криумчарење мигранти – Kurir.mk

Сузбиена меѓународна мрежа за криумчарење мигранти

Катерина Бојаџиева — Tue, 25 Jul 2023 12:59:37 +0000

Во текот на месец јуни 2023 година, со координација и поддршка од ИНТЕРПОЛ и Европол, а со активно учество на Министерството за внатрешни работи, беше реализирана меѓународна оперативна акција во пет земји, во која беа лишени од слобода 62 лица, од кои 25 кубански државјани, а беа запленети и фалсификувани документи и пари. Членовите на криминалните групи за да ги „промовираат“ своите услуги на ранливите граѓани (во случајов, кубански државјани) користеле апликации на социјалните мрежи, при што за сума од околу 9.000 евра криминалците го организирале патувањето, трансферите и обезбедувале фалсификувана документација, потребна за влез во Европската Унија. Мигрантите користеле авионски превоз од Куба до Србија, па преку Северна Македонија се обидувале да остварат нелегален влез во Грција, од каде што, пак, го продолжувале патот кон Шпанија. Се проценува дека околу 5.000 кубански државјани биле прокриумчарени во ЕУ, генерирајќи им профит на криминалните групи од околу 45 милиони евра. Спроведената истрага откри комплексна криминална мрежа поставена низ Грција, Србија и Шпанија, чии членови се адаптирале на сите околности, со цел да го продолжат криминалниот бизнис. Криумчарите и нивните соработници кои го олеснуваа движењето на лицата мигранти од Куба низ Северна Македонија биле во најголем број српски државјани, а имале свои помагачи низ нашата земја. Притоа, при откриените случаи на кривично дело „криумчарење мигранти“ на лица од Куба во Северна Македонија, сторителите беа процесуирани пред надлежните органи со соодветни поднесоци. Имено, Србија и Северна Македонија имаа безвизен режим со Куба и истиот беше искористен за остварување на легален влез, сѐ до 01.01.2023 година кога Северна Македонија донесе одлука за воведување виза за Куба, односно до април 2023 кога истото го стори и Србија. Истрагата, координирана од ИНТЕРПОЛ и Европол, беше покрената во октомври 2021 година, откако Финска, Грција, Северна Македонија и Србија пријавија зголемен број кубански граѓани кои се обиделе да влезат во Европа со лажни документи. Најпрво, кубанските државјани користеа комерцијални летови за Русија, каде што криминалците им нуделе опција илегално да ја преминат руско-финската граница и така да влезат во ЕУ, а како друга опција им нудеа летови за Србија, па од таму да го продолжат своето патување во Централна или Јужна Европа. Меѓутоа, по почетокот на конфликтот во Украина, рутата се промени, па кубанските државјани летаа од Германија за Србија. Криминалните мрежи потоа им го олеснувале илегалниот влез во Северна Македонија и Грција, често принудувајќи групи на мигранти да се движат ноќе со часови, без залихи на храна и вода. Некои од најранливите мигранти, меѓу кои и малолетници, биле изложени на измами, грабежи и изнуда, а некои жени биле префрлени во други криминални групи заради сексуална експлоатација. Министерството за внатрешни работи на Република Северна Македонија преку соодветните единици имаше активна улога од почетокот на оваа истрага. Беа одржани оперативни состаноци со сите засегнати држави во седиштата на ИНТЕРПОЛ во Лион, Франција и на Европол во Хаг, Холандија. Исто така, беа одржувани и состаноци на билатерално ниво помеѓу Северна Македонија и Србија и Грција, за споделување на информации кои би можеле да бидат од корист за истрагата во земјите.

Приведен кондуктер во Железници поради криумчарење мигранти

Ивана Ефремовски — Tue, 02 May 2023 11:32:45 +0000

На 01.05.2023 во 19.20 часот на Железничка станица Велес, полициски службеници од СВР Велес го лишиле од слобода А.А.(28) од Скопје, кондуктер во Железници на Република Македонија. Кај него биле пронајдени вкупно 1.000 евра за кои постои сомнение дека потекнуваат од кривично дело по член 418 – б од Кривичниот законик. Претходно, околу 18:30 часот на Железничка станица Кукуричани, неготинско, во патнички воз, кој сообраќал на релација Гевгелија-Скопје, полициски службеници од Регионалниот центар за гранични работи Југ откриле две лица мигранти од Сирија. Во службен разговор во полициска станица тие изјавиле дека на кондуктерот му дале пари за да влезат во возот. А.А. бил задржан во полициска станица и по целосно документирање на случајот, во координација со јавен обвинител, ќе биде поднесена соодветна пријава.

Приведен криумчар на мигранти: Не застанал на знак СТОП и се обидел да избега

Магдалена Андонова — Mon, 21 Nov 2022 09:05:10 +0000

На 20.11.2022 во 21.30 часот на автопатот Гевгелија-Демир Капија, после тунел „Јаворица“, полициски службеници од Полициската станица за граничен надзор и граничен премин Богородица го лишиле од слобода А.А.(42) од Скопје, затоа што со возило „фолксваген пасат“, со скопски регистарски ознаки, превезувал двајца мигранти од Сирија. Претходно, во 20.15 часот на наплатната рампа Смоквица, тој со возилото не застанал на знак за запирање даден од полициски службеници, по што со возилото продолжил кон клучка Миравци, се исклучил, па веднаш се вратил на автопатот. По преземени мерки, во 21.30 часот тој бил запрен и лишен од слобода, а набргу кај клучка Миравци биле пронајдени и мигрантите. Лицето било приведено во полициска станица, додека мигрантите биле спроведени во Прифатно-транзитниот центар „Винојуг“ во Гевгелија. По целосно документирање на случајот, во координација со Јавен обвинител, против него ќе биде поднесена соодветна пријава.

Приведени две лица од Скопје и Србија, криумчареле мигранти од Сирија

Магдалена Андонова — Thu, 13 Oct 2022 09:45:02 +0000

Министерството за внатрешни работи информира дека на 12.10.2022 во 20.30 часот кај место викано „Чештево“ во Валандово, полициски службеници од Полициската станица за гранични проверки и граничен надзор „Стар Дојран“ ги лишиле од слобода С.С.(45) од Скопје и П.К.(20) од Република Србија, затоа што со патнички возила превезувале лица мигранти од Сирија. Околу 14.40 часот на локалниот пат за с.Казандол, валандовско, полициски службеници забележале две патнички возила „шкода“, едното со скопски регистарски, а другото со српски национални ознаки, натоварени со мигранти. Кога ја забележале полициската патрола, возилата застанале, по што возачите и лицата мигранти се дале во бегство. Набргу, по преземени мерки, во близина на возилата биле пронајдени 26 лица мигранти од Србија, кои биле спроведени во прифатно-транзитен центар за понатамошна постапка, а по пребарување на теренот, во 20.30 часот, биле пронајдени и лишени од слобода С.С. и П.К.. Тие биле задржани во полициска станица и по целосно документирање на случајот, во консултација со Јавен обвинител, против нив ќе биде поднесена соодветна пријава по член 418 од Кривичниот законик.

Приведен криумчар од Демир Хисар, во неговото возило пронајдени мигранти од Сирија

Магдалена Андонова — Tue, 11 Oct 2022 10:11:11 +0000

Полициски службеници лишиле од слобода 23-годишник од демирхисарското село Сопотница, откако кај неговото возило биле пронајдени 44 лица мигранти од Сирија, од кои 14 малолетници. – Синоќа околу 19:40 чaсот на место викано „Страиште“, во близина на Валандово, полициски службеници од Полициската станица за гранични проверки и граничен надзор „Стар Дојран“ го лишиле од слобода С.Л.(23) од с.Сопотница, демирхисарско. При преглед во товарно возило „мерцедес“, со скопски регистарски ознаки, кое го управувал, во специјално направен бункер во возилото, биле пронајдени 44 лица мигранти од Сирија, од кои 14 малолетници, соопштија од Министерството за внатрешни работи. Како што посочуваат од МВР, мигрантите биле спроведени во прифатно-транзитен центар, а лицето било приведено и задржано во Полициската станица Гевгелија. Во координација со јавен обвинител, по целосно документирање на случајот против него ќе биде поднесена соодветна пријава.

Приведен криумчар, превезувал 11 мигранти од Сирија

Магдалена Андонова — Mon, 12 Sep 2022 12:02:16 +0000

На 12.09.2022 во 10.15 часот пред тунел Јаворица, на автопатот А1 во правец Гевгелија-Демир Капија, полициски службеници од Регионален центар за гранични работи Југ, Полициска станица Богородица, го лишиле од слобода П.Ч.(22) од Скопје. При контрола на патничко возило „БМВ“, со скопски регистарски ознаки, кое тој го управувал, биле пронајдени 11 лица мигранти од Сирија. Увид на местото извршила екипа од Полициската станица Валандово. Лицата мигранти се предадени на полициски службеници од Одделението за прекуграничен криминал при Регионален центар за гранични работи Југ за понатамошна постапка. За случајот е известен Јавен обвинител, а по негово целосно документирање против П.Ч. ќе биде поднесен соодветен поднесок.

Карамбол на патот кон Демир Капија: Не застанал на полициски знак, па од кога бил запрен заедно со сувозачот и мигрантите почнале да бегаат

Магдалена Андонова — Sun, 03 Jul 2022 07:32:49 +0000

На 02.07.2022 во 19.00 часот на место викано „Клисура“ на автопатот А1, во близина на Демир Капија, полициски службеници од Полициската станица за граничен премин Богородица ги лишиле од слобода од С.Р.(22) од с.Брест, општина Чучер Сандево и Е.Ј.(25) од с.Арачиново. При преглед во возило „ауди“ со скопски регистарски ознаки, кое го управувал С.Р., а сопатник бил Е.Ј., биле пронајдени 14 лица-мигранти (по 6 лица од Сирија и Пакистан и 2 лица од Авганистан). Претходно, во 18.30 часот, на автопатот А1 во правец од Прдејци кон Демир Капија, возилото не застанало на знак за запирање од полициски службеници, а кога било запрено возачот, совозачот и мигрантите се обиделе да избегаат, но биле спречени и лишени од слобода. С.Р. и Е.Ј. биле приведени во Полициската станица Неготино за понатамошна постапка, а мигрантите биле спроведени во Транзитен центар „Винојуг“ во Гевгелија. По целосно документирање на случајот ќе биде поднесена соодветна кривична пријава.

Приведени две лица од тетовско, во нивното возило пронајдени мигранти

Магдалена Андонова — Wed, 08 Jun 2022 08:41:19 +0000

Денеска (08.06.2022) во 04.30 часот полициски службеници од Полициска станица за граничен премин и граничен надзор Богородица, кај место викано„Табла“ кај с.Богородица ги лишиле од слобода А.З.(24) и Ј.С. двајцата од с.Копачин Дол, тетовско. Имено, при извршена контрола на товарно возило„форд транзит“, со скопски регистарски ознаки, управувано од А.З., во кое совозач бил С.Ј. биле пронајдени 40 лица мигранти (30 од Пакистан, 6 од Авганистан и 4 од Индија). Поради основано сомнение за извршено кривично дело „криумчарење на мигранти“, возачот и совозачот се приведени во полициска станица и по документирање на случајот против нив ќе биде поднесен соодветен поднесок. Лицата мигранти се пренесени во Прифатно-транзитен центар „Винојуг“ Гевгелија.

Приведени двајца криумчари на мигранти на излезот од Гевгелија

Магдалена Андонова — Sat, 30 Apr 2022 09:42:46 +0000

На 29.04.2022 во 20.30 часот на излез од Гевгелија, полициски службеници од Полициската станица за граничен премин и граничен надзор „Богородица“ дале знак за запирање на патничко возило „сеат толедо“, со скопски регистарски ознаки, но тоа не застанало. Набрзо возилото било пронајдено во близина на наплатна рампа Смоквица и во него биле откриени 7 лица мигранти од Сирија. Истовремено, на излезот од Гевгелија било сопрено и патничко возило „бмв“, со скопски регистарски ознаки, во кое биле пронајдени 6 лица мигранти од Сирија. Возачот А.Н.(27) од с.Горно Количани, скопско, се обидел да избега, но бил фатен, лишен од слобода и приведен во полициска станица. На 30.04.2022 околу 02.00 часот бил фатен и лишен од слобода и возачот од „сеат толедо“ - О.И.(21) од с.Црвена Вода, општина Студеничани. За случајот бил известен Јавен обвинител и по негово целосно документирање ќе следи соодветен поднесок. Лицата мигранти биле предадени во Транзитниот центaр „Виноjуг“ Гевгелија.

Приведен скопјанец на автопатот Гевгелија – Неготино: Кај него полицијата пронашла мигранти од Сирија

Магдалена Андонова — Wed, 16 Mar 2022 10:17:14 +0000

На 15.03.2022 околу 19.30 часот на автопатот А1 Гевгелија-Неготино, кај наплатна станица Демир Капија, полициски службеници од Полициска станица за граничен надзор Михајлово го лишиле од слобода Љ.Ѓ.(53) од Скопје. При контрола во патничко моторно возило „фолксваген пасат“ со скопски регистарски ознаки, управувано од Љ.Ѓ., биле пронајдени четири лица илегални мигранти од Сирија. Љ.Ѓ. бил предаден во Полициска станица Неготино за понатамошна постапка. За настанот е запознаен Јавен обвинител, а увид на местото на настанот извршиле екипи од Регионален центар за гранични работи Југ и Полициска станица Неготино. По целосно документирање на случајот против лицето ќе биде поднесена соодветна пријава.