консултации – Kurir.mk

Историски консултации помеѓу Израел и Германија во областа на националната безбедност

Тале Кристо — Fri, 02 Sep 2022 19:28:11 +0000

Претставници на националните безбедносни служби на Израел и на Германија денеска првпат се сретнаа во Ерусалим на одржат „историски“ консултации, соопшти кабинетот на израелскиот премиер Јаир Лапид. На состанокот присуствуваа претставници на германското и израелското Министерство за надворешни работи, советници за национална безбедност, како и генералниот директор на израелското Министерство за одбрана Амир Ешел, директорот на Мосад, директорот на безбедносната служба Шин Бет и нивните германски колеги. – Учесниците разговараа за широк спектар на прашања поврзани со националната безбедност. Претставниците на Израел зборуваа за опасноста што, од гледна точка на Израел, претставува враќање на нуклеарниот договор со Иран. Двете земји се согласија да продолжат да го одржуваат овој дијалог на редовна основа, се наведува во соопштението од кабинетот на Лапид. За новата линија на комуникација се разговараше за време на посетата во март на германскиот канцелар Олаф Шолц на Израел. Целта е „да се воспостави работна рамка за стратешки дијалог меѓу Германија и Израел, што ќе ја подигне соработката меѓу двете земји на повисоко ниво“.

Румен Радев почнува консултации со партиите од бугарскиот Парламент

Ивона Петрова — Fri, 15 Jul 2022 05:22:44 +0000

Претседателот на Бугарија Румен Радев денеска ќе има консултации со претставници на пратеничките групи во 47. Народно Собрание, пред да го врачи третиот мандат за формирање нова влада во рамките на актуелниот парламент, јави дописникот на МИА од Софија Радев пред два дена, по враќањето од посетата на Црна Гора, рече дека ќе има консултации со сите парламентарни партии за да ги слушне начините за излез од политичката криза и какви модели и политики ќе бараат поединечните партии за коалиција пред да одлучат на кого од „Демократска Бугарија“, Бугарската социјалистичка партија или „Има таков народ“, да го предаде третиот мандат за формирање нова бугарска влада. Доколку и овој обид не успее, тогаш претседателот на Бугарија е должен да го распушти Народното собрание, да закаже предвремени парламентарни избори и да назначи преодна влада која ќе ги организира во рок од два месеци. Како најверојатен датум за нивното одржување, Радев го гледа почетокот на октомври, а правниците очекуваат тие да се одржат на 2 или 9 октомври.

Вака се потценува интелигенцијата на македонскиот народ: СДСМ симулира консултации со сопствените гласноговорници!

Ивана Ефремовски — Fri, 01 Jul 2022 17:56:52 +0000

„Овој предлог ќе биде ставен на широк консултативен процес. Консултации во следните денови ќе се прават во Владата, со политичките партии, со претседателот на државата, Парламентот, како и со граѓанскиот сектор, експертската и севкупна јавност во земјата. По овие консултации ќе се донесе одлука во однос на предлогот“. Ова вчера го истакна премиерод Димитар Ковачевски откако потврди дека е добиен нов француски предлог. Откако јавноста го доби предлогот на увид и веднаш сфати дека не станува збор за НОВ туку за предлог со неколку изменети модификации и термини, оправдано се јави револт кај граѓаните. Па така, Владата на чело со СДСМ одлучи да прикаже слика дека консултациите навистина почнале и денес организираа средба. Доволно е да погледнете кои “експерти“ се седнати на маса да се консултираат, за да сфатите дека со ваквиот чин владата ја потценува интелигенцијата на македонскиот народ. СДСМ симулира консултации, а спроти своите претставници ставиле свои сопартијци, гласноговорници, перјаници, кои секој ден јавно и гласно ги правдаат сите чекори на оваа партија, колку и да се штетни тие за државата.

Американскиот амбасадор во Москва повикан да се врати во САД на консултации

Тале Кристо — Tue, 20 Apr 2021 07:30:45 +0000

Американскиот амбасадор во Русија, Џон Саливан, до крајот на неделава ќе се врати во Вашингтон на консултации со администрацијата на претседателот Џо Бајден. -Амбасадорот Саливан неделава ќе се врати во САД за да го посети своето семејство и да се состане со членовите на новата администрација, со кои немал можност да се консултира откако се согласи да продолжи со работата на неопределено време, изјави за порталот Акиос портпарол на Стејт департментот, јавува Тасс. Руската агенција наведува дека Стејт департментот се уште не ги потврдил наводите за планираното патување на Саливан во Вашингтон. Претходно, порталот Акиос јави дека Саливан не планира да ја напушти Русија, и покрај советот од официјална Москва да се врати во Вашингтон на консултации. Шефот на руската дипломатија, Сергеј Лавров, на 16 април на прес-конференција изјави дека помошникот на рускиот претседател, Јуриј Ушаков, го информирал Саливан за одлуките на Русија како одговор на американските мерки против земјата и го советувал Саливан да се врати во Вашингтон на консултации. Лавров, исто така, изјави дека рускиот амбасадор во САД, Анатолиј Антонов, продолжува со своите консултации во Москва, каде се наоѓа од 21 март. Минатата недела американската Влада на црна листа стави руски компании, протера руски дипломати и им забрани на американските банки да купуваат државни обврзници од руската Централна банка и Министерството за финансии, а Русија протера десет американски дипломати и на црната листа стави осум највисоко рангирани официјални претставници на Вашингтон како одговор на санкциите наметнати од Русија.

Косово: Османи на консултации со партиите околу предвремени избори

Тале Кристо — Tue, 22 Dec 2020 09:31:27 +0000

Претседателката на Собранието на Косово, Вјоса Османи денеска ќе одржи консултации со политичките партии во врска со предвремени избори. Консултациите ќе започнат во 13 часот. Османи најави дека ќе го стори тоа, откако Уставниот суд донесе одлука дека владата на Авдулах Хоти е незаконски избрана, пренесуваат косовските медиуми. Како што е наведено, по консултацијата со политичките партии, ќе го објави датумот на изборите, што може да биде најдоцна во рок од 40 дена. Уставниот суд во Приштина донесе одлука по жалбата на Движењето Самоопределување во врска со гласањето на пратеникот Етем Арифи, што беше клучно за формирање влада предводена од премиерот Хоти. Судот пресуди дека гласот на пратеникот Арифи за формирање влада на Хоти е неважечки.

Бугарските социјалисти нема да учествуваат во консултациите на ГЕРБ за нов устав

Тале Кристо — Tue, 18 Aug 2020 13:41:01 +0000

Бугарската социјалистичка партија (БСП) не го поддржува нацрт-новиот Устав и нема да учествува во консултациите на ГЕРБ за уставни измени, изјави Јанаки Стоилов од БСП на вонредна прес-конференција, јави БГНЕС. – Ги повикуваме граѓаните и нашите поддржувачи отворено да го искажат своето незадоволство, вклучително и на мирни протести, и да не учествуваат на изборите за Големо народно собрание. И парламентарните и вонпарламентарните партии не треба да учествуваат во лошо замислената уставна иницијатива, повика Стоилов. „Протестите против олигархиската влада на корумпираната Влада на Бугарија продолжуваат во земјата повеќе од 40 дена, а демонстрантите бараат оставка на Владата, главниот обвинител и предвремени избори. БСП се согласува со овие барања. Во уште еден обид да остане на власт, претседателот на ГЕРБ (Бојко Борисов) на коцка стави едно од нашите неколку достигнувања во последниве децении, Уставот на Република Бугарија.Иницијативата има за цел да го сврти вниманието.Исто така, уништувачите на парламентаризмот и уставнизмот влегуваат во улога на уставните законодавци. што го задушува индивидуалниот развој и просперитетот на нацијата“, се наведува во ставот на социјалистите. На прашањето за оценка на новите предлози, кои се спорни околу тоа дали треба да се спушти Врховното национално собрание, Стоилов додаде дека тие не го поддржуваат овој предлог. „Може да се разгледаат начините за заедничка работа на Националното собрание со Врховното национално собрание. Борисов избра неуспешна улога за него и е нов основач на бугарската држава. Ова не му одговара “, додаде Стоилов. Шефицата на пратеничката група на ГЕРБ Даниела Дариткова вчера го депонираше нацрт-уставот во Народното собрание. Документот е испратени до шефовите на сите пратенички групи во парламентот и пратениците, соопшти прес центарот на партијата. ГЕРБ ги повика на разговори и консултации за предложениот нацрт-устав сите парламентарни групи со цел да биде постигната широка согласност меѓу народните претставници за свикување на Големото народно собрание, односно неопходни се гласовите на две третини од пратениците. Според Трновскиот Устав во Бугарија има Обично народно собрание и Големо народно собрание, но зборот „обично“ најчесто не се користи. Народното собрание се состои од 240 народни пратеници, а Големото народно собрание од 400 пратеници избрани на директни избори. Големото народно собрание се избира непосредно од избирачите од целата земја за решавање на важни државни и општествени прашања, како што се носење или менување уставот, менување на територијата на државата и слично. Последен пат заседавало од 10 јули 1990 до 2 октомври 1991 година.

Продолжуваат консултациите за состав на новата Влада

Тале Кристо — Sun, 16 Aug 2020 08:09:51 +0000

Генерални секретари на Социјалдемократскиот сојуз на Македонија и Демократската унија за интеграција викендов ги продолжуваат интензивните консултации и работата на постигнување коалициски договор меѓу Коалицијата „Можеме”, предводена од СДСМ и ДУИ за формирање нова влада со четиригодишен мандат. Двете партии информираа дека по утврдувањето на коалициските принципи и определби, преговарачките екипи работат на хармонизација на изборните програми на двете партии во предлог програма за работа на евентуалната идна Влада. Започна и процесот на разгледување на поделбата на одговорностите во идната коалиција како и на „предлозите за соодветни, подготвени, чесни и способни кадри, кои ќе можат во целост да ја реализираат програмата во четиригодишен мандат“, соопштија СДСМ и ДУИ. Двете партии потенцираат дека единствени точни информации околу консултациите се оние добиени од официјалните партиски лица вклучени во преговорите. Консултациите меѓу двете партии, започнаа откако во четвртокот шефот на државата Стево Пендаровски му го додели мандатот за формирање влада на лидерот на СДСМ Зоран Заев. Разговорите меѓу двете партии почнаа во четвртокот попладне, по врачувањето на мандатот, со тричасовна средба Заев со лидерот на ДУИ, Али Ахмети, која во заедничко соопштение беше оценета како конструктивна и продуктивна и на која биле постигнати основите за „напредок кон коалициски договор за нова европска Влада посветена на европските интеграции, на економијата, еднаквоста и на владеењето на правото“. ДУИ од своја страна соопшти дека разговорите за формирање владина коалиција со СДСМ се одвиваат на различни партиски нивоа, изарувајќи уверување дека ќе дојдат до конечен договор и Влада со целосен четиригодишен мандат, која ќе биде изгласана во Собранието, ќе им служи на сите граѓани подеднакво и ќе продолжи партнерството со евроатлантските сојузници. Додека траат консултациите за формирањето нова влада, ВМРО-ДПМНЕ и натаму инсистира на својот став дека врачувањето на мандатот на Заев од страна на претседателот Пендаровски било противуставно. Партискиот портпарол Димче Арсовски вчера на прес-конференција најави дека размислува за поднесе иницијатива за испитување на уставноста на постапката на шефот на државата. – Секогаш кога ќе биде прекршен Уставот, Уставниот суд е должен да излезе и да го заштити Уставот, така што размислуваме за уставна иницијатива и многу набрзо ќе се знае конкретниот чекор во однос на поднесување на истата, нагласи Арсовски.

Продолжуваат консултациите за формирање Влада

Тале Кристо — Sat, 15 Aug 2020 07:46:37 +0000

Консултациите за формирање Влада, по изборите на 15 јули продолжуваат, откако во четвртокот претседателот на државата Стево Пендаровски му го довери мандатот за формирање влада на лидерот на СДСМ Зоран Заев. Сега Заев има рок од дваесет дена од добивањето на мандатот за консултации за формирање нов состав на Влада. ДУИ соопшти дека разговорите за формирање владина коалиција со СДСМ се одвиваат на различни партиски нивоа. – Потврдени се принципите врз кои ќе се заснова следната влада, и тие и беа соопштени на јавноста неколку пати. Се подготвуваме за следните чекори, како што се изработката за детална програма за работа и дефинирање предлози со соодветни, подготвени, чесни и способни кадри, посочија од ДУИ. Нивните уверувања, како што се наведува, се дека овој пристап ќе доведе до конечен договор и Влада со целосен четиригодишен мандат, која ќе биде изгласана во Собранието, ќе им служи на сите граѓани подеднакво и ќе продолжи партнерството со евроатлантските сојузници. Тричасовна средба во четвртокот попладне, по врачувањето на мандатот, имаа лидерите на двете партии Али Ахмети и на СДСМ Заев, која беше оценета во заедничкото соопштение како конструктивна и продуктивна и на која биле постигнати основи за напредок кој води до коалиционен договор за нова, европска Влада посветена на европските интеграции, на економијата, еднаквоста и на владеењето на правото. На средбата присуствувале и генералните секретари Љупчо Николовски и Артан Груби. Во соопштението беше најавено дека разговорите меѓу двете партии ќе продолжат во текот на викендот на ниво на генерални секретари. Опозициската ВМРО-ДПМНЕ, која ги замрзна односите со шефот на државата откако тој реши да му го даде мандатот за формирање Влада на Заев без да прикаже доказ за мнозинство во Парламентот, најави дека во наредниот период сите опции се отворени и дека ќе го следат периодот на преговори кој што ќе го предводат партиите. – Точно е, вчера имавме конкретна изјава и од страна на претседателот Мицкоски но, тоа го говорат и експертите, тоа го пишува и во Уставот, дека противуставно, Стево Пендаровски го даде мандатот на пратеникот, односно го узурпираше во рацете на пратеникот Зоран Заев, рече портпаролот на ВМРО-ДПМНЕ Димче Арсовски. Според него, Заев или од СДСМ неколкупати кажале дека имаат мнозинство, но потоа самите се демантирале. – Во однос на тоа ќе треба да почекаме, да видиме како се развиваат преговорите, сепак тие преговори ги водат две други политички партии и ќе треба таму да ги бараме одговорите во однос на се она што се разговара таму. Во однос на позицијата на ВМРО-ДПМНЕ морам да истакнам дека веќе е јасно кој го узурпираше мандатот во раце и кој го има мандатот за да се обиде како што велеа да состави нова Влада, рече Арсовски одговарајќи на новинарско прашање. Коалицијата Алијанса за Албанците и Алтернатива соопшти дека нивни претставници немале средби за учество во новата влада и дека нема да да преговараат додека ДУИ не го исцрпи правото да биде дел од идната влада, односно да стане опозиција. За нив ДУИ е легален, но не легитимен победник на изборите кај партиите на Албанците. – Иако ние сме легитимни победници на изборите на 15 јули во албанскиот политички камп, ние нема да влеземе во преговори, се додека ДУИ не го исполни предизборното ветување за премиер да биде Насер Зибери. Дури, како што кажавме, ако во Собранието доајде предлог Насер Зибери да биде премиер, ние со нашите 12 пратеници ќе гласаме за него. Но, ако ДУИ не успее да го реализира ова ветување, за што има легалитет, таа партија нема право да биде дел од идната влада и нејзиното место е во опозиција, истакна на прес-конференцијата Скендер Зеид Реџепи, генерален секретар на Алтернатива. Вчера со реакција за барањето на ДУИ премиер да биде Албанец, излезе и партијата ДОМ, која е во коалиција со СДСМ. Во соопштението тие посочуваат дека за нив барањето на ДУИ за премиер по етнички клуч е неприфатливо затоа што води кон поделеност на македонското општество, подем на национализмот и претставува закана за општествениот систем и современиот граѓански концепт-едно општество за сите. – Премиерската функција не смее да се претвори во “весела математика”, од типот 1+3, 2+2, 3+1. Дополнително, ротацијата на премиерската позиција би можела во иднина да стане пракса и за други политички функции што би довело до нефункционалност на институциите, се посочува во соопштението.

Тачи најави консултации со партиите за формирање нова влада на Косово

Тале Кристо — Thu, 26 Mar 2020 16:39:37 +0000

Претседателот на Косово Хашим Тачи најави дека ќе ги започне консултациите со лидерите на сите парламентарни политички партии за формирање нова влада, откако синоќа Собранието на Косово му изгласа недоверба на кабинетот на Албин Курти, јави дописникот на МИА од Приштина. При денешната посета на Медицинскиот баталјон во рамките на Безбедносните сили на Косово, Тачи изјави дека, во консултација со партиските лидери, ќе ги разгледа можностите за формирање „нова влада на стабилност, единство и сеопфатност“. – По падот на Владата, како претседател на државата, без одолговлекување ќе ги започнам консултации со лидерите на сите парламентарни партии, за да ја разгледам можноста за формирање нова влада на стабилност, единство и сеопфатност. Во секој мој чекор, како претседател на државата, ќе ги почитувам во целост Уставот и законите на државата, изјави Тачи. Во Собранието на Косово синоќа, со мнозинство гласови, беше изгласана недоверба на Владата на Курти. Иницијативата за уривање на Владата ја поднесе досега владејачкиот Демократски сојуз на Косово (ЛДК), а го поддржаа и другите парламентарни партии, како опозициските, така и оние на српското и другите немнозински заедници, кои беа дел од кабинетот на Курти. Против беа пратениците на Движењето Самоопределување (ВВ) на Курти, како и тројца од пратениците на ЛДК, меѓу кои и собраниската спикерка Вјоса Османи.

Нова рунда консултации меѓу Македонија и Грција на ниво на МНР

Ивона Петрова — Fri, 09 Feb 2018 08:32:42 +0000

Министерствата за надворешни работи на Република Македонија и Грција денеска во Скопје ќе го одржат седмиот состанок, како дел од Мерките за градење на доверба меѓу двете земји. Како што најави македонското МНР, се очекува во двете делегации учество да земат и претставници на повеќе ресорни институции. Последната средба меѓу шефовите на дипломатиите на двете земји Никола Димитров и Никос Коѕијас се одржа на 11 јануари во Солун. Тогаш, македонското и грчкото МНР соопштија, дека имале добар разговор со фокус на унапредување на билатералните односи и соработка во поширок контекст, поврзан со тековните мерки за градење доверба. МИА