференциска лига: Шкендија го победи Арарат, висок пораз на Академија Пандев во Полска

Тале Кристо — Thu, 07 Jul 2022 21:04:19 +0000

Половичен успех на македонските екипи вечерва во Конференциската лига на УЕФА. Шкендија на „Тодор Проески“ во Скопје забележа победа над Арарат од Ерменија со 2:0, резултат постигнат уште во првото полувреме. Стрелци на головите за тетовци беа Аденис Шала во 21. и Валмир Нафиу во 45. минута. За разлика од Шкендија, Академија Пандев доживеа висок пораз од 4:1 на гостувањето во Гдањск кај Лехија. На овој меч од 8. минута имаше 30.минутен прекин поради тепачка меѓу себе на домашните навивачи.

Шкендија и Академија Пандев ги добија ривалите за првото коло во Конференциската лига на УЕФА

Тале Кристо — Tue, 14 Jun 2022 12:21:28 +0000

Двата македонски претставника во првото квалификациско коло од Конференциската лига, денеска ги добија своите противници. На извлекувањето во Нион, Академија Пандев за ривал го доби Лехија Гданск од Полска, додека Шкендија ќе се соочи со Арарат од Ерменија. Шкендија треба првиот меч да го игра на домашен терен, струмичани ќе гостуваат. Првите натпревари се закажани за 7 јули, реваншите седум дена подоцна. Победникот на Купот на Македонија, екипата на Македонија ЃП директно се пласира во второто коло.

Мурињо: Нема да биде лесно на реваншот со Лестер дури и со 70.000 наши навивачи

Тале Кристо — Fri, 29 Apr 2022 08:19:57 +0000

Тренерот на Рома, Жозе Мурињо ги сумираше впечатоците по мечот со Лестер во полуфиналето на Конференциската лига (1:1). – Ја губевме топката премногу лесно, стана невозможно да се оди во контранапад, не го правевме тоа баш најдобро. Сепак, можевме да притиснеме и да играме како што сакаме, но со текот на времето изгубивме интензитет. Сигурен сум дека сите навивачи на Рома кои го следеа натпреварот би биле среќни кога би знаеле дека исходот од пресметката ќе биде решен на Олимпико. Знам дека на реваншот и со 70.000 навивачи на стадион и уште повеќе надвор нема да биде лесно. Во недела имаме натпревар против Болоња, екипа која игра многу добро и победува. За разлика од Лестер, треба да се фокусираме на Серија А и да се обидеме да завршиме петти. Треба да заборавиме на полуфиналето три дена и целосно да се фокусираме на Болоња, изјави тренерот на Рома. Во другото полуфинале, синоќа Фејнорд го совлада Марсеј со 3:2. Реваншите се закажани за 5 мај, домаќини ќе бидат Рома и Марсеј. Финалето ќе се игра на 25 мај.

Познати полуфиналистите во Лига Европа и Конференциската лига

Тале Кристо — Fri, 15 Apr 2022 07:39:54 +0000

Германскиот прволигаш Ајнтрахт Франкфурт приреди синоќа сензација на „Камп Ноу“ и со триумф од 3-2 ја елиминираше Барселона во четвртфиналето на Лига Европа. Пласман во полуфиналето во второто по ранг европско клупско натпреварување обезбедија и Лајпциг, Вест Хем и Глазгов Ренџерс. За својата втора европска титула во историјата, по триумфот во поранешниот Куп на УЕФА во 1980 година, фудбалерите на Ајнтрахт во полуфиналето ќе треба да го елиминираат Вест Хем, додека вториот германски претставник, Лајпциг, ќе игра против Глазгов Ренџерс. Првите полуфинални натпревари се на 28 април, а реваншите во Глазгов и Франкфурт една недела подoцна. Во полуфиналето, пак, во Конференциската лига ќе играат Лестер – Рома и Олимпик Марсеј – Феенорд (28 април и 5 мај). Лига Европа – реванш четвртфинале: Аталанта – Лајпциг 0-2 (1-1 по првиот натпревар) Барселона – Ајнтрахт Франкфурт 2-3 (1-1) Лион – Вест Хем 0-3 (1-1) Глазгов Ренџерс – Брага 3-1 (0-1). Конференциска лига – реванш четвртфинале: ПСВ – Лестер 1-2 (0-0) Рома – Бодо/Глимт 4-0 (1-2) ПАОК – Марсеј 0-1 (1-2) Славија Прага – Феенорд 1-3 (3-3).

Мурињо има намера со Рома да ја освои Конференциската лига

Тале Кристо — Wed, 15 Sep 2021 13:45:52 +0000

Тренерот на Рома, Жозе Мурињо изјави дека има намера да ја освои Конференциската лига со римскиот тим. – Освоив трофеј во еврокуп којшто повеќе не постои. Тоа беше во 1997 година со Барселона, тогаш го освоивме Купот на победниците на куповите, јас работев како асистент во тимот. Сега сакам да ја освојам Конференциската лига, но нашата цел не е само да го освоиме овој трофеј, ние сакаме да ги освоиме сите три турнири на кои учествуваме – првенството, Купот и конференциската лига. Секако, Серија А е приоритет за нас, но сакам да го изградам вистинскиот менталитет во тимот, истакна Мурињо. Утре, 16 септември, Рома на домашен терен ќе го одигра првиот натпревар од групната фаза во Конференциската лига против ЦСКА Софија.

Конференциска лига – квалификации: Шкупи во второто коло, Силекс елиминиран

Тале Кристо — Thu, 15 Jul 2021 20:17:26 +0000

Екипата на Шкупи е единствениот македонски претставник кој имаше успешен настап во првото квалификациско коло во евро-куповите. „Чаирчани“ вечерва на гостувањето кај Лапи во Приштина одиграа 1:1 и по победата со 2:0 на првиот дуел одигран во Скопје, со вкупни 3:1 одат во следната рунда на Конференциската лига на УЕФА. За разлика од Шкупи, Силекс не успеа. Кратовци загубија од молдавски Петрокуб со 1:0 со гол примен во последната минута од судиското надополнување и со вкупен резулат 2:1 се елиминирани. Претходно во текот на денот, „излетот“ во евро-куповите заврши и за Струга Трим Лум по поразот во Скопје со 1:4 од летонска Лиепаја (1:1 прв натпревар). Неуспешен настап во првото квалификациско коло од Лигата на шампионите во вторникот имаше и Шкендија (0:1 и 0:5), но тетовци ќе имаат шанса за поправен во втрата рунда од квалификациите во Конференциската лига. зс/