косовски државјанин – Kurir.mk

Поголемо количество оружје и муниција пронајдени кај косовски државјанин во Скопје, поведена истрага

Ивана Ефремовски — Mon, 19 Jun 2023 09:02:13 +0000

Основното јавно обвинителство Скопје донесе Наредба за спроведување истражна постапка против 37-годишен државјанин на Косово со престојувалиште во Кондово, за кого постои основано сомнение дека сторил кривично дело – Неовластено изработување, држење, посредување и тргување со оружје или распрскувачки материи од член 396 став 2 во врска со став 1 од Кривичниот законик. На 18 јуни, при претрес во објектот во кој престојувал, полицијата открила поголемо количество огнено оружје и муниција, вклучувајќи и оружје, муниција и експлозивни материи кои на граѓаните им се забранети. Така, кај него бил пронајден рачен ракетен фрлач “РБР 64mm, M80”, кој преставува бесповлечно противоклопно ракетно средство за еднократна употреба познат како “ЗОЉА” од југословенско производство, како и три рачни бомби, од кои две фрагментирачки рачни бомби од типот “RGD-5” и една дефанзивна рачна бомба од типот “F1” од кинеско или од источноевропско производство. Освен ова, полициските службеници пронашле и еден пиштол за светлосно звучна сигнализација “BLOW AUTOMATIC F92“ кал.9mm, еден дел од пиштол – рам од оружје за светлоснo-звучна сигнализација, четири шаржери од кои три со по 30 куршуми, а еден со 20 куршуми со кал.7,62х39mm, 6 патрони од ловна муниција со кал.12 од разни производители, наменета за испалување од ловни огнени оружја, како и уште вкупно 164 куршуми од различен калибар, вклучувајќи и боева муниција, муниција изведена со панцирно пробивни, запалливи и трасирачки проектили и муниција изведена со експандирачки проектили. Бидејќи постои опасност од бегство и можност осомничениот да го повтори делото, надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор.

Измамени скопјанец и косовски државјанин, им одзеле околу три илјади евра

Тале Кристо — Wed, 03 May 2023 16:03:07 +0000

Косовски државјанин и 63-годишен скопјанец биле измамени во два одделни случаи. Во првиот случај, како што информира МВР, Ш.К. од Косово вчера на пладне пријавил во полиција дека на подрачјето на Карпош бил измамен од едно лице за сума од 500 евра. Според пријавеното, лицето му се доближило и го прашало дали сака да купи три камења – дијаманти од негов пријател од Кувајт, кој бил со него. Како што е пријавено, тој му ги дал парите, по што лицата заминале, а тој по кратко време сфатил дека бил измамен. Во вториот случај, 63-годишен скопјанец пријавил во полиција дека бил измамен за сума од 2.300 евра од едно лице, кое се претставило дека е од Република Турција. Според пријавеното, на 25 април 2023 година преку социјална мрежа и преку електронска пошта лицето го контактирало и го известило дека бил наследник на поголема сума на пари во банка. Како што е пријавено, лицето му побарало да испрати лични податоци преку електронска пошта и пари за наводни трошоци. Исто така, според пријавеното, тој ги испратил личните податоци по меил, а парите преку брз трансфер, по што прекинала комуникацијата со лицето и тој сфатил дека бил измамен. Полицијата презема мерки за расчистување на случаите.

20 годишен Косовец примен во Систина со повреди, бил претепан од неколку лица

Магдалена Андонова — Thu, 18 Aug 2022 14:19:18 +0000

На 18.08.2022 во 00.38 часот во СВР Скопје било пријавено дека во болницата „Аџибадем Систина“ бил донесен повреден Л.Г.(20) од Косово. Според пријавеното, тој со повреди се здобил во близина на Железничката станица каде бил физички нападнат од неколку лица кои употребиле тврди предмети бил. Увид на местото извршила екипа од СВР Скопје. Се преземаат мерки за расчистување на случајот.

Уапсен косовец баран со меѓународна потерница од Интерпол

Магдалена Андонова — Sun, 24 Jul 2022 11:02:50 +0000

Службеници од Полициската станица за Граничен премин „Долно Блаце“ вчера уапсиле Косовец баран со меѓународна потерница од Интерпол, соопшти Министерството за внатрешни работи. – Вчера во 12:30 часот, полициски службеници од Полициската станица за Граничен премин „Долно Блаце“ го лишиле од слобода B.K. (31) од Косово, затоа што при извршена проваерка било констатирано дека бил баран со меѓународна потерница од Интерпол, посочуват од МВР. Лицето било задржано во Полициската станица Кисела Вода за понатамошна постапка. (МИА)

Предлог за притвор за косовски државјанин кој давал поткуп на полициски службеници на Блаце

Тале Кристо — Tue, 07 Jun 2022 16:09:55 +0000

Основното јавно обвинителство Скопје поведе постапка против косовски државјанин за кого постои основано сомнение дека го сторил кривичното дело – Давање поткуп од член 358 став 1 од Кривичниот законик. Осомничениот 56-годишник, утринава бил лишен од слобода на граничниот премин „Долно Блаце“, при излез од земјава кон Република Косово, кога им дал поткуп од 50 евра на полициските службеници кои вршеле проверка на неговото комбе. Парите ги ставил во неговата патна исправа, обидувајќи се да го убеди раководителот на смена на граничниот премин да го пропушти на излез без проверка на возилото. Трговската стока што ја пренесувал во комбето, по наредба на јавен обвинител е фотографирана и предадена на Царинската управа за натамошна постапка. Оценувајќи дека во конкретниот случај постои опасност осомничениот да се даде во бегство, особено со оглед на фактот што станува збор за странски државјанин, надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор.

Бил фатен со роба за која немал дозвола па му понудил пари на полицаецот да го почести: Уапсен косовски државјанин на Долно Блаце

Магдалена Андонова — Tue, 07 Jun 2022 15:39:47 +0000

Денеска (07.06.2022) на Граничен премин Долно Блаце, на излез од државата кон Косово, полициски службеници го лишија од слобода косовскиот државјанин С.Ј.(56). Тој управувал патничко возило комби „фолксваген“, со косовски национални ознаки, а при проверка на возилото, во него била пронајдена поголема количина на роба која ја превезувал, а за која не поседувал никаква документација. Притоа, тој му понудил на полицискиот службеник да го почести, ставајќи му пари во својата косовска патна исправа. По ова С.Ј. бил приведен, а по документирање на случајот од страна на Одделението за прекуграничен криминал и миграции при Регионален центар за гранични работи Север против него ќе биде поднесена соодветна пријава.

Бегал од полиција, па се удрил во нивни автомобил – повредени двајца полицајци, поднесено обвинение против косовски државјанин

Магдалена Андонова — Thu, 15 Apr 2021 09:44:24 +0000

Основното јавно обвинителство Скопје поднесе Обвинителен предлог против еден државјанин на Република Косово за кривично дело – Загрозување на безбедноста на сообраќајот според член 297 став 1 од Кривичниот законик. Обвинетиот, на 2 април, управувал патничко моторно возило Ауди А4 со косовски регистарски ознаки кај граничниот премин Блаце, во насока од Косово кон Македонија. Кога пристигнал до полициската станица на граничниот премин, не застанал на даден знак од полицискиот службеник за да го престрои возилото за пасошка контрола, не застанал ниту кај кабината на Царинската управа и продолжил да вози. Полицискиот службеник излегол од станицата и издал усна наредба за запирање на возилото, по што двајца полициски службеници со службено возило се ипатиле да го запрат. Го престигнале на 4 километри од граничниот премин, му дале светлосна и звучна сигнализација да застане, но обвинетиот продолжил со голема брзина да вози по магистралниот пат кон Скопје. Полициските службеници го заобиколиле возилото за да го принудат да запре, но во тој момент обвинетиот, во обид да побегне, директно удрил во полицискиот автомобил. Од ударот, двајцата полициски службеници се здобиле со телесни повреди.

Обвинение за обид за тешка кражба пртив косовски државјанин

Тале Кристо — Thu, 01 Apr 2021 08:17:03 +0000

Против 35-годишен државјанин на Република Косово Основното јавно обвинителство Скопје поднесе Обвинителен предлог за кривично дело – Тешка кражба од член 236 став 1 точка 1 во врска со член 19 (во обид) од Кривичниот законик. На 28 март, обвинетиот насилно го откорнал прозорецот од задната страна и влегол во куќа на улицата „Анте Хаџи Митков“, па од подрумските простории се обидел да одземе предмети – обувки вредни 12.000 денари. Притоа полициски службеници го забележале и го спречиле во намерата. Поради опасност од бегство на обвинетиот кој е странски државјанин, надлежниот јавен обвинител до Основниот кривичен суд Скопје достави и предлог за продолжување на мерката притвор определена од судијата на претходна постапка.

Притворен косовски државјанин во врска со престрелката во Ѓорче Петров

Тале Кристо — Wed, 03 Mar 2021 13:49:40 +0000

Министерството за внатрешни работи до Основното јавно обвинителство Скопје поднело писмено известување за настанот што се случи на 01.03.2021 година, околу 16 часот, на улица „Борис Сарафов“ во Скопје, кога од патничко моторно возило „голф 5“ без регистарски таблици беше пукано со огнено оружје кон автомобил „мерцедес“ со скопски регистарски таблици, управувано од лице од село Горно Свиларе, при што возачот на „мерцедесот“ се здобил со прострелна рана во левата натколеница. Јавен обвинител од Основното јавно обвинителство Скопје, постапувајќи по поднесеното писмено известување, до судијата на претходна постапка од Основниот кривичен суд Скопје поднело Предлог за определување краткотраен притвор од 48 часа против едно лице, косовски државјанин. – Ваквата мерка беше побарана со цел да се обезбедат докази за евентуална инволвираност на тоа лице во кривично-правниот настан. Предлогот на јавниот обвинител беше прифатен и на лицето со решение му е определен краткотраен притвор од 48 часа, соопштија денеска од Јавното обвинителство на Република Македонија. За истиот настан, посочуваат во соопштението, уште едно лице беше лишено од слобода, но тоа лице е пуштено, бидејќи од МВР не биле обезбедени и приложени докази за негова инволвираност. Надлежниот јавен обвинител денеска издал повеќе наредби за вештачење на биолошки траги, на чаури од испукани куршуми и други наредби за обезбедување докази. – Од добиените резултати од наредените вештачења зависи дали ќе се потврди директната инволвираност во настанот на лицето за кое беше определен краткотраен притвор. По изготвување на овие вештачења, согласно Законот за кривична постапка, Обвинителството ќе одлучи за понатамошниот тек на постапката, стои во соопштението од ЈО.

Косовски државјанин обвинет за употреба на лажни документи

Дарко Андоновски — Tue, 15 Dec 2020 12:42:29 +0000

Против 20-годишен косовски државјанин Основното јавно обвинителство Скопје поднесе Обвинителен предлог за кривично дело – Фалсификување исправа од член 378 став 3 во врска со став 1 од Кривичниот законик. Како што соопшти Јавното обвинителство, на 12 ноември, на Меѓународниот аеродром Скопје, при пасошка контрола, обвинетиот употребил лажен словенечки пасош и лажна словенечка лична карта. Иако знаел дека документите се лажни и несоодветни на оригиналните примероци, тој ги употребил како вистински при обидот за излез од државава.