Кристијан Линднер – Kurir.mk

Линднер: Ние сме во енергетска војна

Тале Кристо — Thu, 29 Sep 2022 13:03:34 +0000

Германскиот министер за финансии денеска предупреди дека Берлин е заглавен во „енергетска војна“ против Русија на Владимир Путин, во момент кога неговата влада најави нов голем фонд за ограничување на зголемените цени на енергијата. „Се наоѓаме во енергетска војна за просперитет и слобода“, рече министерот за финансии Кристијан Линднер. Тој нагласи дека огромниот штит против трошоците за енергија е „кристално јасен одговор на Путин дека… ние сме економски силни“.

Линднер: Нема резерви во германскиот буџет за 2022 година

Ивона Петрова — Sat, 11 Jun 2022 08:30:03 +0000

Германската сојузна влада ја достигна границата на својот фискален капацитет, соопшти денеска министерот за финансии Кристијан Линднер. Касата на владата ја исцрпеа дополнителните средства за справување со пандемијата на коронавирусот, последиците од војната во Украина и фондот за климатски промени. – Нема резерви во федералниот буџет за 2022 година, рече Линднер, пренесува германскиот портал t-online. Тој изјави дека на граѓаните пред есен не треба да им се дава дополнителна финансиска помош за да се ублажат последиците од зголемената инфлација. – Советувам да се ослободат мерките што се преземени за да можат да функционираат, рече тој. Германската Влада во март најави пакет помош од 16 милијарди евра за да им помогне на потрошувачите да се справат со зголемените цени на енергијата и да ја намалат зависноста од рускиот гас.

Линдлер: Г7 и глобалните институции одвојуваат 19,8 милијарди долари за Украина

Тале Кристо — Fri, 20 May 2022 13:57:34 +0000

Групата седум најразвиени земји во светот – Г7 и глобалните финансиски институции ќе одвојат 19,8 милијарди долари за зајакнување на јавните финансии на Украина, изјави денеска германскиот министер за финансии Кристијан Линднер. Министерот на новинарите им соопшти дека распределбата на 9,5 милијарди долари била договорена на состанокот на министрите за финансии на Г-7 од оваа недела во германското место Кенигсвинтер, блиску до Бон, во Германија. Тој додаде дека целта е да се осигура дека финансиската состојба на Украина нема да влијае на нејзината способност да се брани од руската инвазија. Во соопштението на Г7 се наведува дека членките „се договориле за конкретни акции за продлабочување на мултилатералната економска соработка и ја истакнале својата посветеност на обединет одговор на руската агресивна војна против Украина и непоколебливата поддршка за Украина“.

Германскиот министер за финансии позитивен на коронавирус

Ивона Петрова — Thu, 21 Apr 2022 07:01:19 +0000

Германскиот министер за финансии, Кристијан Линднер излезе позитивен на коронавирус за време на пролетната конференција на Меѓународниот монетарен фонд (ММФ) во Вашингтон, јави ДПА. Линднер (43) ја потврди веста на Твитер. Тој е позитивен на вирусот „по две години без Ковид-19 инфекција“. Министерот додаде дека „благодарение на трите вакцини“, сега се соочувал „само со благи и бледи симптоми на настинка“. Тој беше во Вашингтон за состанокот на министрите за финансии на земјите од Г20.

Кристијан Линднер: Русија е виновна за глобалните економски проблеми

Ивана Ефремовски — Wed, 20 Apr 2022 15:51:54 +0000

Германскиот министер за финансии, Кристијан Линднер денеска оцени дека Русија е виновна за глобалните економски проблеми. Линднер на маргините на есенското заседание на ММФ во Вашингтон, според германските медиуми нагласи дека кризата не е предизвикана од санкциите на Западот, туку од руската агресија врз Украина. „Само Русија е одговорна за сегашните макроекономски ризици“, нагласи Линднер. Тој предупреди на опасноста од должничка криза во земјите во развој, како и на проблемите во снабдувањето со храна и економската стабилност. „Русија е причината за сето ова“, нагласи Линднер. Тој додаде дека не може да има враќање на вообичаената форма на соработка со рускиот претседател Владимир Путин додека тој не ја повлече војската од Украина. (МИА)