Кристофер Нкунку – Kurir.mk

Нкунку официјално е првото засилување на Челзи за наредната сезона

Бошко Тасиќ — Wed, 21 Jun 2023 04:15:50 +0000

Челзи објави дека потпишл договор со францускиот репрезентативец Кристофер Нкунку до 30 јуни 2029 година. Нкунку (25) досега беше член на Лајпциг, а неговиот договор со Челзи ќе важи од први јули. Лондонскиот клуб не ја откри висината на трансферот, но британските медиуми тврдат дека Челзи на Лајпциг му платил отштета од 62 милиони евра. „Неверојатно сум среќен. Со нетрпение очекувам да се сретнам со новите играчи и тренерот, се надевам дека ќе им покажам на навивачите на Челзи што можам да направам на теренот“, изјави Нкунку за официјалниот сајт на клубот. Нкунку пристигна во Лајпциг во 2019 година од Пари Сен Жермен.

Нкунку се договори со Челзи

Ивона Петрова — Sun, 18 Dec 2022 14:53:49 +0000

Досегашниот фудбалер на Лајпциг и француски репрезентативец Кристофер Нкунку ќе ја продолжи кариерата во Челзи, откако постигна договор со лондонскиот клуб, тврди добро информираниот италијански новинар Фабрицио Романо. Според истиот извор, двата клуба постигнале договор, а Нкунку ќе му се приклучи на Челзи по завршување на сезоната. Францускиот фудбалер има договор со Лајпциг до јуни 2026 година и според информациите Челзи за предвремен раскин на договорот на бундеслигашот ќе му плати обештетување во износ од 70 милиони евра. Нкунку (25) е член на Лајпциг од 2019 година кога дојде од ПСЖ. За француската репрезентација досега има осум настапи, а Мундијалот во Катар го пропушти поради повреда.

Челзи во тајност договорил трансфер на Нкунку

Ивана Ефремовски — Fri, 30 Sep 2022 15:53:47 +0000

Фудбалерот на Лајпциг и француски репрезентативец Кристофер Нкунку ќе ја продолжи кариерата во Челзи, откако договорил трансфер во лондонскиот клуб, објави денеска „Билд“. Според германскиот весник, францускиот напаѓач далеку од очите на јавноста во присуство на медицински тим на Челзи успешно ги минал медицинските прегледи во Франкфурт. Трансферот ќе биде реализиран во јули идната година, а Челзи, најверојатно, ќе ја активира откупната клаузула во договорот меѓу Нкунку и Лајпциг, која изнесува 60 милиони евра. „Билд“ наведува дека постои можност Нкунку веќе во јануари да се пресели во Челзи, а раководството на премиерлигашот во преговори со челните луѓе на Лајпциг ќе се обиде да го намали обесштетувањето за францускиот фудбалер. Нкунку (24) дојде во Лајпциг во 2019 година од ПСЖ, за француската репрезентација досега има одиграно осум натпревари. (МИА)

Нкунку играч на сезоната во Бундеслигата во избор на новинарите

Тале Кристо — Sun, 31 Jul 2022 15:50:56 +0000

Напаѓачот на Лајпциг, Кристофер Нкунку, е избран за најдобар играч во Бундеслигата во избор на новинарите за изминатата сезона. Нкунку во изборот на кој учествуваа 700 спортски новинари освои 134 бодови, шест повеќе од второпласираниот Полјак Роберт Левандовски, кој настапуваше за Баерн Минхен, додека третото место му припадна на голманот на освојувачот на Лига Европа, Кевин Трап, од Ајнтрахт Франкфурт. – Почестен сум од освојувањето на оваа награда бидејќи е показател за квалитет. Им се заблагодарувам на соиграчите и тренерот, без чија помош немаше да имам толку добра сезона, изјави Нкунку, кој во мај беше избран за најдобар фудбалер во Бундеслигата и во изборот на фудбалерите. Нкунку изминатата сезона постигна 20 голови, додавајќи и 13 асистенции, и беше меѓу најзаслужните во редовите на Лајпциг за освоеното трето место во Бундеслигата и германскиот Куп.

Играчот на Лајпциг е најдобар во Бундеслигата

Бошко Тасиќ — Tue, 17 May 2022 17:09:02 +0000

Офанзивниот играч на РБ Лајпциг, Кристофер Нкунку е прогласен за најдобар играч на сезоната во Бундеслигата, објавено е на официјалната веб-страница на лигата. Французинот зад себе ги остави Роберт Левандовски, Ерлинг Халанд и Патрик Шик. „Нкунку е еден од шесте различни играчи кои ги освоија наградите за играч на месецот. Но, разликата е во тоа што тој ја доби наградата четири пати: во октомври, февруари, март и април“, објавија од раководството на Бундеслигата, објаснувајќи дека наградата се доделува од сезоната 2018/19 во соработка на лигата и ЕА Спортс. Во одлуката учествуваат гласовите на навивачите со 40 отсто, со 30 клубовите и 30 експертите. Францускиот фудбалер постигна 20 гола на 34 натпревари во Бундеслигата, а додаде и 13 асистенции.