кошаркарска евролига – Kurir.mk

Руските клубови суспендирани, Валенсија и Партизан во кошаркарската Евролига

Дарко Андоновски — Thu, 16 Jun 2022 16:11:17 +0000

Членовите на Извршниот комитет на кошаркарската Евролига одлучија денеска да ги суспендираат екипите од Русија за следната сезона во Евролигата и Еврокупот, а во елитното натпреварување да ги заменат Партизан и Валенсија, во чиј редови настапува македонскиот репрезентативец Ненад Димитријевиќ. Суспензијата на руските кошаркарски екипи доаѓа како последица на војната во Украина, а од Евролигата појаснија дека при донесување на одлуката се воделе од одлуките, кои претходно ги донесоа други меѓународни федерации, вклучувајќи ги МОК, УЕФА, ФИФА и ЕХФ, како и изјавите на 37 министри за спорт во европските држави, кои заклучија дека на руските клубови треба да им се забрани настап во нивните земји. Учесници во Евролигата во следната сезона ќе бидат Алба Берлин, Ефес, Монако, Армани, Басконија, Црвена ѕвезда, Барселона, Баерн Минхен, Фенербахче, Асвел, Макаби, Олимпијакос, Панатинаикос, Партизан, Реал Мадрид, Валенсија, Виртус Болоња и Жалгирис. Белградски Партизан се враќа во елитното европско кошаркарско натпреварување прв пат по пауза од осум години.

Белград домаќин на завршниот турнир во кошаркарската Евролига

Дарко Андоновски — Thu, 19 May 2022 10:04:20 +0000

Белград од денеска до сабота ќе биде домаќин на завршниот турнир во кошаркарската Евролига. Првото полуфинале денеска ќе го игра актуелниот шампион Ефес против Олимпијакос од 18 часот. Ова претставува 45. средба за двата тимови, чиј исход е 22:22. Од 21 часот ќе се соочат Реал-Барселона. Во регуларниот дел од сезоната Барселона ги доби двата натпревари, во декември дома (93:80), а потоа во февруари во Мадрид (86:68). Победниците ќе играат за титула во сабота, а турнирот се одржува во „Штарк Арена“.

Кошаркарската Евролига ги суспендираше руските клубови

Бошко Тасиќ — Mon, 28 Feb 2022 18:40:11 +0000

Русија и руските клубови полека добиваат суспензии во сите спортови. Исклучок не е ниту кошарката, Евролигата денеска и официјално го направи тоа. Извршниот одбор на акционери на денешен состанок одлучил да ги суспендира руските тимови, ЦСКА Москва, УНИКС Казан и Зенит од Евролигата, како и Локомотив Кубан од Еврокупот.

Руските кошаркарски тимови можат да бидат домаќини во Белград во Евролигата

Бошко Тасиќ — Sat, 26 Feb 2022 08:55:23 +0000

Конфликтот помежу Русија и Украина носи и големи промени во светот на спортот. Најмногу на удар се екипите од Русија, кои поради санкциите нема да бидат во можност домашните натпревари да ги играат на домашен терен. Многу европски екипи веќе соопштија дека немаат намера да патуваат во Русија, а како што пренесуваат српските медиуми во целата приказна се вклучи Белград, кој е подготвен да организира шест домашни натпревари на руските тимови: ЦСКА, Уникс и Зенит. Овие наводи ги потврди и заменик градоначалникот на Белград, Горан Весиќ. „Точно е дека Евролигата неофицијално стапила во контакт со град Белград со прашањето дали можеме да бидеме домаќини на шест натпревари кои руските клубови Зенит, ЦСКА и Уникс треба да ги одиграат во периодот од 1 до 17 март“, за српски „Новости“ потврди Весиќ. Тој наведува дека во име на град Белград, по консултации со претседателот Вучиќ, тој дал согласност споменатите натпревари да се играат во престолнината на Србија. „Ја гарантираме безбедноста на сите спортисти, без разлика дали се од Русија, Украина или која било друга земја. Кај нас сите се добредојдени и безбедни. Така што ние сме подготвени да бидеме домаќини и на овие и на други натпревари кои евентуално би биле откажани доколку одлучи Евролигата. Белград е сигурен партнер на Евролигата и град на спортот и пред сè на кошарката“, додаде Весиќ. Токму поради воениот конфликт во Украина веќе се одложени сите натпревари на руските екипи во Евролигата.

Поради коронавирусот одложени 8 дуели во кошаркарската Евролига

Магдалена Андонова — Wed, 05 Jan 2022 17:00:03 +0000

Раководството на кошаркарската Евролига одложи вкупно осум дуели, кои требаше да се одиграат утре и задутре, поради зголемениот број заразени со коронавирус во екипите. За четврток беа закани натпреварите Црвена ѕвезда – Фенербахче, Алба – Панатинаикос, Макаби – Басконија и Реал Мадрид – Уникс, додека в петок требаше да се одиграат уште четири дуели, ЦСКА Москва – Барселона, Ефес – Баерн Минхен, Жалгирис – Олимпијакос и Асвел – Монако. Единствениот натпревар кој остана на програмата в петок е меѓу Милано и Зенит. Евролигата соопшти дека во консултации со екипите ќе одреди нови термини за одигрување на одложени натпревари. (МИА)