КПУ Затвор-Скопје – Kurir.mk

ДЗР: Секторот за ресоцијализација при КПУ „Затвор Скопје“ не е доволно екипиран и нема лице за проверка на квалитетот на храната

Катерина Бојаџиева — Thu, 07 Jul 2022 08:51:17 +0000

Секторот за ресоцијализација при КПУ „Затвор Скопје“ не е доволно екипиран со што се доведува во прашање процесот на успешна ресоцијализација на осудените лица, а нема ниту определено лице за проверување на квалитетот на храната пред доделување на оброците, покажува ревизорскиот извештај на Државниот завод за ревизија на КПУ „Затвор Скопје“ Скопје за 2020 година. Ревизорите, исто така, утврдиле дека не е воспоставена сметководствена евиденција за материјалните средства со кои располага установата. Клучни препораки на Државниот завод за ревизија се дека е неопходно соодветно екипирање на Секторот за ресоцијализација, како и одговорното лице да преземе мерки дека лицата кои се назначени да вршат проверка на храната да постапуваат согласно задолженијата. Државниот завод за ревизија издава неповолно мислење во однос на вистинитоста и објективноста на финансиските извештаи и мислење со резерва за усогласеноста на финансиските трансакции за сметката на основниот буџет за 2020 година на КПУ „Затвор Скопје“ Скопје. Во однос на сметката на буџетот од самофинансирачки активности за 2020 година на КПУ „Затвор Скопје“ Скопје, ДЗР изразува мислење без резерва во однос на објективноста на финансиските извештаи и за усогласеноста на финансиските трансакции со релевантната законска регулатива.

Кичеец се уште не се пријавил во затвор

Ивона Петрова — Tue, 13 Oct 2020 09:39:17 +0000

Зоран Милески – Кичеец се уште не се пријавил во КПУ Затвор „Скопје“, на издржување казна затвор од три години за случајот „Рекет“, информира за МИА директорот на затворот Есад Рахиќ. Според упатиот акт од Основниот кривичен суд во Скопје, Зоран Милески требал сам да се пријави на издржување на казната до вчера, на 12 октомври 2020 година. Милески е осуден на три години затвор, откако во декември минатата година, го призна делото за случајот „Рекет“ – примање награда за противзаконито влијание.

Боки 13 вратен во „Шутка“, Апелација решава за притворот

Ивона Петрова — Mon, 02 Dec 2019 10:29:19 +0000

Првообвинетиот во случајот „Рекет“ Бојан Јовановски е испуштен од Градската општа болница „8-ми Септември“ и вратен во КПУ Затвор-Скопје каде што издржува мерка притвор. Јовановски беше хоспитализиран минатата недела поради контролни прегледи со упат издаден од доктор во ординацијата во КПВ Шуто Оризари. Во меѓувреме, Апелацискиот суд денеска треба да одлучи дали тој и натаму ќе остане во притвор. Неговиот адвокат Сашо Дуковски бара да биде пуштен од затвор заради неговата здравствена состојба. Останатите двајца обвинети за „Рекет“, Катица Јанева и Зоран Милевски – Кичеец се во домашен притвор. Судењето за „Рекет“ треба да почне утре во Кривичниот суд во Скопје.