Кристијан Николов – Kurir.mk

Кристијан Николов потпиша за Работнички

Бошко Тасиќ — Wed, 27 Sep 2023 04:11:48 +0000

Македонскиот кошаркарски репрезентативец, Кристијан Николов кој беше без клуб откако ја заврши соработката со Коњаспор од Турција ќе биде нов член на скопски Работнички. Плејмејкерот во минатото го носеше дресот на МЗТ Скопје што значи ќе стане уште еден играч кој во историјата има настапувано за два најдобри, најтрофејни македонски клубови. Работнички склопо интересен состав во кој од македонските кошаркари тука се Бобан Стајиќ, Стојан Ѓуроски, Виктор Ефремовски, Филип Бакоч и Андреј Шошкиќ, а кога се во прашање странците тренерот Мираковски ќе може да смета на Квентон Декоси, Димитрик Трис, Роберт Рикиќ и Ѓорѓе Џелетовиќ.

Николов ќе го пропушти ноемврискиот ФИБА „прозорец“

Ивона Петрова — Mon, 07 Nov 2022 12:15:19 +0000

Кристијан Николов нема да биде дел од македонската кошаркарска репрезентација претстојните два натпревари од претквалификациите за Евробаскетот 2025. Репрезентативниот бек заработи скршеница на палецот на десната рака по што следува едномесечна рехабилитација. Членот на турскиот прволигаш Коњаспор се повреди на еден од последните тренинзи со клубот. – За жал нема да бидам во можност да им помогнам на своите репрезентативни соиграчи на овие два натпревари. Имам повреда, односно скршеница на палецот на десната рака, тоа го потврдија и првите снимки. Во петок имам уште една лекарска контрола со која докторите треба да ја одредат дефинитивната слика и да почна со рехабилитацијата. Извесно е дека ќе бидам надвор од теренот во наредните четири недели. Ќе видиме понатаму, се надевам дека се ќе биде во најдобар ред. Ќе бидам најголем навивач на нашата репрезентација на средбите со Норвешка и со Данска. И се надевам дека ќе ја продолжиме успешната серија и во овој прозорец на патот кон евро-квалификациите, порачува Николов од Турција. „Црвено-жолтите“ на 10 ноември ќе играат со Норвешка, три дена подоцна (13 ноември) ќе се соочат со Данска.

Николов: Посакуваме победа на двата меча

Бошко Тасиќ — Sat, 20 Aug 2022 04:16:04 +0000

Кристијан Николов е во Скопје, по доаѓањето од Турција веднаш му се стави на располагање на стручниот штаб на „црвено-жолтите“ предводен од Александар Јончeвски. „Имаме нов селектор и ова е нов предизвик за сите нас. Секако е дека ќе дадеме се од себе, тука сме секогаш за националниот дрес. Можам да кажам дека ќе се бориме до крај и дека ќе одиме на што е можно подобри резултати. Ние посакуваме победи на двата меча. Оваа Македонија која ја имаме сега можеби е најкомплетната во изминатиот период.Ни фалат неколку играчи, тоа е точно, но досега сме можеби најкомплетната репрезентација која сме ја имале, барем од таков поглед. Нашите мисли се насочени кон Данска, сега сите играат кошарка, сите напредуваат и сакаат да победат. Нема да ни биде воопшто лесно, но ние тука сме да одиграме максимално и да изгинеме за секоја топка затоа што играме за Македонија“, изјави Николов. Македонија и гостува на Данска на 25. август во Нествед, на 28. август игра против Словачка во Скопје.

Кристијан Николов повторно ќе игра во Турција

Бошко Тасиќ — Tue, 12 Jul 2022 20:34:32 +0000

Македонскиот репрезентативец, Кристијан Николов по пауза од неколку години одново ќе игра во Турција и тоа во новиот прволигаш Коњаспор. Плејмејкерот си замина од редовите на МЗТ Скопје, тим чиј дрес го носеше во изминативе три сезони. Сега Николов ќе ја организира играта на Коњаспор кој преку плејофот избори пласман во најсилната турска конкуренција. Ова за Николов е враќање во земјата во која играше за неколку клубови од кои најпознат е Галатасарај.

Николов си замина од МЗТ, Кафи негова замена

Бошко Тасиќ — Sun, 10 Jul 2022 10:47:36 +0000

Само неколку часа откако беше најавено дека македонскиот репрезентативец Кристијан Николов си заминува од МЗТ Скопје, шампионот објави дека Американецот, Мајк Кафи ќе го носи дресот на составот од Аеродром. Николов кариерата реши да ја продолжи во новиот турски прволигаш Коња, а новиот плејмејкер на МЗТ Скопје, Кафи кој доаѓа од германскиот прволигаш Крејлсхем. Дваесет и девет годишниот Американец претходно го носел средот на Запорожје, Трикала, Хелсинки, Киев Баскет, Лученец и Јашаберени.

Николов: Ќе се бориме за секоја топка

Бошко Тасиќ — Mon, 27 Jun 2022 21:22:49 +0000

Македонскиот кошаркарски репрезентативец Кристијан Николов кој вети пожртвувана игра, борба за секоја топка и голема желба за триумф над Украина. -Очекувам да дадеме се од себе, да се бориме за секоја топка. Подмладени сме, меѓутоа тоа не значи дека ќе се предадеме. Секој од нас знае што значи да се игра за Македонија и ветуваме дека ќе го дадеме максимумот, Првo играме со Шпанија, потоа Украина на домашен терен. Сакаме победа, затоа што мотивот не е загубен и покрај тоа што сме некомплетни. Кога играме за репрезентацијата мораме да бидеме чисти пред себе и да го дадеме најдоброто. Знам дека младите ќе дадат се од себе. Ние еден на друг не гледаме како млад и стар, не се делиме, туку се гледаме како играчи кои можат да играат за репрезентацијата и затоа се овде, -порача членот на МЗТ СКопје.

Николов: Ќе се обидеме да им вратиме на Шпанците за поразот на Евробаскетот 2011

Ивона Петрова — Thu, 25 Nov 2021 12:36:33 +0000

Шпанската репрезентација ќе биде првиот сериозен тест за Драган Бајиќ и Македонија во квалификациите за Светскиот Куп 2023. Плејмејкерот на нашиот национален тим, Кристијан Николов во најавата за утрешниот натпревар бара поддршка од публиката за позитивен резултат. -Не чувствуваме никаков притисок, тоа е најважно за нас. Играме против Шпанија. Ќе дадеме сè од себе да дојдеме до позитивен резултат за нас. Следниот меч ни е со Украина, потоа и Грузија. Таму ги гледаме шансите и се надевам дека ќе бележиме позитивни резултати. Репрезентацијата е предизвик за секој од нас, а враќањето на Дамјан Стојановски е голем плус. Ние сите што сме овде ќе се бориме да имаме добри резултати и да носиме успеси. Се надевам дека ќе дојде и публиката да ни даде поддршка. А ние, ако ни се укаже било каква шанса, ќе се обидеме да им вратиме за оној пораз во полуфиналето од Европското првенство од пред десет години, вели Николов. Во петок навечер од 19.30 часот, Шпанија ќе гостува во Скопје, доволно за уште еден повик до публиката за Спортскиот центар „Јане Сандански“ да биде пополнет со максимално дозволениот капацитет.

Николов: Тежок меч, Русија имаше повеќе скокови од нас

Бошко Тасиќ — Fri, 19 Feb 2021 17:26:18 +0000

Македонија во квалификациите за пласман на Европското првенство наредата година во вториот меч загуби од Русија со 77-94, а во име на тимот на прес-конференцијата говореше Кристијан Николов. „Одигравме еден доста тежок натпревар. Бевме малку уморни, а Русија имаше повеќе скокови од нас. Тоа беше најголем проблем за нас. Сега имаме еден ден одмор, па ќе се подготвуваме за следниот меч со Италија. Ќе го дадеме максимумот, овој тим од 15 кошаркари верува во себе. Играме за националниот тим и ќе направиме се да одиме на ЕП“, изјави Николов. На Македонија за пласман на ЕП и се потребни две победи, но Естонија мора да загуби на мечот со Русија.

Николов уште една сезона во МЗТ Скопје

Магдалена Андонова — Thu, 13 Aug 2020 11:41:50 +0000

Македонскиот кошаркарски репрезентативец, Кристијан Николов и следната сезона ќе го носи дресот на МЗТ Скопје Аеродром, откако денеска потпиша нов едногодишен договор со „сино-белите“. Николов мината сезона која беше прекината поради пандемијата, ги одигра сите 17 средби во Првата лига и оствари просек од 7,2 поени, 2,3 скока и 2,9 асистенции, додека настапи и на 21 средба во АБА2-лигата со просечна минутажа од околу десет минути. Дваесет и тригодишниот Николов е седмиот македонски репрезентативец кој ќе му биде на располагање на тренерот Ѓорѓи Кочов претстојната сезона. Претходно договорт со клубот од Аеродром потпишаа Дамјан Стојановски, Бојан Крстевски, Андреј Магдевски, Андреј Маслинко, Адем Мекиќ и Филип Бакоч. На списокот играчи се и тројца странци и тоа Американците Феми Олуџоби и Хасани Гравет, како и српскиот интернационалец Андрија Бојиќ. (MИА)