крводарителска акција – Kurir.mk

Крводарителска акција по повод празникот Успение на Пресвета Богородица

Тале Кристо — Mon, 28 Aug 2023 08:28:02 +0000

Во Домот на АРМ денеска од 9 до 17 часот ќе се одржи традиционалната 21. крводарителска акција по повод празникот Успение на Пресветан Богородица. Целта на акцијата е да се обезбедат поголеми количини на крв во летниот период, заради можноста од недостаток на крв и крвни деривати. Организатори се Црвениот крст на Република Северна Македонија, Општинска организација Центар и Институтот за трансфузиска медицина. Акцијата започна во 2003 година со 146 дарувања, а денеска се зборува за бројка од 4391 единици крв, или во просек 220 крводарители по акција.

Традиционална крводарителска акција во чест на Тоше Проески

Катерина Бојаџиева — Wed, 25 Jan 2023 06:48:01 +0000

Под мотото „За Тоше со Љубов“ денеска, по деветнаесетти пат, Црвен крст на град Скопје и Црвен крст на Република Северна Македонија – Општинска организација Центар во соработка со ИТМ ќе ја организираат традиционалната крводарителската акција во спомен на роденденот на големиот хуманист и крводарител, Тоше Проески. Крводарителската акција ќе се реализира во холот на Дом на АРМ од 09:00 до 17:00 часот. -Оваа крводарителска акција стана веќе препознатлива во нашиот град и е посетена од голем број граѓани, а пред сѐ помладата популација која во ликот на Тоше Проески препознава пример на хуманост, наведуваат од Црвен крст. До сега, на овие акции се реализирани повеќе од 5 300 единици крв.

Крводарителска акција за роденденот на Тоше утре во Дом на АРМ

Катерина Бојаџиева — Tue, 24 Jan 2023 12:20:53 +0000

Во холот на Дом на АРМ утре од 9 до 17 часот по 19-ти пат ќе се реализира крводарителска акција на денот на раѓањето на Тоше Проески (1981-2007). – Црвен крст на град Скопје и Црвен крст на Република Северна Македонија – Општинска организација Центар во соработка со Институтот за трансфузиона медицина ќе ја организираат традиционалната крводарителска акција во спомен на роденденот на големиот хуманист и крводарител Тоше Проески кој, за жал, прерано го загубивме, соопшти Црвен крст на град Скопје. Организаторот додава дека оваа крводарителска акција стана веќе препознатлива во Скопје и е посетена од голем број граѓани. На овие акции реализирани во чест на Тоше досега се собрани повеќе од 5300 единици крв.

Крводарителска акција во среда во чест на Тоше Проески

Катерина Бојаџиева — Mon, 23 Jan 2023 09:51:32 +0000

По деветнаесетти пат Црвен крст на град Скопје и Црвен крст на Република Македонија - Општинска организација Центар во соработка со ИТМ ќе ја организираат традиционалната крводарителската акција во спомен на роденденот на големиот хуманист и крводарител, Тоше Проески. Крводарителската акција ќе се реализира на 25.01.2023 година (среда) во холот на Дом на АРМ во периодот од 09:00-17:00 часот. Оваа крводарителска акција стана веќе препознатлива во нашиот град и е посетена од голем број граѓани, а пред сѐ помладата популација која во ликот на Тоше Проески препознава пример на хуманост. До сега, на овие акции реализирани се повеќе од 5.300 единици крв.

СВР Тетово спроведе уште една крводарителска акција

Ивона Петрова — Fri, 09 Dec 2022 13:14:40 +0000

Во Секторот за внатрешни работи Тетово денеска се спроведе втората крводарителска акција оваа година, во која вкупно беа собрани 15 единици крв. -Заедно со претходната акција вкупната бројка на собрани единици сега изнесува 43, додека во периодот за кој станува збор вкупната бројка на собрани единици во двете досега реализирани акции во Одделението за внатрешни работи Гостивар изнесува 53. Со овие акции, вработените во СВР Тетово уште еднаш на дело ја искажаа нивната несебичност, хуманост и солидарност и на најконкретен начин партиципираа во континуираните напори и активности за афирмација и унапредување на крводарителството на пошироките полошки простори. Она што посебно охрабрува е дека меѓу крводарителите значителен е бројот на нови, млади полициски службеници кои даруваат дел од себе за да спасат други животи, велат од СВР Тетово.

Крводарителска акција во Амбасадата на САД во сеќавање на жртвите од 11 септември

Катерина Бојаџиева — Tue, 13 Sep 2022 10:55:27 +0000

По повод Националниот ден за служба и сеќавање на близу 3000 жртви од терористичките напади во Њујорк на 11 септември 2001 година, денеска во Амбасадата на САД во Скопје се одржа крводарителска акција во соработка со Црвениот крст на Република Северна Македонија и Институтот за трансфузиона медицина. Во присуство на министерот за внатрешни работи Оливер Спасовски, пратеници, претставници на верските заедници и на дипломатскиот кор, американската амбасадорка Кејт Мари Брнз истакна дека оваа акција е одличен симбол нa партнерство помеѓу САД и Северна Македонија и на заедничките активности за обезбедување подобра и побезбедна иднина за граѓаните на двете земји. Посветена е, нагласи таа, на крводарителите овде во Северна Македонија, во САД и низ светот бидејќи токму волонтерите беа тие кои први излегоа во пресрет да помогнат на спасувачите ризикувајќи ги своите животи во потрага по преживеаните и да им помогнат на повредените вклучувајќи и со донирање на крв. – Пред 11 септември 2001 година беше незамисливо дека е можно да сме подготвени за трагедија од такви размери. Од тогаш научивме многу за заканите со кои се соочуваме во светот и за тоа како да бидеме поподготвени да се соочиме со какви било катастрофи предизвикани било од човекот или природата. Донирањето крв е само еден пример како можеме да придонесеме за подготвеност во случаи на кризи обезбедувајќи потребни количини од животоспасувачката течност за оние на кои им е најпотребна, рече Брнз. Таа потсети дека оваа година Амбасадата на САД во Скопје работеше со своите партнери во Армијата и полицијата во Северна Македонија, на вежбата за кризен менаџмент од големи размери со вклучување и на персоналот на Амбасадата со што се овозможи и обука за прва помош. Вежбите како оваа, според неа, претставуваат средство кое овозможува брза и ефикасна реакција во услови на криза за спасување животи и превенција од натамошни штети. – Работејќи со нашите партнери во Армијата и полицијата во Северна Македонија ние исто така сме подготвени за комуникација, координација и заедничко ефикасно делување. Всушност ова е тоа што го работи Армијата на Северна Македонија заедно со партнерите од САД и ЕУ и НАТО сојузниците на регуларна основа. Ваквите вежбовни активности како што беше годинашната вежба „Брз одговор “ најголема од овој вид во историјата на Северна Македонија е со цел да ја подобри интероперабилноста меѓу НАТО силите за успешен одговор за каква било закана и криза која може да се појави. Ова никогаш не било покритично и понеопходно од денес по неиспровоцираната инвазија на Русија врз Украина. Со волонтирање заедничка работа и грижа на оние на кои им е потребна сите ние можеме да го дадеме нашиот дел за да им помогнеме на нашите земји, на нашите заедници да станат отпорни во случај на непријателства или трагедии, а тоа е и суштината на Денот за служба и сеќавање и на организациите како Црвен крст која со своите над 300 волонтери во Северна Македонија ни помагаат да го постигнеме тоа, порача Брнз. Генералниот секретар на Црвениот крст на Република Северна Македонија Саит Саити истакна дека трагичниот настан кој се случи пред 21 година е болно сеќавање не само за американскиот народ туку и за целиот напреден свет, но и потсетник колку е важно во услови на трагедии да си помагаме, да ги мобилизираме сите ресурси во служба на помош за повредените и настраданите. -Денешниот настан и крводарителската акција организирана со ваша несебична поддршка се уште еден дел од низата општествено одговорни активности кои се исклучително важни за градење на позитивен однос кон крводарувањето. Придонесот на кровдарителите е позитивен пример во пошироката заедница кој поттикнува и инспирира личности со високо развиено чувство на алтруизам и солидарност кои придонесуваат за подигање на нивото на здравстевната култура и јавната свест, рече Саити заблагодарувајќи се за личниот ангажман на амбасадорката Брнз и на Амбасадата со надеж дека оваа акција ќе опстои уште многу години. На оваа акција која е 12-та по ред, крв даруваа амбасадорката, персоналот од Амбасадата, како и дел од присутните гости. Акцијата ќе продолжи и во наредните три дена во „Даре Џамбаз“ каде крв ќе даруваат припадниците на Армијата, на полицијата, но и секој заинтересиран граѓанин.

Кровдарителска акција во општина Гази Баба

Магдалена Андонова — Tue, 19 Jul 2022 12:28:02 +0000

Денес 19.07.2022 година во просториите на општина Гази Баба се оддржа крводарителска акција во организација на општинската организација на Црвениот крст на Гази Баба. На крводарителската акција крв даруваа вработените во општинската администрација и градоначалникот Бобан Стефковски. За акцијата градоначалникот Стефковски информираше на својата официјална страна на Фејсбук на која напиша: Денес 19.07.2022 година во просториите на општина Гази Баба се оддржа крводарителска акција во соработка со општинската организација на Црвениот крст Гази Баба. Имав можност лично да учествувам и да дарувам крв во рамки на акцијата. Во акцијата учествуваа и вработените во општинската администрација со кои заедно уште еднаш ја докажавме хуманата страна на општина Гази Баба. Преку дарување на крв секој од нас има можност да помогне за спасување на живот, напиша Стефковски.

Масовна крводарителска акција во „Алкалоид“ по повод Светскиот ден на крводарителството

Ивона Петрова — Tue, 14 Jun 2022 11:50:44 +0000

Со масовен настан за крводарување по повод 14 јуни – Светскиот ден на крводарителството – „Алкалоид“ ја продолжува петдецениската традиција на организирање крводарителски акции со вработените во компанијата. Под мотото „Дарувај крв, спаси живот“, 130 алкалоидовци изразија волја за крводарување во рамките на колективната акција, која се одржа во Центарот за едукација и за обуки на „Алкалоид“, во соработка со „Црвен крст“ и со Институтот за трансфузиона медицина. Компанијата е особено горда на своите традиционални крводарители, кои во својот животен и работен век реализирале повеќекратни крводарувања. „Крводарителството е исклучиво доброволна акција, која некому значи живот. Со само една дарувана ќеса крв од 450 мл, постапка која трае десетина минути, може да се спасат 3 до 4 човечки животи. Јас сум крводарител од свои 18 години и имам дарувано над 50-пати“, истакна Роберт Новески, вработен во „Алкалоид“ со реализирани 53 крводарувања. Генералниот директор и Претседател на УО на „Алкалоид“, Живко Мукаетов, за време на крводарителската акција упати благодарност до сите генерации алкалоидовци, кои преку овој голем чин на хуманоста оставиле траен придонес во развојот на македонското крводарителство. На настанот имаше и првократните крводарители од помладата генерација вработени, кои допрва ќе го промовираат ваквиот чин на солидарност во компаниските редови. „За време на ова мое прво крводарување се чувствувам навистина исполнето. Се одлучив на овој хуман чекор водена од чувството дека ќе помогнам некому“, истакна Елена Казанџиевска, вработена во „Алкалоид“. Крводарителството е доброволен чин и индивидуален одраз на хуманост и на солидарност. Крводарител може да биде секое лице на возраст од 18 до 65 години со добра општа здравствена состојба. Според критериумите за крводарување, мажите може да даруваат крв на секои 3, а жените на секои 4 месеци. Едно крводарување може да спаси 3 до 4 човечки животи. Во насока на уште поголема афирмација на доброволното крводарителство и во знак на изразување почит и благодарност спрема големиот број крводарители од своите редови, компанијата креираше посебен визуелен идентитет – лого на Друштвото на крводарители. Со негување на традицијата на компаниски крводарителски акции, „Алкалоид“ ги потврдува својата заложба и посветеноста за унапредување на корпоративната општествена одговорност.

Голема крводарителска акција во просториите на Град Скопје

Тале Кристо — Sat, 28 May 2022 12:04:07 +0000

Голем број граѓани, меѓу кои и вработени во градската администрација, вчера ја покажаа својата хуманост и солидарност, и даруваа крв во крводарителската акција што се одржа во просториите на Град Скопје. Крвта е секојдневно потребна за да се спасат и да се продолжат многу животи, а во тоа помагаат хуманите граѓани – крводарители кои се вклучуваат во овие акции и несебично даруваат крв. Оваа акција се реализираше во соработка со Црвениот крст.

Крводарителска акција во Ѓорче Петров на 14 мај: Градоначалникот Стојкоски со повик до граѓаните

Катерина Бојаџиева — Wed, 11 May 2022 07:41:20 +0000

На 14 мај во Домот на културата во Ѓорче Петров од 10 до 16 часот сите заинтересирани ќе имаат можност да даруваат крв. -Успешна крводарителската акција во сабота нека биде уште една потврда за хумано Ѓорче. Ги повикувам сите доброволци и солидарни луѓе со дарување крв да придонесат за потребите на заедницата. Капка крв значи живот. Придружете се!, пишува градоначалникот на општина Ѓорче Петров, Александар Стојкоски, на Фејсбук.