КОВАКС – Kurir.mk

СЗО: Испорачана милијардитата вакцина од програмата Ковакс

Тале Кристо — Sun, 16 Jan 2022 12:04:41 +0000

Светската здравствена организација (СЗО) денеска соопшти дека досега има испорачани една милијарда дози во рамките на програмата Ковакс. Од СЗО предупредуваат дека оваа бројка треба да биде пресвртницата и „потсетник за тоа колку останува да се направи“, по акумулацијата на залихите на вакцини во богатите земји, пренесуваат американските медиуми. СЗО прецизираше дека во вчерашната испорака на 1,1 милион дози вакцини за Руанда беше вклучена и милијардитата доза испорачана преку програмата Ковакс. Во соопоштението на СЗО се наведува дека во рамките на програмата Ковакс, досега вакцини се испорачани во 144 земји, „но тоа е само потсетник за тоа колку уште треба да се направи“. СЗО долго време ја критикуваше нееднаквата дистрибуција на вакцините и ги повика и производителите и земјите да и дадат приоритет на програмата Ковакс.

Директорка на СТО: КОВАКС засега не ја исполни целта

Ивона Петрова — Wed, 14 Jul 2021 07:20:55 +0000

Програмата КОВАКС за рамномерна испорака на вакцини против Ковид-19 низ целиот свет не успеа да ја исполни целта, бидејќи некои земји беа во можност да понудат повеќе пари и да направат резерви, смета генералната директорка на Светската трговска организација (СТО), Нгози Окоњо-Ивеала. – Недостигот во набавката го одреди однесувањето, истакна Окоњо-Ивеала за време на онлајн интервјуто за Атлантскиот совет, но не именуваше на кои земји мисли. Таа додаде дека многу земји ја поддржале програмата КОВАКС, но истовремено купувале вакцини и на тој начин му ги ускратувале на КОВАКС, поради што глобалната програма за вакцинација се бори да ги достави набавките. Генералниот директор на СЗО, Тедрос Аданом Гебрејесус, претходно предупреди дека смртноста од Ковид-19 повторно се зголемува, делта сојот на коронавирусот станува доминантен, а многу земји сè уште не добиле доволно вакцини за да ги заштитат своите здравствени работници. – Глобалниот јаз во снабдувањето со вакцини е исклучително голем, снабдувањето е нерамномерно и нефер. Некои држави и региони нарачуваат милиони вакцини за да ја дадат третата доза, додека некои земји не успеаја да ги вакцинираат ниту своите здравствени работници, ниту најранливите групи на населението, предупреди Гебрејесус.

Ковакс ќе добие 110 милиони дози кинески вакцини против коронавирус

Ивана Ефремовски — Mon, 12 Jul 2021 12:31:41 +0000

Ковакс системот веднаш ќе добие 110 милиони дози вакцина против коронавирус од кинеските компании „Синовак“ и „Синофарм“ кои ќе му помогнат на меѓународниот систем за дистрибуција на вакцини да се справи со недостигот поради новиот бран на пандемијата, соопшти денеска Сојузот за вакцини (Гави). „Договорот со кинеските фармацевтски групи вклучува и опции за набавка на дополнителни дози во наредните месеци“, се вели во соопштението. -Благодарение на овој договор, дури и откако овие вакцини веќе добија итно одобрување од СЗО, можеме веднаш да започнеме со испорака во земјите, рече Сет Беркли, раководител на Гави. Ковакс системот, кој требаше да гарантира еднаков пристап до вакцините и на богатите и на сиромашните земји, досега дистрибуираше повеќе од 102 милиони дози вакцини во 135 земји, многу помалку од планираното. Околу 170 милиони дози на „Синофарм“ потенцијално може да се обезбедат до крајот на првата половина на 2021 година, во зависност од потребите. Во случајот на „Синовак“, вкупниот број купени дози може да достигне 380 милиони до крајот на јуни 2022 година. Овие вакцини ќе бидат достапни за сите земји кои плаќаат за вакцините, како и за земјите што ќе ги примаат вакцините како донација. Ковакс планира да дистрибуира две милијарди дози до почетокот на 2022 година, вклучително и 1,8 милијарди за 92 најсиромашни земји. (МИА)

КОВАКС до крајот на годинава ќе испорача 520 милиони дози во Африка

Магдалена Андонова — Thu, 08 Jul 2021 16:42:25 +0000

Глобалната програма за дистрибуција на вакцини КОВАКС планира годинава да испорача 520 милиони дози вакцина против коронавирус во Африка, изјави директорката на програмата Аурелија Нгуен. Таа на прес-конференција организирана од Светската здравствена организација за африканскиот регион кажа дека Програмата не е задоволна од досегашната дистрибуцијата на вакцините, но дека распределбата треба значително да се зголеми од септември. Доцнењето во испраќањето на вакцината делумно се должеше на индиските ограничувања на извозот, што спречија КОВАКС да преземе дози од Индискиот институт „Серум“, еден од најголемите светски производители на вакцини, што ја произведува вакцината „АстраЗенека“. Нгуен додаде дека КОВАКС досега доставила околу 25 милиони дози во 44 африкански земји. До крајот на првиот квартал од 2022 година, КОВАКС планира да го снабди континентот со 850 милиони долази вакцини, бидејќи има убелдкиво најниски стапки на вакцинација во светот. Директорот на Глобалната алијанса за вакцини „Гави“, една од организациите што управуваат со КОВАКС, во април кажа дека намерата е Африка да се снабди со 720 милиони дози вакцини во 2021 година.

ЕИБ ветува поголема финансиска поддршка за механизмот Ковакс

Катерина Бојаџиева — Mon, 26 Apr 2021 15:12:31 +0000

Од почетокот на пандемијата, Европската инвестициска банка (ЕИБ) одобри повеќе од 40 милијарди евра за поддршка на развојот на вакцините, јавното здравје и економската отпорност на Ковид-19 во Европа и во светот. Претседателот на Европската инвестициска банка Вернер Хојер денеска оцени дека е потребна поголема финансиска поддршка, што ќе им овозможи на земјите со низок и среден приход да имаат пристап до вакцините против Ковид-19 преку механизмот Ковакс. Тој рече дека ЕИБ се очекува да ја зголеми поддршката за Ковакс на 600 милиони евра, како единствена мултилатерална финансиска институција што инвестира во таа програма, пренесува Бета. – ЕИБ е подготвена да ја зголеми поддршката за Ковакс, набавка на дополнителни вакцини против Ковид-19 и подобрување на производството на вакцини, дијагностика и јавното здравје во земјите со низок и среден приход, рече Хојер. Во соопштението на ЕИБ се вели дека нејзините технички и финансиски експертисоработуваат со глобални партнери за подобрување на набавката на дополнителни вакцини во рамките на програмата Ковакс. Се додава дека парите на ЕИБ, заедно со грантот од 100 милиони евра од Европската комисија во рамки на Ковакс, им овозможија на луѓето од повеќе од 100 земји со ниски и средни приходи да добијат пристап до вакцини против Ковид-19.

Франција донира 100.000 дози на Астра Зенека во програмата Ковакс

Тале Кристо — Wed, 21 Apr 2021 17:46:19 +0000

Франција овој месец ќе донира 100.000 дози на Астра Зенека на земји во развој, со што ќе стане првата членка на ЕУ која ќе испрати свои залихи во програмата Ковакс за посиромашните земји, изјави денеска советник на претседателот Емануел Макрон. Макрон ги повика земјите од ЕУ да испратат пет проценти од сопствените резерви на вакцини во земјите во развој со цел да се запре развојот на нови мутации на вирусот и да се спречи Русија и Кина да добијат дипломатска предност со споделување на своите вакцини. – Франција ќе промовира европски механизам за споделување на вакцини со Ковакс, изјави советник на Макрон, изразувајќи надеж дека другите земји ќе се посветат на „физичко споделување вакцини со Ковакс“. Целта на Ковакс, поддржана од Светската здравствена организација (СЗО) и Глобалната алијанса за вакцини и имунизација (ГАВИ) е да обезбеди две милијарди дози вакцини за посиромашните земји до крајот на 2021 година. Франција се обврза дека ќе испрати 500.000 дози до средината на јуни, нагласи францускиот советник, додавајќи дека првата серија ќе биде испратена наскоро.

Ковакс со план за испорака на третина од милијарда вакцини против Ковид-19 до средина на годинава

Катерина Бојаџиева — Sat, 10 Apr 2021 08:05:18 +0000

Меѓународната програма за споделување вакцини „Ковакс“ има за цел да испорача третина од милијарда дози вакцини против Ковид-19 до средината на годината. Тоа го најави на форумот на Светска банка, Сет Беркли, директор на ГАВИ. Програмата испорача скоро 38,4 милиони дози вакцини во 102 држави на шест континенти, шест недели откако почна да издава залихи. Говорејќи на истиот форум, Нгози Оконџо-Ивеала, генерален директор на Светската трговска организација, нагласи дека земјите во развој кои извезуваат стоки се соочуваат со голем скок на цените, а туризмот пропаднал во пандемијата. На светот му треба финансиска рамка за подготвеност и одговор на итни случаи и мора да ги држи отворени синџирите на снабдување за подобро да ги заштитиме економските системи, наведе таа.

За Албанија уште 50.000 вакцини против коронавирус преку Ковакс

Ивана Ефремовски — Wed, 31 Mar 2021 18:48:03 +0000

Албанија добива уште 50.000 дози вакцини преку Ковакс системот. Оваа вест ја сподели Еди Рама преку социјалните мрежи.

Вархеји ја поздрави испораката на вакцини во Македонија и Црна Гора преку Ковакс

Тале Кристо — Sun, 28 Mar 2021 11:48:46 +0000

Европскиот комесар за проширување Оливер Вархеји денеска ја поздрави испораката на вакцини против Ковид-19 во Македонија и Црна Гора преку програмата Ковакс. -ЕУ е меѓу оние кои најмногу придонесуваат за Ковакс и е солидарна со своите партнери за да се обезбеди вакцините да стигнат до сите. Ќе излеземе заедно од пандемијата, напиша Вархеји на својот профил на Твитер. Во Црна Гора и Македонија, преку програмата Ковакс, денеска пристигнаа по 24.000 дози на вакцината АстраЗенека ЕУ во својата порака на Твитер истакна дека поддршката на Унијата за програмата Ковакс помага да се осигура дека безбедните вакцини ќе стигнат до сите подеднакво.

Молдавија е првата европска земја која доби вакцини од Ковакс

Тале Кристо — Fri, 05 Mar 2021 09:03:33 +0000

Молдавија е првата европска земја што доби вакцини против коронавирус од глобалната програма Ковакс, соопшти денеска претседателката на земјата Маја Санду. Таа на Твитер напиша дека синоќа во Молдавија пристигна првата транша од 14.000 дози вакцини. Во Молдавија имунизацијата почна пред три дена со вакцините на АстраЗенека кои и ги подари Романија.