Косово – Kurir.mk

Пуштена во промет пругата од македонско-косовската граница до Косово Поле

Дарко Андоновски — Sat, 04 Nov 2023 19:15:10 +0000

Железничката линија од Генерал Јанковиќ, на косовската страна на границата со Северна Македонија, до Косово Поле, во близина на косовската престолнина, денеска беше отворена по подолго време, откако беа пуштени во употреба два тунели на трасата, јави дописникот на МИА од Приштина. На денешната церемонија по повод отворањето на пругата, косовскиот премиер Албин Курти го опиша настанот како еден од најважните за косовската инфраструктура и за поврзувањето на земјата со регионот. Двата тунели, кои беа срушени во косовската војна од 1998-99 година, се долги, едниот 262 метри, а другиот 122. Според Курти, со целокупниот проект за ревитализација на косовските железници се предвидуваат 13 нови мостови и седум тунели, „реконструирани според највисоките европски стандарди за железнички транспорт“. Во соопштението на Владата на Косово се наведува дека вредноста на работите во овој сегмент, од границата на Северна Македонија до Косово Поле, е над 164 милиони евра, додека над 200 милиони евра е планираната вредност за преостанатиот сегмент до Митровица и од Митровица до северната граница на Косово. Курти изрази благодарност до Европската унија, Европската инвестициска банка и Европската банка за обнова и развој, за поддршката на финансирањето и рехабилитацијата на оваа железничка пруга, „која граѓаните на Косово уште повеќе ќе ги доближи до Европската унија“. - Овој проект со години се соочуваше со многу предизвици и пречки. Тие се надминуваат благодарение на решителноста на раководителите, инженерите и работниците на Косовските железници – јавното претпријатие Инфракос, нашето Министерство за животна средина, просторно планирање и инфраструктура, Министерството за економија… и Министерството за финансии, труд и трансфери, изјави Курти. Тој додаде дека „железницата е многу важна инфраструктура која го поврзува Косово со регионот и со Европа и го отвора патот на раст и развој“. Министерката за економија, Артане Ризваноли рече дека штотуку отворената пруга нуди подобри можности за граѓаните и бизнисите, поевтин и побрз транспорт, додека министерот за животна средина, просторно планирање и инфраструктура Либурн Алиу изјави дека со оваа пруга Приштина се поврзува директно со Скопје и Солун.

Демостат: „Де факто признавањето“ на Косово е паричката на Западот за Курти

Ивана Ефремовски — Fri, 03 Nov 2023 13:10:39 +0000

„Де факто признавање“ е паричката што Западот првенствено ја има наменето за премиерот на Косово, Албин Курти, пишува порталот Демостат, јави дописникот на МИА од Белград. Како што соопшти Демостат „според толкувањето на познавачите на состојбите, на Курти ќе му биде полесно на домашен терен да објасни дека е неопходно конечно да се формира Заедницата на српските општини (ЗСО), која косовските власти и западната „петорка“ од ЕУ, САД, Франција, Германија и Италија ја нарекуваат „Заедница на општини со српско мнозинство“. Изразот „де факто признавање на Косово“, кој деновиве често се споменува во српската јавност, не претставува ништо ново, ниту е знак дека Србија ќе се откаже од ставот дека Косово е нејзин составен дел. Како што објаснуваат за Демостат извори од дипломатски кругови, Бриселскиот договор, потпишан во април 2013 година, претставува признавање на „новата реалност“ на Косово, бидејќи Србија, меѓу другото, се согласила општините со српско мнозинство на север да бидат интегрирани во Косовскиот правосуден систем. Во изминатите десет години, Белград и Приштина усвоија низа договори во рамките на Бриселскиот дијалог под покровителство на ЕУ, вклучително и оние за телекомуникациите и енергетиката. Веќе во јуни 2013 година двете страни разменија офицери за врска. Договорот за телекомуникациите му овозможи на Косово да добие шифра (+383). На крајот на јуни 2022 година, Белград и Приштина го прифатија „Патоказот за спроведување на енергетските договори во рамките на бриселскиот дијалог“. Претседателката на Европската комисија, Урсула фон дер Лајен, која оваа недела беше на „мини балканска турнеја“, во Приштина по разговорот со косовската претседателка Вјоса Османи изјави дека Косово треба да го прифати формирањето на ЗСО, додека Србија „де факто“ да го признае Косово. Фон Дер Лајен во своето обраќање пред новинарите во Белград не е првата која го спомена терминот „де факто признавање“ на заедничката прес конференција со претседателот на Србија, Александар Вучиќ, но како одговор на новинарско прашање, таа објасни дека тоа всушност значи спроведување на договорот постигнат во Охрид. - За што се работи: имплементација на Охридскиот договор, кој предвидува различни чекори, кои вклучуваат признавање на документите и институциите на Косово од страна на Србија и што оди заедно со формирањето на ЗСО, што треба да го спроведе Косово, рече таа, повикувајќи ги Србите да го поддржат европскиот предлог за статутот на ЗСО, а Косово да го спроведе. (МИА)

ФИБА турнир Скопје 2023: Двојна победа на македонските селекции над Косово

Ивана Ефремовски — Fri, 03 Nov 2023 09:20:24 +0000

Македонските кадетски кошаркарски репрезентации во машка и женска конкуренција забележаа синоќа победи над соодветните селекции на Косово во рамки на 2. коло на ФИБА развојниот турнир „Заедно до 16“ што се игра во Скопје. Во пресметката на женските селекции, македонските кошаркарки забележаа убедлив триумф над Косово со 73-24 во дуел во кој избраничките на селекторот Горан Крстевски имаа апсолутна доминација на паркетот во СРЦ „Кале“. Најефикасна во македонските редови беше Колева со 17 поени. На машкиот турнир, македонските кошаркари ја извојуваа и втората победа, совладувајќи ја убедливо селекцијата на Косово со 72-57. Најефикасен во македонските редови беше Бошковски со 15 поени. Во третото коло од турнирот во Скопје, двете македонски селекции се слободни, а натпреварувањето го продолжуваат в сабота против селекциите на Турција. (МИА)

Вучиќ: Никогаш нема да ја потпишам независноста на Косово

Ивона Петрова — Thu, 02 Nov 2023 12:10:22 +0000

Српскиот претседател денеска во видео објавено на неговит профил на Инстаграм нагласи дека никогаш нема да потпише за независнот на Косово. „Исто како што ... зборуваа дека се против санкциите кон Русија, и дека јас лично ќе ги воведам по 3 април и по тие избори не го направив тоа, додека тие се уште се залагаат за санкции против Русија до денес, па сега се измислија дека сум подготвен да потпишам независност на Косово само за да поминам изборите“, наведе Александар Вучиќ во видеото објавено на Инстаграм профилот.

Рама ја повика Србија да соработува во дијалогот со Косово

Ивана Ефремовски — Fri, 27 Oct 2023 12:03:39 +0000

Албанскиот премиер Еди Рама ја повика Србија да соработува во дијалогот со Косово, додека разговорите во Брисел сè уште траат, јави Топ чанел. Оваа реакција, според телевизијата, доаѓа откако вчера Косово, на средбата со европските лидери, го прифати бриселскиот Основен договор од 27 февруари 2023 година и Охридскиот анекс за имплементација од 18 март 2023 година. Рама смета дека ова е многу важен чекор во дијалогот меѓу двете земји, притоа нагласувајќи дека сега е време и Србија да го стори истото. -Мудроста на албанскиот народ, а не само тоа, е поука дека „подобро доцна отколку никогаш“. Не можам да го скријам задоволството што на вчерашната средба во Брисел конечно косовското раководство постапи правилно! Разумно прифаќајќи го предлогот на ЕУ на 21 октомври, Косово денес е во многу подобра позиција. Ова е многу важен чекор напред. Време е и Србија да го стори истото. Се што е досега прифатено и договорено мора да се спроведе без одлагање. Ги повикувам нашите западни партнери да го задржат овој моментум и да ги поттикнат страните кон конечно решение, пишува Рама во објава на социјалните мрежи. Тој и со порака дека „ни е потребен мир, стабилност и соработка“. -Доста е со истиот стар опасен муабет. Доста е со избегнување мир и хранење на духовите од минатото за ситни интереси на домашната политика. Погледнете недалеку одовде што се случува со оние кои избегнуваат мир и се впуштаат во игри на сè или ништо. Ни треба мир, стабилност и соработка во овој дел од Европа. Помирете се заради Бога и гледајте напред, порачува Рама. Вчера, тој го пофали косовскиот премиер Албин Курти за прифаќањето на предлогот за деблокирање на Заедницата со српски општини. (МИА)

Борел: Без договор меѓу лидерите на Србија и Косово, предусловите на секоја страна беа неприфатливи за другата

Катерина Бојаџиева — Fri, 27 Oct 2023 08:26:37 +0000

Шефот на европската дипломатија, Жозеп Борел изјави дека договорот меѓу лидерите на Србија и Косово не бил можен поради предусловите на секоја страна, кои за другата биле неприфатливи, јави дописникот на МИА од Белград. По вчерашните одвоени разговори меѓу лидерите на ЕУ, Франција, Германија и Италија со премиерот на Косово Албин Курти и претседателот на Србија Александар Вучиќ во Брисел, Борел изјави дека „сите заедно презентирале нов европски сериозен и избалансиран предлог“ за формирањето на Заедницата на општини со српско мнозинство (ЗСО) и инсистирале страните да ја искористат таа можност, бидејќи тоа би било „голем скок напред“ во процесот на нормализирање на односите. -За жал, страните не беа подготвени да се договорат за ова. Предусловите на секоја страна за другата беа неприфатливи, изјави Борел пред новинарите доцна синоќа. Борел додаде дека водачите на ЕУ бараат од двете страни „искрено да се ангажираат“ во процесот на нормализирање на односите. -Ова може да се направи само во рамките на дијалогот, бидејќи тоа е единствениот начин да се напредува на европскиот пат. Ќе продолжиме да инсистираме и да работиме на постигнување договор, рече Борел. Тој исто така рече дека лидерите на ЕУ, Франција, Германија и Италија „се многу загрижени поради ќорсокакот во процесот на нормализација меѓу Косово и Србија и неодамнешните терористички напади (во селото Бањска), кои повторно ги осудија за време на вчерашната разговори. Владата на Косово синоќа соопшти дека Курти на средбите повторил дека е подготвен да го потпише Договорот за патот кон нормализација меѓу Косово и Србија, договорен во февруари во Брисел, но дека Вучиќ не сакал да го стори тоа. -Претседателот на Србија, Александар Вучиќ, одби да го потпише договорот со Косово и побара да се прифати придружното писмо, со кое практично се укинуваат трите принципи на Договорот, неговиот анекс за имплементација, како и предлогот (за ЗСО) предложен од петте претставници на западните земји на 21 октомври, соопшти Владата на Косово. Вучиќ синоќа изјави дека предлогот што „големата петорка“ го донесе во Белград и Приштина на 21 октомври е „добра основа“ за продолжување на работата и формирање на Заедницата на српски општини (ЗСО). -Тој предлог се однесува исклучиво на формирањето на ЗСО, но не можам да зборувам за детали, рековме дека тој предлог е многу добра основа и дека сме подготвени да работиме и веднаш да почнеме да го спроведуваме, заедно со оградувањето, што и денеска го претставив на лидерите на трите најмоќни земји, а тоа е дека не можеме да прифатиме членство на Косово во ОН и прифаќање на независноста на Косово, рече Вучиќ.

Мелони: Белград и Приштина да преземат чекори во однос на спроведувањето на потпишаните договори

Дарко Андоновски — Thu, 26 Oct 2023 16:01:22 +0000

Италијанската премиерка Џорџа Мелони изјави дека францускиот претседател Емануел Макрон, германскиот канцелар Олаф Шолц и таа повикале на спроведување на веќе постигнатите договори на денешните средби со лидерите на Србија и Косово. -Побаравме од двајцата лидери да преземат чекори напред во однос на имплементацијата на договорите постигнати во последните години и месеци, рече Мелони по одделните состаноци на лидерите на ЕУ, Франција, Германија и Италија со српскиот претседател Александар Вучиќ и косовскиот премиер Албин Курти. Вучиќ и Курти денеска во Брисел одвоено разговараа со претседателот на Европскиот совет Шарл Мишел, шефот на европската дипломатија Жозеп Борел, специјалниот претставник на ЕУ за Западен Балкан, Мирослав Лајчак и лидерите на Франција, Германија и Италија, Емануел Макрон, Олаф Шолц и Џорџа Мелони. -Се надеваме на напредок, изјави Мелони пред пристигнувањето на Самитот на ЕУ.

Министерството за одбрана на Србија бара присуство само на војници на КФОР на границата со Косово

Дарко Андоновски — Wed, 25 Oct 2023 14:21:59 +0000

Србија инсистира само членовите на мисијата на НАТО, КФОР да бидат распоредени на косовската страна од границата, беше соопштено денеска по средбата меѓу српскиот министер за одбрана Милош Вучевиќ и турскиот министер за одбрана Јашар Ѓулер. Турција ја презеде командата на КФОР во октомври. -Силно ја охрабруваме директната комуникација меѓу началникот на Генералштабот на војската на Србија и командантот на КФОР и инсистираме на административната линија од страната на Косово и Метохија да бидат присутни само припадниците на КФОР и заеднички патроли на членовите на Српската војска и припадниците на КФОР по административната линија, се наведува во соопштението на министерот за одбрана Милош Вучевиќ. Вучевиќ најави дека безбедноста на Косово била „доминантна тема на разговор“ со неговиот турски колега. -Охрабрени сме од гаранциите што ги добивме од г-дин Ѓулер во врска со безбедноста на српската заедница, се додава во соопштението. Вучевиќ, како што е соопштено, го повторил ставот на Белград дека Србите во Косово „немаат проблем со присуството на членовите на КФОР и дека присуството на КФОР ги намалува тензиите и води кон деескалација“. Односите меѓу Србија и Косово дополнително се заострија по нападот на вооружена група врз косовската полиција во селото Бањска на 24 септември. Одговорноста за нападот ја презеде Милан Радоичиќ, поранешен потпретседател на водечката партија на Србите, Српска листа. Радоичиќ, кого Приштина го обвинува за тероризам, е во Србија, а властите во Белград најавија дека нема да го екстрадираат во Приштина. Тој е под истрага и во Косово и во Србија, но за различни кривични дела.

Свечља: Имаме информации дека нови групи се обучуваат во Србија за напади во Косово

Тале Кристо — Wed, 25 Oct 2023 06:43:07 +0000

Министерот за внатрешни работи на Косово, Џељаљ Свечља вели дека косовските служби поседуваат разузнавачки информации за тоа дека во Србија се обучуваат други групи за можни нови напади врз Република Косово, јави дописникот на МИА од Приштина. Во синоќешното интервју на КТВ, еден месец по нападот во Бањска, на северот на Косово, Свечља рече дека дел од овие напади што се очекува да се случат, освен Милан Радоичиќ, поранешниот потпретседател на партијата Српска листа, кој ја презеде одговорноста за нападот на 24 септември, ќе биде и лицето Звонко Веселиновиќ, кој ѝ е добро познат на полицијата и кого косовските и српските медиуми го споменуваат како една од главните фигури на организираниот криминал во северно Косово. Според косовскиот министер, овие групи се обучуваат во српски армиски бази во близина на границата со Косово. - Имаме разузнавачки информации дека се обучуваат други групи, дека не само Радоичиќ, туку и Веселиновиќ ќе биде дел од идните напади, доколку дозволиме да се случат, со единствена цел да се предизвика нова ситуација на теренот, при што позицијата на Србија би се подобрила во однос на нивната цел да го уништат Косово, рече Свечља. Тој додаде дека Косово ќе ги исполни сите процедури, барајќи екстрадиција и судење на Радоичиќ пред правосудниот систем на Косово. - Не само негово, туку и на оние кои го планираа овој напад против територијалниот суверенитет на Република Косово. Нема да застанеме тука, порача косовскиот министер за внатрешни работи. Свечља рече дека државата Србија, Владата и претседателот на Србија, Александар Вучиќ, се одговорни за она што се случи во Бањска на 24 септември. - Тие го извршија планирањето, регрутирањето, обуката, ја вооружија и ја донесоа таа терористичка група на граница, која беше само бран на терористи планирани да влезат во Косово. Имаше и друга група внатре во Косово, рече тој. Свечља тврди дека планот за терористичкиот напад во Бањска на 24 септември бил подготвен воено и имал за цел припојување на северните косовски општини кон Србија. Според него, Бањска била собирното место на членовите на терористичката група, кои, како што вели, би се распоредиле во Звечане и Северна Митровица. Според податоците на косовската полиција, доколку се реализирал планот на српската паравоена група, друга група би влегла во Лепосавиќ преку српската граница. - Првичната цел им беше да најдат безбеден коридор, тргнаа заедно од Извоци низ паралелен ридски пат во Бањска и ќе се распоредеа до Звечане и Северна Митровица. Бањска беше само собирно место. Не влегоа одеднаш, влегоа групи во вечерните часови. Место на средба беше Бањска. Тоа е воен план. Би биле сместени во Звечане и Митровица. Би се сретнале со останатите членови во Зубин-Поток. А имаме информации дека уште една група би влегла во Лепосавиќ од српската граница. Нашите разузнавачи се многу блиску до бројот на членови на оваа група, но не можам да ја кажам таа информација, изјави Свечља на КТВ.

Војник на КФОР загина во сообраќајна несреќа во Косово

Ивона Петрова — Tue, 24 Oct 2023 20:42:56 +0000

Припадник на италијанскиот контингент на КФОР загина во сообраќајна несреќа, соопшти мисијата на НАТО на Косово. Несреќата, прецизираат, се случила околу 15 часот и 30 минути на патот што ги поврзува општините Пеќ и Клина, додека овој војник бил во воено возило ВМ90, пишува КоСсев. Во критична состојба, со хеликоптер бил префрлен во американската болница во Приштина, каде лекарите констатирале смрт околу 16.50 часот. Во несреќата учествувал и уште еден војник, кој со возило на брза помош во свесна и стабилна состојба бил пренесен во кампот „Вилаџо Италија“, а потоа е испратен во воената болница во базата на КФОР „Филм Сити“ на дополнителни контроли, додаваат од КФОР. Околностите за оваа несреќа ги истражува Меѓународната воена полиција во соработка со локалните и меѓународните власти, соопшти КФОР.