кралот лав – Kurir.mk

Претпродолжението на „Кралот Лав“ најавено за 2024 година

Катерина Бојаџиева — Mon, 12 Sep 2022 07:34:24 +0000

Продукциската куќа „Дизни“ објави дека новото продолжение на „Кралот Лав“ ќе се појави во кината во 2024 година. Станува збор за „Муфаса: Кралот Лав“ (Mufasa: The Lion King), всушност – претпродолжение на филмот од 1994. и на неговата преработка – играниот филм од 2019 година. Според „Реп“ (The Wrap), и режисерот-оскаровец Бери Џенкинс се спомнува како соработник, како и сценаристот Џеф Нејтансон. Во актерската екипа, засега се најавени Арон Пирс, Сет Роген, Келвин Харисон Помладиот, Били Ајшнер и Џон Кани. Приказната го следи животот на таткото на лавот Симба – главниот лик од оригиналниот цртан филм. Филмот е во претпродукција, а ќе се снима во Јужна Африка.

Одлична вест за оние кои го сакаат „Кралот Лав“

Ивана Ефремовски — Sun, 04 Oct 2020 13:38:48 +0000

Компанијата „Дизни“ соопшти дека ќе се снима продолжение на цртаниот филм „Кралот Лав“ во 3Д техника во режија на искусниот и проверен Бари Џенкинс, режисерот на хитот „Месечина“. „Кралот Лав“ кој се појави во 2019 година во кино салите заработи фантастични 1,6 милијарди долари. Во овој долгометражен цртан филм гласовите ги позајмија многу ѕвезди меѓу кои и пејачката Бијонсе. Дизни не објавува други детали за продолжението на цртаниот филм „Кралот Лав“ а режисерот Џенкинс истакнал дека негов сон е да соработува со оваа компанија.

Најавено продолжение на „Кралот лав“

Ивона Петрова — Wed, 30 Sep 2020 10:57:55 +0000

Koмпанијата „Дизни“ објави дека ќе се снима продолжение на „Кралот лав“. Филмот ќе биде во 3-Д, а режијата му е доверена на Бери Џенкинс – оскаровецот за филмот „Месечина“ (Moonlight). „Кралот лав“ (2019), и покрај „млаките“ критики, досега заработи околу 1,6 милијарди долари. Во филмот, гласовите ги позајмија многу познати ѕвезди, меѓу кои и пејачката Бијонсе. „Дизни“ не соопшти повеќе подробности за вториот дел, којшто сѐ уште е во претпродукција.

ФОТО+ВИДЕО: Запознајте ја Бахати, лавчето кое беше Симба во новиот „Кралот лав“

Ивона Петрова — Wed, 31 Jul 2019 08:39:00 +0000

Младата лавица Бахати, родена во Зоолошката градина во Далас е лавчето кое го „глумело“ легендарниот Симба во новото издание на филмот „Кралот лав“. Кога имала само еден месец, вработените во Зоолошката ја снимале како се движи и однесува и видеото го испратиле во Дизни. Голем дел од нејзините движења се искористени за да се направи моделот за ликот на Симба за новиот филм кој веќе го освојува светот. Лора Баумхарт која е специјалист за месојадци во Зоолошката градина вели дека Бахати е една од најпопуларните лавици во земјата. -Имавме можност да ја снимиме кога проодуваше, кога прв пат јадеше месо, кога почна да трча и да се качува по камењата во живеалиштето, да си игра со предмети..., истакнува Баумхарт . Интересно е тоа што Бахати на јазикот Свахили значи „Среќна“. Таа го добила ова име бидејќи сите претходни бремености на нејзината мајка завршиле со мртвородено младенче. Воедно, малата Бахати е првото лавче родено во оваа Зоолошка градина по 40 години.

„Кралот лав“ требало да има ужасен крај: За среќа, овие трауматични кадри се избришани (ВИДЕО)

Ивана Ефремовски — Sun, 28 Jul 2019 11:36:06 +0000

„Кралот лав“ на многумина им останал во сеќавање како еден од омилените, ако не и најомилениот, цртан филм од детството. Но, да завршел онака како што првично планирале продуцентите, наместо убави сеќавање, многумина од нас ќе сме имале трауматични спомени од тој долгометражен цртан филм. Како што пренесува The Mirror, анимираниот филм требало да има крај за кој од Disney, сепак, заклучиле дека е премногу брутален како за детски филм, па одлучиле да го изменат. Како што е веќе познато, во финалната борба меѓу Симба и Скар, лошиот роднина доживува пораз, а умира така што го јадат неговите поранешни сојузници – хиените. Во, според Disney, побруталната верзија, Скар го турнува Симба од карпите и мислејќи дека е мртов, ја слави победата при што паѓа во огнот кој претходно го има запалено самиот тој и изгорува до смрт. Од Disney, сепак, заклучиле дека глетката во која Скар жив гори не е баш примерна сцена за младата публика, па се одлучиле за „поблагата“ верзија во која е „само жив изеден“.

„Кралот лав“ со заработени 531 милион долари сруши многу рекорди

Предраг Кукиќ — Mon, 22 Jul 2019 11:04:37 +0000

Новиот хит на „Дизни“, „Кралот лав“, со заработката овој викенд сруши повеќе рекорди. Тој донесе приход од 185 милиони долари во Северна Америка и го надмина рекордот на „Хари Потер“ според заработката во првите три дена откако беше ставен на репертоар. Римејкот на анимираниот класик од 1994, во режија на Џон Фавро, заработи 531 милион долари на светско ниво во првите 10 дена од прикажувањето, имајќи предвид дека во киносалите во Кина дојде една недела порано. „Кралот лав“ го имаше деветтото најдобро отворање на сите времиња и најдобро во САД во јули, надминувајќи го рекордот на „Хари Потер и Реликвиите на смртта, втор дел“ од 169,1 милион долари. Исто така, „Кралот лав“ е лајв екшн филм на „Дизни“ кој најбрзо заработи пари, надминувајќи го „Убавицата и ѕверот“ со неговите 174,7 милиони долари. Новите успеси веќе го прават „Кралот лав“ седми најдобар филм за оваа година.

Го чекаат и возрасни и деца: Официјалниот трејлер за филмот „Кралот лав” (ВИДЕО)

Ивана Ефремовски — Thu, 11 Apr 2019 07:17:51 +0000

Компанијата „Дизни“ го претстави првиот официјален трејлер за новата преработка на цртаниот филм „Кралот лав”, што овојпат е во облик на игран филм. Новата реалистична верзија на хитот на „Дизни“ од 1994 година ќе ја има премиерата на 19 јули годинава, прво во САД, а потоа и во кината низ светот. Гласовите на ликовите ги позајмуваат Доналд Гловер (како Симба), Чиветел Еџиофор, Бијонсе, Сет Роген, Џејмс Ерл Џонс и други. Сценариото е на Џеф Нејтансон, а режисер и главен продуцент е Џон Фавро.

Закажана премиерата на новиот Дизниев „Кралот лав“

Катерина Бојаџиева — Mon, 26 Nov 2018 11:48:01 +0000

Компанијата Дизни сними уште една преработка на своја класика: цртаниот од 1990-те, „Кралот лав“. Новиот филм е исто така делумно анимиран, компјутерски, но сето тоа сега изгледа многу пореалистично. Гласовите овојпат ќе ги позајмат: Доналд Гловер (како главниот лик Симба), Бијонсе (мајката лавица), Били Ајхнер (мунгосот Тимон), Сет Роген (дивото прасе Пумба) и препознатливиот Џејмс Ерл Џоунс како главниот антагонист – злобниот лав Муфаса. Проектот е во постпродукција, а премиерата е закажана за 19 јули 2019 година.

ВО ВИСТИНСКИ МОМЕНТ: Мајмун го држи своето младенче како во сцена од анимираниот филм Кралот Лав (ФОТО)

Ивана Ефремовски — Sun, 28 Oct 2018 20:32:37 +0000

Фотографот Дафна Бен Нун, го фотографирала моментот кога мајмунот го држи своето младенче свртено кон сонцето. Фотографијата е направена во Зимбабве. Сцената од култниот анимиран филм Кралот Лав од 1994 година е доловена и во Зимбабве. Тоа траеше само неколку секунди, но беше фасцинирачки да се набљудува моментот, изјави Дафна.